1 KORINHTU 14 - Jinghpaw Common Language Bible 2009

Kaga Wenyi Chyeju Kumhpa Ni A Lam

¹ Dai majaw nanhte gaw tsaw ra ai myit hpe jai lang na matu shakut nga ra myit dai. Wenyi chyeju kumhpa ni hpe ra marit nga mu. Grau nna dai mungga hpe hkaw tsun chye ai chyeju kumhpa hpe ra marit nga mu.

² Laklai ai ga amyu myu shaga ai wa gaw masha kaga ni hte shaga hkat ai n rai, Karai Kasang hte she tsun shaga nga ai, hpa majaw nga yang, shi a ga hpe gade e mung n chye na ya mu ai. Shi gaw Wenyi atsam hpe lang nna makoi magap da ai lam ni hpe tsun nga ai.

³ Rai ti mung Karai Kasang a mungga hkaw tsun ai wa chyawm gaw, masha ni hpe shadaw shangang ai ga, n-gun jaw ai ga, shalan shabran ai ga tsun dan nga ai.

⁴ Laklai ai ga amyu myu chye tsun ai wa gaw, shi hkum hpe sha shadaw shangang lu ai, rai ti mung Karai Kasang a mungga hkaw tsun ai wa gaw dai hpung ting hpe shadaw shangang nga ai.

⁵ Nanhte nga manga hte gaw, laklai ai ga amyu myu tsun na ngai ra nga nngai, rai ti mung Karai Kasang a mungga hkaw tsun lu ai atsam hte seng ai chyeju kumhpa hpe grau nna lu la shangun mayu nngai. Hpa majaw nga yang, laklai ai ga amyu myu chye tsun ai wa gaw, tinang tsun ai ga a lachyum hpe sanglang htai dan ai masha nga yang she dai Hpung hpe shadaw shangang lu nga ai. Dai n rai yang gaw, Karai Kasang a mungga hkaw tsun ai wa gaw laklai ai ga amyu myu hpe tsun ai wa hta grau nna hpu ging nga ai.

⁶ Dai rai nna hpu nau ni e, ya e ngai nanhte kaw sa du nna, laklai ai ga amyu myu tsun ti mung, Karai Kasang kaw na shingran ga, chye chyang ai ga, Wenyi shung ya ai hte tsun ai mungga, sharin shaga ai ga, nanhte hpe n tsun dan made yang gaw, nanhte a matu hpa akyu nga a ta?

⁷ Sumpyi shing n rai, tingse zawn re ai asak n rawng ai madum sumpyi ni hpe yu ga! Dai madum sumpyi ni hta na ngoi ai mahku nsen hpe dan leng ai hku n shapraw lu yang gaw, dai mahku nsen hpe kadai wa gara hku chye ginhka lu na a ta?

⁸ Pahke dum ai wa gaw mahku nsen hpe ginhka nna asan sha n dum n shaga yang gaw, kadai wa hpyen rawt na matu hkyen shajin lu na a ta?

⁹ Dai hte maren laklai ai ga amyu myu hte nanhte tsun ai ga lachyum n dan n leng a yang gaw, kadai wa gara hku chye na lu na a ta? Nanhte a ga ni nbung hta mat mat na sha rai nga malit dai.

¹⁰ Mungkan hta ga amyu law law nga ai rai ti mung, gara amyu ga mung lachyum n rawng ai n nga ai.

¹¹ Rai ti mung, ngai n chye na ai amyu ga shaga ai wa gaw nye a matu maigan masha rai nna, ngai mung shi a matu maigan masha rai na rai nga ai.

¹² Nanhte gaw Wenyi chyeju kumhpa hpe, ra marit nga myit dai majaw dai Hpung hpe galu kaba hkra gaw gap ai chyeju kumhpa ni hpe yawng hta grau nna jai lang nga mu.

¹³ Dai majaw laklai ai ga amyu myu tsun ai wa gaw, tinang tsun ai ga a lachyum tsun htai dan lu ai chyeju atsam lu la na matu shi akyu hpyi lu na rai nga ai.

