SHAKAWN KUNGDAWN 39 - Jinghpaw Common Language Bible 2009

Nni Nkri Hkrum Sha Nga Ai Masha Wa A Hpyi Nem Ai Ga

¹ “Ngai galaw ai amu hta sadi sahka hte nga na ring ngai; nye a shinglet hte ngai yubak n galaw shangun na nngai. N hkru ai masha ni, ni nga yang, ngai hpa mung tsun dan na nngai n rai,” nga nna ngai tsun ni ai.

² Mai kaja ai lam hpe pyi, ga hkum mi n tsun ai sha, ngai zim rai nga nga nngai! Rai ti mung, nye a nni nkri chyu sha grau rawt sawng wa nga li ai,

³ myit ru myit tsang ai gaw, ngai hpe ka-up kau nga li ai. Ngai grau myit ru magang, ru tsang ai gaw ngai hta grau law wa magang rai nga ai; Ngai n san ai sha n nga lu nga nngai.

⁴ “Madu e, ngai gaw galoi du hkra hkrung nga lu na rai nga a ta? Ngai galoi si na rai nga a ta? Nye a asak galoi wa mi she htum mat na, ngai hpe tsun dan e law.”

⁵ Nang jaw ya ai nye a asak gaw kade wa kadun nga a hka! Na a man e, nye a asak prat gaw hpa n rai nga ai zawn rai nga ai. Kaja wa ahkrung nga ai masha hkum shagu gaw nsa sa lai nbung hte,

⁶ shingnip langai mi hta pyi grau nga ai n rai. Shi galaw ai lam yawng mayawng mung kaman a matu rai nga ai; shi gaw sut gan hpe mahkawng da ti mung dai hpe kadai lu la na ra ai gaw, n chye nga ai.

⁷ Madu e, ngai gaw kaning re ai hpe myit mada lu na rai nga a ta? Ngai nang hpe myit mada nga nngai.

⁸ Nye a yubak yawng mayawng kaw nna ngai hpe hkye hkrang la e, shing rai, angawk ai ni ngai hpe hkum mani asawng shangun nga et.

⁹ Nang ngai hpe ndai zawn re ai nni nkri hpe jahkrum ai wa rai nga ndai majaw, ngai ga hkaw mi mung n tsun ai sha, zim rai nga na nngai.

¹⁰ Ngai hpe ari hkum jaw sa! Nang adup ai a jaw e, ngai si wa magang nga nngai.

¹¹ Na a daru sharin ai lam ni hte, masha a yubak hpe nang ari jaw nga ndai; dai wa tsaw ra ai arai hpe manut e, jahten kau ai zawn nang jahten kau nga ndai. Kaja wa, masha langai mi gaw nsa sa lai nbung langai mi hta grau nga ai n rai!

¹² Madu e, nye a akyu hpyi ai ga hpe na ya e, ngai hpyi jahtau ai nsen hpe madat ya e; ngai hkrap ngu hkrap ngoi nga yang, ngai hpe sa karum la e. Nye a kaji kawa ni yawng zawn, ngai gaw na a manam sha, jahkring mi tai nga nngai.

¹³ Ngai garai n si mat wa yang, kabu gara let nga lu na matu ngai hpe masin hkum pawt nga e law.