MAHTE 1 - Jinghpaw Common Language Bible 2009

Yesu Hkristu A Ginru Ginsa Labau

¹ Ndai gaw Abraham a aru arat rai nga ai Dawi a matu mara Yesu Hkristu a labau gawn ai hta lawm ai kaji kawa ni a mying jahpan rai nga ai.

² Abraham a kasha gaw Isak, Isak a kasha gaw Yaku, Yaku a kasha ni gaw Yuda hte shi a kahpu kanau ni rai ma ai.

³ Yuda hte Htama kaw na shaprat ai kasha ni gaw Hparet yan Zerak; Hparet a kasha gaw Hesrum; Hesrum a kasha gaw Aram:

⁴ Aram a kasha gaw Aminadab; Aminadab a kasha gaw Nashon; Nashon a kasha

⁵ gaw Salmon hte Rahab kaw na shaprat ai kasha gaw Bua; Bua hte Ruhta kaw na shaprat ai kasha gaw Obed: Obed a kasha gaw Yese:

⁶ Yese a kasha gaw Dawi Hkawhkam; Dawi hte Uria a madu jan kaw na shaprat ai kasha gaw Shawlumon:

⁷ Shawlumon a kasha gaw Rehoboam; Rehoboam a kasha gaw Abia; Abia a kasha gaw Asap; Asap a kasha gaw Yosahpat

⁸ Yosahpat a kasha gaw Yoram; Yoram a kasha gaw Uzia; Uzia a kasha gaw Yohtam:

⁹ Yohtam gaw Ahaza hpe shaprat wu ai; Ahaza gaw Hezekia hpe shaprat wu ai.

¹⁰ Hezekia a kasha gaw Manashe; Manashe a kasha gaw Amon: Amon a kasha gaw Yoshia;

¹¹ Yoshia gaw Babelon mare de Israela masha ni hpe bawng dung na matu rim woi mat wa ai ten hta Yehoiahkin hte shi a kahpu kanau ni hpe shaprat wu ai.

¹² Babelon mare de bawng dung na matu Israela amyu masha ni hpe rim woi mat wa ai hpang e, Yehkonia gaw Salahtila hpe shaprat wu ai. Salahtila a kasha gaw Zerubabela;

¹³ Zerubabela a kasha gaw Abiu; Abiu a kasha gaw Eliakim; Eliakim a kasha gaw Azura:

¹⁴ Azura a kasha gaw Zadok: Zadok a kasha gaw Ahkim: Ahkim a kasha gaw Eliu;

¹⁵ Eliu a kasha gaw Eleaza; Eleaza a kasha gaw Mahtan: Mahtan a kasha gaw Yaku;

¹⁶ Yaku gaw Meshia ngu ai Yesu a kanu hpe hkungran la ai Yosep hpe shaprat wu ai.

¹⁷ Shing rai, Abraham a prat kaw nna Dawi prat du hkra; ahtik labau shi mali; bai, Dawi a prat kaw nna Babelon e bawng dung nga ai prat du hkra ahtik labau shi mali; bai, Babelon e bawng dung nga ai kaw nna Meshia shangai wa ai ten du hkra ahtik labau shi mali rai nga ai.

Yesu Hkristu Shangai Wa Ai Lam

¹⁸ Ya, Yesu Hkristu kaning rai shangai chyinghkai wa ai lam ning rai nga ai; Shi a kanu Mari gaw Yosep hte mahtan da nga ai rai nna, shan garai n hkungran ai majaw garai n kanawn yang, Mari gaw dai Chyoi Pra ai Wenyi a majaw na-um nasin rai wa sai.

¹⁹ Yosep gaw myit ding hpring nna teng man ai hku galoi mung galaw ai masha langai mi rai nga ai hte maren, shi gaw Mari hpe masha a man e sari jahpoi ai lam n galaw mayu wu ai majaw, shi hte mahtan da ai lam hpe akatsi sha lagyim dawm kau na hkyen nga ai.

²⁰ Ya, shi ndai lam hpe naw myit aru yu nga yang, Madu a lamu kasa langai mi yupmang hta shi hpe hkum shadan dan nna, “Dawi a kasha Yosep e, Mari hpe na a madu jan hku hkap la na hkum hkrit et, hpa majaw nga yang, shi a na-um nasin gaw, dai Chyoi Pra Ai Wenyi a majaw byin wa ai rai nga ai.

²¹ Shi gaw shadang sha shangai na ra ai rai nna, nang shi a mying hpe, Yesu ngu nna shamying lu na rai nga ai; hpa majaw nga yang, shi a amyu hpe tinang a yubak mara kaw na hkye hkrang la na shi rai nga ai,” ngu wu ai.

²² Ndai lam ni gaw Madu nan myihtoi a n-gup hku nna tsun da sai ga dik wa u ga she byin wa sai.

²³ Shi gaw, “Yu u, dai hkawn sek gaw na-um nasin rai wa nna, shadang sha shangai na ra ai, shi a mying, Emanuela ngu shamying ya na maru ai,” nga ai. De a lachyum gaw, “Karai Kasang anhte hte rau rai nga ai!,” nga ai re.

²⁴ Dai rai nna Yosep gaw, yup pyaw ai kaw na rawt wa nhtawm, dai Madu a lamu kasa shi hpe hkang da wu ai hte maren, Mari hpe la wu ai.

²⁵ Rai ti mung, dai shadang sha hpe shangai shaprat ai ten du hkra, shi hte hkum shan hku n kanawn mazum ai sha nga nga ai; dai shadang sha hpe shi Yesu ngu nna shamying wu ai.