SHAKAWN KUNGDAWN 24 - Jinghpaw Common Language Bible 2009

Hkik Hkam Ai Hkawhkam

¹ Ndai mungkan hte dai hta nga ai arai yawng mayawng hte gaw Madu a rai nga ai; Aga hte de a ntsa e nga ai arai yawng mayawng mung shi a rai nga ai.

² Ginding aga a kata, sung ai hka ni a ntsa e, dai hpe shi gaw da nna de a npawt nhpang ni hpe nammukdara kata sung ai shara ni hta jahkrat tawn da nga sai.

³ Madu a bum de lung lu na ahkang kadai wa lu nga a ta? Shi a chyoi pra ai Nawku Htingnu de kadai wa shang lu nga a ta?

⁴ Sat lawat hte myit sawn ai lam hta san seng ai ni, hpara sumla ni hpe n nawku ai ni n teng n man ai ga sadi ni hpe n jaw ai ni rai ma ai.

⁵ Dai Madu shanhte hpe shaman ya nna, shanhte hpe hkye hkrang la na ra ai; Karai Kasang gaw shanhte hpe mara n kap ai ni ngu nna tsun na ra ai.

⁶ Dai zawn re ai masha ni gaw Karai Kasang hpang de sa ai ni rai nna, Yaku a Karai Kasang man e, du ai ni rai nga ma ai.

⁷ Mare chyinghka ni hpe hpaw malang da mu, prat dingsa na chyinghka ni hpe hpaw mu; magrau grang ai hkawhkam wa shang wa na ra ai.

⁸ Dai magrau grang ai hkaw hkam wa gaw kadai rai nga a ta? Shi gaw n-gun atsam hte n-gun chyalai rawng ai wa hte majan hta awng padang ninglaw lu ai Madu rai nga ai.

⁹ Mare chyinghka ni hpe hpaw malang da mu; Prat dingsa na chyinghka ni hpe hpaw mu; magrau grang ai hkawhkam wa shang wa na ra ai.

¹⁰ Dai magrau grang ai hkawhkam wa gaw kadai rai nga a ta? Awng padang lu ai Madu -Shi gaw galu kaba ai hkawhkam wa rai nga a hka!