Revelation 10 - ᒋᔐᒪᓂᑑ ᐅᑕᔨᒳᐃᓐ ᑳ ᐅᔅᑳᒡ ᑌᔅᑎᒥᓐᑦᐁᓐᒋᓪ ᐁᒄ ᒫᒃ ᐊᓐ ᑳ ᐊᐱᔖᔑᒡ ᒪᓯᓇᐦᐄᑲᓐ 1 ᒦᓐ ᑳ ᐃᔑ ᐙᐸᐦᑏᑯᔮᓐ, ᒦᓐ ᑯᑕᒃ ᐁ ᓲᐦᒉᔨᐦᑖᑯᓯᑦ ᐁᓐᒋᓪ ᓂᒌ ᐙᐸᒫᐤ ᑭᐦᒋᑮᔑᑯᐦᒡ ᐁ ᐅᐦᑐᐦᑌᑦ, ᑲᔅᑲᐗᓂᔥᑾ ᐁ ᐅᑕᐳᐦᑯᑦ᙮ ᐲᓯᒧᔮᐱᔫ ᒌ ᐙᔅᑳᑯᑌᔫ ᐊᓂᑌ ᐅᔅᑎᒀᓂᒡ᙮ ᐅᑖᔥᑕᒧᐦᒄ ᒬᐦᒡ ᐲᓯᒻ ᐁ ᐃᔑ ᒌᐦᑳᔮᔥᑐᐌᑦ ᒌ ᐃᔑᓈᑯᓂᔫ᙮ ᐁᒄ ᐅᔅᑳᑦᐦ ᒧᔮᒻ ᒌᑐᐙᔅᑯᐦᐄᑲᓐᐦ ᐁ ᐃᔥᑯᑌᐅᓂᔨᒀᐤᐦ ᒌ ᐃᔑᓈᑯᓂᔫᐦ᙮ 2 ᒌ ᑕᐦᑯᓇᒻ ᒪᓯᓇᐦᐄᑲᓂᔑᔫ ᐅᑎᐦᒌᐦᒡ᙮ ᐁ ᒌ ᐋᐸᐦᐌᑎᓂᑲᓄᔨᑯᐸᓀ᙮ ᐁᒄ ᐊᓂᔫ ᐅᓂᐦᐄᐅᓯᑦ ᐊᓂᑌ ᐃᑌᐦᒉ ᒋᐦᒋᑲᒦᐦᒡ ᒌ ᐃᔑ ᑕᐦᑯᔅᒉᐤ ᐁᒄ ᐊᓂᔫ ᐅᓂᒥᐦᒌᐅᓯᑦ ᐊᔅᒌᐦᒡ ᒌᔑ ᑕᐦᑯᔅᒉᐤ᙮ 3 ᐁᒄ ᑳ ᑌᐺᑦ ᒧᔮᒻ ᒥᔅᑕ ᐊᑎᒻ ᐁ ᐃᑎᐦᑖᑯᓯᑦ᙮ ᐃᔅᑯᑕᒃ ᒫᒃ ᑳ ᑌᐺᑦ ᐊᓂᒌ ᓃᔣᔥᒡ ᑳ ᑕᔑᑣᐤ ᓂᒥᔅᒎᒡ ᒌ ᐅᐦᒋ ᐯᐦᑖᑯᓲᒡ ᒬᐦᒡ ᐁ ᐊᔨᒥᑣᐤ ᐁ ᐃᑎᐦᑖᑯᓯᑣᐤ᙮ 4 ᐃᔅᑯᑕᒃ ᒫᒃ ᑳ ᐯᐦᑖᑯᓯᑣᐤ ᐊᓂᒌ ᓃᔣᔥᒡ ᑳ ᑕᔑᑣᐤ ᓂᒥᔅᒎᒡ ᒧᔮᒻ ᐁ ᐊᔨᒥᑣᐤ ᑳ ᐃᑎᐦᑖᑯᓯᑣᐤ, ᓂᒌ ᐐ ᒋᐦᒋ ᒪᓯᓇᐦᐄᒉᓐ᙮ ᐁᒄ ᑳ ᐅᐦᒋ ᐯᐦᑕᒫᓐ ᐯᐦᑖᑯᓱᐎᓐ ᑭᐦᒋᑮᔑᑯᐦᒡ ᐅᐦᒋ ᐁ ᐃᑎᑯᔮᓐ, ᐁᑳᐐ ᒪᓯᓇᐦᐊ ᑖᓐ ᑳ ᐃᑗᑣᐤ ᐊᓂᒌ ᓂᒥᔅᒎᒡ᙮ ᐁᑳᐐ ᐊᐌᓐ ᒋᑲ ᐅᐦᒋ ᒋᔅᒉᔨᐦᑕᒻ᙮ 5 ᐁᒄ ᐊᓐ ᐁᓐᒋᓪ ᓇᐸᑌ ᐊᓂᑌ ᒋᐦᒋᑲᒦᐦᒡ ᐁᒄ ᒫᒃ ᓇᐸᑌ ᐊᔅᒌᐦᒡ ᑳ ᐃᔑ ᑕᐦᑯᔅᒉᑦ ᑳ ᐅᐦᐸᓂᔥᒉᐸᔨᐦᑖᑦ ᐅᓇᐦᐄᑎᐦᒌ ᑭᐦᒋᑮᔑᑯᐦᒡ ᐃᔑ᙮ 6 ᐁᒄ ᑳ ᐃᑗᑦ, ᐁᐅᒄ ᐆ ᐁ ᐃᑗᔮᓐ ᐅᐦᒋᔥᑰ ᒋᔐᒪᓂᑑ ᐁ ᐃᐦᑖᑦ, ᐊᓐ ᑳᒋᒉ ᑳ ᐱᒫᑎᓰᑦ, ᒌᔑᑯᔫ, ᐊᔅᒌᔫ ᐁᒄ ᒫᒃ ᒋᐦᒋᑲᒥᔫ ᑲᔦ ᒥᓯᐌ ᐁ ᐃᔑ ᐃᐦᑕᑯᓂᔨᒡ ᐊᓂᑌ ᒌᔑᑯᐦᒡ, ᐊᔅᒌᐦᒡ ᐁᒄ ᒫᒃ ᒋᐦᒋᑲᒦᐦᒡ ᑳ ᐅᔑᐦᑖᑦ, ᐁᑯᓐ ᒉ ᐃᔥᐱᔥ ᓇᑳᐐᑦ ᐁᒄ ᒋᔐᒪᓂᑑ ᒉᒌ ᐃᐦᑑᑕᐦᒃ ᑖᓐ ᐊᓂᔫᐦ ᐙᐦ ᐃᐦᑑᑕᐦᒃ᙮ 7 ᐃᔅᑯᑕᒃ ᒫᒃ ᐊᓐ ᓃᔣᔥᒡ ᐁ ᐃᐦᑖᑦ ᐁᓐᒋᓪ ᐴᑖᑕᐦᑫ ᐅᐴᑖᒋᑲᓐ ᐁᒄ ᒉ ᒌᔑᐦᑖᑦ ᒋᔐᒪᓂᑑ ᐁ ᑎᐱᐦᑑᑕᐦᒃ ᑖᓐ ᑳ ᐃᑌᔨᐦᑕᒥᐦᐄᑯᑦ ᒉᒌ ᐃᐦᑑᑕᐦᒃ ᐊᓂᔫ ᒉᒀᔫ ᐁᑳ ᐊᐌᔫᐦ ᐅᐦᒋ ᒋᔅᒉᔨᐦᑕᒥᔨᒡ, ᐊᓂᔫ ᑳ ᐃᔑ ᐐᐦᑕᒧᐙᑯᐸᓀ ᐊᓂᔦᐦᑳ ᐅᑖᐸᒋᐦᐋᑲᓐᐦ ᑳ ᒋᔅᒋᐌᐦᐄᒉᔨᑣᐤᐦ᙮ 8 ᐁᒄ ᒦᓐ ᑳ ᐯᐦᑑᒃ ᐊᓐ ᐊᐌᓐ ᑳ ᐯᒋ ᐊᔨᒥᐦᐄᑦ ᑭᐦᒋᑮᔑᑯᐦᒡ ᐅᐦᒋ ᐁ ᐯᒋ ᐄᔑᑦ, ᒫᒌᐦ ᐅᑎᓂᒻ ᐊᓂᔫ ᒪᓯᓇᐦᐄᑲᓂᔑᔫ ᑳ ᐋᐸᐦᐄᔅᑌᔨᒡ ᐅᑕᐦᒌᐦᒡ ᐊᓐ ᐁᓐᒋᓪ ᐊᓂᑌ ᒋᐦᒋᑲᒦᐦᒡ ᑲᔦ ᐊᔅᒌᐦᒡ ᑳ ᐃᔑ ᑕᐦᑯᔅᒉᑦ᙮ 9 ᐁᒄ ᑳ ᓈᑕᒃ ᐊᓐ ᐁᓐᒋᓪ ᐁᒄ ᑳ ᐃᑕᒃ ᒉᒌ ᐯᒋ ᒦᑦ ᐊᓂᔫ ᒪᓯᓇᐦᐄᑲᓂᔑᔫ ᑳ ᑕᐦᑯᓇᐦᒃ᙮ ᐁᒄ ᑳ ᐯᒋ ᐄᔑᑦ, ᐅᑎᓐ ᒉ ᒦᒋᔨᓐ᙮ ᒋᑲ ᓰᐙᐤ ᒋᑑᓂᐦᒡ ᒧᔮᒻ ᐋᒨᓲᑳᐤ ᐁᑯᓐ ᒉ ᐃᔥᐱᑕᒪᓐ᙮ ᒥᒄ ᒫᒃ ᐃᔅᑯᑕᒃ ᒌ ᑯᐦᒋᐸᔨᐦᑖᔨᓀ ᒋᑲ ᐊᑎ ᐐᓴᑲᓐ ᐊᓂᑌ ᒋᔅᑲᑖᐦᒡ᙮ 10 ᑳ ᐅᑎᓇᒧᒡ ᐊᓂᔫ ᒪᓯᓇᐦᐄᑲᓂᔑᔫ ᑳ ᑕᐦᑯᓇᐦᒃ ᐊᓐ ᐁᓐᒋᓪ ᐁᒄ ᑳ ᒦᒎᒡ᙮ ᐃᔅᑯᑕᒃ ᒫᒃ ᑳ ᓴᔅᑲᒧᔮᓐ ᓂᒌ ᒪᔅᐱᑌᓐ ᐁ ᓰᐙᒡ ᒧᔮᒻ ᐋᒨᓲᑳᐤ ᐁᑯᓐ ᑳ ᐃᔅᐱᑕᒫᓐ᙮ ᒥᒄ ᒫᒃ ᐃᔅᑯᑕᒃ ᑳ ᑯᐦᒋᐸᔨᐦᑖᔮᓐ ᒌ ᐊᑎ ᐐᓴᑲᓐ ᐊᓂᑌ ᓂᔅᑲᑖᐦᒡ᙮ 11 ᐁᒄ ᑳ ᐃᑎᑯᔮᓐ, ᒦᓐ ᒋᑲ ᒋᔅᒋᐌᐦᐄᒉᓐ ᒋᑲ ᐋᔨᒨᑌᓐ ᑖᓐ ᐁ ᐃᔑ ᐋᔨᒨᒥᑯᑣᐤ ᒋᔐᒪᓂᑑᐦ ᐅᑕᔨᒧᐎᓂᔫ ᒥᐦᒉᑐ ᐊᐌᓂᒌ, ᓇᓈᐦᑰ ᐁ ᐃᑎᔅᑳᓀᓯᑣᐤ, ᓇᓈᐦᑰ ᐁ ᐃᔑ ᒫᒨᑌᐅᔒᑣᐤ, ᑲᔦ ᒫᒃ ᓇᓈᐦᑰ ᐁ ᐃᔑ ᐊᔨᒥᑣᐤ᙮ ᒋᔐᐅᒋᒫᐅᒡ ᑲᔦ ᑖᓐ ᐁ ᐃᔑ ᐋᔨᒨᒥᑯᑣᐤ ᒋᔐᒪᓂᑑᐦ ᐅᑕᔨᒧᐎᓂᔫ ᒋᑲ ᐋᔨᒨᑕᒧᐙᐅᒡ᙮ |
© Wycliffe Bible Translators, Inc. and Canadian Bible Society, 2001.
Wycliffe Bible Translators, Inc.