Revelation 11 - ᒋᔐᒪᓂᑑ ᐅᑕᔨᒳᐃᓐ ᑳ ᐅᔅᑳᒡ ᑌᔅᑎᒥᓐᑦᑳ ᓃᔑᑣᐤ ᑳ ᐐᐦᑕᐦᒀᐤ ᑖᓐ ᑳ ᐃᔑ ᐙᐸᐦᑕᐦᒀᐤ 1 ᐁᒄ ᑳ ᒦᑯᔮᓐ ᒥᔅᑎᒄ ᑎᐹᔅᑯᓂᑲᓐ᙮ ᓂᒌ ᐃᑎᑰᓐ, ᒋᔐᒪᓂᑑ ᐃᑌᐤ, ᐱᓯᑰᐦ᙮ ᒉ ᓂᑑ ᑎᐹᔅᑯᓇᒪᓐ ᓂᒋᔐᐊᔨᒥᐦᐁᐅᑲᒥᒄ ᑲᔦ ᐊᓐ ᐸᒋᔥᑎᓂᒉᐅᓈᐱᔅᒄ᙮ ᑲᔦ ᒫᒃ ᒉ ᐊᒋᒪᑣᐤ ᐊᓂᒌ ᐊᓂᑦ ᑳ ᐃᐦᑖᑣᐤ ᑳ ᓅᒌᔥᑑᑣᐤ᙮ 2 ᒥᒄ ᐁᑳᐐ ᑎᐹᔅᑯᓐᐦ ᐊᓂᑦ ᐁ ᑆᐦᒋᐦᒡ ᐙᔅᑳ ᐊᓐ ᒋᔐᐊᔨᒥᐦᐁᐅᑲᒥᒄ᙮ ᐁᑳᐐ ᑎᐹᔅᑯᓐᐦ ᐌᔥ ᐊᓂᒌ ᐁᑳ ᒎᐗ ᑳ ᐃᑎᔅᑳᓀᓯᑣᐤ ᒌ ᒥᔮᑲᓅᒡ ᐊᓂᔫ᙮ ᐁᐅᑯᓂᒡ ᐅᒌ ᒉ ᑖᐦᑕᐦᑯᔥᑳᑕᐦᒀᐤ ᐊᓂᔫ ᐃᐦᑖᐎᓂᔫ ᑳ ᐸᔦᐦᒋᓰᒪᑲᓂᔨᒡ ᓀᒥᑕᓅ ᓃᔓ ᐲᓯᒻ ᐃᔥᐱᔥ᙮ 3 ᒣᒀᒡ ᒫᒃ ᐊᓂᔫᐦ ᐁ ᒌᔑᑳᒀᐤᐦ ᓂᑲ ᐃᑎᔕᐦᐙᐅᒡ ᓃᔓ ᐊᐌᓂᒡ ᒉ ᐅᑖᐸᒋᐦᐋᑲᓂᔮᓐ ᒉᒌ ᒋᔅᒋᐌᐦᐄᒉᑣᐤ᙮ ᑲᓨᑲᔅ ᒪᒍᓂᔑᔫ ᐁ ᒋᒋᔥᑲᐦᒀᐤ᙮ ᐯᔭᒀᐤ ᒋᔐᒥᑖᐦᑐᒥᑕᓅ ᓃᔣᐤ ᒥᑖᐦᑐᒥᑕᓅ ᒦᓐ ᑯᑣᔓᒥᑕᓅ ᒌᔑᑳᐤᐦ ᐁᑯᓐ ᒉ ᐃᔥᐱᔥ ᐙᐐᐦᑕᐦᒀᐤ ᑖᓐ ᒉ ᐃᔥᐱᔥ ᒦᒀᐤ ᒉᒌ ᐃᔑ ᐋᔨᒨᑕᐦᒀᐤ᙮ ᐁᑯᓐ ᐁ ᑕᐦᑎᐦᒀᐤ ᐁ ᒌᔑᑳᒀᐤᐦ ᓀᒥᑕᓅ ᓃᔓ ᐲᓯᒻᐦ᙮ 4 ᐅᒌ ᒫᒃ ᓃᔓ ᐋᐸᒋᐦᐋᑲᓐᒡ ᐁᐅᑯᓂᒡ ᐊᓂᒌ ᑳ ᓃᔓᑳᐴᑣᐤ ᐊᓕᕝ ᒥᔅᑎᑯᒡ ᑲᔦ ᐁᐅᑯᓂᒡ ᐊᓂᒌ ᐊᓂᔫᐦ ᓃᔓ ᐙᔥᑌᓇᒫᑲᓈᐦᑎᒄ ᐅᐦᒋᔥᑰ ᒋᔐᒪᓂᑑ ᐁ ᐃᐦᑖᑦ ᑳ ᐃᐦᑕᑯᓂᔨᒀᐤᐦ, ᐊᓂᔫᐦ ᒥᓯᐌ ᐊᔅᒌᔫ ᑳ ᐅᒋᒫᐅᑐᑕᒥᔨᒡ᙮ 5 ᐐ ᐎᔦᔥ ᐃᐦᑑᑖᑯᑣᐌᓂᒡ ᒫᒃ ᐊᐌᔫᐦ ᐅᒌ ᓃᔓ ᐋᐸᒋᐦᐋᑲᓂᒡ, ᐃᔥᑯᑌᔫ ᒋᑲ ᐅᐦᒋᐸᔫ ᐅᑑᓂᐙᐦᒡ ᐅᐦᒋ᙮ ᐁᑯᑦ ᒫᒃ ᒉ ᐅᐦᒋ ᐗᓈᒋᐦᐋᑣᐤ ᐊᓂᔫᐦ ᑳ ᐅᐦᑳᑎᑯᑣᐤ᙮ ᐁᑯᑦ ᑲᔦ ᒉ ᐅᐦᒋ ᓂᐸᐦᐋᑣᐤ ᒥᒄ ᐁ ᐃᔑᓈᑯᓯᔨᒡ ᐊᐌᔫᐦ ᐙᐦ ᐎᔦᔥ ᐃᐦᑑᑖᑯᑣᐤ᙮ 6 ᒣᒀᒡ ᒫᒃ ᐊᓂᔫ ᒉ ᐃᔥᐱᔥ ᒋᔅᒋᐌᐦᐄᒉᑣᐤ ᒋᑲ ᐊᔮᐅᒡ ᑎᐯᔨᐦᒋᒉᐎᓂᔫ ᒉᒌ ᐃᐦᑑᑕᐦᒀᐤ ᐁᑳ ᒉᒌ ᒋᒨᓂᔨᒡ᙮ ᒋᑲ ᒥᔮᑲᓅᒡ ᑲᔦ ᒥᓯᐌ ᐁ ᐃᔑ ᐃᐦᑕᑯᓂᔨᒡ ᓂᐲᔫ ᒉᒌ ᑎᐯᔨᐦᑕᐦᒀᐤ ᐁᒄ ᒫᒃ ᒉ ᐃᐦᑑᑕᐦᒀᐤ ᐊᓂᔫ ᓂᐲᔫ ᒥᐦᑯᐦᒡ ᒉᒌ ᐃᔑᓈᑯᓂᔨᒡ᙮ ᒥᒄ ᐙ ᐃᔥᐱᔥ ᐃᐦᑑᑕᐦᒀᐤ ᒋᑲ ᒌ ᐃᐦᑑᑕᒧᒡ ᓇᓈᐦᑰ ᐃᑖᔅᐱᓀᐎᓂᔫ ᒉᒌ ᐃᐦᑕᑯᓂᔨᒡ ᐊᔅᒌᐦᒡ᙮ 7 ᐃᔅᑯᑕᒃ ᒫᒃ ᒌᔑ ᐙᐐᐦᑕᐦᒀᐌᓂᒡ ᒋᔐᒪᓂᑑ ᐅᑕᔨᒧᐎᓂᔫ ᐁᒄ ᐊᓂᔫᐦ ᒪᒋ ᐊᐌᓰᓴ ᐊᓂᑌ ᑳ ᒥᔅᑕ ᐳᑯᓀᔮᔨᒡ ᑳ ᐅᐦᒋ ᑯᐃᒀᐦᑕᐎᔨᒡ ᒉ ᒫᓯᐦᐄᑯᑣᐤ᙮ ᒋᑲ ᐊᔥᐸᔑᐦᐄᑰᒡ ᒫᒃ᙮ ᐁᒄ ᒉ ᓂᐸᐦᐄᑯᑣᐤ᙮ 8 ᐊᓂᔫᐦ ᒫᒃ ᐐᔫᐙᐤᐦ ᐁᑯᑦ ᐊᓂᑦ ᒣᔅᑲᓈᐦᒡ ᐊᓂᔫ ᒥᔅᑕ ᐅᑌᓈᔫ ᑖᓂᑦ ᑳ ᓂᐸᐦᐋᑲᓄᔨᒡ ᑳ ᒌᔅᑖᔅᑯᐦᐙᑲᓄᔨᒡ ᐋᔑᑌᔮᐦᑎᑯᐦᒡ ᐅᑎᐯᔨᐦᒋᑫᒧᐙᐤᐦ ᐁᑯᑦ ᒉ ᐃᐦᑕᑯᓂᔨᒀᐤᐦ᙮ ᐆ ᒫᒃ ᐃᐦᑖᐎᓐ ᒧᔮᒻ ᑖᓐ ᑳ ᐃᑌᔨᐦᑖᑯᐦᒀᐤᐦ ᐊᓂᔫᐦ ᐃᐦᑖᐎᓐᐦ ᔂᑕᒻ ᐁᒄ ᒫᒃ ᐄᒋᑉ ᑳ ᐃᔑᓂᐦᑳᑌᒀᐤᐦ ᐁᑯᓐ ᑳ ᐃᑌᔨᐦᑖᑯᐦᒀᐤᐦ, ᓈᔥᒡ ᒌ ᒥᔖᐤ ᐊᓂᑦ ᒪᒑᑎᓰᐎᓐ᙮ 9 ᒥᓯᐌ ᒫᒃ ᐁ ᑎᔅᑳᓀᓯᑣᐤ ᐊᐌᓂᒌ ᑲᔦ ᓇᓈᐦᑰ ᐁ ᐃᔑ ᐊᔨᒥᑣᐤ ᑲᔦ ᒥᓯᐌ ᐁ ᐃᔑ ᒫᒨᑌᐅᔒᑣᐤ ᒥᒄ ᒋᑲ ᑲᓇᐙᐸᐦᑕᒧᐌᐅᒡ ᐊᓂᔫ ᐐᔫᔫ ᓂᔥᑐ ᒌᔑᑳᐤ ᒦᓐ ᐋᐱᐦᑑ ᐃᔥᐱᔥ᙮ ᓇᒧᐃ ᒋᑲ ᐅᐦᒋ ᐸᒋᔥᑎᓀᐅᒡ ᒉᒌ ᒋᔅᑲᐦᐋᑲᓄᔨᒡ᙮ 10 ᐊᓂᒌ ᒫᒃ ᐊᐌᓂᒡ ᐊᔅᒌᐦᒡ ᑳ ᐃᐦᑖᑣᐤ ᒋᑲ ᒥᔦᔨᐦᑕᒧᒡ ᐁ ᒌ ᓂᐸᐦᐋᑲᓄᔨᒡ ᐊᓂᔫᐦ ᑳ ᓃᔑᔨᒡ᙮ ᒋᑲ ᒥᔻᑕᒧᒡ ᑲᔦ ᒋᑲ ᒫᒦᑑᒡ ᒦᐌᐎᓐᐦ ᐁ ᒌ ᓂᐸᐦᐋᑲᓄᔨᒡ ᐊᓂᔫᐦ ᑳ ᓃᔑᔨᒡ ᑳ ᐃᐦᑑᑕᒥᔨᒡ ᒉᒌ ᓇᓀᐦᑳᑌᔨᒧᓈᓄᔨᒡ ᐅᑕᐦ ᐊᔅᒌᐦᒡ᙮ 11 ᒥᒄ ᒫᒃ ᐃᔅᑯᑕᒃ ᒥᔮᐅᐸᔨᓂᔨᒀᐅᐌᓐ ᐊᓂᔫᐦ ᓂᔥᑐ ᒌᔑᑳᐤ ᒦᓐ ᐋᐱᐦᑑ ᐁᒄ ᒋᔐᒪᓂᑑ ᒉ ᒥᔮᑦ ᔦᐦᐁᐎᓂᔫ ᐊᓂᔫᐦ ᐁ ᓃᔑᔨᒡ ᐁᒄ ᒉ ᐅᐦᒋ ᐱᓯᑯᔨᔨᒡ᙮ ᒥᓯᐌ ᒫᒃ ᐊᐌᓂᒌ ᒉ ᐙᐸᒫᑣᐤ ᓈᔥᒡ ᒋᑲ ᓭᒋᓲᒡ᙮ 12 ᐁᒄ ᐊᓂᒌ ᑳ ᓃᔑᑣᐤ ᑳ ᐯᐦᑕᐙᑣᐤ ᐊᐌᔫ ᐁ ᐊᔨᒥᐦᐄᑯᑣᐤ ᑭᐦᒋᑮᔑᑯᐦᒡ ᐅᐦᒋ᙮ ᒌ ᐃᑎᑰᒡ ᐁ ᒋᔐᐌᔨᒡ, ᐋᔥᑕᒧᒄ ᐅᑌ᙮ ᐁᒄ ᒣᒀᒡ ᐁ ᑲᓇᐙᐸᒥᑯᑣᐤ ᐊᓂᔫ ᑳ ᐅᐦᑳᑎᑯᑣᐤ ᒌ ᐅᐦᐱᐸᔨᔫᒡ ᑭᐦᒋᑮᔑᑯᐦᒡ ᐃᔑ ᑲᔅᑲᐗᓂᔥᑯᐦᒡ᙮ 13 ᐃᔅᑯᑕᒃ ᒫᒃ ᑳ ᐃᔅᐸᔨᐦᒡ ᐆ, ᒌ ᒥᔅᑕ ᑯᐃᐦᑯᓐ᙮ ᐯᔭᒄ ᐁᔑᑯᒻ ᒥᑖᐦᐣ ᐙᔅᑳᐦᐄᑲᓐᐦ ᐊᓂᑦ ᐊᓐ ᐃᐦᑖᐎᓂᐦᒡ ᒌ ᐗᓈᑎᓐ᙮ ᓃᔣᔣᐤ ᒋᔐᒥᑖᐦᑐᒥᑕᓅ ᐊᐌᓂᒌ ᒌ ᐗᓈᑎᓯᔫᒡ ᐊᓂᔫ ᑳ ᒥᔅᑕ ᑯᐃᐦᑯᓂᔨᒡ᙮ ᐁᒄ ᐊᓂᒌ ᐊᐌᓂᒌ ᐁᔥᒄ ᑳ ᐃᐦᑖᑣᐤ ᐊᔅᒌᐦᒡ ᒌ ᒥᔅᑕ ᓭᒋᓲᒡ᙮ ᒌ ᐃᑗᐅᒡ, ᑖᐺ ᓲᐦᒉᔨᐦᑖᑯᓲ ᒋᔐᒪᓂᑑ ᑭᐦᒋᑮᔑᑯᐦᒡ ᑳ ᐃᐦᑖᑦ᙮ 14 ᐆ ᒫᒃ ᓃᔓ ᑳ ᐃᐦᑕᑯᐦᒡ ᑳ ᐃᔑ ᓇᓀᐦᑳᑌᔨᒧᓈᓅᐦᒡ ᔖᔥ ᒌ ᒌᔑᐸᔫ᙮ ᐁᔥᒄ ᒫᒃ ᒦᓐ ᑯᑕᒡ ᐁ ᓇᓀᐦᑳᑌᔨᒧᓈᓅᐦᒡ ᒋᑲ ᐅᑎᐦᒋᐸᔫ᙮ ᔖᔥ ᐯᔓᓈᑯᓐ ᒉ ᐅᑎᐦᒋᐸᔨᐦᒡ᙮ ᐁᓐᒋᓪ ᑳ ᐴᑖᑕᐦᒃ ᐊᓂᔫ ᒫᐦᒋᔥᑕᐃ ᐴᑖᒋᑲᓂᔫ 15 ᐁᒄ ᒦᓐ ᑯᑕᒃ ᐁᓐᒋᓪ ᑳ ᐴᑖᑕᐦᒃ ᐅᐴᑖᒋᑲᓐ᙮ ᐁᐅᒄ ᐆ ᓃᔣᔥᒡ ᑳ ᐃᐦᑖᑦ ᐁᓐᒋᓪ᙮ ᓂᒌ ᐯᐦᑕᐙᐅᒡ ᒫᒃ ᐊᐌᓂᒌ ᐁ ᒋᔐᐌᑣᐤ, ᐊᓂᑌ ᑭᐦᒋᑮᔑᑯᐦᒡ ᐁ ᐊᔨᒥᑣᐤ ᐁ ᐃᑗᑣᐤ, ᐁᒄ ᐌᑎᓇᒫᓱᑦ ᒋᑎᐯᔨᐦᒋᑫᒥᓅ ᑲᔦ ᐊᓂᔫᐦ ᑳ ᐯᒋ ᐃᑎᔕᐦᐙᑦ ᒉᒌ ᐅᒋᒫᐅᑣᐤ ᐅᑕᐦ ᐊᔅᒌᐦᒡ᙮ ᐎᔭ ᒫᒃ ᐅᑎᐯᔨᐦᒋᑫᐤ ᒋᑲ ᐅᒋᒫᐤ ᑳᒋᒉ ᑲᔦ ᑳᒋᒉ᙮ 16 ᐁᒄ ᐊᓂᒌ ᓃᔅᑕᓅ ᓀᐤ ᑳ ᒋᔅᑌᔨᐦᑖᑯᓯᑣᐤ ᒋᔐᐃᓅᒡ ᑳ ᐊᐱᑣᐤ ᐅᒋᔐᐅᒋᒫᐤ ᑌᐦᑕᐳᐎᓇᐙᐤᐦ ᐅᐦᒋᔥᑰ ᒋᔐᒪᓂᑑ ᐁ ᐃᐦᑖᔨᒡ ᒌ ᐅᑎᔑᐸᔨᐦᐆᒡ ᑲᔦ ᒌ ᓅᒌᔥᑐᐌᐅᒡ ᒋᔐᒪᓂᑑ 17 ᐁ ᐃᑗᑣᐤ, ᓂᑎᐯᔨᐦᒋᑫᒥᓈᓐ ᒋᔐᒪᓂᑑ ᒫᐅᒡ ᑳ ᓲᐦᑳᑎᓯᔨᓐ, ᐊᓐ ᑳ ᐃᐦᑖᑦ ᑲᔦ ᒨᔥ ᑳ ᐯᒋ ᐃᐦᑖᑦ, ᒋᓇᓈᔅᑯᒥᑎᓈᓐ ᐁ ᒌ ᐋᐸᒋᐦᑖᔨᓐ ᒋᓲᐦᑳᑎᓰᐎᓐ ᒌ ᐁ ᑎᐯᔨᐦᒋᒉᔨᓐ᙮ 18 ᒥᓯᐌ ᐁ ᐃᑎᔅᑳᓀᓯᑣᐤ ᐊᐌᓂᒌ ᒌ ᒥᔅᑕ ᒋᔓᐙᓲᒡ᙮ ᐁᒄ ᒫᒃ ᒌ ᐌᑎᐦᒋᐸᔨᐦᒡ ᒉᒌ ᒋᔓᐙᓯᔨᓐ ᑲᔦ ᒉᒌ ᐎᔮᔅᑯᓂᑣᐤ ᐊᓂᒌ ᑳ ᓂᐱᑣᐤ᙮ ᔖᔥ ᐅᑎᐦᒋᐸᔫ ᒉᒌ ᑎᐸᐦᐊᒨᑣᐤ ᐅᑎᐸᐦᐊᒫᑯᓰᐎᓇᐙᐤ ᐊᓂᒌ ᒋᑖᐸᒋᐦᐋᑲᓂᒡ ᑲᔦ ᐊᓂᒌ ᐅᒋᔅᒋᐌᐦᐄᒉᓲᒡ ᑲᔦ ᐊᓂᒌ ᑳ ᑖᐺᐦᑕᐦᒀᐤ ᑲᔦ ᒫᒃ ᐊᓂᒌ ᑳ ᒋᔅᑌᔨᐦᑕᐦᒀᐤ ᒋᑎᔑᓂᐦᑳᓱᐎᓂᔫ, ᐊᓂᒌ ᑳ ᒋᔅᑌᔨᐦᑖᑯᓯᑣᐤ ᑲᔦ ᐊᓂᒌ ᐁᑳ ᑳ ᒋᔅᑌᔨᐦᑖᑯᓯᑣᐤ᙮ ᔖᔥ ᐅᑎᐦᒋᐸᔫ ᒉᒌ ᐗᓈᒋᐦᐋᑲᓅᑣᐤ ᐊᓂᒌ ᑳ ᐗᓈᒋᐦᐋᑣᐤ ᐊᐌᔫᐦ ᐅᑕᐦ ᐊᔅᒌᐦᒡ᙮ 19 ᐁᒄ ᒋᔐᒪᓂᑑ ᐅᒋᔐᐊᔨᒥᐦᐁᐅᑲᒥᒄ ᑭᐦᒋᑮᔑᑯᐦᒡ ᑳ ᐃᐦᑕᑯᓂᔨᒡ ᑳ ᐋᐸᐦᐄᑲᓄᔨᒡ᙮ ᐊᓂᑌ ᒫᒃ ᐲᐦᑕᑲᒥᐦᒡ ᒌ ᓅᑯᓐ ᐊᓐ ᑳ ᐸᔦᐦᒋᓰᒪᑲᐦᒡ ᒥᔅᑎᑯᐗᑦ ᐊᓂᑌ ᑳ ᑕᑖᑲᓄᔨᒡ ᐊᓂᔫ ᓂᔅᑯᒧᐎᓂᔫ ᒋᔐᒪᓂᑑ ᑳ ᐅᔑᐦᑕᒧᐙᑦ ᐅᑏᓃᒻᐦ᙮ ᐁᒄ ᑳ ᐙᔂᔅᑌᐸᔨᐦᒡ ᑲᔦ ᓂᒥᔅᒎᒡ ᒌ ᐯᐦᑖᑯᓲᒡ᙮ ᑲᔦ ᒫᒃ ᒌ ᑯᐃᐦᑯᓐ ᑲᔦ ᒌ ᒥᔅᑕ ᒥᔅᑰᒥᑖᓐ᙮ |
© Wycliffe Bible Translators, Inc. and Canadian Bible Society, 2001.
Wycliffe Bible Translators, Inc.