SHAKAWN KUNGDAWN 144 - Jinghpaw Common Language Bible 2009

Awng Padang A Matu Karai Kasang A Chyeju Hpe Hkawhkam Wa Shakawn Ai Ga

¹ Ngai hpe makawp maga nga ai Madu hpe shakawn kungdawn mu! Shi gaw ngai hpe majan a matu zai ladat hpaji sharin ya ai hte ngai hpe lajang shachyip ya nga ai.

² Shi gaw ngai hpe makawp maga ya ai wa, nye a shamyet shanat shara wahpang; ngai hpe hkye hkrang la ai nye a dahpran shara, hte shim lum na matu, ngai kam hpa nga ai wa rai nga ai. Amyu baw ni hpe shi nye a npu e tawn da nu ai.

³ Madu e, shinggyim masha gaw hpa wa mi rai nna, nang shi hpe mada yu nga n ni? Shinggyim masha sha hpe nang hpa majaw ahkyak wa zawn nawn nga n ni?

⁴ Shinggyim masha gaw nsa sa lai nbung hte bung nga ai, shi a nhtoi ni lai mat wa ai shingna zawn rai nga ai.

⁵ Madu e, lamu hpe gang je hpaw nna yu hkrat wa rit; bum ni hpe ahtawk hkra ai hte dai ni wan hkut shapraw ya na ra ai.

⁶ Myihprap galam dat nna, na a gumlau hpyen ni hpe shabra kau u; na a pala ni hpe gap dat nna shanhte hpe jahprawng kau u.

⁷ Tsaw htum ai shara kaw nna, na a lata hpe ladawn ai hte sung ai hka kata kaw nna, ngai hpe gang shaw la ai hte mawai la e; tsasam masha ni a n-gun kata kaw nna ngai hpe hkye hkrang la e.

⁸ Shanhte gaw teng man ai ga hpe, galoi mung n tsun nga ma ai; teng man ai ga tsun na matu, dagam ga hte ga shaka tawn sai rai ti mung, shanhte naw masu nga ma ai.

⁹ Karai Kasang e, mahkawn ga nnan hte nang hpe ngai mahkawn mangoi na nngai; tingse dum let nang hpe ngai mahkawn mangoi na nngai.

¹⁰ Nang gaw hkawhkam ni hpe awng padang jaw ya nga ndai hte; na a shangun ma wa Dawi hpe mawai la nit dai.

¹¹ Gumshem ai nye a gumlau hpyen ni a lata kaw nna ngai hpe hkye hkrang la e; tsasam masha ni a n-gun atsam kata kaw nna mung ngai hpe hkye hkrang la e; shanhte gaw teng man ai ga hpe galoi mung n tsun nga ma ai hte dagam ga hte ga shaka la tim pyi shanhte masu ai ga ni hpe naw tsun nga ma ai.

¹² Anhte a shadang sha ni gaw shanhte a brang ram prat hta, hpun lawn kasha ni tu kaba wa ai zawn; anhte a shayi sha ni mung, Nawku Htingnu jut ni hpe mawn sumli da ai nlung shadaw ni zawn, rai nga mu ga.

¹³ Anhte a mam dum ni hta nsi naisi hkum dingnum hte hpring nga u ga; udat pa layang hkan e nga ai sagu ni hta mung, kasha hkying hkying mun mun law htam wa mu ga.

¹⁴ Anhte a dumsu yam nga ni hta nbya n nga, daw hten mat ai mung n hkran ai sha, law htam mayat maya wa mu ga. Anhte a mare ni hta myit ru myit htum ai a majaw jahtau marawn ai nsen ni mung n nga u ga.

¹⁵ Ndai zawn teng man ai hte nga lu ai amyu gaw a nga ai; Madu hpe Karai Kasang hku nna hkap la kam sham ai amyu gaw a nga ai law!