SHAKAWN KUNGDAWN 98 - Jinghpaw Common Language Bible 2009

Mungkan Ga Hpe Up Hkang Ai Karai Kasang

¹ Dai Madu hpe mahkawn ga nnan hte mahkawn mu; shi gaw mauhpa magam amu ni hpe galaw da nu ai! Shi a daru magam n-gun hte chyoi pra ai n-gun a jaw e, shi gaw awng padang hpe hkam la nu ai.

² Dai Madu gaw shi a awng padang hpe ndau shabra nna; shi a hkye hkrang la ai daru magam n-gun hpe amyu baw ni hpe, chye shangun nu ai.

³ Shi gaw Israela amyu masha ni hpe shanhte a matu, sadi dung ai hte dinggrin tsaw ra myit hte shi a ga sadi hpe shagrin da nu ai; shing rai, shara shagu hkan na amyu masha ni yawng hte gaw anhte a Karai Kasang a awng padang hpe mu lu nga masai.

⁴ Mungkan ga ting, dai Madu hpe kabu gara mahkawn nga mu; shi hpe mahkawn mangoi let kabu gara jahtau nga mu!

⁵ Dai Madu hpe mahkawn shakawn mu! Tingse ni hpe dum let, shi hpe mahkawn shakawn mu!

⁶ Pahke hte pahtau ni hpe gawut dum let, anhte a Hkawhkam rai nga ai dai Madu hpe kabu gara ai hte jahtau garu nga mu.

⁷ Panglai hte dai hta rawng ai hkrung mahkrung yawng hte e, marawn kashaw nga mu; mungkan ga hte dai hta shanu nga ai ni yawng hte e, shi hpe mahkawn mangoi nga mu!

⁸ Madu gaw ginding aga hpe up hkang na matu, du sa ra ai majaw, hka nu ni e, shi a man hta lahpawk dum nga mu;

⁹ kawng ni e shi a man hta, kabu gara ai hte mahkawn jawm mahkawn shakawn nga mu. Shi gaw mungkan ga na amyu masha ni hpe teng man rap ra ai tara hte up hkang na ra ai.