SHAKAWN KUNGDAWN 6 - Jinghpaw Common Language Bible 2009

Ru Tsang Hkrum Ai Aten, Karum La Na Matu Akyu Hpyi Ai Ga

¹ Madu e, masin pawt ai hte ngai hpe hkum daru et! Na masin kahtet ai hte ngai hpe ari hkum jaw et!

² O Madu e, ngai hki ba la nga nngai, ngai hpe matsan dum la e law! Ngai tsep kawp kya gumba mat nga nngai majaw ngai hpe n-gun jaw ya e.

³ Nye a hkum ting mung htum hkra ru tsang hkrum sha nga li ai. Madu e ngai hpe karum la na matu galoi du hkra ala na ngu nga n ta?

⁴ Madu e, ngai hpe sa hkye hkrang la e law; na a matsan dum ai hta, ngai hpe si ai kaw nna mawai la e law.

⁵ Katsan ga e, nang hpe dum nga ma ai n rai; kadai mung, dai shara hta nang hpe shakawn lu ma ai n rai.

⁶ Ngai yawn hkyen ai hte hki ba la nga nngai, nye a hkrap agru ai kaw na pru ai myi prwi gaw nye a yupra hpe madi ya nga ai rai nna, nye a baw hkum mung myi prwi ni hte madi nyap nga li ai.

⁷ Nye a gumlau hpyen ni a majaw myi bum mat hkra hkrap nna, ngai gaw adan aleng n mu lu nga nngai.

⁸ N hkru ai masha nanhte e, ngai kaw nna pru mat wa mu! Dai Madu gaw nye a hkrap ngu hkrap ngoi ai nsen hpe na ya nga ai;

⁹ shi gaw karum la na matu nye a hpyi jahtau ai nsen hpe madat ya ai hte nye a akyu hpyi ai ga hpe shi htan ya na ra ai.

¹⁰ Nye a gumlau hpyen ni gaw nhtum nni sum kaya ai lam hpe chye wa na mara ai; shanhte akajawng sha kaming kamawng shaden kau ai hkrum na mara ai.