SHAKAWN KUNGDAWN 43 - Jinghpaw Common Language Bible 2009

Bawng Dung Hkrum Ai Masha Langai Mi A Akyu Hpyi Ga

¹ O Karai Kasang e, ngai hpe mara n kap ai wa ngu nna tsun shana ya e; n kam n sham ai masha ni kaw na nye a maw mawn ai lam hpe makawp maga ya e. Masu magaw ai ni hte n hkru n shawp ai masha ni a lata kaw nna ngai hpe hkrang shaw la e!

² Nang gaw ngai hpe makawp maga ai wa rai nga ndai; ngai hpe hpa majaw nang kau da nga n ta? Nye a gumlau hpyen ni a gumshem ai hta ngai hpa majaw nni nkri hpe matut hkam sha ra nga a ta?

³ Na a nhtoi hte na a teng man ai lam hpe jaw dat rit, dai gaw ngai hpe woi lakawn mat wa nna; na a chyoi pra ai Ziun Bum hte nang shanu nga ai Nawku Htingnu de woi wa u ga.

⁴ Shaloi, Karai Kasang e, na a tawn hkungri de ngai sa wa lu na ring ngai; nang gaw nye a kabu gara ai chyeju hka hpawk rai nga ndai. O Karai Kasang e, nye a Karai Kasang e, nye a tingse hpe dum ai hte nang hpe ngai mahkawn shakawn nga na nngai.

⁵ Ngai hpa majaw nde wa myit n pyaw nga nngai kun? Ngai hpa majaw nde wa ru tsang hkrum nga nngai kun? Ngai gaw Karai Kasang hta myit mada nga let, nye a hkye la Madu hte nye a Karai Kasang hpe kalang mi bai ngai shakawn na ring ngai.