HOSEA 4 - Jinghpaw Common Language Bible 2009

Dai Madu Israela Hpe Mara Shagun Ai

¹ Dai Madu gaw ndai mung hta nga nga ai amyu masha ni hpe mara shagun ninghkap na amu rawng nga ai. Israela e, shi tsun ai ga hpe madat mu: “Ndai mungdan hta kangka ai hte tsaw ra myit n nga sai rai nna amyu masha ni mung ngai hpe Karai Kasang zawn n yin la hkraw nga ma ai.

² Shanhte gaw ga sadi tawn da ma ai, dai ni hpe jahten kau ma ai; shanhte gaw masu magaw ai, masha sat ai, lagu ai, hte num shaw la shaw amu galaw ma ai. Ru hka amu law jat wa ai hte dai mung e masha sat ai amu kahtap gala byin nga ai.

³ Dai rai nna lamu ga gaw hkun hkraw wa na ra ai, dai hta nga manga yawng si na ra ai. Dusat yam nga ni hte ntsa malen u ni yawng, hka na nga du hkra si na mara ai.

Dai Madu gaw Hkinjawng Ni Hpe Mara Shagun Ai

⁴ Dai Madu gaw, “Kadai mung amyu masha ni hpe mara n shagun mu ga; shanhte hpe n daru mu ga-nye a aput angun ai gaw nanhte hkinjawng ni hpe ninghkap nga nngai.

⁵ Nanhte gaw shani shana shut hpyit nga myit dai, myihtoi ni gaw nanhte hta grau nna kaja nga ai n rai. Ngai gaw nanhte a kanu Israela hpe jahten kau na nngai.

⁶ Nye a amyu masha ni gaw ngai hpe n chye yin la nga ma ai majaw dingnye hkrum nga masai. Nanhte hkinjawng ni mung ngai hpe yin la na matu ningdang kau myit dai, nye a sharin achyin ai hpe n madat nga myit dai, dai rai nna ngai gaw nanhte hpe ningdang ai hte nanhte a shadang sha ni hpe mung nye a hkinjawng ni hpe zawn yin la na nngai n rai.

⁷ “Nanhte hkinjawng ni grau law htam wa magang, nanhte ngai hpe yubak galaw shut magang rai nga myit dai, dai rai nna ngai gaw nanhte a shagrau sha-a lam hpe jahpoi asawng hkrum ai de kayin kau dat ya na nngai.

⁸ Nanhte gaw nye amyu masha ni a yubak ni hta na sut su rawt jat wa nga myit dai, dai rai nna nanhte gaw shanhte hpe yubak grau grau galaw mat wa na ra nga myit dai.

⁹ Nanhte gaw amyu masha ni hkam sha ai ari nan hkam sha na rai myit dai! Ngai gaw nanhte hpe ari jaw nna nanhte galaw ai n hkru ai amu a matu ngai matai htang na we ai.

¹⁰ Nanhte gaw nanhte a matu hkungga hkambum hpe sha myit ti mung, naw kawsi kyet na myit dai. Nanhte gaw mayat maya karai ni hpe nawku myit ti mung, ngai kaw nna kayin mat wa nna karai shaje ni a hpang de hkan nga myit dai majaw kashu kasha lu na myit dai n rai.

Dai Madu Gaw Tara Maigan Nawku Lai Hpe Daw Dan Ai

¹¹ Dai Madu gaw, “Sabyi ntsin dingsa nnan lahkawng yan gaw nye a amyu masha ni a machye machyang myit ni hpe shamak kau ya nga ai!

¹² Shanhte gaw hpun tawng langai mi kaw na shingran ni hpe hpyi nga ma hka! Shingna langai gaw shanhte chye mayu ai hpe tsun dan nga a hka! Shanhte ngai kaw na pru mat wa masai. Shawa num tai ai numsha langai zawn, shanhte a hkum ni hpe karai shaje hpang de nawng ya kau nga masai.

¹³ Shanhte gaw bum pungding ntsa na chyoi pra ai shara ni hta shagu hkungga ni nawng ya nhtawm, kawng ntsa ni hte shingnip grai tsawm ai hpun kaba npu hkan manam pyaw ai baw nat nga ma hka! “Dai lam a majaw nanhte a shayi sha ni shawa num tai nna, nanhte a kanam ni la shaw ai amu galaw ma ai.

¹⁴ Ti mung, Nanhte hkum nan htingnu shawa num ni hte rau hkawm sa nna shanhte hte rau tara maigan hpe nanhte shagu hkungga ni nawng ya nga myit dai ndai amu a majaw ngai shanhte hpe ari jaw na n rai. Ga shagawp hta tsun da ai hte maren, ‘Nyan n rawng ai masha gaw hten run mat ai hkrum na ra ai,’ nga nga ai.

¹⁵ “Nanhte Israela amyu masha ni gaw ngai hta sadi n dung nga myit ti mung, Yuda ni chyawm gaw dai zawn nan re ai mara n galaw hkrup nga mu ga. Gilgala mare e hkum nawku myit; Betawen mare e mung hkum nawku myit; ahkrung nga ai dai Madu a amying hta ga sadi ni hkum tawn da myit.

¹⁶ Israela amyu masha ni gaw lawze ni zawn du ja nga ma ai; ngai gaw shanhte hpe dam ai tsingdu pa na sagu kasha ni hpe zawn kaning rai rem lu na rai ta?

¹⁷ Israela amyu masha ni gaw hpara sumla ni a myit shalen la ai hkrum nga ma ai. Shanhte a lam hta shanhte myit ra ai hku hkan nga manu ga.

¹⁸ Sabyi nang hkra lu ngut ai hpang, shanhte gaw shawa num amu galaw ai hpe ra sharawng ma ai, kaya kahpa amu galaw na ra nga ma ai.

¹⁹ Shanhte gaw nbung e shapoi kau ai hkrum nna shanhte galaw ai tara maigan shagu hkungga ni a majaw kaya kahpa hkrum na mara ai.