NEHEMIA 7 - Jinghpaw Common Language Bible 2009

¹ Ya bunghku bai gaw gap nna chyinghka ni yawng shi shara hte shara shakap da ngut jang, Nawku Htingnu sin ai ni, chyoi pra ai mahkawn mangoi hpung ni hte kaga Lewi masha ni hpe shanhte a amu hta san da ai hkrum nga sai.

² Ngai gaw Yerusalem mare hpe up hkang hpareng na masha lahkawng san da nngai; shan gaw ngai nau Hanani hte hpyen dap hpe up hkang nga ai Hanania yan rai nga ai. Hanania gaw kam hpa mai ai hte Karai Kasang hpe grau nna hkrit kamyin ai wa rai nga ai.

³ Ngai gaw shanhte hpe jahpawt de jan atsawm sha rawt ai aten du hkra, Yerusalem chyinghka ni hpe n hpaw na matu mung, jan shang aten sin langa ni bungli garai n tawn da yang, dai ni hpe la nna htinggrang da na matu tsun tawn ni ai. Ngai gaw shanhte hpe Yerusalem hta nga ai amyu masha ni hta na sin langa ni hpe san da na hte shanhte hta na nkau mi lak san shara ni hta lit shatsam na hte kaga ni tinang dum nta grup grup na shara ni hpe kawan hkawm na lam tsun mawe ai.

Bawng Dung Hkrum Ai Kaw Na Nhtang Wa Ai Ni A Jahpan

⁴ Yerusalem gaw dam lada ai mare langai mi rai nga ai, rai ti mung amyu masha law law dai shara hta n nga nga ai, dum nta law law ni hpe garai n gap da lu nga ai.

⁵ Karai Kasang gaw ngai hpe amyu masha ni hte shanhte a ningbaw ni hte du salang ni hpe jahpawng da na matu mung, shanhte a dinghku labau ni gawn na matu mung, bawng dung ai kaw nna shawng nhtang wa ai ni a labau ka matsing da na matu mung, ngai hpe wenyi n-gun shadut ya nga ai. Da ndai gaw ngai mu tam da sai shiga rai nga ai:

⁶ Bawng dung hkrum ai masha law law hte gaw Babelon mungdaw kaw nna pru wa nhtawm Yerusalem hte Yuda mung na tinang nang a mare de nhtang wa ma ai. Shanhte a dinghku ni gaw Hkawhkam Nebuhkadneza shanhte hpe bawng masha hku rim woi mat wa ai shani kaw nna Babelon mung e bawng dung hkrum let nga nga sai ni rai ma ai.

⁷ Shanhte a ningbaw ni gaw Zerubabela, Yawshu, Nehemia, Azaria, Ramia, Nahamani, Mordehkai, Bilshan, Misperet, Bigwai, Nehum hte Bana hte rai ma ai.

^8-25 Ndai gaw bawng dung ai kaw nna nhtang wa ai Israela lakung lama shagu a nambat rai nga ai. Parosha - 2,172 Shehpatia - 372 Ara - 652 Pahat Moba (Yeshua hte Yoab yan a amyu matu ni - 2,818 Elam - 1,254 Zatu - 845 Zahkai - 760 Binui - 648 Bebai - 628 Azgad - 2,322 Adonikam - 667 Bigwai - 2,067 Adin - 655 Atera (Hezekia ngu nna mung shaga ai) - 98 Hashum - 328 Bezai - 324 Harip - 112 Gibeon - 95

^26-38 Ndai lawu de na mare ni hta nga lai wa masai kaji kawa ni a amyu masha ni mung nhtang wa ma ai: Betlehem hte Netohpa - 188 Anahtot - 128 Bet Azmawet - 42 Kiriat Yarim, Hkehpira hte Berot - 743 Rama hte Geba - 621 Mikma - 122 Behtela hte Ai - 123 Kaga Nebo - 52 Kaga Elam - 1,254 Harim - 320 Yerihko - 345 Loda, Hadi hte Ono - 721 Sena - 3,930

