PRU MAT 18 - Jinghpaw Common Language Bible 2009

Yehtru Gaw Mawshe Kaw Du Chyai Ai

¹ Mawshe a katsa Midian hkinjawng Yehtru gaw Karai Kasang Mawshe hte shi a amyu Israela a matu galaw ai lam magup hpe mung, shi gaw shanhte hpe Egutu mung kaw nna woi wa ai lam hpe mung na wu ai.

² Dai rai nna, shi gaw Mawshe tawn kau da ai madu jan Zihpura hte,

³ shi a shadang sha yan rai nga ai Gershom yan Elieza hpe woi nna Mawshe hpang de sa wa ma ai. (Mawshe gaw, “Ngai gaw tsasam mung e maigan masha tai mat ni ai,” ngu nna tsun wu ai; dai rai nna shi gaw shadang sha langai hpe Gershom ngu nna shamying wu ai.

⁴ Shi gaw, “Nye wa a Karai Kasang chyawm gaw Egutu hkawhkam wa e sat kau na lata kaw nna ngai hpe karum la ai hte hkye hkrang la ni ai,” ngu nna tsun wu ai; dai rai nna shi gaw kaga shadang sha hpe Elieza ngu nna shamying wu ai.

⁵ Yehtru gaw Mawshe a madu jan hte shi a shadang sha lahkawng yan hpe woi nna dai nam mali kata, Mawshe dap jung tawn ai chyoi pra ai bum de du sa ma ai.

⁶ Shi gaw Mawshe hpang de shanhte du sa wa nga sai lam shiga shana dat wu ai,

⁷ dai rai nna, Mawshe mung shi hpe tau la na nga pru sa nhtawm shi a man e gum dagup nna shi hpe pup wu ai. Shan gaw shada da hkam kaja ai lam san hkat let, Mawshe a sum kata de shang wa ma ai.

⁸ Mawshe gaw Yehtru hpe dai Madu mahtang Israela amyu masha ni hpe hkye mawai la na matu, Egutu hkawhkam wa hte shi a amyu masha ni hpe shi galaw dan nu ai amu nlang hte hpe tsun dan wu ai. Shi gaw amyu masha ni hkrun lam e hkrum sha ai mayak lam ni hte Karai Kasang shanhte hpe kaning rai hkye hkrang la sai lam ni hpe mung tsun dan wu ai.

⁹ Dai lam yawng mayawng hpe Yehtru na ai shaloi, shi kabu ai hte,

¹⁰ “Hkawhkam wa hte Egutu masha ni a lata kaw na nanhte hpe hkye hkrang la sai dai Madu hpe shakawn kungdawn mu! Shi a amyu masha ni hpe mayam prat kaw na hkye hkrang la sai dai Madu hpe shakawn mu!

¹¹ Egutu masha ni Israela amyu ni hpe dai zawn n kaw n law di mu ai shaloi, shi gaw ndai amu ni hpe galaw nu ai majaw, dai Madu gaw karai ni yawng hta grau kaba nga ai hpe ya ngai chye ni ai,” ngu nna tsun wu ai.

¹² Dai hpang Yehtru mung hkum dingnawng nat nawng na hkungga hte Karai Kasang hpe nawng jau na kaga shagu hkungga ni hpe la sa wu ai rai nna Arun hte Israela ningbaw ni yawng shi hte rau nawku ai kumla hku nna, chyoi pra ai lusha sha na matu pru sa wa ma ai.

Tara Agyi Ni Hpe San Da Ai

¹³ Hpang shani e, Mawshe gaw amyu masha ni a lapran na ndang kalang lam ni hpe hparan ya wu ai rai nna, jahpawt kaw na shana du hkra bungli law nga wu ai.

¹⁴ Mawshe galaw ai amu nlang hte hpe Yehtru mu wu ai shaloi, shi gaw, “Amyu masha ni a matu nang galaw nga ai ndai lam yawng mayawng gaw kaning re ai amu rai nga lit ta? Amyu masha ni jahpawt kaw na shana du hkra tsap nga nna, nang hte bawng ban jahkrup ra ai dai amu ni yawng hpe nang chyu sha hpa majaw galaw nga n ta?,” ngu nna san wu ai.

