KASA 26 - Jinghpaw Common Language Bible 2009

Agripa A Man E Pawlu Shi Hta Mara N Nga Ai Lam Tsun Dara Ai.

¹ Hkawhkam Agripa gaw Pawlu hpe, “Na lam nang nan tsun shaga na ahkang lu ndai,” ngu wu ai. Dai rai nna Pawlu lata ladawn let shi hta mara n nga ai lam lawu na hte maren makawp maga tsun wu ai gaw:

² “Hkaw hkam Agripa e! Yuda masha ni ngai hpe shagun ai mara ni hte seng nna, na a man e ngai hta mara n nga ai lam, nye a hkum hpe makawp maga tsun lu ai gaw nye a matu laklai ai ahkaw ahkang nan rai nga ai ngu nna ngai nawn nngai.

³ Yuda amyu masha ni a htung hking lam ni hte dangrang hkat chye ai manghkang lam magup hpe nang grai chye ai wa rai nga ndai. Dai rai nna myit galu kaba ai hte ngai hpe madat ya na, ngai hpyi nem nngai.

⁴ “Nye a brang ram prat kaw nna ngai kaning rai asak hkrung lai wa sai lam Yuda masha ni yawng chye chyalu rai ma ai. Shawng nnan nye a dai daw buga hta, dai hpang Yerusalem mare hta nye a prat tup ngai kaning rai asak hkrung lai wa sai hpe shanhte chye ma ai.

⁵ Galoi mung shanhte ngai hpe chye nga ma ai majaw, anhte a nawku htung na ja dik ai tara hkan ai Hparishe hpung hta ngai lawm nga nngai gaw, shanhte sakse hkam mayu yang, hkam lu ma ai.

⁶ Rai ti mung Karai Kasang gaw anhte a ji wa ni hpe jaw da ai ga ndat hta na ngai lu la ai myit mada ai lam a majaw daw dan ai hkam na, ya ngai nang e tsap nga nngai.

⁷ Dai ga sadi gaw anhte a amyu dap shi lahkawng ting shani shana Karai Kasang hpe nawku daw jau let myit mada ala nga ai ga sadi rai nga ai. Hkawhkam wa e, ngai hpe Yuda amyu masha ni mara shagun ai lam gaw ndai zawn myit mada ai a majaw rai nga ai.

⁸ Ya nang e nga nga ai nanhte Yuda masha ni Karai Kasang gaw si ai ni hpe jahkrung sharawt la ai ngu ai hpe hpa majaw n mai kam ai ngu nga myit ta?

⁹ “Ngai nan Nazaret wa Yesu a mying hte nhtan shai ai lam shagu hpe ngai dang di lu ai daram galaw mai ai ngu nna myit nngai.

¹⁰ Kaja wa Yerusalem mare e dai hku nan ngai galaw yu se ai. Hkinjawng agyi ni kaw na ahkang lu la nna, Karai Kasang a masha ni law law hpe htawng hta bang da nna, shanhte hpe sat kau na daw dan ai shaloi ngai myit hkrum lawm ni ai.

¹¹ Tara jawng ni hta shanhte hpe law law lang ari jahkrum nhtawm, shanhte a makam masham nyet kau mu ga galaw shakut se ai. Shanhte hpe ngai nachying pawt bu ai hte maigan mare kahtawng du hkra pyi, hkan zingri mase ai.

Pawlu Shi Myit Malai Lu Wa Ai Lam Hpe Tsun Dan Ai.

¹² “Ndai yaw shada ai lam a majaw hkinjawng agyi ni kaw na mungga ahkang lu nna Damasku mare de sa wa nngai.

¹³ Jan pungding madi ai ten hta, Hkawhkam wa e, jan hta grau htoi tu ai nhtoi langai mi gaw dai lam e hkawm sa nga ai ngai hte nye a manang ni a grup yin lamu de na htoi tu pru ai hpe ngai mu nngai.

¹⁴ Shaloi anhte yawng ga de kadawng taw mat shajang nga yang Hebre ga hte ngai hpe, ‘Shawlu, Shawlu! Nang ngai hpe hpa rai zingri nga n ta? Usu gaw madu a nga gau shingna masen hpe lahkat htawng yang na zawn dai masawn hpe htawng ai hte na hkum hpe machyi la shangun nga n hka!,’ nga ai nsen langai mi ngai na nngai.

¹⁵ Shaloi ngai gaw, ‘Madu e, nang kadai rai nga n ta?,’ ngu nna san we yang Madu gaw, ‘Nang zingri zingrat ai Yesu rai nga nngai.

