PRU MAT 9 - Jinghpaw Common Language Bible 2009

Yam Nga Nlang Si Htum Ai

¹ Dai Madu gaw Mawshe hpe, “Hkawhkam wa kaw shang nna Hebre masha ni a Madu Karai Kasang ning nga nna tsun ai ngu shi hpe tsun u: ‘Nye a amyu masha ni ngai hpe nawku lu mu ga, shanhte hpe dat dat u.

² Nang rai nna shanhte hpe dat dat na matu bai ningdang ai rai yang,

³ na a yam nga ni rai nga ai gumra, lawze, gawla-uk, nga, dumsu, sagu hte bainam ni yawng a ntsa e hkrit hpa urum zinli jahkrat dat ai hte nang hpe ari jaw na we ai.

⁴ Ngai gaw Israela amyu masha ni hte Egutu masha ni a yam nga hpung ni a lapran e, dan leng ai ginhka lam tawn da na we ai; Israela amyu masha ni madu ai yam nga ni gaw langai mi mung si na n rai.

⁵ Ngai Madu nan ndai amu hpe hpawt de galaw na matu ahkying aten ladaw da ni ai,’” ngu nna tsun wu ai.

⁶ Hpang shani e, dai Madu shi tsun nu ai hte maren, amu shabyin dat wu ai rai nna Egutu masha ni a yam nga ni yawng si mat nga ai, rai ti mung Israela amyu masha ni a yam nga ni chyawm gaw langai mi mung n si nga ai.

⁷ Hkawhkam wa gaw Israela amyu masha ni a yam nga langai mi mung n si mat malu ai gaw hpa baw byin wa sai kun?, ngu nna san yu wu ai. Rai ti mung, shi myit ja nga ai rai nna amyu masha ni hpe n dat ya wu ai.

Shu Duhtau

⁸ Dai hpang dai Madu gaw Mawshe yan Arun hpe, “Wan htung na dap loi mi latup la nna, Mawshe gaw dai hpe hkawhkam wa a man e nbung hta kabai shamawng dat na rai wu ai.

⁹ Dai wan dap gaw Egutu mung ting a ntsa e ga nhpu zawn mawng mat wa nna, masha a ntsa e mung, yam nga ni a ntsa e mung bum lapau wa shangun ai shu duhtau byin wa na ra ai,” ngu nna tsun wu ai.

¹⁰ Dai re ai majaw shan gaw dap loi mi la nhtawm hkawhkam wa a man e tsap nga ma ai; Mawshe mahtang nbung de dai hpe kabai shamawng dat wu yang, dai gaw masha hta mung, yam nga ni hta mung bum lapau wa ai shu duhtau byin wa sai.

¹¹ Mandan lakle sara ni mung Mawshe a man e myi man n madun lu ma ai; hpa majaw nga yang, shanhte gaw kaga Egutu masha ni yawng zawn shu duhtau ni hte ka-up da hkrum nga ma ai.

¹² Rai ti mung dai Madu gaw hkawhkam wa hpe myit shaja ya wu ai rai nna dai Madu tsun da nu ai hte maren, Mawshe yan Arun a ga hpe hkawhkam wa n madat ya wu ai.

Sin

¹³ Shaloi dai Madu gaw Mawshe hpe, “Hpawt de manap jau jau aten hta hkawhkam wa hte sa hkrum nhtawm, Hebre masha ni a Karai Kasang, dai Madu tsun ai ga shi hpe tsun wu ai: ‘Nye a amyu masha ni ngai hpe nawku lu mu ga, shanhte hpe dat dat u.

¹⁴ Ndai lang chyawm gaw na a du salang ni hte na a amyu masha ni hpe chyu sha ngai ari jaw na n rai; rai ti mung, nang hpe du hkra pyi ngai ari jaw na we ai. Mungkan ga ting hta ngai zawn re ai langai mi mung n nga ai hpe nang chye lu na rai ndai.

¹⁵ Nang hpe adup abyen na matu mung, na a masha ni hpe ana ahkya hte zingri na matu mung, nye a lata sharawt tawn taw gaw, nang gaw tsep kawp shamyit kau ai hkrum na rai ndai.

¹⁶ Rai ti mung, nye a mying ningsang kajai gumhkawng ai gaw mungkan ga ting hta chyam bra wa lu na matu mung, nye a daru magam n-gun hpe madun dan na matu mung ngai nang hpe jahkrung sharawt da nga nngai.

¹⁷ Rai tim, nang mahtang myit nau kaba nga ndai rai nna, nye a amyu masha ni hpe dat dat na matu n hkraw nga ndai.

¹⁸ Egutu labau hta galoi mung n hkrat yu ai nachying kaba ai sin marang hpe hpawt de ndai ahkying hta nan ngai jahtu dat na nngai.

¹⁹ Ya chyawm gaw na a yam nga hpung ni hte pa hkan e nga ai nang lu malu ni hpe ulawng de gawt bang dat na hkang da u; dai n re ai sha, shingbyi shara hpa n nga ai shara na masha hte yam nga ni a ntsa e sin hkrat bun nna dai ni yawng si mat na mara ai!,’” ngu nna tsun wu ai.

²⁰ Hkawhkam wa a du salang nkau mi mahtang dai Madu tsun ai ga a majaw hkrit kajawng nga ma ai rai nna shanhte a mayam ni hte yam nga ni hpe shingbyi shara nga ai kata de woi jashawn da ma ai.

²¹ Dai Madu a shadum jahprang ai ga hpe hpa zawn n nawn ya ai nkau mi mahtang shanhte a mayam ni hte yam nga ni hpe pa hkan e dam da ma ai.

²² Dai Madu gaw Mawshe hpe, “Na a lata lamu de sharawt tawn u, shing rai yang Egutu mung ting na masha ni a ntsa e mung, yam nga ni a ntsa e mung, pa hkan na hkai nmai mahkra a ntsa e mung sin marang htu hkrat bun na ra ai,” ngu nna tsun wu ai.

²³ Dai rai nna, Mawshe mung shi a dawhkrawng hpe lamu de sharawt dat wu ai rai nna dai Madu gaw mu shangoi dat wu ai hte sin marang hpe jahtu dat wu ai; myihprap wan mung ga du hkra gashoi nga ai.

²⁴ Dai Madu gaw htat la ai sin marang hte rau mungkan ting de gashoi shangun lu ai myihprap wan hpe shangun dat wu ai rai nna dai gaw Egutu mung a labau hta galoi mung garai n hkrat yu ai hte nachying ja la ai laru rai nga ai.

²⁵ Egutu mung ting na pa hkan e nga ai arai nga manga shagu hpe mung, masha hte yam nga ni yawng lawm hkra adup kau nga ai. Dai gaw yi hkauna hkan tu nga ai hkai nmai ni yawng hpe kayat ashin kau nna, tu matu hpun mahkra hpe mung agrawp daw kau nga ai.

²⁶ Israela amyu masha ni shanu nga ai Goshen ginwang hta chyu sha sin marang n hkrat nga ai.

²⁷ Hkawhkam wa gaw Mawshe yan Arun hpe shaga la nna, “Ndai lang chyawm gaw ngai shut kau ni ai. Dai Madu gaw ding hpring nga ai, nye a amyu masha ni hte ngai mahtang shut hpyit kau saga ai.

²⁸ Dai Madu hpe hpyi nem ya mi! Anhte hta ndai mu hte sin marang hkrat ai gaw ram la nga sai. Nanhte hpe dat dat na matu, ngai ga sadi jaw nngai; dai rai nna nanhte gaw ndai yang e loi mi mung nga lu na myit dai n rai,” ngu nna tsun wu ai.

²⁹ Mawshe gaw shi hpe, “Mare kaw nna ngai pru mat wa ai shaloi jang, nye a lata hpe sharawt nhtawm dai Madu hpe hpyi nem ya na nngai; shaloi jang mu ngoi ai gaw hkring mat nna sin marang ni mung dai hkan e htu sana n rai. Dai Madu gaw ginding aga hpe madu nga ai hpe nang chye lu na rai ndai.

³⁰ Rai ti mung, nang hte na a du salang ni ya du hkra, dai Madu Karai Kasang hpe n hkrit nga myit dai hpe ngai chye nga nngai,” ngu nna tsun wu ai.

³¹ Muk-yaw mam gaw myin wa nna, lachyit mung pu pu ai aten rai nga ai majaw, lachyit hte muk-yaw mam ni hten mat nga ai.

³² Hkaulan mam chyawm gaw hpang e mahtang myin wa ai majaw hpa mung n hten nga ai.

³³ Mawshe gaw hkawhkam wa kaw na pru wa nhtawm, mare shinggan de du jang, dai Madu hpe hpyi nem na matu shi a lata sharawt da wu ai rai nna mu hte sin marang ni yawng sim mat nga ai.

³⁴ Hkawhkam wa dai byin ai lam hpe mu ai shaloi, shi gaw yubak bai galaw nhtawm shi hte shi a du salang ni gaw shawng de na zawn masin bai ja wa nna

³⁵ dai Madu gaw Mawshe hpe tsun da nu ai hte maren, Israela amyu masha ni hpe hkawhkam wa dat dat ya wu ai n rai.