SHAKAWN KUNGDAWN 15 - Jinghpaw Common Language Bible 2009

Karai Kasang Hpyi Ai Hpa Rai Ta? Lam

¹ Madu e, na a Nawku Htingnu de kadai wa shang mai nga a ta? Na a chyoi pra ai Ziun bum ntsa hta kadai wa nawku daw jau mai nga a ta?

² Lam shagu hta Karai Kasang a ga hpe madat mara ai wa gaw teng man ai amu hpe tut nawng e galaw nga nna; shi tsun ai ga mung teng man ai hte myit malang nga ai majaw,

³ kaga masha ni hpe shatan nhkan ga n tsun nga ai. Shi gaw shi a manang ni hpe shut hpyit ai amu hpa mung n galaw ai hte, shi a htingbu ni a lam shiga n shapoi ya nga ai.

⁴ Shi gaw Karai Kasang hpe nyet kau ai ni hpe matsat nga ai; Madu a ga madat mara ai ni hpe shagrau sha-a nga ai. Ga sadi shatup na matu kade wa yak hkra rai ti mung, shi jaw da ai ga sadi ni hpe tut nawng e galaw shatup nga ai.

⁵ Shi gaw amyat n la ai sha, hkoi ya ai hte mara n kap ai wa hpe masu ai sakse tai ya na matu mayun kumhpa hpe jaw tim hkap la na wa n rai. Ndai lam ni hpe galaw shadik ai ni kadai mung tut nawng e shim nga na mara ai.