ESAIA 56 - Jinghpaw Common Language Bible 2009

Masha Amyu Baw Ni Yawng Karai Kasang A Amyu Masha Ni Hta Lawm Wa Na Mara Ai

¹ Dai Madu gaw shi a amyu masha ni hpe, “Teng man ai hte ding man ai amu galaw mu, ngai gaw kade n na yang nanhte hpe hkye la na nngai.

² Ngai gaw Bansa Nhtoi hpe tut nawng hkan sa nna dai nhtoi hpe awu asin n di ai ni hpe shaman ya na nngai. Ngai gaw n hkru ai amu hpa mung n galaw ai ni hpe shaman ya na nngai,” ngu nna tsun ai.

³ Dai Madu a amyu masha ni kaw hkan nga sai maigan masha wa gaw, “Dai Madu gaw ngai hpe shi a amyu masha ni hte rau n nawku shangun na re,” nga nna n tsun hkrup u ga. Unuk gaw shi hta kashu kasha n lu sai, shi gaw galoi mung Karai Kasang a amyu masha daw chyen mi pyi n tai lu na sai, ngu nna galoi mung n myit la mai ang nga ai.

⁴ Dai Madu gaw shing re ai lasha wa hpe, “Nang gaw nye Bansa Nhtoi hpe hkan nang ai hku nna ngai hpe shagrau sha-a ai hte mung, ngai ra sharawng ai amu hpe nang galaw ai hku nna mung, nye a ga shaka hpe sadi sahka hte shatup ai hku nna mung nang galaw ai rai yang,

⁵ na a mying gaw nye a Nawku Htingnu hta mung, nang kashu kasha lu ai rai yang dai ni hta grau nna, nye a amyu masha ni a lapran ni hta adum nga na mara ai. Nang gaw galoi mung malap kau hkrum na n rai nga ndai,” ngu nna tsun nga ai.

⁶ Dai Madu gaw shi hpe tsaw ra nna shi hpe daw jau nga ai shi a amyu masha ni a daw chyen mi tai nna, Bansa Nhtoi hpe hkan nang ai hte, shi a ga shaka hpe sadi sahka hte shatup nga ai maigan masha ni hpe ning ngu tsun wu ai:

⁷ “Ngai gaw nang hpe nye a chyoi pra ai kawng ngu ai Ziun de woi sa nna, nye a akyu hpyi nta hta nang hpe kabu gara lam jaw na nngai, nye a tawn hkungri ntsa nang nawng jau ya ai shagu hkungga ni hpe hkap la na nngai. Nye a Nawku Htingnu gaw masha amyu baw ni yawng a amyu masha ni a matu akyu hpyi ai nta langai ngu shamying hkrum na ra ai.”

⁸ Bawng dung hkrum ai kaw na Israela dum nta de woi wa ai Tsaw Htum ai dai Madu gaw shi a amyu masha ni hte matut mahkai wa na matu kaga masha ni hpe naw woi wa na ra ai, ngu ga sadi tawn da nga sai.

Israela A Ningbaw Ni Daw Dan Ai Hkrum Ma Ai

⁹ Dai Madu gaw maigan masha amyu baw ni hpe matse labye dusat ni zawn du sa wa nna shi a amyu masha ni hpe kawa sha kau na lam tsun nu ai.

¹⁰ Shi gaw, “Nye a amyu masha ni hpe sadi jaw na zawn nawn ai ningbaw ni yawng, myi kyaw nga ma hka! Shanhte gaw hpa mung n chye ma ai. Shanhte gaw n wau ai sha, sin yu nga ai gwi ni hte bung ma ai-shanhte gaw hpum yup nga nna yup mang mu ma ai. Shanhte yup nga ai gaw kade sha yu tsaw ra hpa rai nga a hka!

¹¹ Shanhte gaw galoi mung kan n hkru ai lawhpa gwi ni zawn rai ma ai. Ndai ningbaw ni gaw chye na hkawn hkrang ai nyan hpa mung n rawng ma ai. Shanhte awng sharawng ai hte shanhte a akyu mu tam ai shaloi sha, shanhte langai hte langai galaw ma ai.

¹² Ndai chyaru ya ni gaw, ‘Anhte sabyi ntsin shapraw ga, anhte dang lu ai made yawng lu ga! Hpawt ni pyi gaw dai ni na hta grau pyaw na ra ai!,’” ngu nna tsun ma ai.