SHAKAWN KUNGDAWN 110 - Jinghpaw Common Language Bible 2009

Madu Hte Shi A Lata La Hkrum Ai Hkawhkam

¹ Dai Madu gaw, “Na a gumlau hpyen ni hpe na a lagaw kabye lahkum ngai shatai kau ai aten du hkra, ndai nye a hkra maga de, dung nga u,” nga nna nye a Madu hkawhkam wa hpe tsun nga ai.

² Madu gaw na a hkawhkam daru magam arawng sadang hpe Ziun kaw nna shara shagu de, maden dat na ra ai. Shi gaw nang hpe, “Na a gumlau hpyen ni a ntsa e, up hkang nga u,” nga nna tsun nga ai.

³ Na gumlau hpyen ni hpe nang htim gasat ai shani e, na a amyu masha ni gaw madu myit hte shang karum wa na mara ai. Jahpawt manap jau jau e, hkrat ai mari zawn, na a brang ram ni nang shanu nga ai chyoi pra ai bum ni de du sa wa na mara ai.

⁴ “Nang gaw Melhkizedek a hkringhtawng lam hta na htani htana hte seng ai hkinjawng tai na rin dai,” nga nna Madu dagam da ai ga sadi rai nhtawm, dai ga sadi hpe bai nhtang dawm la kau na n rai.

⁵ Dai Madu gaw na a hkra maga hta nga nga ai. Shi pawt sindawng ai aten hta e; hkawhkam ni hpe anyawp kau na ra ai.

⁶ Shi gaw masha ni hpe tara dara na ra ai hte, majan pa ni hta masha mang ni hte jahpring da na ra ai; mungkan ting na hkawhkam ni hpe shi agrawp kau na ra ai.

⁷ Dai hkawhkam wa gaw lam makau e lwi ai hka shi hka hpe lu na ra ai; shing rai, shi gaw n-gun rawng wa nna, awng padang hta rawt tsap wa lu na ra ai.