¹⁶ Rai ti mung ya rawt nna jan rai tsap u, Nang hpe nye a shangun ma tai u ga san da na matu nang kaw ngai dan pru ring ngai, nang gaw, dai ni nang ngai hpe mu mada lu sai lam hte, hpang de ngai nang hpe naw madun dan na ra de ai lam ni hpe masha kaga ni e sakse hkam dan na rai ndai.

¹⁷ Ngai gaw nang hpe Israela amyu masha ni a lata na mung, ngai shangun dat nna nang sa hkaw tsun na maigan masha ni a lata na mung, hkye hkrang mawai la na de ai.

¹⁸ Ngai hpe kam sham ai a marang e shanhte yubak mara ni raw dat kau ai hkrum nna Karai Kasang a lata la ai amyu hta lawm lu mu ga, n sin kata nna nhtoi de, Satan a atsam kata nna Karai Kasang hpang de shanhte kayin wa lu hkra nang shanhte a myi jahpaw ya na rai ndai,’ nga nna ngai hpe tsun nngai.

Pawlu Gaw Shi Galaw Ai Amu A Lam Tsun Dan Ai

¹⁹ “Dai rai nna, Hkawhkam Agripa e, ngai gaw lamu na shingran dai hpe n madat ai n nga lu nngai.

²⁰ Dai lam hpe shawng nnan Damasku mare, dai hpang Yerusalem mare hte Yuda mung ting na masha ni hte maigan amyu masha ni myit malai lu nna Karai Kasang hpang de kayin wa nhtawm myit malai hte gingdan ai arawn alai shachyen mu ga, ngai hkaw dan nngai.

²¹ Dai lam a majaw Yuda masha ni gaw, ngai nawku htingnu e nga nga yang, ngai hpe rim la nna sat kau na maw mi ai.

²² Rai ti mung Karai Kasang kaw nna karum ai lu la ai majaw sha, dai ni du hkra ngai asak hkrung nga lu ai hte kaji kaba n nga yawng a man e tsap let sakse hkam lu nga nngai.

²³ Meshia gaw nni nkri hkrum lu na hte si ai ni kaw na shawng hkrung rawt wa nna, Israela amyu masha ni hte maigan masha ni hpe hkye hkrang la ai nhtoi hkaw tsun shana ya na ra ai ngu ai lam myihtoi ni hte Mawshe hkaw tsun lai wa sai hte maren byin wa na ra ai ngu ai lam rai nga ai,” ngu wu ai.

²⁴ Ya Pawlu dai hku shi hkum hpe makawp maga ai ga tsun ai shaloi, Hpestu gaw, “Pawlu e nang mana nit dai! Hpaji hparat nau chye dinglai nna de a majaw mana byin mat nit dai!,” ngu nna marawn jet kau wu ai.

²⁵ Pawlu chyawm gaw, “Grau htum ai Hpestu e, ngai n mana nngai; teng man nna sadi sahka hpaji hte gring ai ga ngai tsun nga nngai.

²⁶ Hkawhkam Agripa e ndai amu lam ni hpe nang chye nga ndai majaw, na a man e ngai nden ja ai hte tsun dan nngai. Dai amu lam gaw shingjut shingnaw hkan e sha byin ai n re ai majaw dai byin mabyin hpe hkawhkam wa nang n chye ai mi n nga na re ngu nna ngai kam nga nngai.

²⁷ Hkawhkam Agripa e, myihtoi ni a ga hpe nang kam n ni? Nang kam nga ndai hpe ngai chye nga nngai!,” ngu wu ai.

²⁸ Hkawhkam Agripa gaw Pawlu hpe, “Ndai aten kadun mi laman hta sha ngai hpe Hkristan shatai la lu na zawn nawn da wu ni?,” ngu wu ai.

²⁹ Bai Pawlu gaw, “Aten kadun sha mi rai tim, aten galu wa rai tim Hkawhkam wa hte hpawn nang e nga ai ni nlang hte gaw, nye a htawng masha tai ai aya hta lai nna, ngai zawn re ai hkrai byin wa na matu Karai Kasang kaw ngai akyu hpyi nngai!,” ngu wu ai.

³⁰ Dai shaloi hkawhkam wa yan munggyi hte Bernike gaw shanhte dung nga ai manang ni hte rau rawt ma ai.

³¹ Pru wa yang shanhte shada, “Ndai wa gaw sat kau ging ai mara, htawng hta sharen da ging ai mara, lama mi mung galaw ai n rai,” nga nna tsun shajang ma ai.

³² Agripa mung Hpestu hpe, “Ndai wa shi lama Kehta kaw du na n hpyi taw gaw raw dat mai sai,” ngu nna tsun wu ai.