SHAKAWN KUNGDAWN 21 - Jinghpaw Common Language Bible 2009

Awng Padang Ninglaw A Matu Shakawn Ai Ga

¹ Madu e, nang gaw hkawhkam wa hpe n-gun atsam jaw ya nit dai majaw, shi kabu gara nga ai; nang gaw shi hpe padang ninglaw lu shangun ndai majaw shi kabu gara nga ai.

² Shi a myit ra sharawng ai hku, nang lajang ya nit dai; shi a hpyi lajin ai lam ni hpe mung nang htan ya nit dai.

³ Nang gaw galu kaba ai chyeju ni hpe gun nna shi kaw sa ndai; shi a baw hta ja janmau nang gup ya nit dai.

⁴ Shi gaw asak hpyi nu ai hte dai hpe nang jaw ya nit dai; dai gaw prat galu ai hte htani htana asak rai nga ai.

⁵ Nang karum la ai a majaw, shi a hpung shingkang galu kaba nga ai; nang shi hpe gumhkawng ai hte arawng sadang jaw ya nit dai.

⁶ Na a chyeju ni gaw shi hte rau htani htana a nga nga ai; na a hpung shingkang mung shi hpe kabu gara ai hte jahpring ya nga ai.

⁷ Dai hkawhkam wa gaw Chyahtum Chyalai n-gun rawng ai Madu hpe kam hpa nga ai; Madu a dinggrin tsaw ra myit a majaw shi tut nawng e shim lum nga na ra ai.

⁸ Dai hkawhkam wa gaw shi a gumlau hpyen yawng mayawng hte hpe rim la na ra ai; shi hpe n dawng ai masha shagu hte hpe mung shi rim kau na ra ai.

⁹ Shi dan pru wa ai shaloi, kang kahtet ai wan gaw arai ni hpe hkru kau ai zawn, shi gaw shanhte hpe shamyit kau na ra ai. Madu gaw shi a masin kahtet ai hte shanhte hpe mayu kau nna; wan mung shanhte hpe hkru kau na ra ai.

¹⁰ Shanhte a matu mara ni langai mi mung hkrung nga lu na mara ai n rai; hkawhkam wa mung shanhte yawng hte hpe sat kau na ra ai.

¹¹ Shanhte gaw shanhte a yaw shada ai lam ni hpe galaw nhtawm; n hkru ai hku shi hpe maw mawn ma ti mung, shanhte awng dang wa na mara ai n rai.

¹² Shi gaw shi a ndan pala ni hte shanhte hpe gap dat na ra ai; shanhte hpe kayin hprawng mat wa shangun na mara ai.

¹³ Madu e, na a galu kaba ai n-gun atsam a majaw, anhte nang hpe shakawn ga ai! Anhte gaw na a daru magam n-gun atsam hpe mahkawn shakawn nga na ga ai law.