PRU MAT 40 - Jinghpaw Common Language Bible 2009

Dai Madu A Hpung Shingkang Shanu Nga Ai Sum Hpe Sharawt Ai Hte Ap Nawng Ai

¹ Dai Madu gaw Mawshe hpe,

² “Shawng na shata a shawng shani e, dai Madu a hpung shingkang shanu nga ai Sum hpe sharawt da na rai ndai.

³ Dai kata hta Jep ai Tara Kanu Shi rawng ai Ga Shaka Sumpu hpe tawn da nna, de a man e nba grang hte grang da na rai nga ai.

⁴ Nang gaw ku hpe la jashawn da nhtawm, de a ntsa e arung arai ni hpe mara da na rai ndai. Pyengdin shadun hpe mung la shang wa nna de a ntsa e pyengdin ni hpe tawn da na rai ndai.

⁵ Manam pyaw ai baw hpe nat nawng ai ja hkungri hpe Ga Shaka Sumpu a man ang e tawn da nna, Sum a chyinghka lam hta mung chyinghka grang hpe grang da na rai ndai.

⁶ Wan nat hkungga nawng jau na tawn hkungri hpe mung Sum a man ang ang e tawn da na rai ndai.

⁷ Shin na ntsin htung hpe Sum hte tawn hkungri a lapran e shadun da nna dai hta hka hte jahpring da na rai ndai.

⁸ Wang grup grup hta mung wang grang sharawt da nhtawm, de a shang wa chyinghka lam e chyinghka grang grang da na rai ndai.

⁹ “Dai hpang chyoi pra ai namman sau hte Sum hte de a arung arai ni yawng hpe chya nna ap nawng na rai ndai; dai hte gaw chyoi pra nga na rai nga ai.

¹⁰ Dai hpang, tawn hkungri hte dai hte seng ai arai nlang ni hpe mung chya ai hte ap nawng na rai ndai; shaloi dai hte gaw tsep kawp chyoi pra nga na rai nga ai.

¹¹ Shin na ntsin htung hte de a shadun ni hpe mung dai hte maren galaw nna ap nawng na rai ndai.

¹² “Arun hte shi a shadang sha ni hpe mung Sum a shang wa chyinghka lam de woi shang wa nna, htung hte maren hka shin na rai ma ai.

¹³ Arun hpe mung hkinjawng hpun palawng ni jahpun ya nna, shi hpe naman chya ya ai hte dai hku nna shi hpe ap nawng na rai ndai; shaloi shi gaw hkinjawng amu hta ngai hpe daw jau lu na rai nga ai.

¹⁴ Shi a shadang sha ni hpe mung nang woi la nhtawm hpun palawng hpun ya na rai ndai.

¹⁵ Dai hpang, nang gaw shanhte a kawa hpe namman sau chya ya ai zawn shanhte hpe chya ya na rai ndai, shaloi shanhte gaw hkinjawng amu hta daw jau lu na rai ma ai. Ndai namman chya ai gaw prat mi hte prat mi shanhte hpe hkinjawng shatai ai amu rai na ra ai.”

¹⁶ Mawshe gaw dai Madu hkang da sai hte maren, lam shagu hpe hkan galaw wu ai.

¹⁷ Dai rai nna, shanhte Egutu mung kaw na pru wa ai lahkawng ning a shata langai a shawng shani hta dai Madu a hpung shingkang shanu nga ai Sum hpe sharawt da ma ai.

¹⁸ Mawshe gaw Sum hte seng ai machyaw ni hpe bang nna, hpunpyen ni hpe shadun nhtawm htinggrang dinghkrawn ai hte de a shadaw ni hpe sharawt da wu ai.

¹⁹ Shi gaw Sum a ntsa e mung, magap kahpyan galup nna de a ntsa e shinggan magap hte galup wu ai; dai gaw dai Madu Mawshe hpe hkang da sai hte maren rai nga ai.

²⁰ Dai hpang, shi gaw lungpa lahkawng la nhtawm Ga Shaka Sumpu hta bang da wu ai; dai Sumpu hta kandang dinghkrawn nna de a magap hte magap tawn wu ai.

²¹ Dai hpang, shi gaw Sum kata e dai Sumpu hpe tawn nna nba grang hte grang da wu ai. Ndai zawn dai Madu hkang da sai hte maren, Ga Shaka Sumpu hpe shinggang da wu ai.

²² Shi gaw Sum kata na muk ku hpe dai shinggang a shinggan dingdung maga de tawn da nna,

²³ dai shara hta dai Madu a matu nawng jau ai muk hpe mara da nga ai; dai mung dai Madu Mawshe hpe hkang da sai hte maren rai nga ai.

²⁴ Shi gaw pyengdin shadun hpe mung Sum kata a dingda maga, muk ku hte tawtap e tawn da nna,

²⁵ dai Madu shi hpe hkang da sai hte maren, Madu a man e pyengdin ni hpe shatu wu ai.

²⁶ Shi gaw ja hkungri hpe mung Sum kata nba grang a man e tawn da nna,

²⁷ dai Madu hkang da sai hte maren, manam pyaw ai baw hpe dai hkungri ntsa e nat wu ai.

²⁸ Shi gaw Sum a shang wa chyinghka lam e mung chyinghka grang hpe grang da nna,

²⁹ dai chyinghka grang a man e wan nat hkungga galaw ai tawn hkungri hpe tawn da wu ai. Dai Madu hkang da sai hte maren, dai tawn hkungri a ntsa e wan nat hkungga hte shadung hkungga ni nawng jau ya wu ai.

³⁰ Shi gaw Sum hte tawn hkungri a lapran e shin na ntsin htung tawn da nna dai hta hka jahpring da wu ai.

³¹ Mawshe, Arun, hte shi a shadang sha ni gaw dai hta shanhte a lagaw lata shin ma ai;

³² shanhte gaw Sum kata de shing n rai tawn hkungri de sa ai aten shagu dai Madu hkang da nu ai hte maren shanhte shin ma ai.

³³ Mawshe gaw Sum hte tawn hkungri grup yin e wang shakum sharawt da nna dai wang a chyinghka lam e chyinghka grang hpe grang da wu ai. Shing rai shi gaw amu yawng mayawng hpe shangut da nga ai.

Dai Madu A Hpung Shingkang Shanu Nga Ai Sum A Ntsa Na Sumwi

³⁴ Dai hpang, sumwi gaw Sum hpe ka-up nna, htoi kabrim ai dai Madu a hpung shingkang mung dai hta hpring nga ai.

³⁵ Ndai amu a majaw, Mawshe gaw dai Sum kata de n shang lu wu ai.

³⁶ Israela amyu masha ni gaw dai Sum kaw na sumwi shalun la ai shaloi chyu sha, shanhte a dap kaw na kaga shara de htawt sa wa wa rai ma ai.

³⁷ Shanhte gaw sumwi dung nga dingsa shanhte a dap kaw na shamu lu ma ai n rai.

³⁸ Shanhte hkawm sa wa ai lam yawng hta dai Madu a hpung shingkang a sumwi gaw dai Sum ntsa e shani e jung nga nna, shana e de a ntsa hta wan htoi nga ai.