JAW JAU 4 - Jinghpaw Common Language Bible 2009

N Dum Shami Shut Kau Ai Yubak Ni A Matu Hkungga Ni

¹ Dai Madu gaw Mawshe hpe

² yubak mara shut hpyit nna dai Madu hkang da sai lam lama ma hpe n dum shami jahten kau hkrup ai kadai mung lawu de na hkang da ai lam ni hkan sa lu na matu Israela amyu masha ni hpe tsun dan na hkang da wu ai.

³ Hkinjawng Kaba wa nan yubak tawt lai nna amyu masha ni hpe mara kap hkra galaw ai rai yang, shi gaw ra n rawng ai usu hpe shi tawt lai kau ai yubak mara a matu dai Madu hpe shagu hkungga nawng jau na rai wu ai.

⁴ Shi gaw dai usu hpe Sum a shang wa chyinghka lam man de dun sa nna dai usu a baw hta shi a lata mara nhtawm, dai hpe dai Madu a man e sat na rai wu ai.

⁵ Dai hpang Hkinjawng Kaba wa gaw usu sai loi mi la nna Sum kata de la shang wa na rai wu ai.

⁶ Shi gaw sai hta shi a layung kapruk la nhtawm chyoi pra ai nba grang a man e sanit lang lapri bun na rai wu ai.

⁷ Dai hpang shi gaw Sum kata na manam pyaw ai baw nat nawng tawn ai hkungri jut na nrung ni hta asai loi mi hkan chya na rai wu ai. Naw ngam ai asai yawng hpe chyawm gaw Sum a shang wa chyinghka ang na wan nat hkungri lagaw nhpang e ru hkaw na rai wu ai.

⁸ Shi gaw dai usu hta na sau yawng hte pu kan hta na kap ai sau yawng,

⁹ sade tawng lahkawng hte dai hta kap ai sau, sin hta na kaja htum ai sau yawng la na rai wu ai.

¹⁰ Dai hkinjawng wa gaw mahku hkungga a matu yam nga sat nna sau la nhtawm, hkungga nawng ya ai zawn dai sau man ni la nna wan nat hkungga nawng yang lang ai tawn hkungri ntsa hta dai hpe nat na rai wu ai.

¹¹ Rai ti mung ahpyi, ashan yawng hte de a baw, lagaw, pu kan hte ahkyi ni hpe shi la nna,

¹² adap sa ru kau na matu masat da ai dap shinggan hta dai ni yawng hpe la sa nna hpun shingjawm nhtawm nat kau na rai wu ai.

¹³ Israela shawa hpung ting gaw dai Madu hkang da ai lam lama ma hpe n dum shami shut hpyit tawt lai nna yubak galaw hkrup nhtawm dai mara dan dawng wa ai shaloi,

¹⁴ htingrai hkungga shatai na matu shawa hpung gaw usu langai shapraw na rai ma ai. Shanhte gaw dai hpe dai Madu a hpung shingkang shanu nga ai Sum de la sa na rai ma ai;

¹⁵ shaloi dai shawa hpung a ningbaw ni gaw de a baw hta shanhte a lata mara nhtawm dai yang e sat na rai ma ai.

¹⁶ Hkinjawng Kaba wa gaw Sum kata de usu sai loi mi la shang wa nhtawm,

¹⁷ dai hta shi layung kapruk la nhtawm nba grang a man e sanit lang lapri bun na rai nga ai.

¹⁸ Shi gaw Sum kata na manam pyaw ai baw nat nawng ai tawn hkungri a jut na nrung ni hta sai loi mi chya na rai wu ai. Naw ngam ai asai yawng hpe chyawm gaw Sum a shang wa chyinghka lam ang ang na wan nat hkungri a lagaw nhpang e ru hkaw na rai wu ai.

¹⁹ Dai hpang usu sau yawng la nna tawn hkungri ntsa e dai hpe nat na rai wu ai.

²⁰ Shi gaw usu hte htingrai hkungga a matu nawng ya ai zawn ndai usu hpe mung dai hte maren nawng ya na rai wu ai. Ndai hku nna shi gaw amyu masha ni a tawt lai ai yubak a matu htingrai htingrat ya ai hte shanhte mung mara raw dat kau ya ai hkrum na rai ma ai.

