LUKA 10 - Jinghpaw Common Language Bible 2009

Yesu, Sape Sanit Shi Lahkawng Hpe Shangun Dat Ai

¹ Dai hpang, dai Madu gaw, sape kaga marai sanit shi lahkawng hpe lata san da nna, marai lahkawng yep yep di nhtawm, shi nan sa wa magang nga ai mare hte shara shagu de, shi a shawng e shangun dat wu ai.

² Shi shanhte hpe, “Nmut shang shara law law nga ai, amu galaw na ni mahtang n law ma ai. Dai majaw, shi a nmut hta amu galaw na masha law law shangun dat ya u ga, Madu kaw akyu hpyi nga mu.

³ Nanhte sa wa manu, chyahkyawn ni a ka-ang de sagu kasha ni hpe zawn, ngai nanhte hpe shangun dat made ai.

⁴ Gumhpraw jan, shing n rai htingpa hte kyepdin re ai ni hkum gun myit, lam e naw rai nga yang, kadai hte mung hkum shachyen myit.

⁵ Gara nta hta mung nanhte shang myit yang, ‘Ndai nta ngwi pyaw nga u ga!,’ ngu nna shawng tsun mu.

⁶ Dai nta hta ngwi pyaw sim sa ai lam hpe ra ai masha nga ai rai yang, nanhte a ngwi pyaw sim sa ai shakram matan ga, dai wa hta nga nga u ga, n nga ai rai yang, dai gaw nanhte kaw bai nhtang wa na ra ai.

⁷ Dai nta hta e nan, nanhte nga nga nna, shanhte jaw ai hte maren lu sha mu, hpa majaw nga yang, amu galaw ai wa gaw shabrai hkam la ging nga ai. Nta mi kaw nna nta mi de hkum htawt nga hkawm myit.

⁸ Mare de nanhte shang myit dai shaloi, shanhte nanhte hpe hkap la ma yang gaw, nanhte a man e baw tawn ai hte maren, lu sha mu.

⁹ Dai mare na machyi ai ni hpe shamai ya nna, dai yang na masha ni hpe, ‘Karai Kasang a Mungdan gaw nanhte hte ani sha du ra ai,’ ngu nna tsun dan mu.

¹⁰ Rai ti mung, gara mare hta rai rai nanhte shang yang, shanhte n hkap la ma yang gaw, dai mare a lam ni de pru nhtawm,

¹¹ ‘Anhte a lagaw hta kap ai nanhte a mare na ga nhpu pyi, nanhte hpe deng u ga matu anhte ahpu katsut kau da ga ai, rai ti mung, Karai Kasang a Mungdan gaw nanhte hte ani sha du ra ai hpe chye nga mu, ngu nna tsun da mu,’ ngu mu ai.

¹² Ngai nanhte hpe tsun made ga, dai Tara Dara ai Nhtoi hta karai kasang gaw Sodom mare hpe dai mare hta grau nna matsan dum ai myit madun na ra ai.

N Kam N sham Ai Mare Ni

¹³ “Kurazin e, na a matu gade hkrithpa kaba rai na rai nga a hka! Betsaida e, na a matu gade hkrithpa kaba rai na rai nga a hka! Nan hta dan ai lamik kumla ni hpe Turu hte Sidon mare hta lama dan yu taw gaw, dai kaw na masha ni gaw, moi moi me lachyit nba hpun ai hte shanhte a ntsa e dap hte bun la rai nna myit malai lu boi na masai.

¹⁴ Tara Dara ai Nhtoi hta Karai Kasang gaw Turu hte Sidon mare yan hpe nan hta grau nna matsan dum lama ai lam madun na ra ai.

¹⁵ Nang mung, Kaperna-um e, lamu du hkra sharawt ai, nang hkrum mayu nga n ni? Katsan ga du hkra jahkrat kau ai nang hkrum na rin dai!”

¹⁶ Yesu gaw, “Nanhte a ga madat ai wa kadai mung, nye a ga madat ai mung rai nga ai. Nanhte hpe ningdang kau ai wa kadai mung, ngai hpe ningdang kau ai wa rai nga ai: ngai hpe ningdang kau ai wa kadai mung, ngai hpe shangun dat ai wa hpe mung, ningdang kau ai rai nga ai,” ngu nna shi a sape ni hpe tsun mu ai.

Sape Sanit Shi Lahkawng Bai Du Wa Ai

¹⁷ Dai sape marai sanit shi lahkawng hte gaw, nachying kabu gara ai myit hte bai du wa nna, “Madu e, na a mying hte daru dat yang, nat ni pyi anhte a ga madat ma ai,” ngu mu ai.

¹⁸ Madu gaw, “Satan gaw lamu de nna myihprap zawn hkrat wa ai hpe ngai mu se ai.

¹⁹ Yu mu! Lapu hte n-gaw gawk ni hpe kabye lu na hte, gumlau a atsam yawng hpe dang lu na ahkang, ngai nanhte hpe jaw made ai rai nna, hpa mung nanhte hpe hkra lu na n rai.

²⁰ Rai ti mung, nat ni nanhte a ga madat ai majaw, hkum kabu myit, nanhte a mying ni hpe sumsing lamu hta ka da sai majaw she, kabu nga mu,” ngu nna tsun mu ai.

Yesu Kabu Myit Pyaw Ai Lam

²¹ Dai ahkying hta Yesu gaw Chyoi Pra ai Wenyi a majaw kabu ai myit hte hpring nna, “Sumsing lamu hte ginding aga a Madu, Wa e! Hpaji byeng-ya rawng ai ni hte myit kunghpan ai ni kaw na, nang makoi magap da ai dai teng man ai lam ni hpe hpaji kata ai ni e nang madun dan ndai majaw, ngai nang hpe shakawn kungdawn nngai. Rai sa, Wa e, dai gaw nang tsaw ra ai hku byin shangun mayu ai lam rai nga lit dai.

