Hebrews 6 - ᒋᔐᒪᓂᑑ ᐅᑕᔨᒳᐃᓐ ᑳ ᐅᔅᑳᒡ ᑌᔅᑎᒥᓐᑦ1 ᓃᑳᓂᐦᒡ ᐁᒄ ᐃᔑ ᐋᐦᒌᑖᐤ᙮ ᒋᔅᑯᑕᒫᓱᑖᐤ ᐊᓂᔫᐦ ᐁᑎᑑ ᐁ ᐊᑎ ᐋᔨᒥᐦᒀᐤᐦ ᒉᒀᔫᐦ ᐌᔥ ᐁᐅᑯᓐᐦ ᒉ ᐐᒋᐦᐄᑯᔨᐦᒄ ᐁᑎᑑ ᒉᒌ ᓂᐦᑖᐅᒌᐦᒄ ᒋᑖᐺᐦᑕᒧᐎᓈᐦᒡ᙮ ᓇᒧᐃ ᑕᓯᓀ ᒋᐹ ᐅᐦᒋ ᐃᐦᑎᓈᓅ ᒥᒄ ᐊᓐ ᐅᔅᑲᒡ ᑳ ᐃᔑ ᐯᐦᑕᒧᐦᒄ ᙭ ᐁ ᐃᔑ ᐋᔨᒨᒫᑲᓅᑦ ᒉᒌ ᒋᔅᑯᑕᒫᑯᔨᐦᒄ, ᐌᔥ ᔖᔥ ᒋᒋᔅᒉᔨᐦᑌᓈᓅ ᐊᓐ᙮ ᓇᒧᐃ ᓂᑕᐌᔨᐦᑖᑯᓐ ᒦᓐ ᒉᒌ ᒋᔅᑯᑕᒫᑯᔨᐦᒄ ᐁᑳ ᒉᒌ ᐱᒫᒋᐦᐋᑲᓅᑦ ᐊᐌᓐ ᒥᒄ ᐊᓂᔫ ᐁ ᒥᔪᑑᑕᐦᒃ᙮ ᓇᒧᐃ ᑲᔦ ᓂᑐᐌᔨᐦᑖᑯᓐ ᒦᓐ ᒉᒌ ᐋᔨᒨᑕᒫᑯᔨᐦᒄ ᒉᒌ ᑖᐺᔨᒪᐦᒄ ᒋᔐᒪᓂᑑ 2 ᒫᒃ ᒉᒌ ᒋᔅᑯᑕᒫᑯᔨᐦᒄ ᓰᑲᐦᐋᐦᑖᒉᐎᓐᐦ, ᒫᒃ ᐁ ᓵᒥᓈᑲᓅᑣᐤ ᐊᐌᓂᒌ, ᒫᒃ ᓂᐳᐎᓂᐦᒡ ᐁ ᐅᐦᒋ ᐗᓂᔥᑳᓈᑲᓅᑦ ᐊᐌᓐ ᒫᒃ ᒫᐦᒋᔥᑕᐃ ᐎᔮᔅᑯᓂᒉᐎᓐ᙮ 3 ᓲᐦᒃ ᐁᑎᑑ ᐐ ᒋᔅᒉᔨᐦᑕᐦᑖᐤ ᑖᓐ ᐁ ᐃᔑ ᓂᑕᐌᔨᒥᑕᐦᒃ ᒋᔐᒪᓂᑑ ᒉᒌ ᐃᔑ ᒋᔅᒉᔨᐦᑕᒧᐦᒄ᙮ 4 ᐃᐦᑖᐅᒡ ᐊᐌᓂᒌ ᐁ ᓂᓯᑐᐦᑕᐦᒀᐤ ᑖᓐ ᑳ ᐃᔑ ᒋᔅᑯᑕᒧᐙᑲᓅᑣᐤ ᒌᓴᔅ ᐁ ᐋᔨᒨᒫᑲᓄᔨᒡ᙮ ᒌ ᒦᑰᒡ ᒋᔐᒪᓂᑑ ᐊᓂᔫᐦ ᒫᐅᒡ ᑳ ᒋᔅᑌᔨᐦᑖᑯᓂᔨᒀᐤᐦ ᒦᐌᐎᓐᐦ ᑲᔦ ᑳ ᐸᔦᐦᒋᓯᔨᒡ ᐊᐦᒑᐦᑾ ᒌ ᒦᑰᒡ᙮ ᔮᐸᒡ ᒫᒃ ᒋᐦᒋᐌ ᒌ ᐊᑎ ᒌᐌᑳᔥᐴᑕᐌᐅᒡ ᒋᔐᒪᓂᑑᐦ᙮ ᓇᒧᐃ ᒫᒃ ᑲᑕ ᒌ ᐐᒋᐦᐋᑲᓅᒡ ᐅᒌ ᒦᓐ ᒉᒌ ᑴᔅᑳᑎᓰᑣᐤ᙮ 5 ᒌ ᐯᐦᑕᒧᐌᐅᒡ ᐁ ᐃᔥᐱᔥ ᒥᔫᐦᑖᑯᓂᔨᒡ ᒋᔐᒪᓂᑑᐦ ᐅᒥᔻᒋᒧᐎᓂᔫ᙮ ᑲᔦ ᒌ ᒨᔑᐦᑖᐌᐅᒡ ᑖᓐ ᐁ ᐃᔥᐱᔥ ᓲᐦᒉᔨᐦᑖᑯᓂᔨᒡ ᐅᓲᐦᑳᑎᓰᐎᓂᔫ ᐊᓄᐦᒌᔥ ᑲᔦ ᑖᓐ ᒉ ᐃᔥᐱᔥ ᓲᐦᒉᔨᐦᑖᑯᓂᔨᒡ ᐊᓂᑌ ᐃᔑ ᓃᔥᑕᒥᐦᒡ᙮ 6 ᒉ ᒌᐌᑳᐴᔥᑕᒧᐙᑴᓂᒡ ᒫᒃ ᐅᒌ ᐄᓅᒡ ᒥᓯᐌ ᑳ ᐃᔑ ᒋᔅᒉᔨᐦᑕᒥᐦᐋᑲᓅᑣᐤ ᒋᐹ ᐃᔑ ᑖᐺᐦᑕᒧᒡ ᓇᒧᐃ ᒦᓐ ᒋᑲᒌ ᐃᐦᑑᑕᐙᑲᓅᒡ ᒉᒌ ᒥᐦᒌᐌᔨᐦᑕᐦᒀᐤ ᐅᒪᒋᐦᑣᐎᓇᐙᐤ᙮ ᐋᑐᐌᔨᒣᐅᒡ ᒋᔐᒪᓂᑑ ᐅᑯᓯᔫ᙮ ᑲᓇᐙᒡ ᒧᔐ ᒫᔦᔨᒣᐅᒡ ᒌᓴᔅ ᐁᒄ ᒫᒃ ᒧᔮᒻ ᒦᓐ ᐁ ᒌᔅᑖᔅᑯᐦᐙᑣᐤ ᐋᔑᑌᔮᐦᑎᑯᐦᒡ ᐃᔑᓈᑯᓂᔫ ᐊᓂᔫ ᐁ ᐃᑖᑎᓰᑣᐤ᙮ 7 ᒫᒥᑐᓀᔨᐦᑕᒧᒄ ᐆ᙮ ᐃᐦᑕᑯᐦᒡ ᔮᐦᒡ ᐊᔅᒌ ᐁ ᒥᔪ ᒥᓂᐦᑴᒪᑲᐦᒡ ᒋᒨᓈᐴᐦ ᑲᔦ ᒫᒃ ᓇᑲᔮ ᒋᒨᐦᒡ ᐊᓂᑦ᙮ ᑲᔦ ᒫᒃ ᒥᔪ ᓈᓈᑲᒋᐦᑖᑲᓅᐦᒡ ᐊᓐ ᐊᔅᒌ ᒉᒌ ᒥᔪ ᓂᐦᑖᐅᒋᐦᑖᒉᒪᑲᐦᒡ ᒉᒀᓐ ᐁ ᒦᒋᓈᓅᐦᒡ᙮ ᒥᔻᐸᑕᓐ ᐊᓐ ᐊᔅᒌ᙮ ᒋᔐᒪᓂᑑ ᔕᐌᔨᐦᑕᒻ ᐊᓂᔫ ᐊᔅᒌᔫ᙮ 8 ᐃᐦᑕᑯᐦᒡ ᒫᒃ ᐊᔅᒌ ᑖᓂᑦ ᓀᐦᑖᐅᒋᐦᒡ ᒉᒀᓐ ᐁᑳ ᐎᔦᔥ ᐃᑖᐸᑕᐦᒡ, ᓇᒧᐃ ᐎᔦᔥ ᑲᑕᒌ ᐃᑖᐸᑕᓐ ᐊᓐ ᐊᔅᒌ᙮ ᓇᒧᐃ ᒋᑲ ᐅᐦᒋ ᔕᐌᔨᐦᑕᒻ ᒋᔐᒪᓂᑑ ᐊᓂᔫ ᐊᔅᒌᔫ᙮ ᒋᑲ ᒌ ᐃᔑᓈᑯᓂᔫ ᒉᒌ ᐃᔥᒀᓴᐦᒃ ᐊᓂᔫ ᐊᔅᒌᔫ᙮ 9 ᐁ ᓵᒋᐦᐄᑕᑯᒡ ᐌᐦᒋ ᐆ ᐃᔑ ᐊᔨᒥᐦᐄᑕᑯᒡ᙮ ᒋᑖᐺᐅᒉᔨᒥᑎᓈᐙᐤ ᐌᔥ ᓂᔑᑑᓈᑯᓐ ᑖᓐ ᐁ ᐃᑖᑎᓯᔦᒄ ᑖᐺ ᐁ ᒌ ᐱᒫᒋᐦᐅᔦᒄ᙮ 10 ᐁᐦᐁ, ᒋᑖᐺᐅᒉᔨᒥᑎᓈᐙᐤ ᐁ ᒌ ᐱᒫᒋᐦᐅᔦᒄ᙮ ᓂᒋᔅᒉᔨᒫᐤ ᒋᔐᒪᓂᑑ ᑯᐃᔅᒄ ᐁ ᐃᐦᑑᑕᐙᑦ ᒥᓯᐌ ᐊᐌᔫᐦ᙮ ᒋᒋᔅᒉᔨᒥᑯᐙᐤ ᑖᓐ ᑳ ᐃᔑ ᒥᔪᑑᑕᒧᐌᒄ ᑲᔦ ᑖᓐ ᑳ ᐃᔑ ᓅᑯᐦᑕᐌᒄ ᐁ ᓵᒋᐦᐁᒄ ᐁ ᒌ ᐐᒋᐦᐄᒣᒄ ᑳ ᑖᐺᐦᑕᒦᑣᐤᐦ ᑲᔦ ᐁᔥᒄ ᐁ ᐐᒋᐦᐄᒣᒄ᙮ ᓇᒧᐃ ᒫᒃ ᒋᑲ ᐅᐦᒋ ᐗᓂᒋᔅᒋᓲ ᐅᔫ᙮ 11 ᒋᐳᑯᓭᔨᒥᑎᓈᓐ ᒥᓯᐌ ᑲᓇᐙᒡ ᒉᒌ ᒥᔪᑑᑕᒣᒄ ᐲᐦᐄᒻ ᐊᑎ ᐃᔅᒀᔮᒀᐌᓐᐦ ᒋᐱᒫᑎᓰᐎᓄᐙᐤᐦ᙮ ᐁᒄ ᒫᒃ ᒉ ᒉᔥᑎᓈᐦᐅᔦᒄ ᑖᐺ ᒉ ᒦᑖᒄ ᒋᔐᒪᓂᑑ ᒥᓯᐌ ᑖ ᐙ ᐃᔑ ᒦᑖᒄ᙮ 12 ᓇᒧᐃ ᒋᓂᑐᐌᔨᒥᑎᓈᓐ ᒉᒌ ᒋᐦᑎᒥᔦᒄ, ᑌᔭᑯᒡ ᓂᔅᐱᑐᐙᐦᑯᒡ ᐊᓂᒌ ᑳ ᑖᐺᐦᑕᐦᒀᐤ ᐁᑳ ᑳ ᒌᐌᑳᐴᔥᑕᐙᑣᐤ ᒋᔐᒪᓂᑑ, ᐌᔥ ᐁᐅᒄ ᐅᒌ ᒉ ᒦᑰᑣᐤ ᒋᔐᒪᓂᑑᐦ ᑖᓐ ᐊᓂᔫᐦ ᑳ ᐃᑗᔨᒡ ᒉᔥᑎᓈᔥ ᒉ ᒦᑯᑣᐤ᙮ ᑖᓐ ᐁ ᐃᔑ ᒉᔥᑎᓈᑌᔨᐦᑖᑯᓂᔨᒡ ᑖᓐ ᐊᓂᔫᐦ ᒋᔐᒪᓂᑑ ᑳ ᐃᑗᑦ ᒉᔥᑎᓈᔥ ᒉ ᐃᐦᑑᑕᐦᒃ 13 ᒫᒥᑐᓀᔨᒫᐦᒄ ᒫ ᒋᔐᒪᓂᑑ ᐁ ᐃᔥᐱᔥ ᒋᔅᑌᔨᐦᑖᑯᓯᑦ᙮ ᐎᔭ ᑎᐲᐌ ᐅᑎᔑᓂᐦᑳᓱᐎᓐ ᒌ ᐋᐸᒋᐦᑖᐤ ᐁ ᐃᑗᑦ ᒉᔥᑎᓈᔥ ᐁᑳ ᓂᐦᑖ ᒉ ᐅᐦᒋ ᐋᐦᒋᔅᑖᐙᑦ ᑖᓐ ᑳ ᐃᔑ ᒉᔥᑎᓈᒡ ᐃᑖᑦ ᐁᑉᕋᐦᐊᒻ ᒉ ᐃᐦᑑᑕᒧᐙᑦ᙮ ᓇᒧᐃ ᑯᑕᒃ ᐊᐌᔫᐦ ᐅᐦᒋ ᐐᐦᐁᐤ ᒉᒌ ᐙᐸᐦᑎᔮᑦ ᐁᑉᕋᐦᐊᒻ ᐁ ᑖᐺᑦ ᑖᓐ ᑳ ᐃᑗᑦ, ᐌᔥ ᑖᐹ ᐃᐦᑖᐤ ᑯᑕᒃ ᐊᐌᓐ ᐁ ᐃᔥᐱᔥ ᒋᔅᑌᔨᐦᑖᑯᓯᑦ ᐁ ᐃᔥᐱᔥ ᒋᔅᑌᔨᐦᑖᑯᓯᑦ ᐎᔭ ᒋᔐᒪᓂᑑ᙮ 14 ᒌ ᐃᑗᐤ, ᒉᔥᑎᓈᔥ ᒋᑲ ᔕᐌᔨᒥᑎᓐ ᐁ ᒦᑖᓐ ᒥᐦᒉᑐ ᐊᐌᓂᒌ ᐊᓂᑦ ᐁ ᐃᐦᑖᔨᓐ ᒉᒌ ᐅᐦᒋ ᐋᓂᔅᒉ ᐱᒫᑎᓰᑣᐤ᙮ 15 ᒌ ᓰᐲᐌᓯᔫ ᒫᒃ ᐁᑉᕋᐦᐊᒻ ᐁ ᐊᔓᐙᐱᑦ ᒉ ᐃᔥᐱᔥ ᐃᐦᑑᑕᒧᐙᑲᓅᑦ ᐊᓂᔫ ᑳ ᐃᑖᑲᓅᑦ ᒉᔥᑎᓈᔥ ᒉ ᐃᐦᑑᑕᒧᐙᑲᓅᑦ᙮ ᒉᒃ ᒥᐦᒉᑐ ᐱᐳᓐᐦ ᑳ ᐊᔓᐙᐱᑦ᙮ ᐁᒄ ᑳ ᒦᑯᑦ ᒋᔐᒪᓂᑑ ᐊᓂᔫ ᑳ ᐃᑗᔨᒡ ᒉᔥᑎᓈᔥ ᒉ ᒦᑯᑦ᙮ 16 ᐃᔅᑯᑕᒃ ᐊᐌᓐ ᓂᔭᔅᐱᒡ ᑖᐯᒡ ᒉᒀᔫ ᐁ ᐃᑗᑦ ᑯᑕᒃ ᐊᐌᔫ ᐐᐦᐁᐤ ᐅᔅᑌ ᐁ ᒋᔅᑌᔨᐦᑖᑯᓯᔨᒡ ᐃᔥᐱᔖᑦ ᐎᔭ᙮ ᐁᒄ ᒫᒃ ᓇᒧᐃ ᐊᐌᔫᐦ ᒌ ᐊᓄᐌᐦᑖᑰ ᐊᓂᔫ ᑳ ᐃᔑ ᓈᔅᐱᒡ ᑖᐺᑦ᙮ 17 ᒋᔐᒪᓂᑑ ᒌ ᐃᑌᐤ ᒉᔥᑎᓈᔥ ᒉ ᔕᐌᔨᒫᑦ ᐅᑏᓃᒻᐦ᙮ ᐁᐅᑯᔫ ᑳ ᐃᑖᑦ ᒉᒌ ᒋᔅᒉᔨᐦᑕᒥᔨᒡ ᐁᑳ ᐐᔅᑳᑦ ᒉ ᐅᐦᒋ ᐋᐦᒋᐦᑖᑦ ᑖᓐ ᑳ ᐐ ᐃᐦᑑᑕᒧᐙᑦ᙮ ᐁᒄ ᒫᒃ ᐁᔫ ᑳ ᓇᔅᐱᒡ ᑖᐺᑦ ᐁ ᐃᑖᑦ ᒉᔥᑎᓈᔥ ᒨᔥ ᒉ ᔕᐌᔨᒫᑦ᙮ 18 ᐌᔥ ᓇᒧᐃ ᒋᑲ ᒌ ᓇᓇᑕᔫ ᒋᔐᒪᓂᑑ᙮ ᐌᔥ ᑖᓐ ᐁ ᐃᔑ ᒉᔥᑎᓈᒡ ᐃᑗᑦ ᒉᒀᔫ ᐁᑯᓐ ᒉ ᐃᔅᐸᔨᐦᒡ᙮ ᒌ ᐃᑗᐤ ᒫᒃ ᐅᔫ ᒉᒌ ᒉᔥᑎᓈᑌᔨᐦᑕᒧᐦᒄ ᐁᑳ ᐐᔅᑳᑦ ᐋᐦᒌᐤᐦ ᒉ ᐅᐦᒋ ᐃᑌᔨᐦᑕᐦᒃ᙮ ᐁᒄ ᒫᒃ ᐃᔅᑯᑕᒃ ᓈᑖᔑᒧᑐᑑᐦᑴ ᒉᒌ ᐱᒫᒋᐦᐄᑕᐦᒄ, ᒉ ᔮᔨᑎᐦᒡ ᒋᑕᔅᐯᔨᒧᐎᓅ ᐁ ᒉᔥᑎᓈᑌᔨᐦᑕᒧᐦᒄ ᑖᓐ ᑳ ᐃᔑ ᓇᔅᐱᒡ ᑖᐺᑦ᙮ 19 ᐁ ᒉᔥᑎᓈᑌᔨᐦᑕᒧᐦᒄ ᒫᒃ ᐅᔫ ᑳ ᐃᔑ ᓇᔅᐱᒡ ᑖᐺᑦ ᒋᔐᒪᓂᑑ ᒉ ᐃᔑ ᐃᐦᑑᑕᒫᑕᐦᒄ ᒧᔮᒻ ᐁ ᐃᑖᐸᒋᓯᑦ ᐴᓇᓯᓈᐹᒋᑲᓐ ᒉᒌ ᑲᔦᐅᑕᑯᐦᑎᐦᒡ ᐆᑦ ᐃᔑᓈᑯᓐ᙮ ᐊᓐ ᒫᒃ ᐊᐌᓐ ᑳ ᒉᔥᑎᓈᑌᔨᒪᐦᒄ ᐁᐅᒄ ᐊᓐ ᐹᐦᒉᑦ ᐊᓂᑌ ᐊᓂᔫ ᑳ ᐋᑰᔦᑲᐦᐄᑲᓄᔨᒡ ᒫᐅᒡ ᑳ ᐸᔦᐦᒋᓰᒪᑲᐦᒃ ᑳ ᐃᔑᓂᐦᑳᑌᔨᒡ ᐊᓂᑌ ᑭᐦᒋᑮᔑᑯᐦᒡ ᑳ ᐃᐦᑕᑯᓂᔨᒡ ᐊᔨᒥᐦᐁᐅᑲᒥᑯᔫ᙮ 20 ᒌᓴᔅ ᒫᒃ ᐆ ᑳ ᒉᔥᑎᓈᑌᔨᒪᐦᒄ᙮ ᐊᓂᑌ ᐊᓂᔫ ᑳ ᐲᐦᒉᑦ ᐁᑯᑌ ᐁ ᐊᔨᒥᐦᐁᔥᑕᒫᑕᐦᒄ᙮ ᐎᔭ ᑳᒋᒉ ᒋᔐᐊᔨᒥᐦᐁᐅᒋᒫᐤ ᒌᓴᔅ ᒬᐦᒡ ᒣᓪᑭᓴᑌᒃ᙮ |
© Wycliffe Bible Translators, Inc. and Canadian Bible Society, 2001.
Wycliffe Bible Translators, Inc.