HOSEA 1 - Jinghpaw Common Language Bible 2009

¹ Ndai gaw Yuda hkawhkam ni rai nga ai Uzia, Yohtam, Ahaza hte Hezekia ni up hkang ai laman hte Yehoasha a kasha Yeroboam Israela hkawhkam tai nga ai aten hta Beri a kasha Hosea hpe jaw ai dai Madu a mungga rai nga ai.

Hosea A Madu Jan Hte Kashu Kasha Ni

² Dai Madu gaw Hosea hku nna Israela hpe shawng nnan ga tsun ai shaloi, shi gaw Hosea hpe, “Nang sa hkungran la su; na a madu jan gaw sadi n dung na ra ai, na a kashu kasha ni mung shi zawn tai na mara ai. Dai hte maren nye a amyu masha ni mung ngai kaw na pru mat wa nna sadi n dung mat nga masai,” ngu nna tsun wu ai.

³ Dai rai nna Hosea gaw Dibla a shayi sha Gome mying ai numsha hpe hkungran la wu ai. Shan a shawng na shadang sha alat shangai ai hpang,

⁴ dai Madu gaw Hosea hpe, “Shi hpe ‘Yezrela’ ngu nna shamying u, hpa majaw nga yang, kade n na yang, shi a kaji kawa Yehu Yezrela e shut kau ai masha sai jahkaw ai ru hka amu ni a matu Israela hkawhkam hpe ngai ari jaw na nngai. Ngai gaw Yehu wa a hkawhkam magam matu ni hpe jahtum kau na we ai.

⁵ Ngai gaw Yezrela Kadit e, dai aten hta Israela a hpyen dap a daru magam n-gun hpe shamyit kau ya na we ai.

⁶ Gome gaw lahkawng ngu na ma lu nga ai. Ndai lang na ma gaw shayi sha langai rai nga ai. Dai Madu gaw Hosea hpe, “Dai numsha hpe, ‘N tsaw ra nu ai’ ngu nna shamying u; hpa majaw nga yang, ngai gaw Israela amyu masha ni hpe galoi mung tsaw ra myit madun na nngai n rai; shanhte hpe mara raw dat ya na nngai n rai.

⁷ Rai ti mung, Yuda amyu masha ni hpe chyawm gaw tsaw ra myit madun dan na nngai. Dai Madu shanhte a Karai Kasang Ngai nan shanhte hpe hkye la na nngai, rai ti mung ngai gaw majan hta nhtu, ndan, pala, gumra hte gumra jawn masha ni hpe lang na n rai.

⁸ Gome gaw shi a shayi sha hpe chyu jahka kau ngut ai hpang, shi hta na-um nasin bai byin wa nhtawm shadang sha langai bai lu wu ai.

⁹ Dai Madu gaw Hosea hpe, “Shi hpe, ‘Nye a amyu n rai,’ ngu nna shamying u; hpa majaw nga yang, Israela amyu masha ni gaw nye a amyu masha ni n rai; ngai mung shanhte a Karai Kasang n rai nngai,” ngu nna tsun wu ai.

Israela Gaw Bai Ngamu Ngamai Wa Ai

¹⁰ Israela amyu masha ni mung n dang hti, n dang shadawn lu hkra re ai panglai zaibru zawn tai wa na mara ai. Ya chyawm gaw Karai Kasang shanhte hpe, “Nanhte gaw nye a amyu masha ni n rai nga myit dai,” ngu nna tsun ai. Rai ti mung, dai nhtoi du du wa ai shaloi shi gaw shanhte hpe, “Nanhte gaw ahkrung nga ai Karai Kasang a kashu kasha ni rai nga myit dai!,” ngu nna tsun na ra ai.

¹¹ Yuda amyu masha ni hte Israela amyu masha ni rau bai zup hpawng wa na mara ai. Shanhte gaw shanhte a matu ningbaw langai sha lata san da nna, shanhte a mungdan hta rawt kaba wa nhtawm ngamu ngamai wa na mara ai. Rai sa, Yezrela a shani gaw galu kaba ai shani tai na ra ai!