²² “Nye Wa gaw arai yawng mayawng ngai hpe ap ya ni ai, Kasha wa kadai rai nga ai hpe Wa hta kaga kadai mung n chye ai, Wa kadai re ai mung, Kasha wa hte dai Kasha e shadan dan na matu lata la ai wa hta kaga kadai mung n chye nga ai.”

²³ Dai hpang, Yesu gaw, sape ni hpang de kayin let, shanhte hpe hkrai tsun wu ai gaw, “Nanhte ya mu lu ai teng man ai lam ni hte, shi a mungdan hpe mu lu ai myi ni gaw a nga malit dai.

²⁴ Nanhte hpe ngai tsun made ga, nanhte mu ai lam ni hpe myihtoi ni hte hkawhkam ni law law wa mu mayu ma timung, n mu lu ma ai; nanhte na lu ai lam ni hpe na mayu ma timung, n na lu ma ai,” ngu wu ai.

Kaja Ai Samari La Wa A Ga Shadawn

²⁵ Tara sara langai mi Madu kaw sa nna, “Sara e, n htum n wai asak lu la hkra, ngai hpa galaw na rai ta?,” ngu nna Yesu hpe chyam dinglik yu wu ai.

²⁶ Yesu gaw, “Tara hta kaning nga ka da a ta? Nang dai ni hpe gara hku lachyum htai la n ta?,” ngu nna shi hpe htan wu ai.

²⁷ Dai wa gaw, “Dai Madu na a Karai Kasang hpe, na a kraw lawang mahkra hte, na a myit masin mahkra hte, na a n-gun lagaw mahkra hte, na a myit mang mahkra hte, nang tsaw ra lu na ndai; na a htingbu wa hpe mung na a hkum hte maren tsaw ra lu na rin dai, nga ai,” ngu nna htan wu ai.

²⁸ Yesu gaw, “Nang htan ai ga teng nga lit dai, shing rai u, shaloi nang asak hkrung lu na ndai,” ngu nna shi hpe htan wu ai.

²⁹ Rai ti mung, dai tara sara wa gaw, shi a ding hpring ai lam shapraw dan mayu ai majaw, “Nye a htingbu wa gaw kadai wa rai na a ta?,” ngu nna Yesu hpe san wu ai.

³⁰ Yesu gaw, “Masha langai mi Yerusalem nna Yerihko mare de yu wa nga yang, damya hkrum wu ai, dai ni gaw shi hpe hpun palawng raw kau ya nna, nhtum nni di kayat nhtawm, ganoi noi si sayang she, kau da nna wa mat ma ai.

³¹ Shaloi hkinjawng langai mi dai lam hku lai yu wa hkrup nna, dai wa hpe mu jang, koi kau da wu ai.

³² Dai hte maren, Lewi masha langai mi mung, dai yang du nna, dai wa hpe mu jang, koi kau da wu ai.

³³ Rai ti mung, Samari masha langai mi mung, dai lam hku hkawm sa wa yang, dai wa kaw du nna, shi hpe mu jang, matsan yu dum ai myit hte sit sa wu ai.

³⁴ Shi a nma ni hta, namman hte sabyi ru bun nhtawm, ahkyen kayawp wu ai. Shi a lawze hta mung, dai wa hpe shajawn nhtawm manam nta langai mi de lakawn wa nna, gawn lajang ya wu ai.

³⁵ Hpang shani e, shi gumhpraw lap lahkawng shaw nna, dai manam nta madu wa hpe ya let tsun wu ai gaw, “Ndai wa hpe yu lajang ya e, shi a majaw nang jan ma ai made hpe gaw, ngai bai wa jang she, nang hpe wa wa na de ai,” ngu da wu ai.

³⁶ “Dai masha masum hta damya hkrum ai wa hte htingbu daw ai wa gaw, kadai mahtang re ai ngu nna nang myit n ta?,” ngu nna san wu ai.

³⁷ Dai Tara sara gaw, “Dai wa hpe matsan dum ai wa re,” ngu nna htan wu ai. Yesu gaw, “Nang mung dai zawn wa galaw su,” ngu nna shi hpe tsun dat wu ai.

Yesu Marhta Yan Mari Kaw Sa Chyai Ai.

³⁸ Ya, Yesu hte shi a sape ni sa wa nga ma yang, kahtawng langai mi de du nna, Marhta ngu ai numsha langai mi, shi a nta hta shi hpe hkap hkalum la wu ai.

³⁹ Dai numsha gaw, Mari ngu ai kanau langai mi lu ai, shi gaw dai Madu a lagaw nhpang e dung nga let, Madu a sharin shaga ai ga madat la nga ai.

⁴⁰ Marhta chyawm gaw galaw jaw ai amu law law a majaw myit kyin dum nga ai, dai rai nna shi sit sa nhtawm, “Madu e, nye a kanau gaw, galaw jaw ai amu hta ngai hpe hkrai sha rap di da ai hpe, nang hpa n nawn ya n ni? Ngai hpe sa karum na, shi hpe tsun ya e,” ngu wu ai.

⁴¹ Dai Madu gaw, “Marhta, Marhta, nang gaw amu law law a majaw, myit ru nna tsang nga ndai.

⁴² Rai ti mung, ra grau ai lam gaw langai sha rai nga ai, Mari gaw jaw ai lam lata la nu ai rai nna, dai hpe shi kaw na shaw la kau ya lu na n rai,” ngu nna shi hpe htan wu ai.