ESAIA 25 - Jinghpaw Common Language Bible 2009

Shakawn Kungdawn Mahkawn Ga

¹ Madu e, nang gaw nye a Karai Kasang rai nga ndai; Ngai nang hpe shagrau na nngai, na a mying nsang hpe kungdawn na nngai. Nang gaw mauhpa amu ni hpe galaw nit dai; moi kaw nna nang galaw ai yaw shada lam ni hpe nang kangka ai hte galaw da nit dai.

² Nang gaw mare ni hpe jahten sharun kau nit dai, shanhte a ngang ai hpyen dap ni hpe jahten kau nga ndai. anhte a gumlau hpyen ni gap da ai hkawhkam htingnu ni htani htana hkoi mat masai.

³ Daru magam n-gun rawng ai masha amyu baw ni nang hpe shakawn kungdawn na mara ai; Mazut ai masha amyu baw ni a mare ni nang hpe hkrit kamyin wa na mara ai.

⁴ Matsan mayan masha ni hte karum la masha n lu ai ni gaw nang kaw hprawng shang wa nna ru tsang hkrum ai aten ni hta shim lum nga ma ai. Nang gaw shanhte hpe nbung laru kaw na makoi shingbyi shara jaw ai hte hkru kahtet kang nga ai kaw na shingnip ka-up da ya nga ndai. Mazut ai gumlau hpyen ni gaw nshung ta na nbung laru langai zawn,

⁵ hkun hkraw ai lamu ga hta jan gri ai zawn gasat ma ai. Rai ti mung, Madu e, nang gaw anhte a gumlau hpyen ni hpe jasim kau ya nit dai; nang gaw mazut ai masha ni a jahtau garu ai nsen hpe kahtet kang ai shani e sumwi ka-up katsi shangun ai zawn shangap kau nga ndai.

Karai Kasang Lusha Poi Hkyen Ai

⁶ Chyahtum Chyalai N-gun rawng ai dai Madu gaw ndai Ziun Bum ntsa e mungkan ga na amyu baw ni yawng a matu lusha poi langai hkyen ya na ra ai, dai gaw dwi sau mu mai htum ai lusha hte hkyeng tsawm ai sabyi machyan lusha poi rai nga ai.

⁷ Ndai yang e shi gaw masha amyu baw yawng a ntsa e ka-up da ai yawn hkyen sumwi hpe akajawng sha gun kau ya na ra ai.

⁸ Dai Tsaw Htum ai Madu gaw si hkrung si htan hpe htani htana jahten kau na ra ai! Shi gaw masha shagu a myi ni kaw na hkrat ai myi prwi ni hpe katsut kau ya nna, shi a amyu masha ni mungkan ting hta hkrum sha lai wa sai kaya kahpa hpe mung la kau ya na ra ai. Dai Madu shi nan tsun nu ai.

⁹ Dai lam byin wa ai shaloi, masha hkum shagu gaw, “Shi gaw anhte a Karai Kasang rai nga a hka! Anhte shi hpe kam hpa saga ai, shi gaw anhte hpe hkye mawai la nu ai. Shi gaw dai Madu rai nga ai! Anhte shi hpe kam hpa saga ai, ya chyawm gaw shi anhte hpe hkye la mi ai majaw, anhte kabu gara ai hte awng sharawng nga ga ai,” ngu nna tsun na mara ai.

Karai Kasang Gaw Moba Hpe Ari Jaw Na Ra Ai

¹⁰ Dai Madu gaw Ziun Bum hpe makawp maga na ra ai, rai ti mung Moba masha ni chyawm gaw yihku hpe ngahkyi hta kabye anyak kau ai zawn kabye anut kau ai hkrum na mara ai.

¹¹ Shanhte gaw hka hpung yawt shakut ai ni zawn shanhte a lata ni shaw ladawn wa na mara ai, rai ti mung Karai Kasang gaw shanhte hpe shagrit kau na ra ai, shanhte a lata ni tsu mat nna lup mat na mara ai.

¹² Shi gaw Moba a tsaw la ai hpyen dap bunghku ni hpe jahten kau na ra ai, dai ni hpe ga nhpu du hkra jahkrat kau na ra ai.