1 YAWHAN 2 - Jinghpaw Common Language Bible 2009

Hkristu Anhte A Karum Ai Wa

¹ Ngai shu ngai sha ni e, nanhte yubak n galaw myit ga, ndai laika hpe nanhte hpang de ngai ka dat nngai, rai ti mung masha langai ngai yubak galaw hkrup a yang gaw, dai Kawa a man e anhte a matu hpyi nem tawngban ya ai wa, Yesu Hkristu ngu ai ding hpring ai Madu anhte lu ga ai.

² Yesu Hkristu shi nan, anhte a yubak mara a matu mara gawng malai hkungga rai nga ai rai nna, shi a marang e anhte a yubak mara ni hpe raw dat kau ya mi ai hta n ga, masha shagu a yubak mara hpe mung raw dat kau ya sai.

³ Shi a hkang da ai ga hte hpe anhte madat mara hkan nang ga yang gaw, anhte shi hpe chye chyap ai ni rai nga ga ai lam hkrak chye lu ga ai.

⁴ Ngai shi hpe chye chyap nngai, nga nna marai langai ngai tsun ti mung, shi a hkang da ai ga hpe n madat n mara a yang gaw, dai wa gaw masu ai wa rai nga ai hte dai teng man ai gaw shi hta n rawng nga ai.

⁵ Kadai rai ti mung, shi a ga hpe madat mara ai rai yang, dai wa gaw, kaja wa Karai Kasang hpe hkum tsup ai hku tsaw ra lu sai wa rai nga ai. Ndai gaw anhte Karai Kasang hte gara hku nna langai sha tai lu ga ai lam hpe hkrak chye shangun ai lam rai nga ai.

⁶ Hkristu hkan sa galaw ai zawn hkan sa asak hkrung ai wa chyu sha Karai Kasang hte langai sha tai nna asak hkrung ai wa re ngu nna tsun lu nga ai.

Hkang Da Ai Lam Ningnan

⁷ Nye a tsaw ra ai ni e, ndai ya ngai ka dat ai hkang da ai ga gaw ningnan n rai nga ai, shawng ningpawt kaw nna nanhte lu tawn da sai hkang da ai ga dingsa rai nga ai. Dai hkang da ai ga dingsa gaw nanhte na yu manu ai mungga rai nga ai.

⁸ Rai ti mung ngai ya nanhte hpang de ka dat ai hkang da ai ga gaw lam mi hku nna ningnan rai nga ai; shing rai ningnan re ai lam teng nga ai hpe Hkristu a asak hkrung lam hta mung, nanhte a mahkrum madup lam ni hta mung, mu lu nga ai. Hpa majaw nga yang, ndai nsin gaw hkoi mat wa nna dai teng man ai nhtoi gaw ya e pyi htoi tu nga ai.

⁹ Kadai rai ti mung ngai gaw nhtoi hta nga nga nngai nga ninglen shi a kahpu kanau wa hpe n ju n dawng a yang gaw ya ndai ten du hkra nsin hta naw nga nga ai wa rai nga ai.

¹⁰ Kadai rai ti mung shi a kahpu kanau wa hpe tsaw ra ai wa gaw, dai nhtoi hta e nga nga ai wa rai nna, shi hta e masha langai ngai hpe yubak galaw shangun ai baw hpa mung n rawng nga ai.

¹¹ Rai ti mung shi a kahpu kanau wa hpe n ju n dawng ai wa chyawm gaw, dai nsin hta e nga nga ai rai nna, dai nsin hta hkawm sa nga ai majaw shi gara de sa wa nga ai hpe n chye wu ai, hpa majaw nga yang dai nsin gaw shi a myi hpe shakyaw kau ya wu ai.

¹² Nye a shu sha ni e, Hkristu a marang e nanhte a yubak mara ni hpe raw dat kau ya ai hkrum manit dai majaw, ngai nanhte hpe ka dat nngai.

¹³ Ji wa ni e, shawng npawt kaw nna nga nga ai wa hpe nanhte chye nga myit dai majaw, ngai nanhte hpang de ka dat nngai. Shabrang ni e, dai n hkru ai nat Satan wa hpe nanhte dang kau myit dai majaw, ngai nanhte hpang de laika ka dat nngai.

¹⁴ Nye a shu sha ni e, dai Kawa hpe nanhte chye nga myit dai majaw, ngai nanhte hpang de ka dat nngai. Ji wa ni e, shawng npawt kaw nna nga nga ai wa hpe nanhte chye nga myit dai majaw, ngai nanhte hpang de ka dat nngai. Shabrang ni e, nanhte n-gun ja myit dai rai nna, Karai Kasang a mungga gaw nanhte hta e rawng nga ai hte, dai n hkru ai nat Satan wa hpe dang kau myit dai majaw, ngai nanhte hpang de ka dat nngai.

¹⁵ Dinghta ga hpe mung, dinghta ga e nga ai arai hpe mung hkum tsaw ra myit. Nanhte dinghta ga hpe tsaw ra myit yang gaw, Kawa hpe n tsaw ra myit dai.

¹⁶ Dinghta ga hte seng ai arai nga manga, hkum shan a kayut ai lam ni, masha ni myi hte mu nna ra marit ai lam ni hte, ndai mungkan na masha ni a gumrawng gumtawng ai hte grang ai lam shagu gaw, gara mung Kawa kaw nna pru ai n rai; dai yawng mayawng gaw dinghta ga kaw na pru ai rai nga ai.

¹⁷ Dinghta ga hte hpawn, dai hta na shinggyim masha ni marin marit ai lam shagu gaw lai mat wa nga sai rai ti mung Karai Kasang a myit ra ai hku hkan galaw ai wa chyawm gaw, htani htana e anga nga ai.

Hkristu A Hpyen Wa

¹⁸ Nye a shu sha ni e, hpang jahtum ai nhtoi ni wa ra ai! nanhte hpe tsun da sai hte maren, Hkristu a hpyen ngu ai wa gaw du na ra ai rai nna, ya e pyi Hkristu a hpyen ni law law wa dawng pru ra ai majaw, hpang jahtum ai ahkying ni ra ai hpe anhte chye nga ga ai.

¹⁹ Ndai masha ni gaw galoi mung anhte a kanawn mazum ai hte n seng ai ni rai ma ai majaw, anhte kaw na shanhte pru mat wa ma ai, anhte a kanawn mazum ai hte seng ai ni rai ma taw gaw shanhte gaw anhte hte rau nga nga na ma ai. Rai ti mung shanhte nlang anhte hte kaja wa n seng ai lam dan leng wa u ga, shanhte pru mat wa ma ai.

²⁰ Rai ti mung Yesu Hkristu gaw nanhte a ntsa e dai Chyoi Pra ai Wenyi ru jaw bun ya ai hkrum manit dai rai nna, nanhte yawng mayawng gaw, dai tengman ai hpe chye lu myit dai.

²¹ Nanhte hpang de ngai laika ka dat ai lam gaw, dai teng man ai ga hpe nanhte n chye ai majaw n rai; dai teng man ai ga hpe mung, masu ai ga gaw dai teng man ai ga hte hpa n seng nga ai hpe mung, nanhte chye nga myit dai majaw ka dat ai rai nga ai.

²² Yesu gaw Meshia n rai nga ai; nga nna ndang kau ai wa sha n rai yang gaw, masu ai wa gaw kadai wa rai nga a ta? Dai Kawa hte Kasha hpe ndang kau ai wa nan, Hkristu a hpyen rai nga ai.

²³ Dai Kasha hpe ndang kau ai wa kadai rai t mung, dai Kawa hpe mung ndang kau ai wa rai nga ai. Dai Kasha hpe hkap la ai wa dai Kawa hpe mung hkap la ai wa rai nga ai.

²⁴ Nanhte gaw shawng ningpawt kaw nna nanhte na yu sai mungga hpe nanhte a kraw lawang ni hta e nga nga shangun da mu. Dai mungga nanhte hta nga nga ai rai yang gaw, nanhte gaw, Kasha hta mung Kawa hta mung tut nawng e langai sha tai na marin dai.

²⁵ Ndai gaw Hkristu nan anhte hpe ga ndat jaw da ai htani htana asak hpe lu la ai lam rai nga ai.

²⁶ Nanhte hpe masu hkalem lam shadam na matu shakut nga ai ni a lam nanhte hpang de ka dat ni ai.

²⁷ Rai ti mung nanhte chyawm gaw, Hkristu shi a wenyi hpe nanhte a ntsa e ru jaw bang ya ai hkrum manit dai rai nna, nanhte hta dai wenyi a shanu nga dingsa kadai mung nanhte hpe sharin shaga na n ra sai. Hpa majaw nga yang, shi a Wenyi gaw nanhte hpe lam shagu hta e sharin shaga nga ai rai nna, shi sharin shaga ai lam gaw teng man nga ai, masu ai lam hpa mung n lawm ai. Dai majaw nanhte gaw dai Wenyi e sharin ai hte maren madat mara hkan sa nna Hkristu hte langai sha rai nga mu.

²⁸ Rai sa shu sha ni e, shi dan pru ai shaloi nanhte gaw hkrit kaya nna gawp makoi mat n ra ai sha shi a man e nden ja ai hte tsap nga lu na matu shi hte langai sha arai nga mu.

²⁹ Hkristu gaw ding hpring nga ai hpe nanhte chye yang gaw dai ding hpring ai hku galaw hkawm sa ai masha shagu gaw Karai Kasang a kashu kasha ni rai nga ma ai hpe nanhte chye ang myit dai.