SHAKAWN KUNGDAWN 138 - Jinghpaw Common Language Bible 2009

Chyeju Dum Shakawn Ai Akyu Hpyi Ga

¹ Madu e, nye a myit masin mahkra hte nang hpe ngai chyeju shakawn nga nngai. hpara ni a man e, nang hpe ngai mahkawn shakawn nga nngai.

² Na a dinggrin tsaw ra myit hte sadi sahka gaw, na a mying nsang hte na a hkang da ai mungga ni hpe lam madun dan nga nit dai majaw, na a chyoi pra ai Nawku Htingnu de, ngai myi man yawng nna, dingnyawm ai hte na a mying nsang hpe shakawn na nngai.

³ Nang hpe ngai shaga yang, nang ngai hpe htan ya nit dai; na a n-gun hte ngai hpe n-gun shaja ya nit dai.

⁴ Madu e, mungkan ga na hkawhkam nlang hte gaw na a ga sadi ni hpe na yu manu ai majaw, shanhte nang hpe shakawn kungdawn na mara ai.

⁵ Nang galaw dan sai amu ni hte, na a galu kaba ai hpung shingkang a lam hpe shanhte mahkawn mangoi wa na mara ai.

⁶ Nang gaw tsaw htum ai shara hta nga nga ai rai tim, grit nem nga ai ni hpe nang lanu lahku nga ndai; gumrawng gumtawng ai ni mung nang kaw nna, makoi yen lu ma ai n rai.

⁷ Ru tsang ai hte gawan da ai ngai hkrum nga ai shaloi, ngai hpe nang makawp maga da nga ndai. Nye a gumlau hpyen ni a sindawng kahtet ai hpe nang hkap shingdang ya nna, na a daru magam n-gun hte ngai hpe hkye hkrang la nga ndai.

⁸ Nang ga sadi tawn da nit dai hte maren, lam shagu hpe jahpring shatsup ya na rin dai; Madu e, na a tsaw ra myit htani htana agrin nga ai. Nang hpang da sai amu ni hpe shangut u law.