^39-42 Da ndai gaw bawng dung hkrum ai kaw nna nhtang wa ai hkinjawng amyu lakung ni a jahpan rai nga ai: Yedaia (Yeshua amyu matu ni) - 973 Imera - 1,052 Pashura - 1,247 Harim - 1,017

^43-45 Bawng dung hkrum ai kaw nna nhtang wa ai Lewi lakung ni: Yeshua hte Kadmiela (Hodawia amyu matu ni) - 74 Nawku Htingnu mahkawn mangoi masha ni (Asap amyu matu ni) - 148 Nawku Htingnu sin ai ni (Shalum, Atera, Talamon, Akub, Hatita hte Shobai ni a amyu matu ni) - 138

^46-56 Bawng dung hkrum ai kaw nna nhtang wa ai Nawku Htingnu amu galaw masha ni a lakung lama ni: Ziha, Hasuhpa, Tobaot, Kerosa, Sia, Padon, Lebana, Hagaba, Shalmai, Hanan, Gidela, Gahara, Reaia, Rezin, Nekoda, Gazam, Uza, Pasea, Besai, Meunim, Mehpushesim, Bakbuk, Hakuhpa, Harahura, Bazlihta, Mehida, Harsha, Barkosa, Sisera, Tema, Nezia, hte Hatihpa ni rai nga ai.

^57-59 Bawng dung hkrum ai kaw nna nhtang wa ai Shawlumon a shangun ma ni a amyu lakung lama ni: Sotai, Sohperet, Perida, Yala, Darkon, Gidela, Shehpatia, Hatila, Pohkerit Hazebim hte Amon ni rai nga ai.

⁶⁰ Bawng dung hkrum ai kaw nna nhtang wa ai Nawku Htingnu amu galaw masha ni a amyu matu ni hte Shawlumon a shangun ma ni yawng marai 392 rai nga ai.

^61-62 Tela Mela, Tela Harsha, Hkeruba, Adon hte Imera kahtawng ni kaw nna nhtang wa ai Delaia, Tobia hte Nekoda amyu lakung hte seng ai ni 642 rai nga ai; rai ti mung shanhte gaw Israela amyu matu ni rai nga ma ai hpe chyawm gaw tup hkrak sakse n madun lu ma ai.

^63-64 Ndai Hobaia, Hakoza hte Barazilai hkinjawng lakung lama ni a kaji kawa ni a labau hpe n gawn da lu nga ai. (Barazilai hkinjawng lakung lama a kaji kawa gaw Gilead mung na Barazilai amyu lakung na numsha langai hpe hkungran la wu ai majaw shi katsa a amyu lakung mying hta hkan nga ai.) Shanhte a kaji kawa ni kadai rai nga ma ai hpe n gawn lu nga ai majaw shanhte hpe hkinjawng hku n hkap la lu nga ai.

⁶⁵ Urim hte Htumim chye lang ai hkinjawng langai garai n pru dingsa, Karai Kasang hpe nawng jau ya ai lusha n sha lu na lam, Yuda munggyi wa shanhte hpe hkang da nga ai.

^66-69 Bai nhtang wa ai bawng dung masha ni yawng 42,360 rai nga ai. Numsha lasha shangun ma ni - 7,337 Mahkawn mangoi chye ai numsha lasha ni - 245 Gumra ni - 736 Lawze ni - 245 Gawla-uk ni - 435 Laugung ni - 6,720

^70-72 Amyu masha law law hte gaw Nawku Htingnu bai gaw gap ai manu jaw karum nga ma ai: Munggyi wa 270 ja awng sa -- 50 poi shingra hta lang na wan -- 530 hkinjawng ni a matu palawng galu ni Amyu lakung ni a ningbaw ni 337 ja pawng ni -- 3,215 gumhpraw pawng ni Ngam ai amyu masha ni 337 ja pawng ni -- 2,923 gumhpraw pawng ni -- 67 hkinjawng ni a matu palawng galu ni

⁷³ Hkinjawng ni, Lewi masha ni, Nawku Htingnu sin ai ni, mahkawn chye mahkawn ai ni, yu maya masha law law hte Nawku Htingnu amu galaw masha ni ngu na Israela amyu masha ni yawng Yuda mung na mare kahtawng ni hkan nga nga ma ai.