1 SAMUELA 6 - Jinghpaw Common Language Bible 2009

Ga Shaka Sumpu Bai Nhtang Wa Ai

¹ Dai Madu a Ga Shaka Sumpu gaw Hpilisti mung e shata sanit nga nga ai hpang,

² masha ni gaw hkinjawng ni hte mandan lakle sara ni hpe shaga la nhtawm, “Dai Madu a Ga Shaka Sumpu hpe anhte kaning di na rai nga ga ta? Shi a shara de bai nhtang dat dat ai rai yang, dai hpe anhte hpa hte dat dat na rai ga ta?,” ngu nna san ma ai.

³ Shanhte gaw, “Ndai Israela a Karai Kasang a Ga Shaka Sumpu hpe nanhte nhtang ya na rai yang, nanhte a yubak a matu mara kumhpa hte hpawn teng teng shagun dat ya lu na rai myit dai. Dai Ga Shaka Sumpu hpe kumhpa n lawm ai sha dat dat lu na myit dai n rai. Ndai hku nna nanhte shamai shatsai ai hkrum nhtawm hpa majaw shi nanhte hpe ari ahpri sha ajaw kau nga myit dai hpe nanhte mu chye na rai myit dai,” ngu nna htan ma ai.

⁴ Masha ni gaw, “Shanhte hpe anhte kaning re ai kumhpa jaw dat na rai nga ga ta?,” ngu nna san ma ai. Shanhte gaw, “Ja hte galaw ai mu shakrwi kasi manga, ja hte galaw ai yu sumla manga, dai ni hta na langai ngai gaw Hpilisti hkawhkam shagu a matu rai na rai nga ai. Nanhte yawng hte nanhte a hkawhkam manga hte hta dat dat ai ana zinli mung maren sha rai nga ai.

⁵ Ndai mu shakrwi hte nanhte a mungdan hpe jahten shaza ai yu a kasi sumla ni hpe nanhte galaw lu na rai myit dai; Israela a Karai Kasang hpe nanhte shagrau sha-a lu na rai myit dai. Shaloi nanhte hpe mung nanhte a hpara ni hte nanhte a lamu ga hta na mung, shi ari jaw nga ai hpe mahkoi mi jahkring kau na ra ai nhten!

⁶ Egutu hkawhkam hte Egutu masha ni zawn nanhte hpa majaw myit shaja da ang nga myit ni? Egutu mung kaw nna Israela masha ni hpe shanhte hpe pru wa shangun dat mu ai aten du hkra, Karai Kasang gaw shanhte hpe kaning rai mana shabu kau dat mu ai hpe hkum malap kau nga myit.

⁷ Dai rai nna leng langai hkyen lajang nhtawm galoi mung lit n gun yu ai dumsu kanu lahkawng hpe leng hta shakap mu; shan a dumsu kasha yan hpe chyawm gaw ulawng de gawt nhtang bang kau mu.

⁸ Dai Madu a Ga Shaka Sumpu hpe la nna leng ntsa hta dai hpe mara nhtawm, de a makau na sumpu langai mi hta nanhte a yubak mara a matu jaw ya ai kumhpa ngu nna shi hpe shagun ya ai ja hte galaw ai kasi sumla ni hpe bang na rai myit dai. Dai leng hpe shi a lam hku hkawm hpang ai hte shi hpe hkrai hkawm mat wa shangun na rai myit dai.

⁹ Dai hpang, dai hkawm mat wa ai hpe azi yu mu; leng dai Bet Sheme mare maga de yawng sa mat wa ai rai yang gaw anhte a ntsa e Israela a Karai Kasang gaw ndai hkrit hpa ru yak tsin-yam tsindam shangun dat nu ai, dai gaw dai hku lachyum pru nga ai. Rai ti mung, dai hku n rai ai rai yang chyawm gaw, ana zinli hpe shi n shangun dat nga ai hpe anhte chye na ga ai; dai gaw majoi byin wa nna hkrum sha ai lam chyu rai nga ai,” ngu nna htan ma ai.

