SHAKAWN KUNGDAWN 32 - Jinghpaw Common Language Bible 2009

Mara Yin La Ai Hte Mara Dat Ya Ai Lam

¹ Yubak dat kau hkrum ai hte, shut hpyit ai ni a mara hta na raw dat kau hkrum nga ai ni gaw a lu ma ai.

² Shut hpyit ai amu hta na dai Madu e mara shagun n hkrum ai hte, masu magaw lam yawng hta na lawt lu ai wa gaw a nga ai.

³ Nye a yubak ni hpe ngai garai n yin la yang, shani tup hkrap nga ai majaw, ngai hki ba nga ni ai.

⁴ Madu e, nang ngai hpe shani shana ari jaw nit dai; ginhtawng ta na kang kahtet ai a majaw, madi manyap shara ni hkun hkraw mat wa ai zawn, nye a n-gun atsam mung tsep kawp htum mat nga sali ai.

⁵ Shing rai, ngai gaw nye a yubak ni hpe nang kaw yin la ni ai; nye a shut hpyit ai mara ni hpe mung ngai makoi magap da nngai n rai. Dai lam ni hpe nang kaw mara yin la na ngai daw dan ni ai; nye a yubak yawng hte hpe nang dat kau ya nit dai.

⁶ Dai rai nna, na a sadi dung ai amyu masha ni yawng hte gaw ra kadawn ai aten ni hta nang kaw akyu hpyi na mai nga ai; ru tsang mawru kaba adawt shang wa ai shaloi dai gaw shanhte kaw du dep wa na n rai.

⁷ Nang gaw nye a gawp makoi shara rai nga ndai; nang gaw ngai hpe ru yak tsin-yam kata kaw nna hkye hkrang la na rin dai. Nang ngai hpe makawp maga ndai majaw na a hkye hkrang la ai lam hpe ja ja mahkawn na nngai.

⁸ Dai Madu gaw, “Nang hkawm sa ang ai lam ngai nang hpe sharin ya na nngai, ngai nang hpe hpaji jaw nna sharin matsun na nngai.

⁹ Ga madat na matu hpri makrang hte gumhtung sumri ni hte hkang ra ai gumra hte lawze ni zawn machye machyang n rawng hkum rai myit,” nga nna tsun ai.

¹⁰ Tara n lang ai ni gaw nni nkri hkam sha ra na ma ai, rai ti mung, Madu hpe kam hpa nga ai ni gaw shi a dinggrin tsaw ra myit hte makawp maga la ai hkrum nga ma ai.

¹¹ Ding hpring ai ni e, Madu galaw dan sai amu a majaw, kabu gara ai hte pyaw pyaw rai nga mu. Shi a ga madat mara ai ni e, kabu gara marawn jahtau nga mu law!