¹⁴ Hpa majaw nga yang, ngai gaw ga amyu myu hte akyu hpyi ai shaloi, kaja wa nye a Wenyi akyu hpyi nga ai rai ti mung, nye a myit gaw dai hta n lawm nga ai.

¹⁵ Shaloi ngai gara hku galaw na rai ta? Ngai gaw nye a wenyi hte ngai akyu hpyi nna, nye a myit hte mung akyu hpyi na nngai. Nye a wenyi hte ngai mahkawn mangoi nna, nye a myit hte mung mahkawn mangoi na nngai.

¹⁶ Nanhte gaw Wenyi hte sha Karai Kasang a chyeju hpe shakawn nna akyu hpyi ai rai yang nawku ai hpawng hta lawm nga ai yu maya masha langai mi gaw, nanhte tsun ai ga n chye na ai majaw, nanhte a kyu hpyi ai ga hpe kaning rai “Amen,” ngu nna tsun lu na a ta?

¹⁷ Chyeju shakawn ai nanhte a akyu hpyi ai ga gade wa kaja nga ai rai ti mung, kaga wa a matu shadaw shangang lu ai akyu mi nga na n rai.

¹⁸ Nanhte kadai hta mung grau nna laklai ai ga amyu myu ngai chye tsun nngai majaw, Karai Kasang hpe ngai shakawn nngai.

¹⁹ Rai ti mung nawku daw jau ai hpawng hta laklai ai ga amyu myu hkying mun tsun lu ai hta masha kaga hpe sharin achyin ya lu na matu chye na ai ga hkaw manga hte sha ngai grau nna tsun mayu nngai.

²⁰ Hpu nau ni e, myit mang ai lam hta ma kaji hkum tai myit: n hkru n kaja ai lam hta she ma kaji tai nga mu; myit mang ai lam hta chyawm gaw, asak kaba nna myit su ai ni zawn rai nga mu.

²¹ Dai Chyum Laika hta ka da nga ai gaw, “Nye a amyu masha ni hpe, laklai ai ga amyu myu tsun ai ni a n-gup shinglet hte ngai tsun na mawe ai; maigan tsasam masha ni a n-gup hte ngai tsun na mawe ai, rai ti mung nye a amyu ni nye a ga hpe madat na ma ai n rai, nga nna dai Madu tsun nga ai.”

²² Dai majaw laklai ai ga amyu myu chye tsun ai chyeju atsam gaw, n kam n sham ai ni a matu mara sakse kumla rai nga ai. Karai Kasang a mungga hkaw tsun lu ai chyeju atsam kumhpa chyawm gaw, kam sham ai ni a matu sakse kumla rai nga ai.

²³ Dai rai nna, dai Hpung ting zuphpawng nga nna, nlang hte gaw laklai ai ga amyu myu tsun shajang nga ma yang, n chye na ai yu maya masha ni, shing n rai, n kam n sham ai ni du sa wa ma yang gaw, “Nanhte yawng mana bu nga myit dai,” nga nna shanhte tsun na ma ai n rai ni?

²⁴ Rai ti mung masha shagu Karai Kasang a mungga hpe hkaw dan nga yang, n kam n sham ai, shing n rai, yu maya masha langai ngai shang wa a yang gaw, shi na la lu ai mungga a majaw shi gaw yubak mara lu ai wa re ai hpe atsawm sha dum chye na ra ai.

²⁵ Shi na la ai mungga nlang hte a majaw shi a myit masin kraw lawang jeyang daw dan ai hkrum ai hte shi a makoi magap da ai maw mawn ai myit dan dawng wa na ra ai rai nna, shi gaw gum dagup nna Karai Kasang hpe nawku let, “Kaja wa Karai Kasang gaw nanhte hte rau nang e nga nga a hka!” nga nna yin la na ra ai.

Hpung Hta Nawku Daw Jau Ai Lam

²⁶ Dai rai nna hpu nau ni e, ngai ngu mayu ai gaw da ndai rai nga ai: Nanhte nawku daw jau na matu hpawng nga myit dai shaloi e, langai wa gaw mahkawn shakawn ai lam, bai langai wa gaw sharin ai lam, bai langai wa gaw shingran ga htai dan ai lam, bai langai wa mi gaw laklai ai ga amyu myu hku tsun nna, kaga langai wa mi gaw tsun ai ga a lachyum hpyan dan ai lam re ai ni hpe gun hpai nga mu. Nanhte galaw ai lam shagu gaw dai hpung hpe shadaw shangang ai lam shabyin u ga.

²⁷ Laklai ai ga hte tsun shaga na rai yang gaw, law dik marai lahkawng shing n rai, marai masum, langai a hpang langai shaga nna, langai wa gaw dai tsun ai ga lachyum hpe hpyan dan u ga.

²⁸ Rai ti mung lachyum hpyan dan na masha n nga a yang gaw, laklai ai ga amyu myu tsun mayu ai wa gaw, dai Hpung hta e shi atsin sha nga nna, shi nan hpe mung, Karai Kasang hpe mung, shaga u ga.

²⁹ Karai Kasang a mungga hkaw tsun na matu shingran hkam la lu ai marai lahkawng masum tsun shaga nna, kaga ni gaw shanhte tsun ai hpe maram masam nga mu ga.

³⁰ Rai ti mung dai hpawng hta dung nga ai wa langai ngai kaw Karai Kasang kaw na shingran ga du a yang gaw, ga shaga nga ai wa hkring mat u ga.

³¹ Zuphpawng hta lawm nga ai shawa masha yawng mayawng gaw sharin achyin ai lu la nna myit rawt sharawng awng ai lam lu la na matu nanhte nlang hte gaw langai a hpang langai mungga hkaw tsun lu na rai nga myit dai.

³² Myihtoi shingran ga hpe hkaw tsun lu ai chyeju kumhpa hpe jai lang ai hta, hkaw tsun ai mungga gaw hkaw tsun ai wa hkang ai a npu e rai ra nga ai.

³³ Hpa majaw nga yang, Karai Kasang gaw kashuk kashak lam a Karai Kasang n re ai sha, ngwi pyaw sim sa lam a Karai Kasang she rai nga ai.

³⁴ Karai Kasang a masha ni a Hpung ni yawng hta hkan sa nga ai masa hte maren, numsha ni gaw dai zuphpawng ni hta atsin sha nga nga mu ga, shanhte hta ga shaga na ahkang n nga ai. Yuda ni a jep ai tara hta tsun da nga ai hte maren, shanhte gaw ningbaw ningla n tai lu ma ai.

³⁵ Shanhte lama ma a lam mu chye mayu ma yang, nta e tinang a madu wa ni kaw san la mu ga. Hpung hta numsha langai mi a matu ga shaga ai gaw kaya kahpa amu rai nga ai.

³⁶ Karai Kasang a mungga gaw nanhte kaw nna pru ai rai kun? Shing n rai nanhte kaw chyu sha dai mungga du sa wa sani?

³⁷ Marai langai ngai tinang a hkum hpe Karai Kasang a kasa wa rai nngai, shing n rai, Wenyi atsam lu la ai wa rai nngai nga nna myit la ai wa gaw, Karai Kasang a hkang da ai hte ndai laika hpe ngai ka dat ai re ai lam hpe chye u ga.

³⁸ Marai langai ngai ndai lam hpe n madat n mara a yang gaw, shi hpe hpa n sawn ai hku tawn da mu.

³⁹ Dai re ai majaw hpu nau ni e, nanhte gaw Karai Kasang a mungga hkaw tsun na lam hta myit lawm sharawng awng nga mu, rai ti mung laklai ai ga amyu myu hte tsun ai hpe mung hkum hkum kau myit.

⁴⁰ Lam shagu hpe htap htuk ai hte jaw hkrak ai hku galaw sa wa mu.