¹⁵ Mawshe gaw, “Ndai amyu masha ni Karai Kasang a myit marai hpe chye la na matu nga, ngai kaw sa ma ai majaw ndai amu hpe ngai galaw ra nga nngai.

¹⁶ Marai lahkawng hta ndang kalang ai lam pru wa ai shaloi, shanhte ngai kaw sa ma ai rai nna shan hta na marai langai ngai jaw nga ai hpe ngai daw dan hparan ya nngai; shan hpe mung Karai Kasang a hkang da ai ga hte tara ni hpe tsun dan we ai,” ngu nna htan wu ai.

¹⁷ Dai hpang Yehtru gaw, “Nang gaw ndai amu hpe jaw ai hku n galaw nga ndai.

¹⁸ nang hkum nan mung, ndai amyu masha ni mung hki ba na marin dai. Nang chyu sha galaw ai gaw na a matu nau wa lit li nga ai.

¹⁹ Ya chyawm gaw ngai nang hpe mai kaja ai hpaji ga nkau mi jaw de ga; Karai Kasang mung nang hte rau rai nga u ga. Karai Kasang a man e amyu masha ni hpe shapraw nna shanhte a ndang kalang lam ni hpe jashawn ai gaw na a matu jaw hkrak sai.

²⁰ Nang shanhte hpe Karai Kasang a hkang da ai ga ni hpe sharin ya nna, shanhte kaning rai asak hkrung hkawm sa na lam hte hpa baw hpe galaw ang na lam, shanhte hpe nang tsun sanglang na rai ndai.

²¹ Rai ti mung, dai hta kaga, atsam ningja rawng ai masha nkau mi hpe nang lata la nhtawm, amyu masha ni a ningbaw tai ai hta, hkying mi a ningbaw ni, latsa a ningbaw ni, manga shi a ningbaw ni hte shi a ningbaw ni ngu nna san tawn u. Shaloi shanhte gaw Karai Kasang hpe hkrit kamyin ai ni, kam hpa ging ai ni hte mayun kumhpa n la sha ai ni rai lu na ma ai.

²² Shanhte gaw amyu masha ni a matu dinggrin tara agyi ni zawn hparan ya nga mu ga. Daw dan hparan yak ai amu ni yawng hpe chyawm gaw nang kaw jashawn mu ga; rai ti mung shanhte nan gaw dai kaji ai ndang kalang lam ni hpe daw dan hparan ya lu mu ga. Shanhte gaw na a lit hpe karan gun ya ai a majaw dai gaw na a matu grau nna amu tsang shangun na ra ai.

²³ Nang gaw ndai amu hpe Karai Kasang hkang da ai hte maren galaw ai rai yang, nang hkum nan hki ba na rin dai n rai, ndai amyu masha ni yawng gaw shanhte hparan la lu sai ndang kalang lam ni hte nta de wa lu na mara ai,” ngu nna tsun wu ai.

²⁴ Mawshe gaw Yehtru a hpaji jaw ga hpe hkap la nhtawm,

²⁵ atsam ningja rawng ai masha ni hpe Israela amyu masha ni yawng kaw na lata la wu ai. Dai ni hpe hkying mi a ningbaw, latsa a ningbaw, manga shi a ningbaw hte shi a ningbaw ni ngu nna san da wu ai.

²⁶ Shanhte gaw amyu masha ni a matu dinggrin tara agyi ni zawn daw dan hparan ya na ma ai; yak ai amu ni hpe Mawshe kaw jashawn ma ti mung, kaji ai ndang kalang lam hpe chyawm gaw shanhte nan daw dan ya nga ma ai.

²⁷ Dai hpang Mawshe gaw Yehtru hpe shakram ga tsun wu ai hte Yehtru mung nta de nhtang mat wa wu ai.