1 SAMUELA 1 - Jinghpaw Common Language Bible 2009

Shilo Mare E Nga Ai Elakana Hte Shi A Dinghku

¹ Ehprim amyu bawsang hta na Elakana mying ai wa langai mi gaw Ehprim bum ga na Rama mare hta nga nga ai. Shi gaw Zuhpa lakung lama na Tohu a dinghku hte seng ai Elihu a kashu, Yeroham a kasha rai nga ai.

² Elakana gaw madu jan lahkawng lu nga ai; Hana hte Pinina yan rai nga ai. Penina gaw kasha lu nna, Hana mahtang n lu nga ai.

³ Elakana gaw Chyahtum Chyalai N-gun rawng ai dai Madu hpe nawku let shagu hkungga nawng ya na nga, Rama mare kaw nna dai Madu a hkinjawng ni rai nga ai Eli a shadang sha lahkawng ngu na Hopni hte Hpineha nga ai Shilo mare de shaning shagu sa sa rai wu ai.

⁴ Elakana gaw shi a shagu hkungga nawng jau ai aten shagu, Penina hpe shan kumhtaw langai, shi a ma ni a matu kumhtaw langai hpra di nna jaw wu ai.

⁵ Dai Madu gaw Hana hpe maudung dung shangun wu ai majaw Elakana shi hpe grai tsaw ra wu ti mung, kumhtaw langai sha shi hpe jaw wu ai.

⁶ Dai Madu shi hpe maudung dung shangun wu ai majaw, shi hpe shingjawng kashun ai Penina mahtang shi hpe myit machyi hkra nni nkri jaw nhtawm roi rip shatsang wu ai.

⁷ Ndai lam shaning shagu abyin nga ai rai nna, dai Madu a nta de shanhte lung wa ai shaloi, Penina mahtang Hana hpe nau wa roi shatsang nga ai majaw shi hkrap ai hte lusha hpa mung n sha wu ai.

⁸ Shi a madu wa Elakana chyawm gaw shi hpe, “Hana e, nang hpa majaw hkrap nga n ta? Hpa majaw lusha n sha n ta? Nang gaw hpa majaw tut nawng e grai yawn nga n ta? Shadang sha shi lu ai hta na a matu ngai grau nna akyu nga ai n rai ni?,” ngu nna san wu ai.

Hana Hte Eli

^9-10 Shilo mare na dai Madu a nta hta shanhte lusha sha ngut ai hpang, lani mi na aten hta Hana rawt sa wa wu ai. Shi gaw grai yawn la ai hte jahtau hkrap let, dai Madu kaw akyu hpyi wu ai. Dai shaloi hkinjawng Eli gaw chyinghka makau na shi a tingnyang hta dung nga ai.

¹¹ Hana chyawm gaw dagam ga sadi hte ning ngu tawn da wu ai: “Chyahtum Chyalai N-gun rawng ai Madu e, na a shangun ma rai nga ai ngai hpe mada yu e law! Nye a ru yak tsin-yam tsindam hpe mu ya nna ngai hpe dum nga u law! Ngai hpe hkum malap kau et! Nang ngai hpe shadang sha jaw n yang gaw shi a kara galoi mung n doi kau ya ai sha, shi a prat dingsa, nang hpe ap ya na nngai, ngu nna ngai ga sadi jaw nngai.”

¹² Hana gaw dai Madu kaw aten na na matut nna akyu hpyi nga ai rai nna, Eli gaw shi a nten galem ai hpe azi yu nga ai.

¹³ Shi chyawm gaw atsin sha akyu hpyi nga ai. Shi a nten shamu nga ti mung nsen n shapraw wu ai. Dai rai nna shi gaw sabyi nang sam nga ai ngu Eli myit nawn la let,

¹⁴ shi hpe, “Chyaru nang ai wa zawn na a hkum hpe hkum madun dan et; chyaru n lu ai sha sadi sahka rai nga u!,” ngu nna tsun wu ai.

¹⁵ Shi chyawm gaw, “N rai law, Madu e, ngai gaw chyaru nang ai wa n rai nngai; chyaru mung n lu yu nngai! Ngai myit htum nga nngai majaw Madu hpang de nye a ru yak tsin-yam tsindam tsun shapraw na ngu nna she ngai akyu hpyi nga nngai.

¹⁶ Ngai hpe manu n dan ai numsha rai nga ai, ngu nna hkum myit nawn la et. Nye a myit grai wa nchyi nmu ngu la nga nngai majaw ndai zawn akyu hpyi ai she rai nngai,” ngu nna htan wu ai.

¹⁷ Eli gaw, “Ngwi pyaw sim sa ai myit hte wa sanu; ya nang shi kaw hpyi nit dai hte maren, Israela a Karai Kasang gaw nang hpe jaw nit ga law,” ngu nna tsun wu ai.

¹⁸ Shi gaw, “Ngai hpe matsan dum la na tut nawng myit dum ya nga rit law,” ngu nna htang tsun wu ai. dai hpang n yawn nga ai sha, lusha loi mi sha la nna wa mat wa wu ai.

Samuela Shangai wa Ai Hte Shi Hpe Ap nawng Ai

¹⁹ Hpang jahpawt e, Elakana hte shi a dinghku masha ni jau jau rawt nna, dai Madu hpe nawku ngut jang, Rama mare na nta de bai wa mat ma ai. Elakana mung shi a madu jan Hana hte kanawn wu ai rai nna dai Madu gaw shi a akyu hpyi ga hte maren htan ya wu ai.

²⁰ Shing rai, shi hta na-um nasin rai wa nna shadang sha shangai wu ai. Hana gaw shi hpe Samuela ngu shamying ya nga ai; dai gaw, “Shi hpe dai Madu kaw na ngai hpyi la nngai,” ngu nna shaleng dan nga ai.

²¹ Aten bai du wa ai shaloi, shi ga sadi tawn da nu ai hte maren, Elakana hte shi a dinghku masha ni Shilo mare de lung wa nhtawm shaning shagu nawng ya ai shagu hkungga hte lak san shagu hkungga, dai Madu a matu nawng ya wu ai.

²² Rai ti mung, ndai lang hta chyawm gaw Hana n hkan nang wu ai. Shi gaw shi a madu wa hpe, “Ma chyu hka ai hte rau shi a prat tup wa shanu nga na dai Madu a nta de shi hpe woi lung wa na nngai,” ngu nna tsun wu ai.

²³ Elakana gaw, “Mai sa, nang myit nawn ai kaja htum ai hku galaw u. Shi hpe chyu jahka kau lu ai aten du hkra nta e nga nga u. Dai Madu shi a ga sadi teng wa u ga law,” ngu nna htan wu ai. Dai rai nna, Hana gaw nta e nga nna shi a ma hpe bau maka nga wu ai.

²⁴ Ma dai hpe chyu jahka kau ngut ai hpang, masum ning du sai usu langai, shadung pawng kru, sabyi ntsin tau mi hte hpawn Shilo mare de woi sa wa wu ai. Hana mahtang dai ma hpe Shilo mare na dai Madu a nta de Samuela hpe woi sa ai shaloi, shi naw kaji nga lu ai.

²⁵ Dumsu usu sat ngut ai hpang, dai ma hpe Eli hpang de woi sa wu ai.

²⁶ Hana gaw shi hpe, “Madu e, ngai hpe mara hkum shagun e, nang ngai hpe dum ai n rai ni? Dai Madu hpe akyu hpyi na ngu, ndai yang e ngai tsap nga yang, nang mu ai numsha rai nga nngai.

²⁷ Ndai ma hpe ngai hpyi se ai rai nna ngai hpyi ai hte maren ngai hpe jaw ya nga ai.

²⁸ Dai rai nna, dai Madu a lata de shi hpe ngai ap nawng ya nga nngai. Shi ahkrung nga dingsa dai Madu a matu rai nga na rai wu ai,” ngu nna tsun wu ai. Dai hpang, dai yang e dai Madu hpe shanhte nawku ma ai.