KOLOSE 2 - Jinghpaw Common Language Bible 2009

¹ Ngai gaw nanhte a matu mung, Ladoki masha ni a matu mung, ngai hpe myi man chyaw n mu yu ai kaga masha ni yawng hte a matu mung, ngai gade wa galaw gun hpai shakut shaja sa wa ai lam nanhte hpe ngai tsun dan made ga.

² Shing rai ngai gun hpai shakut ai lam gaw, shanhte yawng hta nden ja ai myit hte hpring tsup nna langai hte langai a tsaw ra myit hta makyit mahkai wa ai hte shanhte gaw dai teng man ai lam hpe chye nna myit kam da lu sai ngu ai sutgan hpe hpring hpring tsup tsup hkam la lu na mara ai. Ndai lam hku nna Karai Kasang a makoi magap da ai sung htum ai lam ngu ai Hkristu hpe chye chyang wa na mara ai.

³ Shi gaw Karai Kasang a makoi magap da ai hpaji byeng-ya nlang hte hte chye chyang ai lam ting hpe hpaw dan ai zaw si rai nga ai.

⁴ Dai rai nna, kadai wa rai ti mung shut ai lam hpe grai jaw na zawn kaja na zawn nga hkra tsun dangrang ai lam ni hte nanhte hpe hkalem hkalau ai lam n byin u ga, ngai ning nga nna tsun shadum nga nngai.

⁵ Hpa majaw nga yang, ngai nanhte hte ngai hkum nan rau n nga lu ai rai ti mung, Wenyi hta nanhte hte rau nga nga nngai rai nna nanhte a dakring dalang re ai ngang kang ai myit marai hte, Hkristu hpe kam sham ai hta rau sha tsap nga myit dai hpe ngai mu nna kabu nga nngai.

Hkristu A Marang E Lu La Ai Hpring Tsup Ai Asak Hkrung Lam.

⁶ Nanhte gaw Hkristu Yesu hpe Madu ngu nna hkap la manit dai hte maren, shi hta e asak hkrung hkawm sa nga mu.

⁷ Sharin achyin ai hpe hkam la manit dai hte maren, shi hta sung sung ru jung nna, shi hta tinang a asak hkrung lam hpe gaw da let nanhte a makam masham hpe grau nna ngang kang shangun nga mu. Nanhte hta chyeju dum ai myit hte hpring nga mu.

⁸ Hkristu a hkang da ai kaw na n re ai sha, shinggyim masha ni a matsun maroi ga hkan nna akyu n rawng ai myit sawn hpaji hku nna hkalem hkalau ai lam hte mung, lamu ganghkau n-gawn tawa hta nga ai nat hpara ni kaw na pru ai sharin shaga ai lam ni hte mung, kadai mung nanhte hpe mayam n shatai myit ga, sadi nga mu.

⁹ Hpa majaw nga yang, shinggyim hkum hkrang majing dagraw nna ndai mungkan hta asak hkrung nga ai ten e, Hkristu hta Karai a marai hkum gawng shingyan hkum dingnum a shanu nga ai.

¹⁰ Nanhte gaw shi hta hkrung nga ai marang e hkum tsup ai asak hkrung lam lu la manit dai. Dai Madu gaw lamu ganghkau hte mungkan ga hte n-gun atsam rawng ai ni hte ahkang aya lu ai ni yawng hpe up ai grau htum ai wa rai nga ai.

¹¹ Nanhte gaw Dai Madu hte langai sha tai nna asak hkrung ai shaloi e matu gadoi hkam la manit dai rai nga ai. Dai gaw masha a lata hte galaw ai n re ai sha, ndai yubak kap ai hkum shan a n-gun atsam kaw na shalawt dat ai ngu ai Hkristu e shabyin ai matu gadoi hkam ai lam rai nga ai.

¹² Nanhte gaw hkalup hkam la myit dai shaloi, shi hte rau lup makoi ai hkrum nna Hkristu hpe si mat ai ni kaw na hkrung sharawt la ai Karai Kasang hta hkrung sharawt la ai n-gun atsam rawng nga ai hpe kam ai makam masham a marang e shi hte rau sharawt la ai mung hkrum manit dai.