²¹ Dai hpang shi galaw shut ai yubak a matu nawng ya ai usu hpe nat wu ai zawn dai usu hpe dap shinggan de woi sa nna nat kau na rai wu ai. Dai gaw shawa hpung hku nna shut kau ai yubak la kau na matu htingrai ai hkungga rai nga ai.

²² Up hkang du wa gaw dai Madu hkang da ai lam lama ma hpe n dum shami shut hpyit tawt lai nna yubak galaw hkrup ai hte shi a yubak hpe shaloi jang chye ai rai yang,

²³ shi a hkungga shatai na matu ra n rawng ai bainam la langai mi la sa na rai wu ai.

²⁴ Shi gaw de a baw hta shi a lata mara da nhtawm wan nat hkungga nawng jau na matu yam nga sat ai shara ngu ai tawn hkungri a dingdung maga hta dai hpe sat na rai wu ai. Dai gaw yubak mara la kau ya na matu htingrai ai hkungga rai nga ai.

²⁵ Hkinjawng wa gaw yam nga asai hta shi a layung tsing la nna tawn hkungri a jut na nrung ni hta chya nhtawm ngam ai hpe tawn hkungri a lagaw nhpang e ru hkaw na rai wu ai.

²⁶ Dai hpang tawn hkungri ntsa hta de a asau ni yawng mara nhtawm mahku hkungga a matu sat nawng ai yam nga sau nat nawng ai zawn nat na rai wu ai. Ndai hku nna hkinjawng wa gaw up hkang du wa a shut hpyit yubak mara a matu shagu hkungga nawng ya ai hte shi a yubak mara mung raw dat ai hkrum na rai wu ai.

²⁷ Yu maya masha langai ngai dai Madu a hkang da ai lam lama ma hpe n dum shami shut hpyit tawt lai kau nna yubak galaw hkrup nhtawm,

²⁸ shi galaw shut kau sai yubak mara hpe shaloi jang chye ai shaloi, shi a hkungga a matu, ra n rawng ai bainam ayi la sa na rai wu ai.

²⁹ Shi a lata gaw dai yam nga a baw ntsa hta mara nna wan nat hkungga nawng ya na matu tawn hkungri a dingdung maga na yam nga sat ai shara hta dai hpe sat na rai wu ai.

³⁰ Hkinjawng wa gaw dai yam nga asai hta shi a layung tsing la nhtawm tawn hkungri a jut nrung ni hta chya nna, ngam ai hpe tawn hkungri a lagaw nhpang e ru hkaw na rai wu ai.

³¹ Dai hpang mahku hkungga a matu sat ai yam nga a sau la ai zawn de a sau yawng la nna tawn hkungri ntsa e nat na rai wu ai. Dai Madu gaw de a manam pyaw ai sangau hta awng sharawng nga na wu ai. Dai re ai majaw hkinjawng wa gaw ndai hku nna dai masha wa a matu shagu hkungga nawng ya ai hte shi mung yubak mara raw dat kau ya ai hkrum na rai wu ai.

³² Masha langai ngai htingrai hkungga nawng ya na matu sagu la sa ai rai yang, dai gaw ra n rawng ai ayi rai lu na rai nga ai.

³³ Shi gaw de a baw ntsa hta lata mara da nhtawm tawn hkungri a dingdung maga na wan nat hkungga a matu yam nga sat ai shara hta dai hpe sat na rai wu ai.

³⁴ Hkinjawng wa mung yam nga asai hta shi a layung tsing la nna tawn hkungri a jut nrung ni hta chya nhtawm ngam ai hpe tawn hkungri a lagaw nhpang hta ru hkaw na rai wu ai.

³⁵ Dai hpang shi gaw mahku hkungga a matu sat ai sagu a sau yawng hpe la nna, dai Madu a matu wan nat hkungga hpe lusha hkungga hte hpawn tawn hkungri hta nat na rai wu ai. Ndai lam hku nna hkinjawng wa gaw dai masha wa a shut hpyit yubak mara a matu shagu hkungga nawng ya ai hte shi mung mara raw dat kau ya ai hkrum na rai wu ai.