SHAKAWN KUNGDAWN 59 - Jinghpaw Common Language Bible 2009

Shim Nga Na Matu Akyu Hpyi Ai Ga

¹ Nye a Karai Kasang e, nye a gumlau hpyen ni kaw na, ngai hpe hkye hkrang la e; ngai hpe gasat ai ni a lata kaw nna mung, ngai hpe makawp maga la e!

² N hkru n shawp ai masha ni a lata kaw nna ngai hpe hkye hkrang la e; masha sat amu galaw ai ni a lata kaw nna mung, ngai hpe mawai la e!

^3-4 Yu u! Shanhte gaw ngai hpe sat na matu ala nga ma ai; mazut ai masha ni ngai hpe hkap daw na matu zup hpawng nga ma ai. O Madu e, shanhte gaw shanhte a shara ni hta gasat na matu jin jin rai nga ai lam gaw, ngai galaw shut kau sai shut hpyit lam, shing n rai, yubak a majaw mung n rai, dai sha n ga, nye a mara langai ngai a majaw mung n rai nga ai.

⁵ Chyahtum Chyalai n-gun rawng ai Madu Karai Kasang e, rawt u, ngai hpe karum la na sa rit; Israela a Karai Kasang e, nang hkum nan yu yu u! Rawt nna maigan masha ni hpe ari jaw u: gumle gumlau sadi n dung ai masha ni hpe matsan dum ai myit hkum madun nga et!

⁶ Shanhte gaw shana de nhtang wa nna, gwi ni zawn nying let, mare kata hkan, ningwan hkawm nga ma ai.

⁷ Shanhte a n kaw n law re ai hte jahkrit shama ai ga ni hpe madat ya u; shanhte a n-gup kata na shinglet ni gaw nhtu zawn dai nga ma ai; shanhte tsun shaga ai ga hpe kadai mung n na ma ai nga nna shanhte myit nawn da ma ai.

⁸ Rai ti mung, Madu e, nang gaw shanhte hpe mani kau nga ndai; tara maigan ni yawng hpe mung, nang ashu kau nga ndai.

⁹ Ngai gaw na a n-gun atsam hpe kam hpa nga nngai, O Karai Kasang e, nang gaw nye a shingbyi shara rai nga ndai.

¹⁰ Nye a Karai Kasang gaw ngai hpe tsaw ra nga ai rai nna, ngai kaw sa wa na ra ai, nye a gumlau hpyen ni sum mat ai lam shi ngai hpe madun dan shangun na ra ai.

¹¹ O Karai Kasang e, shanhte hpe hkum sat kau et, shing n rai, nye a amyu masha ni malap kau na mara ai. Anhte hpe makawp maga ai Madu e, na a n-gun atsam hte shanhte hpe shabra kau nna, shanhte hpe dang kau u.

¹² Yubak gaw shanhte a nten ni hta rawng nga ai, shanhte tsun shaga ai ga ni yawng mung yubak hkrai rai nga ai. shanhte gaw dagam dala ga hte masu magaw ga ni hpe tsun nga ma ai majaw; shanhte a gumrawng gumtawng ai mahkam hta ahkang nga mu ga!

¹³ Na a masin kahtet ai hte shanhte hpe shamyit kau u, shanhte hpe atsai awai shamyit kau u. Shaloi, Karai Kasang gaw Israela hpe up hkang nga ai lam hpe masha shagu chye wa nna, shi a up hkang ai gaw mungkan ga ting a ntsa e, maden jat wa na ra ai.

¹⁴ Nye a gumlau hpyen ni gaw shana e nhtang wa nna, gwi ni zawn nying let, mare kata hkan, ningwan hkawn nga ma ai;

¹⁵ gwi ni zawn lusha a matu brak hkawm nga ma ai hte lusha shahpa law law shanhte n mu tam ai shaloi, ngoi garu nga ma ai.

¹⁶ Rai ti mung, na a n-gun atsam a lam hpe ngai mahkawn mangoi nga na nngai; na a dinggrin tsaw ra myit a lam hpe jahpawt manap shagu ngai ja ja mahkawn shakawn na nngai. Nang gaw nye a langchyi rai nga nna, ngai ru tsang hkrum ai aten hta na shingbyi shara rai nga nit dai.

¹⁷ Ngai hpe makawp maga ai wa e, ngai nang hpe shakawn nga na nngai; Karai Kasang gaw nye a shingbyi shara rai nga ai, ngai hpe tsaw ra ai Karai Kasang mung rai nga ai.