¹³ Nanhte gaw moi shawng de yubak galaw ai ni rai nga myit dai majaw mung, Yuda masha n rai nna tara kata ai hte matu gadoi n hkam ai maigan masha ni rai nga myit dai majaw mung, Wenyi lam hta masha chyasi rai nga myit dai. Rai ti mung ya gaw Karai Kasang nanhte hpe Hkristu hte rau asak bai jahkrung ya manit dai. Karai Kasang gaw anhte a yubak yawng mayawng hte hpe raw dat kau ya sai.

¹⁴ Shi gaw anhte a n hpru n mai ai yubak mara a hka jahpan hpe mung, dai hte seng ai jep da ai tara ni hpe mung wudang ntsa e hpri hte dit shakap nna yeng seng kau nu ai.

¹⁵ Dai wudang ntsa e Hkristu gaw lamu hte aga ntsa na n-gun atsam rawng ai ni hte ahkang aya lu ai yawng hte hpe htawk jahkrat yeng seng kau nhtawm, shanhte hpe bawng masha shatai kau nna padang dip yan hkawm ai a hpang e hkan nang shangun ai hte shawa masha ni e jawm yu ai masha ni shatai kau nu ai.

¹⁶ Dai re ai majaw, sha hpa, lu hpa hte, shata praw shani hte Bansa Nhtoi a lam kadai mung nanhte a matu tara jahkrat nna n jeyang mu ga.

¹⁷ Dai zawn re ai yawng hte gaw du na ra ai aten e byin pru wa na arai ni a shingnip shingna hkrai rai nga ai. Kaja wa teng teng re ai gaw Hkristu shi hkum nan rai nga ai.

¹⁸ Laklai ai shingran ni hpe mu ai majaw yawng hta grau ai ngu myit ai hte n teng n man ai hku shagrit shanem shangun nna lamu kasa ni hpe nawku na matu shadut ai ni kadai hpe rai ti mung nanhte hpe mara hkum dawdan shangun et. Dai zawn re ai ni gaw shanhte a shinggyim myit hku nna kaman lila grang dakat ai ni rai ma ai.

¹⁹ Shanhte gaw hkum hkrang a baw ngu ai Hkristu hpe manoi manat ai lam n nga mat masai. Nra hkrihkraw hte lamyi laman, lasaw lasa ni e shachyaw jum da ai hkum hkrang ting gaw Hkristu ngu ai baw kaw na sha hpa hpe hkam la nna Karai Kasang a myit ra ai lam hte maren kaba wa nga ai.

Hkristu Hte Rau Si Na Hte Hkrung Na Lam

²⁰ Nanhte gaw Hkristu hte rau si mat manit dai rai nna ndai mungkan n-gawn tawa hpe up madu ai n-gun atsam rawng ai wenyi ni a lata hta na shalawt dat ai hkrum manit dai. Dai rai yang hpa rai nna nanhte gaw ndai mungkan hte seng ai ni zawn hkawm sa nga myit ta?

²¹ Hpa majaw nanhte gaw, “Ndai hkum jum, hkum chyim, hkum hkra myit,” nga nna jep da ai tara ni hpe naw madat mara hkan sa nga myit ta?

²² Dai tara ni yawng hte gaw kalang mi jai lang ngut ai hpang akyu n rawng mat ai rai ni hte seng nga ai. Dai lam yawng hte gaw, masha e galaw shapraw ai tara hte sharin shaga ai lam ni sha rai nga ma ai.

²³ Ndai zawn re ai tara ni gaw adip arip rai lamu kasa ni hpe naw shangun ai, n teng n man ai hku shagrit shanem shangun ai, hpaji amyu mi re ngu nawn da ai tinang a hkum hpe shagyeng shakyet ai lam ni hpe sharawt ai lam ni, rai nga ma ai. Rai ti mung dai tara ni gaw masha a hkum shan a ra gasit kayut ai myit hpe dip hkang ai lam hta akyu majing hpa mi n rawng nga ai.