ᐊᐸᔅᑕᓚᒡ 3 - ᒋᔐᒪᓂᑑ ᐅᑕᔨᒳᐃᓐ ᑳ ᐅᔅᑳᒡ ᑌᔅᑎᒥᓐᑦᐁᑳ ᓂᐦᑖᐅᐦᑌᑦ ᓈᐯᐤ ᑳ ᒦᓄᐙᒋᐦᐋᑲᓅᑦ 1 ᐯᔭᒀᐤ ᐲᑕᕐ ᐁᒄ ᒫᒃ ᒞᓐ ᒌ ᐃᑐᐦᑌᐅᒡ ᐊᓂᑌ ᒋᔐᐊᔨᒥᐦᐁᐅᑲᒥᑯᐦᒡ ᓂᔥᑐ ᐁ ᐃᔅᐸᔨᔨᒡ ᐁ ᒌᔥᒀᐱᐦᑖᒌᔑᑳᔨᒡ, ᐊᓂᑦ ᐁ ᐅᑎᐦᒋᐸᔨᔨᒡ ᑳ ᒌ ᐊᔨᒥᐦᐋᓄᔨᒡ᙮ 2 ᓈᔥᒡ ᒌ ᒥᓯᒋᐦᑑ ᐊᓐ ᒋᔥᑐᐦᑲᓐ ᐊᓂᑦ ᐁ ᐅᐦᒋ ᐲᐦᑐᑳᓅᐦᒡ ᐊᓐ ᒋᔐᐊᔨᒥᐦᐁᐅᑲᒥᒄ ᑳ ᒥᔻᔑᒡ ᐃᔥᒀᐦᑌᒻ ᒌ ᐃᔑᓂᐦᑳᑖᑲᓅ, ᐁᑯᑦ ᑳ ᐊᐱᑦ ᓈᐯᐤ ᐁᑳ ᐅᐦᒋ ᓂᐦᑖᐅᐦᑌᑦ᙮ ᒣᔑᑯᒻ ᒌᔑᑳᐤ ᐁ ᒌ ᐃᑐᐦᑕᐦᐋᑲᓅᑦ ᐊᓂᑌ, ᒉᒌ ᓂᑐᑕᒧᐙᑦ ᐊᐌᔫ ᔔᓕᔮᔫ ᐊᓂᑌ ᐊᔨᒥᐦᐁᐅᑲᒥᑯᐦᒡ ᐁ ᐃᑐᐦᑌᔨᒡ᙮ 3 ᐃᔅᑯᑕᒃ ᒫᒃ ᐊᓐ ᓈᐯᐤ ᐎᔮᐸᒫᑦ ᐊᓂᔫ ᐲᑕᕐ ᑲᔦ ᒞᓐ ᒉ ᐊᑎ ᐲᐦᒉᔨᒡ ᐊᓂᔫ ᒋᔐᐊᔨᒥᐦᐁᐅᑲᒥᑯᔫ ᒌ ᓂᑐᐌᔨᐦᑕᒧᐌᐤ ᔔᓕᔮᔫ᙮ 4 ᑯᐃᔅᒄ ᒫᒃ ᒌ ᑲᓇᐙᐸᒣᐅᒡ ᐊᓂᔫ ᓈᐯᐤ, ᐁᒄ ᐲᑕᕐ ᑳ ᐃᑖᑦ, ᐯᒋ ᑲᓇᐙᐸᒥᓈᓐ ᒫ᙮ 5 ᐁᒄ ᑳ ᑲᓇᐙᐸᒥᑯᑣᐤ ᐊᓂᔫ ᓈᐯᐤᐦ, ᐁ ᐳᑯᓭᔨᒥᑯᑣᐤ ᒉᒀᔫ ᒉᒌ ᒥᔮᑣᐤ᙮ 6 ᐁᒄ ᐲᑕᕐ ᑳ ᐃᑖᑦ, ᓇᒧᐃ ᒥᑐᓐ ᓂᑕᔮᓐ ᔔᓕᔮᐤ ᒉᒌ ᒦᑖᓐ, ᒥᒄ ᒫᒃ ᒋᑲ ᐐᒋᐦᐄᑎᓐ ᒉᒌ ᒦᓄᐙᑎᓯᔨᓐ᙮ ᐅᑎᔑᓂᐦᑳᓱᐎᓂᐦᒡ ᐅᐦᒋ ᒌᓴᔅ ᙭ ᓈᓴᕆᑦ ᑳ ᐅᐦᒌᑦ, ᐱᓯᑰᐦ ᒉ ᐱᒧᐦᑌᔨᓐ᙮ 7 ᐁᒄ ᐲᑕᕐ ᑳ ᐅᑎᓇᒧᐙᑦ ᐊᓂᔫ ᐅᓂᐦᐄᐎᓂᑎᐦᒋᔫ ᑳ ᐐᒋᐦᐋᑦ ᐁ ᐱᓯᑯᔨᒡ᙮ ᑏᐌᐦᒡ ᒫᒃ ᐊᓐ ᓈᐯᐤ, ᐅᓯᑦ ᐁᒄ ᒫᒃ ᐅᐦᑯᓐ ᒌ ᐅᐦᒋ ᓵᐲᒥᑲᓂᔫᐦ᙮ 8 ᒌ ᐱᓯᑯᔑᐱᐦᑖᐤ ᒫᒃ, ᑳ ᓃᐳᑦ, ᑳ ᐊᑎ ᐸᐹᒧᐦᑌᑦ᙮ ᑳ ᐐᒉᐙᑦ ᐊᓂᔫᐦ ᐲᑕᕐ ᑲᔦ ᒞᓐ ᐁ ᐲᐦᒉᔨᒡ ᐊᓂᑌ ᒋᔐᐊᔨᒥᐦᐁᐅᑲᒥᑯᐦᒡ, ᐁ ᐱᒧᐦᑌᑦ, ᐁ ᒀᔥᒀᔥᑯᐦᑎᑦ, ᐁ ᒫᒥᐦᒋᒫᑦ ᒋᔐᒪᓂᑑ᙮ 9 ᒥᓯᐌ ᒫᒃ ᐊᐌᔫ ᐊᓂᑦ ᑳ ᐃᐦᑖᔨᒡ ᒌ ᐙᐸᒥᑰ ᐁ ᐱᒧᐦᑌᑦ ᑲᔦ ᐁ ᒫᒥᐦᒋᒫᑦ ᒋᔐᒪᓂᑑ᙮ 10 ᒌ ᓂᓯᑑᓄᐌᐅᒡ ᒫᒃ ᐁᐅᒄ ᐊᓂᔫ ᐋᐎᔨᒡ ᓈᐯᐤ ᑳ ᒌ ᐊᐱᔨᒡ ᐁ ᐱᑯᔑᐦᑣᔨᒡ ᐊᓂᑌ ᑳ ᒥᔻᔑᔨᒡ ᐃᔥᒀᐦᑌᒻ ᑳ ᐃᔑᓂᐦᑳᑌᔨᒡ᙮ ᒥᓯᐌ ᒫᒃ ᒌ ᑯᔥᑯᐸᔫᒡ ᑲᔦ ᒌ ᒥᔅᑳᑌᔨᐦᑕᒧᒡ ᑖᓐ ᑳ ᐃᔅᐸᔨᔨᒡ᙮ ᑖᓐ ᑳ ᐃᔑ ᐐᐦᑕᐦᒃ ᐲᑕᕐ ᐊᓂᑌ ᒋᔐᐊᔨᒥᐦᐁᐅᑲᒥᑯᐦᒡ 11 ᐊᓐ ᒫᒃ ᓈᐯᐤ ᐁᑳ ᐅᐦᒌ ᓂᐦᑖᐅᐦᑌᑦ ᒌ ᒫᒫᐦᒋᑯᓀᐤ ᐊᓂᔫ ᐲᑕᕐ ᐁᒄ ᒫᒃ ᒞᓐ, ᐁᒄ ᒥᓯᐌ ᐊᐌᓂᒌ ᑳ ᐃᔅᐸᐦᑖᑣᐤ ᐊᓂᑌ ᐁ ᓃᐳᔨᒡ ᐊᓂᑌ ᔂᓚᒪᓐ ᐅᑆᐦᒋᒻ ᑳ ᐃᔑᓂᐦᑳᑌᔨᒡ, ᒥᓯᐌ ᓈᔥᒡ ᒌ ᑯᔥᑯᐙᐸᒨᒡ᙮ 12 ᐃᔅᑯᑕᒃ ᒫᒃ ᐲᑕᕐ ᐎᔮᐸᒫᑦ ᐊᓂᔫᐦ ᐄᓅᐦ, ᒌ ᐃᑌᐤ, ᒋᔭᐙᐤ ᐃᔅᕋᐁᓕᐦᒡ ᑳ ᐅᐦᒋᔦᒄ, ᒉᒀᓐ ᐌᐦᒋ ᓈᔥᒡ ᑯᔥᑯᐙᐸᒧᔦᒄ ᐆ, ᑲᔦ ᒉᒀᓐ ᓈᔥᒡ ᐌᐦᒡ ᒥᔅᑳᔑᓅᔮᐦᒡ᙮ ᒋᑎᑌᔨᐦᑌᓈᐙᐤ ᐋ ᓂᔮᓐ ᑎᐲᐌ ᓂᒪᔅᑰᓰᐎᓈᐦᒡ ᒫᒃ ᓂᑕᔨᒥᐦᐁᐙᑎᓰᐎᓈᐦᒡ ᐌᐦᒌ ᐱᒧᐦᑌᑦ ᐆ ᓈᐯᐤ᙮ 13 ᐊᓂᔫᐦ ᒋᔐᒪᓂᑑᐦ ᑳ ᐊᑐᔥᑯᐙᑣᐤ ᐊᓂᔦᐦᑳᓈᓂᒡ, ᐁᑉᕋᐦᐊᒻ, ᐊᐃᓴᒃ ᑲᔦ ᒉᑲᑉ ᑲᔦ ᐅᑖᐦᒡ ᑰᐦᑖᐐᓅᒡ ᒋᔅᑌᔨᐦᑖᑯᐦᐁᐤ ᐊᓂᔫ ᐅᑖᐸᒋᐦᐋᑲᓐᐦ, ᐁᐅᒄ ᐅᔫᐦ ᒌᓴᔅ᙮ ᒋᔭᐙᐤ ᒫᒃ ᒋᒌ ᐃᐦᑑᑐᐙᐙᐤ ᒉᒌ ᐸᒋᔥᑎᓈᑲᓅᑦ ᐊᓂᑌ ᕎᒻ ᒋᔐᐅᒋᒫᐤ ᐁ ᐃᐦᑖᔨᒡ᙮ ᐁ ᒌ ᐋᑐᐙᐦᐁᒄ ᐅᐦᒋᔥᑰ ᐹᐃᓚᑦ ᐁ ᐃᐦᑖᔨᒡ, ᐋᑦ ᐃᔅᑯᑕᒃ ᐹᐃᓚᑦ ᑳ ᐐ ᐸᒋᔥᑎᓈᑦ᙮ 14 ᔮᐸᒡ ᒋᔭᐙᐤ ᒋᒌ ᐋᑐᐌᔨᒫᐙᐤ ᐊᓐ ᑳ ᐸᔦᐦᒋᓰᑦ ᑲᔦ ᑳ ᑯᐃᔅᑯᑖᑎᓰᑦ ᑲᔦ ᐁ ᒌ ᐃᑗᔦᒄ ᑳ ᓂᐸᐦᐄᐌᑦ ᓈᐯᐤ ᑌᔭᑯᒡ ᒉᒌ ᐸᒋᔥᑎᓇᒫᑯᔦᒄ᙮ 15 ᑲᔦ ᒋᒌ ᐃᐦᑑᑕᐙᐙᐤ ᒌᓴᔅ ᒉᒌ ᓂᐸᐦᐋᑲᓅᑦ ᐊᓐ ᑳ ᒥᔮᑦ ᐊᐌᔫ ᐱᒫᑎᓰᐎᓂᔫ᙮ ᒥᒄ ᒫᒃ ᒋᔐᒪᓂᑑ ᒌ ᐃᐦᑑᑕᐌᐤ ᒦᓐ ᑳᐤ ᒉᒌ ᐱᒫᑎᓯᔨᒡ᙮ ᐌᔥ ᓂᒌ ᐙᐸᒪᓈᓐ ᒦᓐ ᑳᐤ ᑳ ᐗᓂᔥᑳᑦ ᒌᓴᔅ᙮ ᓂᒋᔅᒉᔨᐦᑌᓈᓐ ᒫᒃ ᐁ ᑖᐺᒪᑲᐦᒡ ᐆ᙮ 16 ᐊᓂᔫ ᐁ ᓲᐦᒉᔨᐦᑖᑯᓂᔨᒡ ᒌᓴᔅ ᐅᑎᔑᓂᐦᑳᓱᐎᓐ ᐁᐅᒄ ᐅᔫ ᐌᐦᒋ ᒦᓄᐙᑎᓰᑦ ᐆ ᓈᐯᐤ᙮ ᒋᒌ ᒋᔅᒉᔨᒫᐙᐤ ᑲᔦ ᒋᒌ ᐙᐸᒫᐙᐤ ᑖᓐ ᑳ ᐃᔑᓈᑯᓯᑦ᙮ ᒋᒌ ᐙᐸᒫᐙᐤ ᒫᒃ ᐊᓂᑦ ᐅᐦᒋᔥᑰ ᐁ ᐃᐦᑖᔦᒄ ᑳ ᒥᓄᐙᒋᐦᐋᑲᓅᑦ ᐊᓂᔫ ᐁ ᑖᐺᔨᒫᑦ ᒌᓴᔅ ᐅᐦᒋ᙮ 17 ᐁᒄ ᒫᒃ ᓃᒋᔖᓂᑎᒄ, ᓂᒋᔅᒉᔨᐦᑌᓐ ᒋᔭᐙᐤ ᐁᒄ ᒫᒃ ᐊᓂᒌ ᑳ ᓃᑳᓂᔥᑳᑖᑯᒡ ᐁᑳ ᐅᐦᒋ ᒋᔅᒉᔨᐦᑕᒣᒄ ᑖᓐ ᓂᐦᐋᐤ ᐁ ᐃᐦᑎᔦᒄ ᐊᓂᔫ ᑳ ᐃᐦᑑᑕᐌᒄ ᒌᓴᔅ᙮ 18 ᒋᔐᒪᓂᑑ ᒌ ᒥᔦᐤ ᐊᓂᔫᐦ ᐅᒋᔅᒋᐌᐦᐄᒉᓲᐦ ᒉᒌ ᓃᑳᓐ ᐐᐦᑕᒥᔨᒡ ᒉ ᐗᐐᓯᒉᔨᐦᑕᒥᔨᒡ ᙭ ᐊᓂᔫᐦ ᑳ ᐎᔮᐸᒫᑦ᙮ ᒋᔐᒪᓂᑑ ᒫᒃ ᒌ ᑎᐱᐸᔨᐦᑖᐤ ᐅᔫ᙮ 19 ᑴᔅᑳᑎᓰᒄ, ᒥᐦᒌᐌᔨᐦᑕᒧᒄ ᑖᓐ ᑳ ᐃᔑ ᒪᒋᑑᑕᒣᒄ᙮ ᓈᑖᐦᒄ ᒋᔐᒪᓂᑑ ᒉᒌ ᐌᐯᔨᐦᑕᒫᑖᒄ ᒋᒪᒋᐦᑣᐎᓇᐙᐤ᙮ ᐁᒄ ᒫᒃ ᐅᑎᐯᔨᐦᒋᑫᐤ ᒉ ᐃᐦᑑᑖᑖᒄ ᒦᓐ ᒉᒌ ᓲᐦᑲᒪᐦᒋᐦᐅᔦᒄ ᒋᑕᐦᒑᐦᑯᐙᐦᒡ᙮ 20 ᑲᔦ ᑲᑕ ᐯᒋ ᐃᑎᔕᐦᐌᐤ ᒌᓴᔅ ᙭, ᐊᓂᔫᐦ ᔖᔥ ᑳ ᐎᔮᐸᒫᑦ ᒉ ᐃᑎᔕᐦᐊᒫᑖᒄ᙮ 21 ᐁᑯᑌ ᒫᒃ ᐊᓂᑌ ᑭᐦᒋᑮᔑᑯᐦᒡ ᒉ ᐃᐦᑖᑦ ᐹᑎᔥ ᒥᓯᐌ ᒉᒀᔫ ᐅᔅᒋᐦᑖᑲᓄᔨᒉ ᐊᓂᔫ ᑖᓐ ᑳ ᐃᔑ ᓃᑳᓐ ᐐᐦᑕᐦᒀᐤ ᒉ ᐃᔅᐸᔨᔨᒡ ᐊᓂᔦᐦᑳᓈᓂᒡ ᐌᔅᑲᒡ ᑳ ᐸᔦᐦᒋᓰᑣᐤ ᐅᒋᔅᒋᐌᐦᐄᒉᓲᒡ᙮ 22 ᐌᔥ ᐊᓂᔮ ᒧᓯᔅ ᒌ ᐃᑗᐤ ᐌᔅᑲᒡ ᐁ ᐋᔨᒨᒫᑦ ᒌᓴᔅ, ᒋᔐᒪᓂᑑ, ᒋᑲ ᐋᐸᒋᐦᐁᐤ ᐊᐌᔫ ᐊᓂᑌ ᓃᑳᓂᐦᒡ ᒉ ᒋᔅᒋᐌᐦᐄᒉᔨᒡ, ᒧᔮᒻ ᓂᔭ ᐁ ᐃᔑ ᐋᐸᒋᐦᐄᑦ, ᐁ ᒋᔅᒋᐌᐦᐄᒉᔮᓐ᙮ ᐊᓂᑦ ᒋᔭᐙᐤ ᐁ ᐃᑎᔅᑳᓀᓯᔦᒄ, ᐁᑯᑦ ᒉ ᐅᐦᒋᔨᒡ᙮ ᒋᑲ ᓂᑐᐦᑕᐙᐙᐤ ᑲᔦ ᒋᑲ ᓇᓂᐦᐄᐦᑐᐙᐙᐤ ᑖᓐ ᒉ ᐃᑎᑖᒄ᙮ 23 ᐊᓐ ᒫᒃ ᐊᐌᓐ ᐁᑳ ᒉ ᓂᑐᐦᑕᐙᑴ ᐅᔫ ᒉ ᐅᒋᔅᒋᐌᐦᐄᒉᓱᔨᒡ, ᒋᑲ ᐄᒉᓈᑲᓅ ᐊᓂᑦ ᐅᐦᒋ ᒋᔐᒪᓂᑑ ᐅᑏᓃᒥᔫ ᐁ ᐃᐦᑖᔨᒡ, ᐁᒄ ᒫᒃ ᒉ ᐗᓈᒋᐦᐋᑲᓅᑦ᙮ ᐁᐅᒄ ᐅᔫ ᑳ ᐐᐦᑕᐦᒃ ᐲᑕᕐ ᐁ ᒌ ᐃᑗᔨᑯᐸᓀᓐᐦ ᐊᓂᔮ ᒧᓯᔅ᙮ ᐁᒄ ᑳ ᐊᑎ ᐃᑗᑦ ᒦᓐ ᐲᑕᕐ, 24 ᓵᒧᐁᓪ ᐁᒄ ᒫᒃ ᐊᓂᒌ ᑯᑕᑲᒡ ᐅᒋᔅᒋᐌᐦᐄᒉᓲᒡ ᒌ ᓃᑳᓐ ᐐᐦᑕᒧᒡ ᐅᔫ ᐊᓄᐦᒌᔥ ᑳ ᒌᔑᑳᒀᐤᐦ ᑖᓐ ᐃᔅᐸᔨᔨᒡ᙮ 25 ᒋᑖᓂᔅᒉ ᐙᐦᑯᒫᐙᐅᒡ ᐊᓂᔦᐦᑳᓈᓂᒡ ᐅᒋᔅᒋᐌᐦᐄᒉᓲᒡ, ᐊᓂᔫ ᒫᒃ ᓂᔅᑯᒧᐎᓂᔫ ᑖᓐ ᑳ ᐃᔑ ᒦᑯᑣᐤ ᒋᔐᒪᓂᑑ ᑲᔦ ᒋᔭᐙᐤ ᒋᑕᓯᒋᓯᓈᓱᓈᐙᐤ ᐊᓂᑦ᙮ ᐌᔥ ᒋᔐᒪᓂᑑ ᒌ ᐃᑌᐤ ᐊᓂᔮᓈᐦ ᐁᑉᕋᐦᐊᒻ, ᐊᓂᑌ ᓃᔥᑖᒥᐦᒡ ᒋᑕᐙᔒᒪᒡ ᓂᑲ ᐅᐦᒋ ᐅᐦᑎᓈᐤ ᐯᔭᒄ ᐊᐌᓐ ᐊᓂᑦ ᐅᐦᒋ ᒉᒌ ᐅᐦᒋ ᔕᐌᔨᒪᒀᐤ ᒥᓯᐌ ᐊᐌᓂᒌ ᐅᑕᐦ ᐊᔅᒌᐦᒡ᙮ 26 ᒌ ᐎᔮᐸᒣᐤ ᒫᒃ ᒋᔐᒪᓂᑑ ᐅᔫᐦ ᐅᑖᐸᒋᐦᐋᑲᓐ ᒋᔭᐙᐤ ᒫᐅᒡ ᓃᔥᑕᒻ ᒉᒌ ᐃᑎᔕᐦᐊᒫᑖᒄ᙮ ᒋᑲ ᔕᐌᔨᒥᑯᐙᐤ ᐁ ᐃᐦᑑᑖᑯᔦᒄ ᒥᓯᐌ ᐁ ᑕᔑᔦᒄ ᒉᒌ ᓇᑲᑕᒣᒄ ᒋᒪᒑᑎᓰᐎᓇᐙᐤᐦ᙮ |
© Wycliffe Bible Translators, Inc. and Canadian Bible Society, 2001.
Wycliffe Bible Translators, Inc.