Matta 1 - Meeŋka Jooŋ

Yeecüwa Macii Dänkä Yurge

¹ Perrä yaanni a yen Yeecüwa Macii dänkä yurge, a kaaynä Daawüüt ke Abrayiim,

² Abrayiim a Icaak wäyen, Aŋ Icaak a Yaagüüp wäyen, aŋ Yaagüüp a Yahüüja wäyen ke mädge,

³ aŋ Yahüüja a Paaric wäyen ke Jüra meen a Taamaar, aŋ Paaric a Hïjïroon wäyen, aŋ Hïjïroon a Aaraam wäyen,

⁴ aŋ Aaraam a Amïnadaap wäyen, aŋ Amïnadaap a Naac wäyen, aŋ Naac a Caalim wäyen,

⁵ aŋ Caalim a Buwaac wäyen meen a Raahaap, aŋ Buwaac a Ubeet wäyen meen a Rawüüc, aŋ Ubeet a Yecce wäyen,

⁶ aŋ Yecce a Yätkä Daawüüt wäyen. Aŋ Daawüüt a Cïlïmaan wäyen kä iŋ Üürïya ti,

⁷ aŋ Cïlïmaan a Raabaam wäyen, aŋ Raabaam a Abïïya wäyen, aŋ Abïïya a Acaap wäyen,

⁸ aŋ Acaap a Yucapaat wäyen, aŋ Yucapaat a Yüraam wäyen, aŋ Yüraam a Üüjïya wäyen,

⁹ aŋ Üüjïya a Yütaam wäyen, aŋ Yütaam a Ahaac wäyen, aŋ Ahaac a Hijakïya wäyen,

¹⁰ aŋ Hijakïya a Manacca wäyen, aŋ Manacca a Amüün wäyen, aŋ Amüün a Yüücïya wäyen,

¹¹ aŋ Yüücïya a Yükünïya wäyen ke mädgen waan yen näpkïtïn ti Baabïl.

¹² Aŋ wääna näpkïtïn ti Baabïl ye, Yükünïya a Caaltïïl wäyen, aŋ Caaltïïl a Jarabaabïl wäyen,

¹³ aŋ Jarabaabïl a Abïyüüt wäyen, aŋ Abïyüüt a Ïlïyakïïm wäyen, aŋ Ïlïyakïïm a Ajüür wäyen,

¹⁴ aŋ Ajüür a Caadik wäyen, aŋ Caadik a Akkïïm wäyen, aŋ Akkïïm a Alïyüüt wäyen,

¹⁵ aŋ Alïyüüt a Ïlïyaajar wäyen, aŋ Ïlïyaajar a Mattaan wäyen, aŋ Mattaan a Yaagüüp wäyen,

¹⁶ aŋ Yaagüüp a Yuucip wäyen or Märïyam, yaana gittä Yeecüwa, yaana battä me ogo Macii ye.

¹⁷ Aŋ kilkä muure yaaka juwu Abrayiim ti atee ke Daawüüt ti ye kilkä kä caay witken kä ŋan, aŋ yaaka juwu Daawüüt ti atee ke näpkïtïn ti Baabïl ye kilkä kä caay witken kä ŋan, aŋ yaaka juwu näpkïtïn ti Baabïl atee ke Macii ti ye kilkä kä caay witken kä ŋan.

Giidä yen Yeecüwa Macii

¹⁸ Aŋ giidä yen Yeecüwa Macii näŋŋä ḍoŋe kä waan yaanni ogo aŋŋi. Wääna meen Märïyam wuuke daa Yuucip ye, i mor iken yoken batta coorgu, kañi me cäyge minneni kä Wääktäŋ Laṇṇä yen Jooŋ.

¹⁹ Aŋ oore Yuucip, ike a män woṇṇu, aŋ batta ṭäkï iccede loon gïtï aŋ ike jaajjin jone ti ogo daljebu liidid.

²⁰ Aŋ wääna ike paydee kä aŋan ye, i malak yen Pïṭo üükïn woo ike ti kä lääggï, aŋ ike kiini ogo, “Yuucip, minneni Daawüüt, ŋana ïkï booju kä koownu Märïyam ogo ïïŋü, a Wääktäŋ Laṇṇä ken ina laaccee kä yaanna.

²¹ Aŋ ike bi giit minneni, aŋ bi äkkä yäṇtäŋ ogo Yeecüwa a yaana bi määkee kä woo mä yeeke kä nääŋken yaacken ye.”

²² Aŋ yaakki muure näŋŋä ḍuuggen ḍääkit jiik'a jaayi Pïṭo kä bäṭo ye ogo,

²³ “Yoore, ṭuul yaana kücï oon ye, bi laacï aŋ bi giit minneni, aŋ bi battä me ogo Ïmaanuwel,” aŋ naana aŋan ye, i ogo, “Jooŋ ke ïkïïn.”

²⁴ Aŋ wääna Yuucip cuuyenee kä nïïnkä ti ye, ike näŋjin bata yaana daa kiinene daa malak yen Pïṭo ye, aŋ iiŋe koowne,

²⁵ aŋ yoken batta agene kä coorgin ke iiŋe giide minneni. Aŋ äkki Yuucip ogo Yeecüwa.