2 SAMUELA 16 - Jinghpaw Common Language Bible 2009

Dawi Hte Ziba

¹ Dawi gaw kawng pungding de loi mi sit sa wu yang, Mehpiboshet a shangun ma Ziba hte daw htaw sai lawze lahkawng hta muk tawng lahkawng tsa, sabyi si sumbaw latsa, kaja ai namsi sumbaw latsa, hte sabyi ntsin hpring hkra rawng ai shanhpyi tingsan langai htaw sa wa ai hte akajawng sha hkrum wu ai.

² Hkawhkam Dawi gaw shi hpe, “Dai arai ni yawng hpe hpa galaw na ngu n ta?,” ngu nna hkap san wu ai. Ziba chyawm gaw, “Ndai lawze lahkawng gaw madu hkawhkam a dinghku masha ni jawn na matu, muk hte namsi gaw masha sha na matu; sabyi ntsin gaw nam mali kata e shanhte hki ba jang lu na matu rai nga ai,” ngu nna htan wu ai.

³ Hkawhkam wa gaw shi hpe, “Ataw, na a madu Shawlu a kashu Mehpiboshet kanang e nga nga a ta?,” ngu nna san wu ai. Ziba chyawm gaw, “Shi a kaji Shawlu a mungdan shi hpe Israela masha ni bai jaw ya na mara ai ngu, shi myit hkawn nga ai majaw Yerusalem mare e nga nga ai,” ngu nna htan wu ai.

⁴ Hkawhkam wa gaw Ziba hpe, “Mehpiboshet madu da ai arai shagu gaw na a rai nga lit dai,” ngu nna tsun wu ai. Ziba chyawm gaw, “Ngai gaw na a shangun ma she rai nga nngai. Dai rai nna nye a hkawhkam hpe ngai tut nawng awng sharawng nga n-ga law,” ngu nna tsun htang wu ai.

Dawi Hte Shime

⁵ Hkawhkam Dawi gaw Bahurim mare de du jang, Shawlu a ru sai langai rai nga ai Gera a kasha Shime gaw shi hpe sa hkrum na nga pru sa wa ai. Shi gaw Dawi hpe matsa let sa wa nga ai.

⁶ Dawi gaw shi a masha ni hte shi a hkum hpe makawp maga ya ai sin langa ni hte gumbawm da wu ti mung Shime mahtang Dawi hte shi a du salang ni hpe nlung hte hkan kabai wu ai.

⁷ Shime gaw shi hpe matsa nhtawm, “Masha sat ai wa e! Ru hka amu galaw shapraw ai wa e! Pru mat wa u! Pru mat wa u!

⁸ Nang gaw Shawlu a mungdan hpe kashun la nga ndai; ya chyawm gaw dai Madu mung Shawlu a dinghku na masha law law hpe sat kau ai amu a majaw nang hpe ari jaw nga sai. Nang gaw hten run mat nna masha sat ai wa rai nga ndai majaw dai Madu gaw na a kasha Absalom hpe mungdan ap kau nu ai!,” ngu nna tsun wu ai.

⁹ Kanu Zeruia a kasha Abishai gaw hkawhkam wa hpe, “Madu hkawhkam wa e, ndai gwi hpe nang hpa majaw matsa shangun nga n ni? Wora de ngai woi sa nna shi a baw hpe sa kahtam di kau shangun e!,” ngu nna tsun wu ai.

¹⁰ Hkawhkam wa gaw Abishai hte shi a kahpu Yoab yan hpe, “Ndai gaw nan a bungli n rai nga ai: dai Madu shi hpe tsun shangun nga ai majaw shi ngai hpe matsa ai rai jang mung, shi shing nga ai hpe kadai wa san lu na ahkang lu nga a ta?,” ngu nna tsun wu ai.

¹¹ Dawi gaw Abishai hte shi a du salang ni yawng hpe, “Nye a kasha nan ngai hpe sat na tam shakut nga ai rai yang mung, ndai Benyamin masha ni hta nanhte hpa majaw mau kajawng shara naw nga a ni? Dai Madu shi hpe matsa shangun nga sai majaw shi hpe chyu sha tawn da nna, ra mi matsa jung nga shangun ga.

¹² Dai Madu gaw nni nkri lam hpe yu matsing nhtawm, shi matsa ai a marang e, ngai hpe shaman chyeju nkau mi jaw ya nhten,” ngu nna tsun wu ai.

¹³ Dai rai nna Dawi hte shi a masha ni matut nna lam dingyang hkawm mat wa yang, Shime mung shanhte hpe hkan dep nang nhtawm kawng nhkrem hku hkawm sa wa let shanhte hpe matsa nhtawm nlung ni kabai bun ai hte ga nhpu shamawng bun wu ai.

¹⁴ Hkawhkam wa hte shi a masha ni yawng Yawdan de du yang, shanhte hki ba mat ma ai majaw shanhte dai yang hkring sa la nga ma ai.

Yerusalem Mare E Nga Ai Absalom A Lam

¹⁵ Absalom hte shi kaw hkan nang nga ai Israela masha ni yawng gaw Yerusalem mare kata de shang wa ma ai rai nna shanhte hte rau Ahihtohpela mung lawm nga ai.

¹⁶ Absalom gaw Dawi kam ging ai manang Hushai hte hkrum jang, “Hkawhkam wa asak galu u ga law! Hkawhkam wa asak galu u ga law!,” ngu nna jahtau wu ai.

¹⁷ Absalom gaw shi hpe, “Nang sadi dung ai na a manang wa Dawi ya hpa byin mat sani? Hpa majaw nang shi kaw n hkan a ni?,” ngu nna san wu ai.

¹⁸ Hushai mung, “Ngai kaning ngu tsun lu na rai ta? Ngai chyawm gaw dai Madu hku nna mung, ndai amyu masha ni hku nna mung, Israela amyu masha ni yawng hku nna mung, lata san da ai wa a maga de ngai nga nngai. Nang hte rau ngai nga nga na nngai.

¹⁹ Nye madu a kasha n rai taw gaw, ngai daw jau ang na rai nga a ni? Ngai gaw na nwa hpe daw jau ni ai hte maren, ya mung nang hpe daw jau na de ai,” ngu nna htan wu ai.

²⁰ Dai sha n-ga, Absalom gaw Ahihtohpela hpang de kayin wa nhtawm, “Ya chyawm gaw anhte nang e rai nga saga ai; anhte hpa galaw na lam, hpaji jaw la yu e,” ngu nna tsun wu ai.

²¹ Ahihtohpela gaw, “Hkawhkam htingnu sin na matu na nwa tawn da ai lashi num ni hte sa kanawn su; shing rai jang na nwa nang hpe shi a gumlau hpyen zawn yu nna, na a hpang hkan ai ni mung myit nden kaba wa na mara ai gaw, dai Israela masha shagu chye wa na mara ai,” ngu nna htan wu ai.

²² Dai rai nna shanhte gaw Absalom a matu hkawhkam htingnu numgaw ntsa e sum galaw ya ma ai; Absalom chyawm gaw masha shagu a man hku shang mat wa nhtawm shi kawa a lashi num ni hte kanawn wu ai.

²³ Dai prat e, Ahihtohpela jaw ai hpaji ga hpa mung Karai Kasang a ga san san rai nga ai ngu nna hkap la nga ma ai majaw, Dawi hte Absalom yan mung hkan nang nga ma ai.