NEHEMIA 10 - Jinghpaw Common Language Bible 2009

¹ Shawng nnan lata masat shakap ai gaw Hahkalia a kasha, munggyi Nehemia rai nga ai; dai hpang Zedekia lata masat shakap ai. Ndai ni mung lata masat shakap ma ai: Seraia, Azaria, Yeremia, Pashura, Amaria, Malhkiya, Hatusha, Shebania, Maluk, Harim, Meremot, Obadia, Daniela, Ginehton, Baruk, Meshulam, Abiya, Miyamin, Mazia, Bilgai hte Shemaia ni rai nga ai. Azania a kasha Yeshua, Henadad lakung na Binui Kadmiela, Shebania, Hodia, Kelita, Pelaia, Hanan, Mihka, Rehob, Hashabia, Zahkura, Sherebia, Shebania, Hodia, Bani, hte Beninu ni rai nga ai. Parosha, Pahat Moba, Elam, Zatu, Bani, Buni, Azgad, Bebai, Adoniya, Bigwai, Adin, Atera, Hezekia, Azura, Hodia, Hashum, Bezai, Harip, Anahtot, Nebai, Magpia, Meshulam, Hezira, Meshezabela, Zadok, Yadua, Pelatia, Hanan, Anaia, Hoshea, Hanania, Hashuba, Halohesha, Pilha, Shobek, Rehum, Hashabna, Masea, Ahia, Hanan, Anan, Maluk, Harim hte Bana ni rai nga ai.

Hkinjawng ni: Lewi masha ni: Amyu masha ni a ningbaw ni: Myit Hkrum Ga Shaka

²⁸ Anhte, Israela amyu masha ni, hkinjawng ni, Lewi masha ni, Nawku Htingnu sin langa ni, Nawku Htingnu mahkawn mangoi chye ai ni, Nawku Htingnu amu galaw masha ni hte kaga Karai Kasang a Tara hpe madat mara ai ni gaw shanhte hkum nan anhte a mungdan hta nga nga ai maigan masha ni hpe jahka kau nhtawm anhte hte rau anhte a madu jan ni hte chye na ram sai anhte a kashu kasha ni yawng hte gaw

²⁹ shi a shangun ma Mawshe a lata hku nna Karai Kasang jaw ya sai Karai Kasang a Tara hte maren, anhte asak hkrung nga na mung, dai Madu anhte a Madu anhte hpe hkang da sai lam yawng mayawng madat mara na mung, shi a tara ni hte madat da ai ga ni yawng hpe hkan shatup na lam ni hpe mung, anhte a ningbaw ni hte ndai hku matut manoi nga let ga shaka dagam da ga ai rai nna dai hpe anhte run jahten ga ai rai yang, matsa mawa ari hkrum na ga ai ngu, dagam ga ai.

³⁰ Anhte gaw anhte a mungdan hta nga nga ai maigan masha ni hte kayau kaya dinghku de na ga ai n rai.

³¹ Maigan masha ni anhte hpe Bansa Nhtoi hte kaga chyoi pra ai shani hta nai mam nsi naisi hte kaga arung arai la sa nna sa dut ya ai rai yang, anhte gaw shanhte kaw na mari la na ga ai n rai. Anhte gaw sanit ning du shagu yi sun n galaw na ga ai, hka kap ai yawng hpe shaprai kau na ga ai.

³² Anhte gaw shaning shagu Nawku Htingnu hta jai lang na matu gumhpraw awng za langai a htam matsat hta na htam mi jaw na ga ai.

³³ Anhte gaw Nawku Htingnu kata nawku daw jau ai amu hta ndai hku shang lawm na ga ai: dai ni gaw, chyoi pra ai muk, shani shagu na shadung hkungga, shani shagu nat nawng na shagu hkungga ni a matu yam nga ni, Bansa Nhtoi ni a matu chyoi pra ai hkungga ni, Shata Praw hta galaw ai Poi ni hte kaga lusha poi ni, kaga chyoi pra ai hkungga ni, Israela amyu a matu yubak mara la kau ya na hkungga ni hte Nawku Htingnu a matu ra mara arung arai hpa mung jaw ya na ga ai.

³⁴ Anhte mung, amyu masha ni mung, hkinjawng ni hte Lewi masha ni mung, madat da ai Tara hte maren, dai Madu anhte a Karai Kasang hpe shagu hkungga nat nawng na matu gara amyu lakung ni mahtang ju hpun shaw ang ai hpe daw dan ya na matu shaning shagu hpaida hte lata na ga ai.

³⁵ Anhte gaw shawng shu la lu ai nsi naisi hte anhte a hpun ni hta na shawng myin ai namsi namsaw hkungga hpe Nawku Htingnu de shaning shagu la sa na ga ai.

³⁶ Anhte gaw anhte hta na shawng shangai ai kasha alat ni hpe madat da sai Tara hte maren, Nawku Htingnu e nga ai hkinjawng ni hpang de woi sa nna Karai Kasang hpe ap ya na ga ai. Anhte gaw dumsu kanu shagu kaw na shawng hkai ai dumsu kasha hte anhte a sagu bainam shagu hta na shawng hkai ai sagu kasha, bainam hkalung ni hpe mung nawng ya na ga ai.

³⁷ Anhte gaw shawng shu la lu ai nsi naisi kaw na shadung katsing hte kaga sabyi ntsin, tsanlun sau hte namsi namsaw baw hkum sumhpa re ai hkungga ni hpe Nawku Htingnu kata na hkinjawng ni hpang de shaning shagu la sa na ga ai. Anhte gaw anhte a yi sun galaw sha nga ai kahtawng ningchyawng lamu ga hkan na htam shi hta na htam mi hpe mung, anhte a lamu ga hta tu ai nsi naisi htam shi hta na htam mi hpe mung hkan lahkawn ai Lewi masha ni hpang de la sa na ga ai.

³⁸ Arun amyu matu hkinjawng ni gaw htam shi hta na htam mi lahkawn da ai shaloi Lewi masha ni hte rau rai na rai ma ai, Lewi masha ni gaw Nawku Htingnu hta lang na matu shanhte lahkawn da ai htam shi hta na htam mi yawng hpe Nawku Htingnu sut gawk ni de la sa na rai ma ai.

³⁹ Israela amyu masha ni hte Lewi masha ni jaw ya ai nsi naisi, sabyi ntsin hte tsanlun sau re ai ni hpe Nawku Htingnu hte seng ai hkinghku ni hpe tawn da ai sut gawk ni hta bungli gun hpai nga ai hkinjawng ni, Nawku Htingnu sin ai ni hte Nawku Htingnu na mahkawn mangoi chye ai ni nga ai shara ni hpang de la sa na mara ai. Anhte gaw anhte a Karai Kasang a nta hpe n gawn n sawn di kau na ga ai n rai.