2 SAMUELA 21 - Jinghpaw Common Language Bible 2009

Shawlu A Amyu Matu Ni Sat Kau Hkrum Ai

¹ Dawi up hkang nga ai laman, masum ning tup laja lana re ai hkuwa byin wa sai. Dai rai nna Dawi gaw dai hte seng nna dai Madu hpe san yu wu ai shaloi, dai Madu gaw, “Shawlu hte shi a dinghku masha ni masha sat ai amu shut kau ai mara lu nga ma ai. Shi gaw Gibeon masha ni hpe sat kau nu ai,” ngu nna tsun wu ai.

² (Gibeon masha ni gaw Israela masha ni n rai ma ai. Shanhte gaw Israela masha ni e makawp maga la na matu ga sadi jaw da hkrum ai Amori masha ni hta na amyu kaji ni sha rai nga ma ai; rai ti mung Shawlu mahtang Israela hte Yuda masha ni a akyu matu grau myit sharawng wu ai majaw shanhte hpe jahten shabyak kau na maw wu ai.)

³ Dai re ai majaw Dawi gaw Gibeon masha ni hpe shaga la nhtawm, “Nanhte a matu ngai hpa galaw ya lu na rai ta? Dai Madu a amyu masha ni hpe nanhte shaman ya lu myit ga, nanhte hpe galaw shut kau sai amu a matu ngai htingrat ya mayu nga nngai,” ngu nna shanhte hpe tsun wu ai.

⁴ Shanhte gaw, “Shawlu hte shi a dinghku masha ni hte ga law ndang kalang ai hta aja gumhpraw hte amu n kam sharawng mayu ga ai; Israela masha kadai hpe mung anhte n sat kau mayu ga ai,” ngu nna htan ma ai. Dawi gaw, “Ataw dai hku she nga yang gaw, nanhte a matu ngai hpa galaw ya ang na lam myit lu nga myit ni?,” ngu nna san wu ai.

⁵ Shanhte gaw, “Israela mung gara shara e mung anhte hta na kadai hpe mung n jahkrung da mayu ai hte Shawlu shi anhte hpe jahten shamyit kau mayu wu ai.

⁶ Dai re ai majaw shi a shadang sha sanit hpe ap ya mi; dai Madu lata san da sai Hkawhkam Shawlu a mare ngu na Gibea e dai Madu a man hta shanhte hpe noi da na ga ai,” ngu nna htan ma ai. Hkawhkam wa mung, “Ngai shanhte hpe ap ya na de ai,” ngu nna htan wu ai.

⁷ Rai ti mung shi hte Yonahtan a lapran chyoi pra ai ga sadi hpe shada da shagrin da nga manu ai majaw, Shawlu a kashu, Yonahtan a kasha Mehpiboshet hpe shalawt da ya wu ai.

⁸ Hpa mi rai ti mung, shi gaw Aia a shayi sha Rizpa kaw na Shawlu a matu shangai ya ai Armoni hte Mehpiboshet hpe mung, Shawlu a shayi sha Merab hte Mehola mare na Barazilai a kasha Adriela yan shaprat ya ai shadang sha manga hte hpe woi la wu ai.

⁹ Dawi gaw shanhte hpe Gibeon masha ni a lata de ap ya wu ai rai nna shanhte mung bum ntsa dai Madu a man e noi da ma ai; shanhte marai sanit hte yawng rau sha si mat ma ai. Shanhte hpe sat ai shani gaw muk-yaw mam dan hpang ai shani ngu na ginhtawng ta a hpang daw na aten hta ang nga ai.

¹⁰ Dai hpang Aia a shayi sha ngu na Shawlu a lashi num Rizpa gaw moi mang tawn da ai lunghtawn ntsa e shi a matu shingbyi shara langai mi hpe lachyit nba hte gap da nna, dai yang e nmut dan hpang ai shani kaw nna mangai marang hkrat ai aten du hkra nga nga wu ai. Dai laman hte hta shani e moi mang ni hpe ntsa malen u ni n sa sha hkra mung, shana e matse labye dusat ni n sa kawa hkra mung makawp maga let gawn nga wu ai.

¹¹ Dawi gaw Rizpa hpa galaw nga ai lam hpe na jang,

¹² Gilead mung e nga ai Yabesha masha ni a lata hta nga ai Shawlu hte shi a kasha Yonahtan a nrut nra ni hpe sa la da wu ai. (Ya Yabesha masha ni gaw Gibeon bum ntsa e Hpilisti masha ni Shawlu hpe sat kau nhtawm shi a moi mang hpe noi kau da ai Bet Shan shawa shara pa kaw na sa lagu tawn da nga ma ai.)

¹³ Dawi gaw Shawlu yan Yonahtan a nrut nra hpe mung, noi da sai masha sanit a nrut nra ni hpe mung shinggyin da wu ai.

¹⁴ Dai hpang Shawlu hte Yonahtan a nrut nra ni hpe Benyamin lamu ga Zela shara na Shawlu a kawa Kisha a lupwa hta makoi mayang da ma ai. Shing rai hkawhkam wa hkang da ai lam yawng hpe galaw ngut ai hpang she mungdan a matu shanhte a akyu hpyi ai ga, Karai Kasang htan ya wu ai.

Marim Mangam Galu Kaba Ai Hpilisti Masha Ni Hte Majan Byin Ai

¹⁵ Hpilisti masha ni hte Israela ni a lapran majan bai byin wa ai majaw Dawi hte shi a masha ni Hpilisti masha ni hpe sa gasat ma ai. Majan kalang mi sha naw gasat yang, Dawi gaw pu ba mat wu ai.

¹⁶ Marim mangam rai galu kaba nna Ishbibeno mying ai wa gaw pawng sanit chyen daram li ai magri mang nri lang, nhtu nnan hte hpyen hking sumraw da ai rai nna Dawi hpe sat lu na zawn nawn da wu ai.

¹⁷ Rai ti mung Zeruia a kasha Abishai mahtang Dawi hpe sa karum ai hte dai masha kaba wa hpe htim gasat ai hte sat kau wu ai. Dai hpang Dawi a masha ni gaw shanhte hte rau galoi mung majan n pru gasat na matu Dawi hpe ga sadi jaw shangun mu ai. Shanhte gaw, “Nang gaw Israela a myit mada shara rai nga ndai majaw hkrat sum mat na anhte n ra sharawng ga ai,” ngu nna tsun ma ai.

¹⁸ Dai hpang Goba shara e Hpilisti masha ni hte majan bai byin ai shaloi mung Husha masha Sibehkai mahtang dai marim mangam rai galu kaba ai Sap mying ai wa hpe sat kau wu ai.

¹⁹ Hpilisti masha ni hte Goba shara e majan bai byin yang, Betlehem mare na Yaira a kasha Elhanan gaw Gat mare na dahkaw daram kaba ai nri numdu lang ai Goliat hpe sat kau wu ai.

²⁰ Dai hpang Gat mare e gasat gala ai hpe yu ra sharawng ai masha kaba langai hte majan bai byin sai. Dai wa gaw lata maga mi de layung kru kru, lagaw maga mi de layung kru kru tu ai wa rai nga ai.

²¹ Shi gaw Israela masha ni hpe grang dakat nna ninghkap wu ai majaw Dawi a kahpu Shama a kasha Yonahtan shi hpe sat kau wu ai.

²² Dai masha mali hte gaw Gat mare e nga ai dai marim mangam rai galu kaba ai wa a amyu matu ni rai ma ai. Shanhte yawng hte gaw Dawi hte shi a masha ni a lata hta sat kau hkrum ai ni rai ma ai.