BU HKAWM 27 - Jinghpaw Common Language Bible 2009

Zelohpehad A Shayi Sha

¹ Yosep a kasha Manashe, shi a kasha Mahkira, shi a kasha Gilead, shi a kasha Zelohpehad hta shayi sha Mala, Hogla, Milhka hte Tiza ni nga ma ai.

² Shanhte gaw Mawshe hte hkinjawng Eleaza a man e mung, ningbaw ni hte dai Madu a hpung shingkang shanu nga ai Sum a chyinghka lam na shawa masha yawng a man e sa shang let,

³ “Anhte a wa gaw shadang sha n lu ai sha nam mali e si mat sai. Dai Madu hpe gumlau ai Kora a hpang hkan ai ni hta shi lawm ai n rai; shi a yubak mara a majaw shi si wa sai.

⁴ Shi hta shadang sha n lu ai a majaw sha anhte a wa a mying hpe Israela hta na hpa majaw shamat kau ang na rai nga a ni? Dai rai nna anhte a wa a kahpu kanau ni a lapran e anhte hpe sut gan sali jaw mi,” ngu nna tsun ma ai.

⁵ Mawshe mung shanhte a amu hpe dai Madu hpang de jashawn wu ai rai nna,

⁶ dai Madu mung shi hpe, “Zelohpehad a shayi sha ni hpyi lajin ai ga mung,

⁷ jaw nga malu ai; shanhte a kawa a kahpu kanau ni a lapran e sut gan sali karan jaw na rai ndai. Shanhte a kawa hkam la ging ai sali wunli shanhte hpe hkam la shangun na rai myit dai.

⁸ Masha langai ngai shadang sha n lu ai sha si mat wa yang, shi sali wunli hpe shi a shayi sha ni hkam la lu nga ai.

⁹ Shi hta shayi sha mung n lu ai rai yang gaw shi a kahpu kanau ni dai sali hkam la na rai ma ai.

¹⁰ Shi hta kahpu kanau ni mung n nga ai rai yang, shi kawa a kahpu kanau ni hpe dai sali jaw na rai ma ai.

¹¹ Shi a kawa di, kawa toi mung n nga sai rai yang, shi hte ni htum ai jinghku wa hpe jaw nna dai hpe shi a sali majing zawn mahkyu la na rai wu ai, ngu nna Israela amyu masha ni hpe tsun u. Ngai Madu nan nang hpe hkang da ni ai hte maren, Israela amyu masha ni ndai tara matsun lam hpe hkan sa lu na rai ma ai,” ngu nna tsun wu ai.

Mawshe A Shara Hta Yawshu Hpe San Da Ai

¹² Dai Madu gaw Mawshe hpe, “Dai Abarim Bum ni de lung wa nhtawm Israela ni hpe ngai jaw ai mungdan wa mada la su.

¹³ Dai hpe nang mada la ngut jang, na a nhpu Arun zawn si na rai ndai; hpa majaw nga yang, Zin Nam Mali e nan lahkawng nye a hkang da ai ga hpe gumlau kau myit dai.

¹⁴ Shawa hpung ting dai Meriba shara e ngai hpe aput angun nga nna nhtan shai hkat nga yang, shanhte a man e nye a chyoi pra ai daru magam n-gun hkam la na ningdang kau myit dai,” ngu nna tsun wu ai. (Meriba gaw Zin Nam Mali na Kadesha shara hta pru ai hka hpawk rai nga ai.)

¹⁵ Mawshe gaw, “Asak sumri yawng a npawt rai nga ai

¹⁶ Madu Karai Kasang e, ndai amyu masha ni hpe woi awn lu nna

¹⁷ shanhte hpe majan gasat yang woi hkang lu ai masha langai mi san da ya u law; shaloi na a shawa hpung gaw rem ai wa n nga ai sagu zawn n rai mat mu ga,” ngu nna hpyi tsun wu ai.

¹⁸ Dai Madu gaw Mawshe hpe, “Atsam ningja hte hpring ai Nun a kasha Yawshu hpe woi la nna shi a baw ntsa hta na a lata mara u;

¹⁹ Hkinjawng Eleaza hte shawa hpung ting a shawng e shi hpe shatsap tawn nhtawm shanhte yawng a man e shi hpe na a hkang galai ai wa rai nga ai ngu nna shi hpe tsun na rai myit dai.

²⁰ Na a ahkaw ahkang nkau mi shi hpe jaw ya u; shaloi Israela shawa hpung ting gaw shi a ga madat mara wa na mara ai.

²¹ Shi gaw nye a myit ra lam hpe Urim hte Htumim hte san ya ai hkinjawng Eleaza hpe kam hpa shamyet shanat na rai wu ai. Ndai hku nna, Eleaza gaw Yawshu hte Israela shawa hpung ting hte shanhte a magam bungli ni yawng hpe matsun madun na rai wu ai,” ngu nna tsun wu ai.

²² Dai Madu gaw shi hpe hkang da sai hte maren Mawshe galaw wu ai. Shing rai shi gaw Yawshu hpe hkinjawng Eleaza hte shawa hpung ting a man e tsap shangun wu ai.

²³ Dai Madu hkang da nu ai hte maren, Yawshu a baw ntsa hta Mawshe a lata mara ai hte shi a ahkang aya galai hkam la na lam shi hpe tsun wu ai.