Romans 8 - ᒋᔐᒪᓂᑑ ᐅᑕᔨᒳᐃᓐ ᑳ ᐅᔅᑳᒡ ᑌᔅᑎᒥᓐᑦᐊᓂᔫ ᐱᒫᑎᓰᐎᓂᔫ ᑳ ᐸᔦᐦᒋᓰᑦ ᐊᐦᒑᐦᒄ ᒫᔮᑦ ᐊᐌᔫᐦ 1 ᓇᒧᐃ ᐁᒄ ᓂᔔᓈᒋᒥᑰᒡ ᒋᔐᒪᓂᑑ ᐊᓂᒌ ᐊᐌᓂᒌ ᒌᓴᔅ ᙭ ᑳ ᐐᒉᐙᑣᐤ᙮ 2 ᐌᔥ ᒋᔐᒪᓂᑑ ᐅᑕᐦᒑᐦᑾ ᒋᑎᐦᑑᑖᑯᓅ ᒉᒌ ᐱᒫᑎᓯᔫᐦᒄ ᙭ ᒌᓴᔅ ᐅᐦᒋ᙮ ᐁᐅᑰ ᑳ ᐋᐱᐦᑯᓂᑦ ᑖᓐ ᑳ ᐃᔑ ᑎᐯᔨᒥᑯᒡ ᒪᒑᑎᓰᐎᓂᔫ ᑲᔦ ᓂᐳᐎᓂᔫ᙮ 3 ᒥᓯᐌ ᐊᐌᓐ ᓇᒧᐃ ᐅᐦᒌ ᐃᐦᑑ ᑌᑲᔥ ᒉᒌ ᓇᓂᐦᐄᐦᑕᒧᐙᑦ ᒋᔐᒪᓂᑑᐦ ᐅᐐᔓᐌᐎᓂᔫ ᒉᒌ ᐅᐦᒋ ᐱᒫᒋᐦᐅᑦ᙮ ᐁᒄ ᒫᒃ ᒋᔐᒪᓂᑑ ᑳ ᐯᒋ ᐃᑎᔕᐦᐙᑦ ᐅᑯᓯᓴ ᒧᔮᒻ ᒋᔮᓅ ᐁ ᐃᔑᓈᑯᓲᐦᒄ ᒉᒌ ᐃᔑᓈᑯᓯᔨᒡ᙮ ᒌ ᐯᒋ ᐃᑎᔕᐦᐌᐤ ᒉᒌ ᓂᐱᔅᑕᒫᑰᐦᒄ᙮ ᐁᑯᑦ ᐆ ᑳ ᐅᐦᒋ ᓂᔔᓈᒋᐦᑖᑦ ᑖᓐ ᑳ ᐃᔑ ᑎᐯᔨᒥᑰᐦᒄ ᒪᒑᑎᓰᐎᓂᔫ᙮ 4 ᒌ ᐃᐦᑑᑕᒻ ᐅᔫ ᒉᒌ ᐅᐦᒋ ᑌᑲᔥ ᑎᐱᑑᑕᒪᐦᒄ ᑖᓐ ᐁ ᐃᔑ ᑯᐃᔅᒄ ᐃᑌᔨᐦᑖᑯᓂᔨᒡ ᐁ ᐃᑕᔓᐌᒪᑲᓂᔨᒡ ᐅᐐᔓᐌᐎᓐ᙮ ᑳ ᐸᔦᐦᒋᓰᑦ ᐊᐦᒑᐦᒄ ᐁ ᑎᐯᔨᒥᑕᐦᒄ ᐁᒄ ᔮᒄ ᒉᒌ ᐃᐦᑑᑕᒧᐦᒄ ᐆ ᓇᒧᐃ ᐐ ᒋᒪᒑᑎᓰᐎᓅᐦ ᐁ ᑎᐯᔨᒥᑯᔨᐦᒄ᙮ 5 ᐊᓂᒌ ᒥᒄ ᐁ ᐃᔑ ᐌᐦᐯᒥᐸᔨᔨᒡ ᒉᒌ ᒪᒑᑎᓰᑣᐤ ᑳ ᐃᔑ ᐱᒫᑎᓰᑣᐤ, ᒥᒄ ᐎᔭᐙᐤ ᓂᑕᒧᒄ ᒉᒌ ᐃᔑ ᓇᓂᐦᐁᔨᐦᑕᒥᐦᐄᓲᑣᐤ ᐃᔑ ᒫᒥᑐᓀᔨᐦᑕᒧᒡ᙮ ᐁᒄ ᐊᓂᒌ ᑳ ᐸᔦᐦᒋᓯᔨᒡ ᐊᐦᒑᐦᒄ ᑳ ᐸᒋᔥᑎᓈᑣᐤ ᒉᒌ ᑎᐯᔨᒥᑯᑣᐤ ᑖᓐ ᒉ ᐃᔑ ᐱᒫᑎᓰᑣᐤ, ᐱᔑᒄ ᒉᒌ ᓇᓂᐦᐁᔨᐦᑕᒥᐦᐋᑣᐤ ᑳ ᐸᔦᐦᒋᓯᔨᒡ ᐊᐦᒑᐦᒄ ᐃᔑ ᒫᒥᑐᓀᔨᐦᑕᒧᒡ᙮ 6 ᒥᒄ ᓂᑕᒧᒄ ᐐᔑ ᓇᓂᐦᐁᔨᐦᑕᒥᐦᐄᓱᑌ ᐊᐌᓐ, ᑲᑕ ᓂᐸᐦᐄᑰ ᐅᔫ ᐁ ᐃᐦᑎᑦ᙮ ᐱᓯᒄ ᑳ ᐸᔦᐦᒋᓯᔨᒡ ᐊᐦᒑᐦᑾ ᒉᒌ ᓇᓂᐦᐁᔨᐦᑕᒥᐦᐋᑦ ᐁ ᐃᔑ ᒫᒥᑐᓀᔨᐦᑕᐦᒃ ᐊᐌᓐ ᐱᒫᑎᓰᐎᓂᔫ ᑲᔦ ᒋᔮᒣᔨᐦᑕᒧᐎᓂᔫ ᐊᔮᐤ᙮ 7 ᐌᔥ ᐊᓂᒌ ᓂᑕᒧᒄ ᒉᒌ ᐃᔑ ᓇᓂᐦᐁᔨᐦᑕᒥᐦᐄᓱᑣᐤ ᑳ ᐃᔑ ᒫᒥᑐᓀᔨᐦᑕᐦᒀᐤ ᓂᔥᑰᔥᑕᐌᐅᒡ ᒋᔐᒪᓂᑑᐦ᙮ ᓇᒧᐃ ᐃᐦᑑᑕᒧᐌᐅᒡ ᑖᓐ ᐁ ᐃᑕᔓᐌᔨᒡ᙮ ᓇᒧᐃ ᒣᒋᒻ ᒌ ᐃᐦᑑᑕᒧᐌᐅᒡ᙮ 8 ᐊᓂᒌ ᓂᑕᒧᒄ ᑳ ᐃᔑ ᐱᒫᑎᓰᑣᐤ ᓇᒧᐃ ᒋᑲ ᒌ ᓇᐦᐁᔨᐦᑕᒪᐦᐁᐅᒡ ᒋᔐᒪᓂᑑ᙮ 9 ᒋᔭᐙᐤ ᒫᒃ ᐐ, ᓇᒧᐃ ᒋᑎᐯᔨᒥᑯᓈᐙᐤ ᓂᑕᒧᒄ ᐁ ᐐ ᐃᔑ ᓇᐦᐁᔨᐦᑕᒪᐦᐄᓱᔦᒄ᙮ ᑳ ᐸᔦᐦᒋᓰᑦ ᐊᐦᒑᐦᒄ ᐁᐅᒄ ᑌᐯᔨᒥᑖᒄ ᒌᔥᐱᓐ ᑖᐺ ᐹᐦᒋᔥᑳᑖᑴ᙮ ᐊᐌᓐ ᒫᒃ ᐁᑳ ᐹᐦᒋᔥᑳᑰᑴ ᑳ ᐸᔦᐦᒋᓯᔨᒡ ᐊᐦᒑᐦᑾ ᓇᒧᐃ ᑎᐲᐌᐅᓰᑐᑖᑰ ᒌᓴᔅ᙮ 10 ᙭ ᒫᒃ ᐁ ᐲᐦᒋᔥᑳᑖᒄ ᐁᑯᑦ ᐌᐦᒋ ᐃᔅᐸᔨᐦᒡ ᑖᐺ ᒉᒌ ᐱᒫᑎᓰᑣᐤ ᒋᑕᐦᒑᐦᑯᐙᐅᒡ ᐌᔥ ᐁ ᑯᐃᔅᑯᑖᑎᓰᐌᒄ ᒋᑦ ᐃᔑ ᑲᓇᐙᐸᒥᑯᐙᐤ ᒋᔐᒪᓂᑑ, ᐋᑦ ᐊᓄᐦᒌᔥ ᐁ ᐊᑎ ᓂᐲᒪᑲᐦᒀᐤ ᒌᔫᐙᐤᐦ ᐊᓐ ᐅᐦᒋ ᐁ ᒪᒑᑎᓯᔦᒄ᙮ 11 ᒌᔥᐱᓐ ᐹᐦᒋᔥᑳᑖᑴᓐᐦ ᐆ ᐸᔦᐦᒋᓯᔫ ᐊᐦᒑᐦᑾ ᐊᓐ ᑳ ᐗᓂᔥᑳᓈᑦ ᒌᓴᔅ ᓂᐳᐎᓂᐦᒡ ᐅᐦᒋ ᒉᔥᑎᓈᔥ ᒋᑲ ᐗᓂᔥᑳᓂᑯᐙᐤ ᑲᔦ ᒋᔭᐙᐤ ᓂᐳᐎᓂᐦᒡ ᐅᐦᒋ ᐊᓂᔫᐦ ᐆ ᐸᔦᐦᒋᓯᔫ ᐊᐦᒑᐦᑾ ᐅᐦᒋ᙮ ᐁᑯᑦ ᒫᒃ ᒉᒌ ᐅᐦᒋ ᐱᒫᒋᐦᑖᑲᓅᐦᒀᐤ ᐊᓂᔫᐦ ᒌᔫᐙᐤᐦ ᑳ ᐃᔑᓈᑯᐦᒀᐤᐦ ᒉ ᓂᐲᒪᑲᐦᒀᐤ᙮ 12 ᓃᒋᔖᓂᑎᒄ, ᒋᓂᑐᐌᔨᐦᑖᑯᓯᓈᓅ ᐁᑳ ᐎᔮᓱᐎᓂᐦᒡ ᒉᒌ ᐃᔑ ᐱᒫᑎᓰᐦᒄ, ᓇᒧᐃ ᒋᐹ ᐅᐦᒋ ᐃᔑ ᐱᒫᑎᓰᓈᓅ ᑖᓐ ᐁ ᐃᔑ ᓂᑐᐌᔨᐦᑕᒨᒪᑲᐦᒀᐤ ᒋᔮᓯᓅᐦ᙮ 13 ᐌᔥ ᐊᓐ ᐃᔑ ᐱᒫᑎᓰᓀ ᑖᓐ ᐁ ᐃᔑ ᓂᑐᐌᔨᐦᑕᒨᒪᑲᐦᒡ ᒋᔮᔅ ᒋᑲ ᓂᐱᓐ᙮ ᐸᒋᔥᑎᓇᑌ ᒫᒃ ᑳ ᐸᔦᐦᒋᓰᑦ ᐊᐦᒑᐦᒄ ᒉᒌ ᐐᒋᐦᐄᔅᒃ ᒉᒌ ᐴᓂᐦᑖᐗᑦ ᑖᓐ ᐙ ᐃᔑ ᐌᐦᒋᐸᔨᐦᒡ ᒉᒌ ᒪᒋᑑᑕᒻ ᐁᒄ ᑮᐹ ᑖᐺ ᒉ ᐱᒫᑎᓯᔨᓐ᙮ 14 ᒥᓯᐌ ᐊᓂᒌ ᑳ ᐸᔦᐦᒋᓯᔨᒡ ᐊᐦᒑᐦᑾ ᑳ ᒋᔅᒋᓄᐦᑕᐦᐄᑯᑣᐤ ᒋᔐᒪᓂᑑᐦ ᐅᑕᐙᔒᒥᑐᑖᑰᒡ᙮ 15 ᐌᔥ ᑖᐹ ᒋᑎᐦᑑᑖᑯᐙᐤ ᐊᓐ ᐊᐦᒑᐦᒄ ᒋᔐᒪᓂᑑ ᑳ ᒦᑖᒄ ᑳᐤ ᒉᒌ ᑎᐯᔨᒥᑯᐌᒄ ᓭᒋᓱᐎᓂᔫ᙮ ᐆ ᐊᐦᒑᐦᒄ ᐅᐦᒋ ᐁᑯᑦ ᐌᐦᒋ ᐃᔑᐦᐄᑕᐦᒄ ᒋᔐᒪᓂᑑ ᒉᒌ ᐅᑕᐙᔒᒥᑐᑖᑕᐦᒄ ᑲᔦ ᒫᒃ ᒉᒌ ᐃᑕᐦᒄ ᐹᐹ, ᓅᐦᑖᐐ᙮ 16 ᑳ ᐸᔦᐦᒋᓰᑦ ᐊᐦᒑᐦᒄ ᒋᒋᔅᒉᔨᐦᑕᒥᐦᐄᑯᓅ ᒋᑌᐦᐄᓈᐦᒡ ᑖᐺ ᒋᔐᒪᓂᑑ ᐁ ᐅᑕᐙᔒᒥᑐᑖᑕᐦᒄ᙮ 17 ᐁᒄ ᒫᒃ ᐁ ᐅᑕᐙᔒᒥᑐᑖᑕᐦᒄ ᒋᔐᒪᓂᑑ ᒉᔥᑎᓈᔥ ᒋᑲ ᒦᑯᓅ ᐊᓂᔫᐦ ᑳ ᐃᔑ ᒥᔻᔑᔨᒀᐤᐦ ᔕᐌᔨᐦᒋᒉᐎᓐᐦ ᑳ ᐊᔦᔅᑰᔥᑕᒧᐙᑦ ᐅᑕᐙᔒᒻᐦ᙮ ᑲᔦ ᒫᒃ ᑖᐱᔥᑯᓐ ᒌᓴᔅ ᐁᒄ ᒫᒃ ᒋᔮᓅ ᒋᑲ ᐊᔮᓈᓅ ᑖᓐ ᑳ ᐃᔑ ᐊᔦᔅᑰᔥᑕᒧᐙᑲᓅᑦ ᒌᓴᔅ᙮ ᐌᔥ ᒌᔥᐱᓐ ᐐᒡ ᓇᓀᐦᑳᑌᔨᒨᒪᐦᑴ ᒌᓴᔅ ᐊᓂᔫ ᐁ ᑖᐺᔨᒪᐦᒄ ᑲᔦ ᒋᔮᓅ ᒋᑲ ᒋᔅᑌᔨᐦᑖᑯᐦᐄᑯᓈᓅ ᒋᔅᑌᔨᐦᑖᑯᐦᐋᑲᓅᑌ᙮ ᐁᔥᒄ ᒋᑲ ᒋᔅᑌᔨᐦᑖᑯᐦᐄᑯᓈᓅ 18 ᓂᔭ ᐁ ᐃᑌᔨᐦᑕᒫᓐ ᑖᓐ ᐁ ᐃᔑ ᓇᓀᐦᑳᑌᔨᒧᔨᐦᒄ ᐊᓄᐦᒌᔥ ᓇᒧᐃ ᒥᑐᓐ ᒉᒀᓐ ᒋᑲ ᐅᐦᒋ ᐃᑌᔨᐦᑖᑯᓐ ᒉ ᐃᑌᔨᐦᑖᑯᐦᒡ ᐃᔅᑯᑕᒃ ᐅᑎᐦᒋᐸᔨᐦᒉ ᐊᓂᑦ ᒉ ᒋᔅᑌᔨᐦᑖᑯᐦᐄᑕᐦᒄ ᒋᔐᒪᓂᑑ᙮ 19 ᒥᓯᐌ ᒉᒀᔫ ᑖᓐ ᑳ ᐃᔑ ᐅᔑᐦᑖᑦ ᒋᔐᒪᓂᑑ ᓈᔥᒡ ᐳᑴᔨᐦᑕᒨᒪᑲᓂᔫ ᐁ ᐊᔓᐙᐸᐦᑕᒧᒪᑲᓂᔨᒡ ᒉ ᐃᔥᐱᔥ ᒧᔐ ᓅᑯᐦᐋᑦ ᐅᑕᐙᔒᒻ᙮ 20 ᐌᔥ ᒥᓯᐌ ᒉᒀᔫ ᑳ ᐃᔑ ᐅᔑᐦᑖᑦ ᒋᔐᒪᓂᑑ ᒌ ᐃᔑᐦᑖᐤ ᒉᒃ ᒉᒌ ᐊᑎ ᐗᓈᑕᓂᔨᒡ᙮ ᓇᒪᔦᐤ ᒫᒃ ᐆ ᑳ ᐃᔑ ᓂᑐᐌᔨᐦᑕᒨᒪᑲᐦᒡ ᒥᓯᐌ ᐊᓐ ᑳ ᐃᔑ ᐅᔑᐦᑖᑲᓅᐦᒡ ᒉᒌ ᐃᔑᓈᑯᐦᒡ᙮ ᐎᔭ ᒋᔐᒪᓂᑑ ᑳ ᐃᑌᔨᐦᑕᐦᒃ ᐅᔫ ᒉᒌ ᐃᔑᓈᑯᓂᔨᒡ᙮ 21 ᔮᐸᒡ ᒫᒃ ᒌ ᐃᑌᔨᐦᑕᒻ ᐁᔥᒄ ᐯᔭᒀᐤ ᐁ ᒌᔑᑳᔨᒡ ᑳᐤ ᒉ ᐃᔑᐦᑖᑦ ᒥᓯᐌ ᑖᓐ ᑳ ᐃᔑ ᐅᔑᐦᑖᑦ ᐁᑳ ᓂᐦᑖ ᒉᒌ ᐗᓈᑎᓂᔨᒡ ᑲᔦ ᐁᑳ ᐁᒄ ᐗᓈᑎᓰᐎᓂᐦᒡ ᒉᒌ ᐃᔑ ᑎᐯᔨᐦᑖᑯᓂᔨᒡ᙮ ᒌ ᐃᑌᔨᐦᑕᒻ ᒉᒌ ᐊᓯᒡ ᒋᔅᑌᔨᐦᑖᑯᐦᑖᑲᓄᔨᒀᐤᐦ ᐅᔫᐦ ᒋᔅᑌᔨᐦᑖᑯᐦᐋᑲᓄᐐᒉᓐᐦ ᐅᑕᐙᔒᒻᐦ᙮ 22 ᒋᒋᔅᒉᔨᐦᑌᓈᓅ ᐊᓂᑦ ᒥᓯᐌ ᑖᓐ ᑳ ᐃᔑ ᐅᔑᐦᑖᑦ ᒋᔐᒪᓂᑑ ᐁ ᐃᐦᑕᑯᓂᔨᒡ ᑖᓐ ᐁ ᐃᔑ ᓇᓀᐦᑳᑌᔨᒨᒪᑲᓂᔨᒡ, ᒬᐦᒡ ᐁ ᐃᔑᓈᑯᓯᑦ ᐃᔅᑴᐤ ᐃᔅᑯᑕᒃ ᐁ ᐊᑎ ᒋᐦᒋᐸᔨᔨᒡ ᒉ ᐙᐸᒫᐅᓱᑦ᙮ 23 ᓇᒧᐃ ᒫᒃ ᒥᒄ ᐅᔫᐦ ᒉᒀᔫᐦ ᓇᓀᐦᑳᑌᔨᒨᒪᑲᓐᐦ᙮ ᒋᔮᓅ ᑲᔦ ᒋᔐᒪᓂᑑ ᑳ ᐅᑕᐙᔒᒥᑐᑖᑕᐦᒄ ᒋᓇᓀᐦᑳᑌᐅᒧᓈᓅ ᒋᑌᐦᐄᓈᐦᒡ ᒣᒀᒡ ᐁ ᐊᔓᐙᐸᑕᒪᐦᒄ ᒋᔐᒪᓂᑑ ᐅᑕᐙᔒᒻᐦ ᒉᒌ ᐃᔑ ᓅᑯᐦᐄᑯᔨᐦᒄ ᑲᔦ ᒉᒌ ᐃᔑᐦᐄᑯᔨᐦᒄ ᐁᑳ ᓂᐦᑖ ᒦᓐ ᒉᒌ ᓇᓀᐦᑳᑌᔨᒧᐐᐦᒄ, ᑳᒋᒉ ᒉᒌ ᐱᒫᑎᓰᐦᒄ᙮ ᔖᔥ ᒫᒃ ᒋᒌ ᒦᑯᓅ ᒋᔐᒪᓂᑑ ᐅᑕᐦᒑᐦᑾ ᒉᒌ ᐅᐦᒋ ᒋᔅᒉᔨᐦᑕᒧᐦᒄ ᒥᓯᐌ ᑖᐺ ᒉ ᐃᔅᐸᔨᔨᒡ ᐅᔫ᙮ 24 ᐁᒄ ᒫᒃ ᐁ ᐃᔑᓈᑯᓰᐦᒄ ᑳ ᐃᔥᐱᔥ ᐱᒫᒋᐦᐄᑕᐦᒄ ᒋᔐᒪᓂᑑ ᐁ ᐊᔅᐯᔨᒧᔨᐦᒄ ᒉ ᐅᑎᐦᒋᐸᔨᐦᒡ ᐆ᙮ ᐃᔅᑯᑕᒃ ᒫᒃ ᒌ ᐅᑎᐦᒋᐸᔨᐦᒉ ᑮᐹ ᓇᒧᐃ ᐁᒄ ᒋᑲ ᐅᐦᒋ ᐊᔓᐙᐸᐦᑌᓈᓅ᙮ ᐌᔥ ᑖᐹ ᐊᔓᐙᐸᐦᑕᒻ ᐊᐌᓐ ᒉᒀᔫ ᒉᒌ ᐃᔅᐸᔨᔨᒡ ᔖᔥ ᐁ ᒌ ᐃᔅᐸᔨᔨᒡ᙮ 25 ᒋᑕᓱᐙᐸᐦᑌᓈᓅ ᒫᒃ ᒉᒀᓐ ᐁᑳ ᓂᐦᑖ ᐅᐦᒋ ᐙᐸᐦᑕᒧᒄ᙮ ᒋᓰᐲᐌᓰᓈᓅ ᒫᒃ ᐁ ᐊᔓᐙᐸᐦᑕᒧᐦᒄ᙮ 26 ᐃᐦᑕᑯᓐ ᑖᓐ ᐁ ᐃᔥᐱᔥ ᐁᑳ ᓵᐯᔨᐦᑕᒧᐦᒄ ᒥᒄ ᒫᒃ ᐃᐦᑖᐤ ᑳ ᐸᔦᐦᒋᓰᑦ ᐊᐦᒑᐦᒄ ᒉᒌ ᐐᒋᐦᐄᑕᐦᒄ᙮ ᒧᔮᒻ ᐁ ᐃᔑᓈᑯᓰᐦᒄ ᓂᔮᓂᑯᑌᐦᒡ ᐁᑳ ᒋᔅᒉᔨᐦᑕᒧᐦᒄ ᑖᓐ ᓂᐦᐋᐤ ᒋᐹ ᐃᔑ ᐊᔨᒥᐦᐋᓈᓅ᙮ ᐁᑯᑦ ᒫᒃ ᓀᑐᑕᒫᔅᑕᒫᑕᐦᒄ ᑳ ᐸᔦᐦᒋᓰᑦ ᐊᐦᒑᐦᒄ ᐅᐦᒋᔥᑰ ᒋᔐᒪᓂᑑᐦ ᐁ ᐃᐦᑖᔨᒡ ᐁ ᒫᒫᑐᐌᐅᒧᔨᐦᒄ ᐁᑳ ᒌ ᐐᐦᑕᒧᐦᒄ ᑖᓐ ᓂᐦᐋᐤ ᐁ ᐃᑕᒪᐦᒋᐦᐅᔨᐦᒄ᙮ 27 ᒋᔐᒪᓂᑑ ᒫᒃ ᑳ ᒋᔅᒉᔨᐦᑕᐦᒃ ᒥᓯᐌ ᒋᑌᐦᐄᓅᐦ ᒋᔅᒉᔨᐦᑕᒻ ᑖᓐ ᓂᐦᐋᐤ ᐁ ᐃᔑ ᓂᑐᑕᒫᔅᑕᒫᒉᔨᒡ ᐊᐦᒑᐦᒄ ᐌᔥ ᓂᑐᑕᒫᔅᑕᒧᐌᔫᐦ ᐊᓂᔫᐦ ᑳ ᑖᐺᐦᑕᒦᑣᐤᐦ ᒉᒌ ᐃᐦᑑᑖᑲᓄᔨᒡ ᒋᔐᒪᓂᑑ ᐅᑎᑌᔨᐦᑕᒧᐎᓐ᙮ 28 ᒋᒋᔅᒉᔨᐦᑌᓈᓅ ᒫᒃ ᒥᓯᐌ ᒉᒀᔫ ᐁ ᐃᔅᐸᔨᔨᒡ ᐅᐱᒫᑎᓰᐎᓃᐦᒡ ᐊᓂᔫᐦ ᑳ ᓵᒋᐦᐄᑯᑦ ᒋᔐᒪᓂᑑ ᐃᐦᑑᑕᒧᐌᐤ ᒥᓯᐌ ᒉᒌ ᒥᔪᑑᑖᑯᔨᒡ᙮ ᐁᑯᓐ ᐁ ᐃᐦᑑᑕᒧᐙᑦ ᐊᓂᔫᐦ ᐎᔭ ᑳ ᐃᑌᔨᐦᑕᐦᒃ ᒉᒌ ᐎᔮᐸᒫᑦ ᒉᒌ ᐅᑏᓃᒥᑦ᙮ 29 ᐌᔥ ᓂᔮᑲᓐ ᒌ ᒋᔅᒉᔨᒣᐤ ᒋᔐᒪᓂᑑ ᐊᐌᔫ ᒉ ᐅᑏᓃᒥᑦ, ᐁᐅᑯᓐ ᒫᒃ ᐅᔫᐦ ᑳ ᐎᔮᐸᒫᑦ ᒉ ᓂᔅᐱᑕᐙᔨᒡ ᐅᑯᓯᓴ᙮ ᐁᐅᒄ ᐅᔫ ᑳ ᐃᐦᑎᑦ ᒋᔐᒪᓂᑑ ᓃᔥᑕᒨᔖᓐ ᒉᒌ ᐃᐦᑖᔨᒡ ᐅᑯᓯᓴ ᐊᓂᑦ ᒣᑴᓰᓅ ᐁ ᒥᐦᒉᑎᔨᒡ ᐐᒋᔖᓂᒫᐤᐦ᙮ 30 ᐊᓂᔫᐦ ᒫᒃ ᓂᔮᑲᓐ ᑳ ᐎᔦᔨᒫᑦ ᐊᐌᔫ ᒌ ᑌᑆᑌᐤ᙮ ᐅᔫᐦ ᒫᒃ ᑳ ᑌᑆᑖᑦ ᒌ ᑯᐃᔅᑯᓈᑯᐦᐁᐤ ᐎᔭ ᐃᔑ ᐁ ᐃᐦᑖᑦ᙮ ᐅᔫ ᒫ ᑳ ᑯᐃᔅᑯᓈᑯᐦᐋᑦ ᒌ ᒋᔅᑌᔨᐦᑖᑯᐦᐁᐤ᙮ ᐁ ᐃᔥᐱᔥ ᓵᒋᐦᐄᑕᐦᒄ ᒋᔐᒪᓂᑑ 31 ᒥᓯᐌ ᒫᒃ ᐆ ᐁ ᒋᔅᒉᔨᐦᑕᒪᐦᒄ ᒫᐤ ᒉᒌ ᐃᑗᔨᐦᒄ, ᑖᐺ ᒋᔐᒪᓂᑑ ᐙᒋᐦᐄᑯᐙᐅᐦᑴ ᓇᒧᐃ ᐊᐌᓐ ᒋᑲ ᒌ ᔖᑰᒋᐦᐄᑯᓅ᙮ 32 ᓇᒧᐃ ᐙᐙᒡ ᐅᑯᓯᓴ ᒎᐦᒋ ᒪᓈᑎᓇᒫᑯᓅ᙮ ᒌ ᐸᒋᔥᑎᓀᐤ ᒉᒌ ᓂᐱᔅᑕᒫᑰᐦᒄ᙮ ᐊᓂᔫ ᒫᒃ ᐙᐙᒡ ᑎᐲᐌ ᐅᑯᓯᓴ ᐁ ᒌ ᐸᒋᔥᑎᓈᑦ ᒉᒌ ᓂᐸᐦᐋᑲᓄᔨᒡ ᒋᔮᓅ ᐅᐦᒋ ᐁᑯᑦ ᒉ ᐅᐦᒋ ᒉᔥᑎᓈᐦᐅᔨᐦᒄ ᒥᒄ ᒉ ᐃᔑ ᒦᑯᔨᐦᒄ ᑯᑕᒃ ᒉᒀᔫᐦ᙮ 33 ᐊᐌᓐ ᒉᒌ ᒪᒥᔑᒫᑦ ᒋᔐᒪᓂᑑᐦ ᐅᐎᔮᐱᒫᑲᓂᔫᐦ᙮ ᐎᔭ ᒋᔐᒪᓂᑑ ᐅᑯᐃᔅᑯᑖᑎᓰᐅᒡ ᐃᔑ ᑲᓇᐙᐸᒣᐤ ᐊᓂᔫ ᑳ ᐎᔮᐸᒫᑦ᙮ 34 ᓇᒧᐃ ᒫᒃ ᐊᐌᓐ ᒋᑲ ᒌ ᓂᔔᓈᒋᒣᐤ ᒋᔐᒪᓂᑑᐦ ᐅᐎᔮᐱᒫᑲᓂᔫᐦ ᒉᒌ ᐃᑗᑦ ᐁ ᐃᑌᔨᐦᑖᑯᓂᔨᒡ ᒉᒌ ᐗᐌᔑᐦᐋᑲᓄᔨᒡ ᐅᒪᒋᐦᑣᐎᓂᔫ ᐅᐦᒋ᙮ ᐌᔥ ᓇᒧᐃ ᒥᒄ ᑰᐦᒋ ᓂᐱᔅᑕᒫᑯᓅ ᙭ ᐁᔫ ᒌ ᐗᓂᔥᑳᓈᑲᓅ ᓂᐳᐎᓂᐦᒡ ᐅᐦᒋ᙮ ᒣᒀᒡ ᒫᒃ ᒋᔐᒪᓂᑑᐦ ᐅᓂᐦᐄᐎᓃᐦᒡ ᐊᐴ ᐁ ᐊᔨᒥᐦᐁᔥᑕᒫᑕᐦᒄ᙮ 35 ᐊᐌᓐ ᒫᒃ ᒉᒌ ᐄᒉᓂᑕᐦᒄ ᙭ ᐅᓵᒋᐦᐄᐌᐎᓃᐦᒡ ᐅᐦᒋ᙮ ᐋᑦ ᓈᔥᒡ ᓇᓀᐦᑳᑌᔨᒧᐐᐦᑴ ᒫᒃ ᓈᔥᒡ ᐋᔨᒧᐦᐅᔨᐦᑴ, ᑲᔦ ᐋᑦ ᐗᐐᓯᒉᔨᐦᑕᒥᐦᐄᑯᐐᐦᑴ, ᐋᑦ ᐃᔑᓈᑯᐦᒉ ᒉᒌ ᑲᐅᐦᑲᑌᔨᐦᒄ, ᑲᔦ ᐋᑦ ᓈᔥᒡ ᒋᔅᑎᒫᑎᓰᐦᑴ, ᐋᑦ ᓈᔥᒡ ᑯᔥᑖᑎᑯᐦᒉ ᑖᓂᑦ ᐁ ᐃᐦᑖᔨᐦᒄ ᑲᔦ ᒫᒃ ᐋᑦ ᓂᐸᐦᐄᑯᔨᐦᑴ ᓇᒧᐃ ᔮᐸᒡ ᒋᑲ ᒌ ᐄᒉᐦᑕᐦᐄᑯᓈᓅ ᒌᓴᔅ ᐅᓵᒋᐦᐄᐌᐎᓂᐦᒡ ᐅᐦᒋ᙮ 36 ᐃᑕᔥᑌᐤ ᒋᔐᒪᓂᑑ ᐅᑕᔨᒧᐎᓂᐦᒡ, ᐁᔑᑯᒻ ᒌᔑᑳᐤᐦ ᑯᔥᐸᓀᔨᐦᑖᑯᓐ ᒉᒌ ᓂᐸᐦᐄᑯᔮᐦᒡ ᐁ ᓅᔔᔥᑳᑖᐦᒡ᙮ ᒬᐦᒡ ᒫᓂᔥᒑᓂᔕᒡ ᑳ ᐯᔓᐙᑲᓅᑣᐤ ᒉᒌ ᓂᐸᐦᐋᑲᓅᑣᐤ ᐁᑯᓐ ᐁ ᐃᔑᓈᑯᓯᔮᐦᒡ᙮ 37 ᐋᑦ ᒫᒃ ᒥᓯᐌ ᐆ ᐁ ᐃᔑ ᓇᓈᐦᑰ ᐃᔅᐸᔨᐦᒡ ᐊᓂᑦ ᐁ ᐃᐦᑖᔨᐦᒄ ᒋᑕᔮᓈᓅ ᐱᔅᒋᔮᒉᐎᓐ ᙭ ᐅᐦᒋ, ᐊᓐ ᑳ ᓵᒋᐦᐄᑕᐦᒄ ᐌᔥ ᐎᔭ ᒋᐐᒋᐦᐄᑯᓅ᙮ 38 ᓂᒉᔥᑎᓈᐦᐅᓐ ᐁᑳ ᒉᒀᓐ ᐃᐦᑕᑯᐦᒡ ᒉᒌ ᐄᒉᐦᑕᐦᐄᑯᔨᐦᒄ ᙭ ᐅᓵᒋᐦᐄᐌᐎᓂᐦᒡ ᐅᐦᒋ᙮ ᐴᓂᐱᒫᑎᓯᔫᐦᒄ ᒫᒃ ᐱᒫᑎᓯᔫᐦᒄ ᔮᐸᒡ ᒋᐹ ᓵᒋᐦᐄᑯᓅ᙮ ᓇᒧᐃ ᐙᐙᒡ ᐁᓐᒋᓕᒡ ᒫᒃ ᒪᒋ ᐊᐦᒑᐦᑯᐦᒡ ᒋᑲ ᒌ ᐄᒉᐦᑕᐦᐄᑯᓅᒡ ᙭ ᐅᓵᒋᐦᐄᐌᐎᓃᐦᒡ ᐅᐦᒋ᙮ ᓇᒧᐃ ᒉᒀᓐ ᒋᑲ ᒌ ᐃᔅᐸᔫ ᐊᓄᐦᒌᔥ ᒫᒃ ᐊᓂᑌ ᓃᔥᑕᒥᐦᒡ ᒉᒌ ᐄᒉᐦᑕᐦᐄᑯᔨᐦᒄ ᐅᓵᒋᐦᐄᐌᐎᓂᐦᒡ ᐅᐦᒋ᙮ 39 ᓇᒧᐃ ᐃᐦᑕᑯᓐᐦ ᓲᐦᒉᔨᐦᑖᑯᓱᐎᓐᐦ ᐊᓂᑌ ᐃᔥᐱᒥᐦᒡ ᒫᒃ ᐅᑌ ᓃᐦᑖᐦᒡ ᒉᒌ ᐄᒉᐦᑕᐦᐄᑯᔨᐦᒄ ᐅᓵᒋᐦᐄᐌᐎᓂᐦᒡ᙮ ᑲᔦ ᓇᒧᐃ ᐃᐦᑕᑯᓂᔫ ᒉᒀᔫ ᐁ ᒌ ᐅᔑᐦᑖᑦ ᒋᔐᒪᓂᑑ ᒉᒌ ᐄᒉᐦᑕᐦᐄᑯᔨᐦᒄ ᙭ ᐆ ᓵᒋᐦᐄᐌᐎᓂᐦᒡ ᐅᐦᒋ᙮ ᐊᓂᔫ ᑖᓐ ᑳ ᐃᔑ ᐃᐦᑑᑕᒫᑕᐦᒄ ᒌᓴᔅ ᙭ ᒋᑎᐯᔨᐦᒋᑫᒥᓅᐦ ᐁᑯᑦ ᑳ ᐙᐸᐦᑏᑕᐦᒄ ᑖᓐ ᐁ ᐃᔥᐱᔥ ᓵᒋᐦᐄᑕᐦᒄ ᒋᔐᒪᓂᑑ᙮ |
© Wycliffe Bible Translators, Inc. and Canadian Bible Society, 2001.
Wycliffe Bible Translators, Inc.