Hebrews 5 - ᒋᔐᒪᓂᑑ ᐅᑕᔨᒳᐃᓐ ᑳ ᐅᔅᑳᒡ ᑌᔅᑎᒥᓐᑦ1 ᒥᓯᐌ ᒋᔐᐊᔨᒥᐦᐁᐅᒋᒫᐤ ᒣᑴᓰᓅ ᐅᑏᓃᒻᐦ ᐁ ᐃᐦᑖᔨᒡ ᒌ ᐅᐦᒋ ᐎᔮᐸᒫᑲᓅ ᒉᒌ ᐊᑐᔥᑯᐙᑦ ᒋᔐᒪᓂᑑ ᐎᔭᐙᐤ ᐅᐦᒋ᙮ ᒌ ᐸᒋᔥᑎᓂᒉᔅᑕᒧᐌᐤ ᐊᓂᔫᐦ ᐄᓅᐦ ᑲᔦ ᒌ ᒪᒋᔥᑗᐦᐊᒫᐤ ᒉᒌ ᐌᐯᔨᐦᑕᒧᐙᑲᓄᔨᒡ ᐊᓂᔫᐦ ᐄᓅᐦ ᐅᒪᒋᐦᑣᐗᓂᔫᐦ᙮ 2 ᐊᓐ ᐊᐌᓐ ᑳ ᒋᔐᐊᔨᒥᐦᐁᐅᒋᒫᐅᑦ ᒋᔅᒉᔨᐦᑕᒻ ᑲᔦ ᐎᔭ ᑖᓐ ᐁ ᐃᑌᔨᐦᑖᑯᓂᔨᒡ ᐁ ᓇᒋᔥᑳᑲᓄᔨᒡ ᑲᑴᒋᐦᐄᐌᐎᓂᔫ᙮ ᐁᒄ ᒫᒃ ᒉᔅᒉᔨᒫᑦ ᔮᒀᐤ ᒉᒌ ᐃᐦᑑᑕᐙᑦ ᐊᓂᔫ ᐅᑏᓃᒻ ᐁᑳ ᑳ ᐄᑆᐦᑳᔨᒡ ᐁᑳ ᑯᐃᔅᒄ ᐃᐦᑎᔨᒡ᙮ 3 ᐊᓐ ᒋᔐᐊᔨᒥᐦᐁᐅᒋᒫᐤ ᒪᒋᔥᑕᐌᐦᐊᒫᐤ ᒉᒌ ᐌᐯᔨᐦᑕᒧᐙᑲᓅᑦ ᐅᒪᒋᐦᑣᐎᓐᐦ ᑲᔦ ᒫᒃ ᐊᓂᔫ ᐄᓅ ᒉᒌ ᐌᐯᔨᐦᑕᒧᐙᑲᓄᔨᒡ ᐅᒪᒋᐦᑣᐎᓂᔫᐦ᙮ 4 ᓇᒧᐃ ᐊᐌᓐ ᒋᑲ ᒌ ᐎᔦᔨᐦᑕᒻ ᒉᒌ ᒋᔅᑌᔨᐦᑖᑯᐦᐄᓱᑦ ᐁ ᒋᔐᐊᔨᒥᐦᐁᐅᒋᒫᐅᑦ᙮ ᒋᔐᒪᓂᑑ ᐁᐅᒄ ᐌᔮᐸᒫᑦ ᐊᐌᔫ ᒉ ᒋᔐᐊᔨᒥᐦᐁᐅᒋᒫᐎᔨᒡ, ᒧᔮᒻ ᑳ ᐃᔑ ᐎᔮᐱᒫᑦ ᐁᕋᓐ ᒉᒌ ᒋᔐᐊᔨᒥᐦᐁᐅᒋᒫᐎᔨᒡ᙮ 5 ᐁᑯᓐ ᒫᒃ ᒬᐦᒡ ᑲᔦ ᐎᔭ ᙭᙮ ᓇᒧᐃ ᐎᔭ ᐅᐦᒋ ᐎᔦᔨᐦᑕᒻ ᒉᒌ ᒋᔅᑌᔨᐦᑖᑯᐦᐄᓱᑦ ᐁ ᒋᔐᐊᔨᒥᐦᐁᐅᒋᒫᐅᑦ᙮ ᒋᔐᒪᓂᑑᐦ ᒌ ᐃᑎᑰ, ᒋᔭ ᓂᑯᔅ, ᓂᔭ ᒎᐦᑖᐐᒫᐅᑐᑕᐅᓐ ᐊᓄᐦᒌᔥ ᐆ ᑳ ᒌᔑᑳᒡ᙮ 6 ᒦᓐ ᐃᐦᑕᑯᓂᔫ ᐊᓂᑌ ᐅᑕᔨᒧᐎᓂᐦᒡ ᒋᔐᒪᓂᑑ ᐁ ᒌ ᐃᑗᑦ, ᑳᒋᒉ ᒋᒋᔐᐊᔨᒥᐦᐁᐅᒋᒫᐅᓐ, ᒬᐦᒡ ᒣᓪᑭᓴᑌᒃ᙮ 7 ᒣᒀᒡ ᐅᑕᐦ ᐊᔅᒌᐦᒡ ᑳ ᐸᐹᒧᐦᑌᑦ ᒌᓴᔅ ᒥᐦᒉᑣᐤ ᒌ ᐃᔑᓈᑯᓲ ᓲᐦᒃ ᐁ ᓂᑐᑕᒧᐙᑦ ᐊᓂᔫᐦ ᑳ ᒋᔅᒉᔨᒫᑦ ᒉᒌ ᐐᒋᐦᐄᑯᑦ ᐁᑳ ᒉᒌ ᓂᐸᐦᐋᑲᓅᑦ᙮ ᒌ ᐯᐦᑖᑰ ᒫᒃ ᐌᔥ ᒌ ᓇᓂᐦᒌᔥᑐᐌᐤ᙮ 8 ᐋᑦ ᐁ ᒌ ᐅᑯᓰᑐᑖᑯᑦ ᒋᔐᒪᓂᑑᐦ ᒌᓴᔅ, ᔮᐸᒡ ᒌ ᓂᑐᐌᔨᐦᑖᑯᓂᔫ ᒉᒌ ᒋᔅᒉᔨᐦᑕᒥᐦᐋᑲᓅᑦ ᑌᑲᔥ ᒉᒌ ᓇᓂᐦᐄᐦᑐᐙᑦ ᐁ ᐸᒋᔥᑌᔨᒥᑎᓲᔅᑕᒧᐙᑦ ᐅᑎᑌᔨᐦᑕᒧᐎᓂᔫ ᒉᒌ ᓇᓀᐦᑳᒋᐦᐋᑲᓅᑦ᙮ ᐁᑯᑦ ᑳ ᐅᐦᒋ ᒋᔅᒉᔨᐦᑕᒥᐦᐋᑲᓅᑦ ᒉᒌ ᓇᓂᐦᐄᐦᑐᐙᑦ ᒋᔐᒪᓂᑑᐦ᙮ 9 ᐊᓂᔫ ᒫᒃ ᑌᑲᔥ ᐁ ᒌ ᓇᓂᐦᐄᐦᑕᐦᒃ ᒌᓴᔅ ᒉᒌ ᓇᓀᐦᑳᒋᐦᐋᑲᓅᑦ ᐁᑯᑦ ᑳ ᐅᐦᒋ ᒥᔮᑲᓅᑦ ᑳᒋᒉ ᒉᒌ ᐱᒫᒋᐦᐋᑦ ᒥᓯᐌ ᐊᓂᔫᐦ ᑳ ᓇᓂᐦᐄᐦᑖᑯᑦ᙮ 10 ᐁᒄ ᒫᒃ ᒋᔐᒪᓂᑑᐦ ᑳ ᐎᔮᐸᒥᑯᑦ ᒉᒌ ᒋᔐᐊᔨᒥᐦᐁᐅᒋᒫᐅᑦ ᒬᐦᒡ ᒣᓪᑭᓴᑌᒃ ᐁ ᐃᔑ ᒋᔐᐊᔨᒥᐦᐁᐅᒋᒫᐎᔨᒡ᙮ ᓲᐦᒃ ᐐ ᐃᐦᑑᑕᐦᑖᐤ ᒉᒌ ᐃᔑ ᓂᐦᑖᐅᒌᐦᒄ ᐅᑎᐯᔨᐦᒋᑫᐤ ᐁ ᐃᐦᑖᑦ 11 ᐁᔥᒄ ᒥᔅᑕᐦᐄ ᐃᐦᑕᑯᓐ ᑖᓐ ᒉᒌ ᐃᔑ ᐐᐦᑕᒫᑕᑯᒡ ᒥᒄ ᒫᒃ ᓈᔥᒡ ᓂᑖᔨᒥᐦᐄᑰᓐ ᒦᓐ ᐁᑎᑑ ᒉᒌ ᐐᐦᑕᒫᑕᑯᒡ, ᐌᔥ ᓈᔥᒡ ᑖᐺ ᓇᒧᐃ ᒋᒌ ᓂᓯᑐᐦᑌᓈᐙᐤ᙮ 12 ᔖᔥ ᒋᐹ ᒋᔅᑯᑕᒧᐙᐙᐅᒡ ᐊᐌᓂᒌ ᑖᓐ ᐁ ᐃᔑ ᑖᐺᒪᑲᓂᔨᒡ ᒋᔐᒪᓂᑑ ᐅᑕᔨᒧᐎᓐ ᐌᔥ ᔖᔥ ᐌᔅᑲᒡ ᑳ ᐅᐦᒋ ᑖᐺᐦᑕᒣᒄ ᒋᔭᐙᐤ ᒥᔻᒋᒧᐎᓐ᙮ ᒥᒄ ᒫᒃ ᓀᑐᐌᔨᐦᑖᑯᓂᑴ ᒦᓐ ᒉᒌ ᒋᔅᑯᑕᒫᑯᔦᒄ ᑖᓐ ᑳ ᐃᔑ ᒋᔅᑯᑕᒫᑯᔦᒄ ᐅᔅᑲᒡ ᑳ ᒋᐦᒋ ᑖᐺᐦᑕᒣᒄ ᒧᔮᒻ ᐊᐱᔅᑕᐙᔕᒡ ᒥᒄ ᒎᒎᓯᓈᐳᐃᐦ ᑳ ᒥᓂᐦᐋᑲᓅᑣᐤ ᒋᑎᑌᔨᐦᑖᑯᓯᓈᐙᐤ᙮ ᐌᔥ ᓇᒧᐃ ᒌ ᒦᒎᒡ ᐎᔮᓯᔫ ᐊᐱᔅᑕᐙᔕᒡ᙮ 13 ᐊᓂᒌ ᐊᐌᓂᒌ ᒨᔥ ᑳ ᐐ ᐯᐦᑕᐦᒀᐤ ᐊᓂᔫ ᑖᐺᐎᓂᔫ ᐅᔅᑲᒡ ᑳ ᒋᔅᑯᑕᒧᐙᑲᓅᑣᐤ, ᐁᑳ ᒫᒃ ᑳ ᐋᐸᑌᔨᐦᑕᐦᒀᐤ ᒉᒌ ᒋᔅᒉᔨᐦᑕᐦᒀᐤ ᑖᓐ ᒉᒌ ᐃᔑ ᑯᐃᔅᑯᑖᑎᓰᑣᐤ, ᓇᒧᐃ ᓂᓯᑐᐦᑕᒧᒡ ᑖᓐ ᓂᐦᐋᐤ ᐁ ᐃᑌᔨᐦᑖᑯᓂᔨᒡ ᐁ ᑴᔅᑳᑎᓰᓈᓄᔨᒡ᙮ ᐅᒌ ᒫᒃ ᐊᐌᓂᒌ ᑳ ᐃᑌᔨᐦᑖᑯᓯᑣᐤ ᒧᔮᒻ ᐊᐱᔅᑕᐙᔕᒡ ᐃᑌᔨᐦᑖᑯᓲᒡ ᒥᒄ ᒎᒎᓯᓈᐳᐃ ᐁ ᒥᓂᐦᐋᑲᓅᑣᐤ᙮ 14 ᐁᒄ ᐊᓂᒌ ᑳ ᒋᔐᐃᓄᐌᔨᐦᑕᐦᒀᐤ ᔖᔥ ᐎᔮᓯᔫ ᒦᒎᒡ᙮ ᒌ ᒋᔅᑯᑕᒫᓲᒡ ᑯᐃᔅᑯᑖᑎᓰᐎᓂᐦᒡ ᒉᒌ ᐃᔑ ᐱᒫᑎᓯᑣᐤ ᐁᔑᑯᒻ ᒌᔑᑳᐤ ᐁ ᑯᒋᐦᑖᑣᐤ ᑯᐃᔅᒄ ᒉᒌ ᐃᔑ ᐱᒫᑎᓰᑣᐤ᙮ ᐁᐅᒄ ᒫᒃ ᐌᐦᒌ ᓂᓯᑑᓇᐦᒀᐤ ᑯᐃᔅᑯᑖᑎᓯᐎᓂᔫ ᑲᔦ ᒪᒑᑎᓰᐎᓂᔫ᙮ |
© Wycliffe Bible Translators, Inc. and Canadian Bible Society, 2001.
Wycliffe Bible Translators, Inc.