BU HKAWM 31 - Jinghpaw Common Language Bible 2009

Midian Hpe Ninghkap Ai Chyoi Pra Majan

¹ Dai Madu gaw Mawshe hpe,

² “Israela amyu masha ni hpe shanhte woi galaw shut ai a matu, Midian masha ni hpe ari jaw mu. Dai bungli hpe nang galaw shangut da lu ai hpang, nang si lu na rai ndai,” ngu nna tsun wu ai.

³ Dai rai nna Mawshe gaw amyu masha ni hpe, “Majan a matu shajin da mu; shaloi nanhte gaw Midian masha ni hpe gasat lu nna dai Madu hpe shanhte kaning rai galaw kau ai a matu shanhte hpe ari jaw lu na rai myit dai.

⁴ Israela amyu bawsang shagu hta na hpyen gasat masha hkying hkying hpe shangun dat na rai myit dai,” ngu nna tsun wu ai.

⁵ Shing rai amyu baw shagu hta na lasha hkying hkying hte hpe lata san da ma ai rai nna hpyen gasat na lasha ni yawng mun mi hkying lahkawng shajin da ma ai.

⁶ Mawshe gaw chyoi pra ai arai ni hte pahtau dum let masat kumla jaw ai hta woi awn ai hkinjawng Eleaza a kasha Hpineha a woi hkang ai npu hta shanhte hpe shangun dat wu ai.

⁷ Shanhte mung dai Madu Mawshe hpe hkang da ai hte maren, Midian masha ni hpe gasat ma yang, lasha nlang yawng hte hpawn,

⁸ Midian hkawhkam manga rai nga ai Ewi, Rekem, Zura, Hura hte Reba ni lawm hkra sat kau ma ai. Beora a kasha Balam hpe mung sat kau ma ai.

⁹ Israela amyu masha ni mung Midian numsha ni hte ma kaji ni hpe rim la nhtawm shanhte a dumsu yam nga hpung ni hte sut gan yawng hpe magawn la nna

¹⁰ shanhte a mare kahtawng ni hte dap ni yawng hpe nat kau ya ma ai.

¹¹ Shanhte rim la lu ai lanep yawng hte hpawn bawng masha ni hte yam nga ni la nhtawm

¹² Yerihko a tawtap Yawdan hka wora hkran na Moba pa ni hta dap jung nga ai Mawshe yan Eleaza hte Israela masha shawa hpung hpang de woi wa ma ai.

Nhtang Wa Ai Hpyen Luksuk

¹³ Mawshe, Eleaza hte shawa hpung na ningbaw ni yawng hpyen luksuk hpe tau la na nga, dap shinggan de pru sa ma ai.

¹⁴ Mawshe chyawm gaw majan pa kaw na nhtang wa ai du salang ni, dap up hkang du ni hte dap ran up hkang du ni hpe hkap pawt wu ai.

¹⁵ Shi gaw shanhte hpe, “Nanhte gaw dai numsha ni yawng hpe hpa majaw jahkrung da nga myit ni?

¹⁶ Dai numsha ni gaw Balam hpaji daw matsun ai hta hkan nna amyu masha ni hpe woi hkalem nhtawm Peora e dai Madu hpe n kam n sham shangun nga ai hpe dum mu. Dai lam a majaw dai Madu a amyu masha ni hta ana zinli ari hkrum sha lai wa saga ai.

¹⁷ Lasha shagu hpe mung, la hte kanawn yu sai numsha shagu hpe mung ya jang sat kau mu;

¹⁸ rai ti mung numsha ma ni yawng hte hkawn jet numsha ni yawng hpe chyawm gaw nanhte a matu jahkrung da na rai myit dai.

¹⁹ Nanhte hta na masha sat ai wa hte si mang hkra ai wa kadai mung dap shinggan e sanit ya tup naw but nga lu na rai myit dai. Nanhte nan mung, nanhte rim wa ai numsha ni mung masum ya hte sanit ya shani hta jasan jaseng kau lu na rai myit dai.

²⁰ Hpun palawng shagu hpe mung, shanhpyi, bainam mun, hpun hte galaw ai arai shagu hte hpe mung jasan jaseng lu na rai myit dai,” ngu nna tsun wu ai.

²¹ Hkinjawng Eleaza mung majan pa de na nhtang wa ai ni hpe, “Ndai lam ni gaw dai Madu Mawshe hpe hkang da sai tara ni rai nga ai.

^22-23 Aja, gumhpraw, magri mang, ahpri, ajang hte machyu zawn re ai wan hta n hkru lu ai arai ni hpe wan hta galip shalai nna jasan jaseng la na rai myit dai. Jasan jaseng ai hka hta arai shagu hte hpe jasan jaseng la na rai myit dai.

²⁴ Sanit ya ngu na shani hta nanhte a hpun palawng ni hkrut lu na rai myit dai; dai hpang mahtang, nanhte mung san seng wa nna dap de bai shang wa lu na rai myit dai,” ngu nna tsun wu ai.

Lanep Karan Ai

²⁵ Dai Madu gaw Mawshe hpe,

²⁶ “Nang mung, Eleaza hte shawa hpung ting na ningbaw ni mung shanhte rim wa ai arai shagu hte hpawn bawng masha ni hte yam nga ni hpe hti da na rai myit dai.

²⁷ Dai ni hpe ka-ang hkup hkup karan nhtawm hpyen gasat ai hpyenla ni a matu ka-ang hkup, shawa hpung ting a matu ka-ang hkup di nna karan ya na rai myit dai.

²⁸ Hpyenla ni madu la lu ai hta na dai Madu a kang a matu bawng masha, dumsu, lawze, sagu hte bainam, manga tsa hta langai mi hku tawn da na rai myit dai.

²⁹ Dai ni hpe dai Madu a matu laksan hkungga shatai na hkinjawng Eleaza a lata de ap ya na rai myit dai.

³⁰ Amyu masha ni lu la ai ka-ang hkup hta na bawng masha, dumsu, lawze, sagu hte bainam re ai yam nga manga shi hta na langai mi hku la da na rai myit dai. Dai hpe dai Madu a Sum hta amu galaw woi hpareng nga ai Lewi masha ni hpe jaw na rai myit dai,” ngu nna tsun wu ai.

³¹ Mawshe yan Eleaza yan mung dai Madu hkang da sai hte maren galaw ma ai.

^32-35 Hpyenla ni shanhte a matu kyem da ai arai gale hta kaga shanhte rim magawn wa ai ni gaw sagu bainam 675,000, dumsu 72,000, lawze 61,000 hte hkawn jet 32,000 hte rai nga ai.

^36-40 Hpyen gasat ai hpyenla ni lu la ai ka-ang hkup gaw sagu bainam 337,500 rai nna dai Madu a kang a matu 675 rai nga ai. Dumsu 36,000 hta na dai Madu a kang a matu 72 rai nga ai. Lawze 30,500 hta na dai Madu a kang a matu 61 rai nga ai; hkawn jet numsha 16,000 hta na dai Madu a kang a matu 32 rai nga ai.

⁴¹ Mawshe gaw dai Madu hkang da ai hte maren, dai Madu a matu laksan hkungga shatai na kang Eleaza hpe jaw ya wu ai.

^42-46 Shawa hpung a kumhtaw mung hpyenla ni hte maren rai nga ai; dai ni gaw sagu hte bainam 337,500, dumsu 36,000, lawze 30,500 hte hkawn jet 16,000 rai nga ai.

⁴⁷ Mawshe gaw ndai kumhtaw ni hta na bawng masha hte yam nga manga shi hta na langai mi hku hta la nna dai Madu hkang da ai hte maren dai Madu a Sum hta amu woi hpareng ai Lewi masha ni hpe ap ya wu ai.

⁴⁸ Dai hpang hpyen luksuk up hkang ai du salang ni, Mawshe kaw sa nhtawm,

⁴⁹ “Madu e, anhte up hkang ai npu na hpyenla ni hpe hti yu ga yang, langai mi mung n mat nga ai.

⁵⁰ Dai rai nna anhte la wa ai ja hte galaw ai shakya arai, lata shanghkawng, lahkawn, lachyawp, na lakan hte kachyi ni hpe la sa nga ga ai. Anhte a asak a matu htingrai ya na dai Madu hpe nawng ya ga ai; shaloi shi anhte hpe makawp maga la na ra ai,” ngu nna tsun ma ai.

⁵¹ Mawshe yan Eleaza gaw shanhte a mawn sumli ai baw ja rai yawng hpe hkap la da ma ai.

⁵² Du salang ni sak jaw ai arai yawng hpe shen yu yang pawng mali tsa jan rai nga ai.

⁵³ Du salang n re ai ni mung shanhte la wa ai lanep mazing la lu ma ai.

⁵⁴ Dai rai nna dai Madu mung Israela amyu masha ni hpe makawp maga la wu ga, Mawshe yan Eleaza mung dai ja rai ni hpe Sum kata de shawn da ma ai.