¹⁰ Shanhte gaw shanhte tsun ai hte maren galaw ma ai: shanhte gaw dumsu kanu lahkawng la nhtawm leng hta shakap ma ai, dumsu kasha ni hpe mahtang ulawng kata e la bang da ma ai.

¹¹ Shanhte gaw Ga Shaka Sumpu hte rau ja hte galaw ai yu kasi sumla hte mu shakrwi kasi sumla ni hpe bang da ai sumpu hte hpawn leng ntsa e mara ma ai.

¹² Dumsu kanu yan gaw Bet Sheme mare de hkrang ai lam dingyang, pai de hkra de n kayin ai sha, nbaw let sa mat wa ma ai. Hpilisti hkawhkam manga hte mung Bet Sheme lamu ga jarit du hkra hkan nang ma ai.

¹³ Bet Sheme masha ni kadit hkan e hkaulan mam dan nga ma ai. Shaloi shanhte akajawng sha sharawt mada yu dat mu yang, Ga Shaka Sumpu hpe mu dat ma ai. Shing re ai hpe hkap mu ai shaloi, shanhte dik hkra kabu nga ma ai.

¹⁴ Leng dai mung Bet Sheme masha Yawshu mying ai wa madu ai yi de du shang wa nhtawm dai yang na lunghtawn kaba makau e hkring mat nga ai. Shaloi amyu masha ni gaw dai hpun leng hpe azat kau nhtawm dai dumsu kanu yan hpe dai Madu a matu wan nat hkungga shatai nna nawng jau ma ai.

¹⁵ Lewi masha ni gaw dai Madu a Ga Shaka Sumpu hte ja kasi sumla ni rawng ai sumpu ni hpe shayu la nhtawm lunghtawn kaba ntsa e mara tawn ma ai. Bet Sheme masha ni mung dai Madu a matu wan nat hkungga hte kaga shagu hkungga ni hpe nawng jau ma ai.

¹⁶ Hpilisti hkawhkam manga hte mung dai amu galaw ai lam hpe azi yu kau da nna, dai shani jang Ekron mare de bai wa mat wa ma ai.

¹⁷ Hpilisti masha ni gaw dai Madu hpe shanhte a yubak mara raw kumhpa ngu na mu shakrwi aja sumla manga hte hpe Ashdod, Gaza, Ashkelon, Gat hte Ekron mare ni a matu langai ngai di nna, shagun dat ya ma ai.

¹⁸ Shanhte gaw aja hte galaw ai yu sumla ni hpe mung bunghku kum ai mare ni hte bunghku n kum ai kahtawng ningchyawng lahkawng yan hpe up hkang nga ai Hpilisti hkawhkam manga ni a mare shagu a matu langai hpra hpra shagun dat ya ma ai. Dai Madu a Ga Shaka Sumpu hpe Bet Sheme mare na Yawshu a yi hta nga ai lunghtawn ntsa e shanhte tawn da nga ai rai nna, dai yang e hpa byin lai wa sai lam ya du hkra sakse langai zawn naw nga nga ai.

¹⁹ Bet Sheme masha ni dai Ga Shaka Sumpu kata de yu yu ma ai majaw dai Madu gaw masha sanit shi hpe sat kau nga ai. Shanhte a lapran hta ndai zawn si ru ai amu kaba dai Madu shabyin dat wu ai majaw masha ni sharung shayawt nga ma ai.

Kiriat Yarim Mare E Tawn Da Ai Ga Shaka Sumpu

²⁰ Dai rai nna, Bet Sheme masha ni gaw, “Ndai chyoi pra ai Madu Karai Kasang a man e, kadai wa tsap lu nga a ta? Anhte kaw nna shi hpe gara shara de anhte shangun dat lu na rai nga ga ta?,” ngu nna tsun ma ai.

²¹ Shanhte gaw Kiriat Yarim masha ni hpang de kasa ni hpe shangun dat nhtawm, “Hpilisti masha ni dai Madu a Ga Shaka Sumpu hpe bai nhtang ya masai. Dai hpe yu sa nna sa la manu,” ngu nna htet dat ma ai.