SHAKAWN KUNGDAWN 122 - Jinghpaw Common Language Bible 2009

Yerusalem Mare Hpe Mahkawn Shakawn Ai Ga

¹ Shanhte gaw, “Dai Madu a nta de anhte lung wa saga,” nga nna ngai hpe tsun ma ai shaloi, ngai kabu gara nga nngai.

² Ya aten hta anhte ndai, Yerusalem mare chyinghka lam kata e, tsap nga ga ai!

³ Yerusalem mare gaw shi shara hte shara htuk manu, tsawm htap ai hku, bai gaw gap da ai mare rai nga ai.

⁴ Ndai mare gaw shi a hkang da ai mungga nga ai hte maren, dai Madu hpe chyeju shakawn kungdawn na matu, amyu baw ni, Israela amyu bawsang ni sa zup ai shara rai nga ai.

⁵ Ndai mare gaw Israela Hkawhkam ni hkaw dung nna, shanhte a amyu masha ni hpe tara jeyang na shara rai nga ai.

⁶ “Nang hpe tsaw ra ai ni ngamu ngamai nga mu ga, na a mare bunghku kata ni hta ngwi pyaw sim sa nga u ga,

⁷ na a hkawhkam htingnu ni hta shim nga u ga,” nga nna Yerusalem mare a ngwi pyaw sim sa lam a matu akyu hpyi nga mu, nga ai.

⁸ Nye a jinghku ni hte manang ni a matu mara, “Nang hta ngwi pyaw sim sa ai lam nga nga u ga law,” nga nna Yerusalem mare hpe ngai tsun nga nngai.

⁹ Anhte a Madu Karai Kasang a nta a jaw e, na a ngamu ngamai lam a matu, ngai akyu hpyi nga nngai.