Revelation 8 - ᒋᔐᒪᓂᑑ ᐅᑕᔨᒳᐃᓐ ᑳ ᐅᔅᑳᒡ ᑌᔅᑎᒥᓐᑦᒫᓂᔥᒑᓂᔥ ᑳ ᒪᓇᐦᒃ ᐊᓂᔫ ᒫᐦᒋᔥᑕᐃ ᒌᔖᐙᒡ ᐸᓴᑯᐦᐄᑲᓂᔫ 1 ᐁᒄ ᐊᓐ ᒫᓂᔥᒑᓂᔥ ᒦᓐ ᑳ ᒪᓇᐦᒃ ᒌᔖᐙᒡ ᐸᓴᑯᐦᐄᑲᓂᔫ ᐊᓂᑦ ᒪᓯᓇᐦᐄᑲᓂᐦᒡ ᐅᐦᒋ᙮ ᐁᐅᒄ ᐁᒄ ᐊᓂᔫ ᒫᐦᒋᔥᑕᐃ ᒌᔖᐙᒡ ᐸᓴᑯᐦᐄᑲᓂᔫ᙮ ᐃᔅᑯᑕᒃ ᒫᒃ ᑳ ᒪᓇᐦᒃ ᐊᐱᐦᑑ ᑎᐸᐦᐄᑲᓐ ᓇᒧᐃ ᒥᑐᓐ ᒉᒀᓐ ᐅᐦᒋ ᐯᐦᑖᑯᓐ ᐊᓂᑌ ᑭᐦᒋᑮᔑᑯᐦᒡ᙮ 2 ᐁᒄ ᑳ ᐙᐸᒪᒀᐤ ᐊᓂᒌ ᓃᔣᔥᒡ ᐁᓐᒋᓕᒡ ᒨᔥ ᐅᐦᒋᔥᑰ ᒋᔐᒪᓂᑑᐦ ᐁ ᐃᐦᑖᔨᒡ ᑳ ᓃᐴᑣᐤ᙮ ᓃᔣᔥᒡ ᐴᑖᒋᑲᓐᐦ ᒌ ᒥᔮᑲᓅᒡ᙮ 3 ᒌ ᐃᐦᑖᐤ ᒦᓐ ᑯᑕᒃ ᐁᓐᒋᓪ ᐁ ᑕᐦᑯᓇᐦᒃ ᐁ ᐅᔖᐅᔔᓕᔮᓈᐱᔅᑳᔨᒡ ᐎᔮᑲᓂᔫ ᑳ ᐐᐦᒋᒫᑯᓂᔨᒡ ᒉᒀᔫ ᑳ ᒌ ᐃᔥᒀᓯᑲᓄᔨᒡ ᐁ ᐃᐦᑕᑯᓂᔨᒡ ᐊᓂᑦ᙮ ᒌ ᐯᒋ ᓃᐴ ᐅᐦᐱᒣ ᐊᓂᑦ ᐊᓂᔫ ᐸᒋᔥᑎᓂᒉᐅᓈᐱᔅᑯᔫ᙮ ᒥᔅᑕᐦᐄ ᒫᒃ ᒌ ᒥᔮᑲᓅ ᐊᓂᔫ ᑳ ᐐᒋᒫᑯᓯᔨᒡ ᒉᒀᔫ ᒉᒌ ᒌᑲᐅᓇᐦᒃ ᐅᑕᔨᒥᒋᑫᐎᓃᐦᒡ ᑳ ᑖᐺᐦᑕᒦᑣᐤᐦ ᑲᔦ ᒉᒌ ᐸᒋᔥᑎᓇᒧᐙᑦ ᒋᔐᒪᓂᑑᐦ ᐊᓂᑦ ᑳ ᐅᔖᐅᔔᓕᔮᓈᐱᔅᑰᐦᒡ ᐸᒋᔥᑎᓂᒉᐅᓈᐱᔅᑯᐦᒡ᙮ 4 ᐊᓂᔫ ᑳ ᐐᐦᒋᒫᑯᓯᔨᒡ ᑳ ᐃᔥᒀᑌᔨᒡ ᑳ ᑕᐦᑯᓇᐦᒃ ᐊᓐ ᐁᓐᒋᓪ ᐅᐦᒋᔥᑰ ᒋᔐᒪᓂᑑ ᐁ ᐃᐦᑖᔨᒡ ᑳ ᓃᐴᑦ, ᐊᓂᑌ ᒋᔐᒪᓂᑑ ᐁ ᐃᐦᑖᔨᒡ ᒌ ᐃᑖᐱᐦᑌᐸᔨᓂᔫ, ᐁᔫ ᐊᓂᔫᐦ ᑳ ᑖᐺᐦᑕᒥᔨᒡ ᐅᑕᔨᒥᐦᒋᑫᐎᓂᔫᐦ ᐁ ᐊᓯᒋᐸᔨᓂᔨᒀᐤᐦ᙮ 5 ᐁᒄ ᐊᓐ ᐁᓐᒋᓪ ᑳ ᓵᑲᔅᒋᓂᑖᑦ ᐊᓂᔫ ᑳ ᐅᔖᐅᔔᓕᔮᐅᓈᐱᔅᑳᔨᒡ ᐎᔮᑲᓂᔫ ᐃᔥᑯᑌᔫ ᐁ ᐊᔥᑖᑦ ᐊᓂᑦ ᐸᒋᔥᑎᓂᒉᐅᓈᐱᔅᑯᐦᒡ ᐁ ᐅᐦᑎᓇᐦᒃ᙮ ᐁᒄ ᐊᓂᑌ ᐊᔅᒌᐦᒡ ᑳ ᐃᔑᐌᐱᓇᐦᒃ ᐊᓂᔫ ᐃᔥᑯᑌᔫ, ᑏᐌᐦᒡ ᒫᒃ ᒌ ᐯᐦᑖᑯᓲᒡ ᓂᒥᔅᒎᒡ ᑲᔦ ᒌ ᒥᔅᑕ ᐗᔀᔅᑌᐸᔫ ᑲᔦ ᒌ ᑯᐃᐦᑯᓐ᙮ ᐊᓂᔫᐦ ᓃᔥᑕᒻ ᓀᐤ ᐴᑖᒋᑲᓐᐦ 6 ᐁᒄ ᐊᓂᒌ ᓃᔣᔥᒡ ᐁᓐᒋᓪᒡ ᓃᔣᔥᒡ ᐴᑖᒋᑲᓐᐦ ᑳ ᑕᐦᑯᓂᐦᒀᐤ ᑳ ᐊᔦᔅᑯᐐᑣᐤ ᒉᒌ ᐴᑖᑕᐦᒀᐤ ᐊᓂᔫᐦ ᐴᑖᒋᑲᓐᐦ᙮ 7 ᐁᒄ ᐊᓐ ᓃᔥᑕᒻ ᑳ ᐃᐦᑖᑦ ᐁᓐᒋᓪ ᑳ ᐴᑖᑕᐦᒃ ᐅᐴᑖᒋᑲᓐ᙮ ᒌ ᒥᔅᑯᒥᔫᐦᑖᓐ ᑲᔦ ᐃᔥᑯᑌᐤ ᒌ ᐸᐦᒋᔥᑎᓐ ᐁ ᒌᑰᐸᔨᐦᒡ ᒥᐦᒄ ᐊᓂᑌ ᐊᔅᒌᐦᒡ ᐁ ᐃᔑ ᐸᐦᒋᔥᑎᐦᒡ᙮ ᒉᑳᑦ ᐋᐱᐦᑑ ᐁ ᐃᔅᐱᒋᔅᑲᒥᑳᒡ ᐊᔅᒌ ᒌ ᐃᔥᒀᑌᐤ᙮ ᒉᑳᑦ ᒫᒃ ᐋᐱᐦᑑ ᒌ ᐃᔥᐱᔥ ᐃᔥᒀᓲᒡ ᒥᔅᑎᑯᒡ᙮ ᒥᓯᐌ ᑲᔦ ᒪᔥᑯᔔᐦ ᒌ ᐃᔥᒀᑌᐤᐦ᙮ 8 ᐁᒄ ᒦᓐ ᑯᑕᒃ ᐁᓐᒋᓪ ᑳ ᐴᑕᐦᒃ ᐅᐴᑖᒋᑲᓐ᙮ ᒧᔮᒻ ᒥᔅᑕ ᐗᒌᐦ ᐁ ᐃᔥᑯᑌᐤᐦᒡ ᒌ ᐃᔑᓈᑯᓐ ᒉᒀᓐ ᒋᐦᒋᑲᒦᐦᒡ ᐁ ᐃᔑᐌᐱᓂᑲᓅᐦᒡ᙮ ᒉᑳᑦ ᒫᒃ ᐋᐱᐦᑑ ᐊᓐ ᒋᐦᒋᑲᒦ ᒌ ᐊᑎ ᒥᐦᑰᓐ᙮ 9 ᒥᓯᐌ ᑖᓐ ᑳ ᐃᔑ ᐱᒫᑎᓰᒪᑲᐦᒡ ᓂᐲᐦᒡ ᒉᑳᑦ ᐋᐱᐦᑑ ᒌ ᓂᐲᒪᑲᓐ᙮ ᑲᔦ ᐯᔭᒄ ᐁᔑᑯᒻ ᓂᔥᑐ ᒌᒫᓐᐦ ᐊᓂᑦ ᑳ ᐃᐦᑕᑯᐦᒀᐤᐦ ᒌ ᐗᓈᑕᓐ᙮ 10 ᐁᒄ ᐊᓐ ᓂᔥᑐ ᑳ ᐃᐦᑖᑦ ᐁᓐᒋᓪ ᑳ ᐴᑖᑕᐦᒃ ᐅᐴᑖᒋᑲᓐ᙮ ᐁ ᒥᓯᒋᐦᑎᑦ ᐊᒐᐦᑯᔥ ᒌ ᐸᐦᒋᔑᓅ ᒌᔑᑯᐦᒡ ᐅᐦᒋ ᐊᓂᑌ ᐃᔑ ᐊᔅᒌᐦᒡ᙮ ᒧᔮᒻ ᐊᓂᑌ ᐁ ᐗᓂᔅᒀᐦᑎᑰᑦ ᒥᔅᑎᒄ ᐁ ᐸᓱᑦ ᐁᑯᓐ ᑳ ᐃᔑᓈᑯᓯᑦ ᐊᓐ ᐊᒐᐦᑯᔥ᙮ ᒉᑳᑦ ᒫᒃ ᐋᐱᐦᑑ ᐁ ᑕᐦᑎᐦᒀᐤ ᓰᐲᐦ ᑲᔦ ᒫᒃ ᑖᓂᑦ ᐯᒫᒎᐦᒡ ᓂᐲᐦ ᐁᑯᑌ ᑳ ᐃᔑ ᐸᐦᒋᔑᐦᒃ ᐊᓐ ᐊᒐᐦᑯᔥ᙮ 11 ᐊᓐ ᒫᒃ ᐊᒐᐦᑯᔥ ᐐᓴᑲᓐ ᒌ ᐃᔑᓂᐦᑳᓲ᙮ ᒉᑳᑦ ᒫᒃ ᐋᐱᐦᑑ ᑖᓂᑦ ᐁ ᐊᑎ ᐃᐦᑕᑯᐦᒡ ᓂᐲᐦ ᒌ ᐐᓴᑳᑲᒨ᙮ ᒥᐦᒉᑐ ᐊᐌᓂᒌ ᒌ ᓂᐸᐦᐄᑰᒡ ᐊᓂᔫ ᓂᐲᔫ ᐁ ᒥᓂᐦᑴᑣᐤ ᐁᑳ ᐅᐦᒋ ᒥᔻᑲᒥᔨᒡ᙮ 12 ᐁᒄ ᐊᓐ ᓀᐤ ᑳ ᐃᐦᑖᑦ ᐁᓐᒋᓪ ᑳ ᐴᑖᑕᐦᒃ ᐅᐴᑖᒋᑲᓐ᙮ ᒉᑳᑦ ᐋᐱᐦᑑ ᐊᓐ ᐲᓯᒻ, ᑲᔦ ᒉᑳᑦ ᐋᐱᐦᑑ ᑎᐱᔅᒋᐲᓯᒻ ᑲᔦ ᒉᑳᑦ ᐋᐱᐦᑑ ᐁ ᑕᔑᑣᐤ ᐊᒐᐦᑯᔕᒡ ᒌ ᐃᐦᑕᑯᓂᔫ ᑳ ᐃᔑ ᐗᓈᒋᐦᐋᑲᓅᑣᐤ ᐁᒄ ᓇᒧᐃ ᑌᑲᔥ ᐋᐱᐦᑑ ᐁ ᐃᔅᒀᔨᒡ ᐁ ᐃᔥᐱᔥ ᒋᐦᑳᔥᑐᐌᑣᐤ ᐅᐦᒋ ᐃᔥᐱᔥ ᒋᐦᑳᔥᑐᐌᐅᒡ᙮ ᒉᑳᑦ ᐋᐱᐦᑖᒌᔑᑳᐤᐦ ᐃᔥᐱᔥ ᓇᒧᐃ ᐅᐦᒋ ᒋᐦᑳᔥᑐᐌᐤ ᐲᓯᒻ᙮ ᑎᐱᔅᒋᐲᓯᒻ ᑲᔦ ᒫᒃ ᐊᒐᐦᑯᔕᒡ ᑲᔦ ᐎᔭᐙᐤ ᓇᒧᐃ ᐅᐦᒋ ᒋᐦᑳᔥᑐᐌᐅᒡ ᒉᑳᑦ ᐋᐱᐦᑖᑎᐱᔅᑳᐤᐦ ᐃᔥᐱᔥ᙮ 13 ᒣᒀᒡ ᒫᒃ ᐁ ᐄᑖᐱᔮᓐ, ᓂᒌ ᐙᐸᒫᐤ ᒥᔅᒋᓲ ᐁ ᐸᐹᒥᐦᐃᔮᑦ ᐊᓂᑌ ᒌᔑᑯᐦᒡ ᐁ ᒋᔐᐌᑦ ᐁ ᐃᑗᑦ, ᑯᔥᑖᑎᑯᓐ, ᑯᔥᑖᑎᑯᓐ, ᑲᑕ ᑯᔥᑖᑎᑯᓐ ᑖᓐ ᒉ ᐃᔅᐸᔨᑦ ᒥᓯᐌ ᐊᐌᓐ ᐅᑕᐦ ᐊᔅᒌᐦᒡ ᑳ ᐃᐦᑖᑦ ᐃᔅᑯᑕᒃ ᐴᑖᑕᐦᒀᐌᓂᒡ ᐅᐴᑖᒋᑲᓇᐙᐤᐦ ᐊᓂᒌ ᓂᔥᑐ ᐁᓐᒋᓕᒡ ᐁᔥᒄ ᐁᑳ ᐅᐦᒋ ᐴᑖᑕᐦᒀᐤ ᐅᐴᑖᒋᑲᓇᐙᐤᐦ᙮ |
© Wycliffe Bible Translators, Inc. and Canadian Bible Society, 2001.
Wycliffe Bible Translators, Inc.