ESAIA 60 - Jinghpaw Common Language Bible 2009

Du Na Ra Ai Aten Na Yerusalem A Hpung Shingkang

¹ Yerusalem e, rawt u, ajan zawn htoi tu u; Dai Madu a hpung shingkang gaw na a ntsa e htoi tu nga ai!

² Kaga masha amyu baw ni gaw nsin hte ka-up da hkrum na mara ai, Rai ti mung dai Madu a nhtoi gaw na a ntsa e htoi tu na ra ai; Shi a htoi kabrim ai hpung shingkang gaw nang hte rau nga nga na ra ai.

³ Masha amyu baw ni gaw na a nhtoi de, Hkawhkam ni gaw na a nhtoi nnan a jahpawt manap de du sa wa na mara ai.

⁴ Grup yin de mada yu nna hpa byin nga ai hpe yu yu u: Na a amyu masha ni gaw dum nta de wa na matu zup hpawng nga ma ai! Na a shadang sha ni sumtsan kaw na wa na mara ai; Na a shayi sha ni ma kaji ni zawn pawn ba la ai hkrum na mara ai.

⁵ Nang gaw dai lam hpe mu nna kabu gara ai hte hpring na ndai; Nang gaw myit n dawt ai hte hkrit gari wa na ndai. Masha amyu baw ni a sut gan nang hpang de la sa na mara ai; Panglai din ai shara hkan na shanhte a sut gan ni du sa wa na mara ai.

⁶ Gawla-uk ni hte hpaga ga ai wunawng mi gaw Midian hte Ehpa mung kaw na du sa wa na mara ai. Shanhte gaw Sheba mung na aja hte manam pyaw ai baw la sa na mara ai. Amyu masha ni gaw dai Madu galaw nu ai kabu gara shiga a lam tsun na mara ai!

⁷ Kedara mung hte Nebaiot mung na sagu ni yawng Nang hpang de la sa nna shagu hkungga ni zawn Dai Madu awng sharawng na matu tawn hkungri ntsa hta nawng ya nga masai. Dai Madu gaw shi a Nawku Htingnu hpe shawng na hta grau nna hpung shingkang rawng shangun na ra ai.

⁸ Sumwi ni zawn mawng nna, tsip de nhtang wa nga ai hkrudu ni zawn Ndai sanghpaw li ni kaning re ai ni rai nga a ta?

⁹ Dai ni gaw sumtsan mung na du wa ai sanghpaw li ni rai nna, Karai Kasang a amyu masha ni hpe nta de woi wa nga ma ai. Shanhte gaw masha amyu baw ni yawng hpe Shi a amyu masha ni a matu shagrau sha-a hkrum shangun nga sai. Dai Madu Israela a chyoi pra ai Karai Kasang hpe Shagrau sha-a na matu shanhte hte rau aja gumhpraw la wa ma ai.

¹⁰ Dai Madu gaw Yerusalem hpe, “Maigan masha ni gaw na a bunghku ni hpe bai gaw gap wa na mara ai, Shanhte a hkawhkam ni nang hpe daw jau na mara ai. Nye a masin kahtet ai majaw, ngai nang hpe ari jaw ni ai. Rai ti mung, ya chyawm gaw ngai nang hpe myi man shapa ya ai hte matsan dum ai myit madun dan na nngai.

¹¹ Na a chyinghka ni shani shana hpaw da lu na rai ndai, Shaloi masha amyu baw ni a hkawhkam ni Shanhte a sut gan nang kaw la shang wa na mara ai.

¹² Rai ti mung nang hpe n daw jau ai masha amyu Baw ni gaw tsep kawp shamyit kau hkrum na mara ai.

¹³ “Marau hpun, shinglim hpun hte chyamka hpun ngu ai Lebanon a maling htinggram kaw na kaja htum ai hpun gaw Nang Yerusalem hpe bai gaw gap na matu mung, Nye a Nawku Htingnu shatsawm na matu mung, Nye a mare hpe hpung sharawng na matu mung, du na ra ai.

¹⁴ Nang hpe dip gamyet sha lai wa sai ni a aru arat ni gaw Shanhte a hkungga lara ai hpe madun na matu gum dagup na mara ai. Nang hpe lang mi n kaw n law di lai wa sai ni yawng na a lagaw nhpang e nawku na mara ai. Shanhte gaw nang hpe, ‘Dai Madu a Mare,’ ‘Ziun ngu ai, Israela a Chyoi Pra Ai Karai Kasang a Mare,’ ngu nna shaga na mara ai.

¹⁵ “Nang gaw galoi mung kau da nna n dawng ai hkrum sana n rai, Shagram kau da ai mare, katsi katsang mare tai sana n rai. Ngai gaw nang hpe galu kaba ai hte tsawm htap shangun na nngai, Htani htana prat dingsa kabu gara ai shara shatai na nngai.

¹⁶ Masha amyu baw ni hte hkawhkam ni gaw Nang hpe kanu gaw shi a kasha hpe bau maka ai zawn lanu lahku na mara ai. Dai Madu ngai nan nang hpe hkye la ni ai lam hpe mung, Israela a chyahtum chyalai n-gun rawng ai Karai Kasang nang hpe shalawt dat ai lam hpe mung, nang chye wa na ndai.

¹⁷ “Ngai gaw nang hpang de magri mang a malai aja, Hpri hte hpun a malai gumhpraw hte magri mang, Nlung a malai hpri la sa na nngai. Na a mung up du ni galoi mung nang hpe dip gamyet na ra ai n rai; Ngai gaw shanhte hpe teng man rap ra ai tara hte ngwi pyaw sim sa lam hte up shangun na nngai.

¹⁸ Kashun kashe du daw sai hkaw ai nsen hpe galoi mung na lu sana n rai; Jahten shaza ai amu gaw na a mungdan hpe bai ga gamang kau na ra ai n rai. Ngai gaw nang hpe bunghku zawn makawp maga nna dahpran shara tai ya na nngai; Ngai gaw nang hpe hkye la ni ai majaw, nang ngai hpe shakawn kungdawn na rai ndai.

¹⁹ “Ajan gaw na a matu shani na nhtoi tai sana n rai, Shata gaw na a matu shana na nhtoi tai sana n rai; Dai Madu ngai gaw na a matu htani htana nhtoi tai nga na nngai; Nye a hpung shingkang a nhtoi gaw na a ntsa e htoi tu nga na ra ai.

²⁰ Na a yawn hkyen ai nhtoi ni gaw htum mat na ra ai. Dai Madu ngai nan na a htani htana nhtoi tai nga na nngai, Dai gaw ajan hte shata yan hta grau nna agrin nga na ra ai.

²¹ Na a amyu masha ni gaw ding man ai amu mahkra galaw na mara ai, Mungdan hpe htani htana madu la na mara ai. Nye galu kaba ai lam yawng mayawng hpe madun dan na matu, Ngai shanhte hpe hkai da nna, shanhte hpe lajang da ni ai.

²² Kaji htum ai hte grit htum ai na a dinghku pyi Galu kaba nna daru magam n-gun rawng ai amyu baw tai wa na mara ai. Dai aten du ai shaloi, Ngai gaw ndai lam hpe lawan shabyin dat na nngai. Ngai gaw dai Madu rai nga nngai!”