2 Corinthians 8 - ᒋᔐᒪᓂᑑ ᐅᑕᔨᒳᐃᓐ ᑳ ᐅᔅᑳᒡ ᑌᔅᑎᒥᓐᑦᐁ ᓰᐦᒋᒫᑲᓅᑦ ᐊᐌᓐ ᒉᒌ ᐌᔫᒡ ᒦᐌᑦ 1 ᓂᐐᒉᐙᑲᓂᑎᒄ, ᒋᓂᑐᐌᔨᒥᑎᓈᓐ ᒉᒌ ᒋᔅᒉᔨᒣᑯᒡ ᑖᓐ ᑳ ᐃᔑ ᒥᔪᑑᑕᒫᑯᑣᐤ ᒋᔐᒪᓂᑑᐦ ᐊᓂᒌ ᐅᒫᒨᐊᔨᒥᐦᐋᐅᒡ ᐊᓂᑌ ᒫᓯᑐᓂᔭ ᑳ ᐃᔑᓂᐦᑳᑌᔨᒡ ᐊᔅᒌᔫ ᑳ ᐃᐦᑖᑣᐤ᙮ 2 ᓈᔥᒡ ᑖᐺ ᒌ ᐯᒋ ᐋᔨᒥᐦᐆᒡ᙮ ᐋᑦ ᐊᓂᔫ ᐁ ᐃᔥᐱᔥ ᓈᔥᒡ ᒋᔅᑎᒫᑎᓰᑣᐤ ᔮᐸᒡ ᓈᔥᒡ ᑖᐺ ᒥᔅᑕᐦᐄ ᒌ ᐸᒋᔥᑎᓂᒉᐅᒡ᙮ ᑲᔦ ᒫᒃ ᓈᔥᒡ ᑖᐺ ᒌ ᒥᔦᔨᐦᑕᒧᒡ ᐁ ᐸᒋᔥᑎᓂᒉᑣᐤ᙮ 3 ᒌ ᐸᒋᔥᑎᓇᒧᒡ ᑖᓐ ᑳ ᐃᔑ ᓂᐦᐄᐸᔨᔨᒡ ᒉᒌ ᐃᔥᐱᔥ ᐸᒋᔥᑎᓇᐦᒀᐤ, ᓂᒌ ᐙᐸᒫᐅᒡ ᐌᓯᓐ, ᐊᔪᐙᒃ ᒫᒃ ᔮᐸᒡ ᒌ ᐃᔥᐱᔥ ᐸᒋᔥᑎᓂᒉᐅᒡ, ᐎᔭᐙᐤ ᒥᑐᓐ ᐁ ᒌ ᐃᑌᔨᐦᑕᒥᐦᐄᑯᑣᐤ ᒉᒌ ᐃᔥᐱᔥ ᐸᒋᔥᑎᓂᒉᑣᐤ᙮ 4 ᓈᔥᒡ ᓂᒌ ᓰᐦᒋᒥᑯᓈᓂᒡ ᒉᒌ ᐸᒋᔥᑎᓇᒐᐦᑣᐤ ᑲᔦ ᐎᔭᐙᐤ ᒉᒌ ᐸᒋᔥᑎᓂᒉᑣᐤ ᒉᒌ ᐐᒋᐦᐋᑲᓄᔨᒡ ᐊᓂᔫᐦ ᑳ ᒋᔅᑎᒫᑎᓯᔨᒡ ᑳ ᑖᐺᐦᑕᒦᑣᐤᐦ᙮ 5 ᐹᔑᒡ ᒫᒃ ᒌ ᐃᐦᑑᑕᒧᒡ ᑖᓐ ᑳ ᐃᑌᔨᒪᒋᐦᑣᐤ ᒉ ᐃᐦᑎᑣᐤ᙮ ᓃᔥᑕᒻ ᒋᔐᒪᓂᑑᐦ ᒌ ᐸᒋᔥᑌᔨᒥᑎᓲᔅᑕᐌᐅᒡ ᐁᒄ ᓂᔮᓐ ᑳ ᐸᒋᔥᑌᔨᒥᑎᓲᔅᑖᑯᔮᐦᒡ ᒬᐦᒡ ᑖᓐ ᑳ ᐃᔑ ᓂᑕᐌᔨᒥᑯᑣᐤ ᒋᔐᒪᓂᑑ ᒉᒌ ᐃᐦᑎᑣᐤ᙮ 6 ᑳ ᐙᐸᐦᑕᒧᐗᒋᐦᑦ ᒫᒃ ᐊᓂᔫ ᐁ ᐃᔑ ᒦᐌᑣᐤ ᓂᒌ ᐃᑕᔓᒫᓈᓐ ᑕᐃᑕᔅ ᒉᒌ ᔒᐦᒋᒥᑖᒄ ᒉᒌ ᐸᒋᔥᑎᓂᒉᐌᒄ ᐌᔥ ᐎᔭ ᓃᔥᑕᒻ ᒋᒌ ᐋᔨᒨᑕᒫᑯᐙᐤ ᐁ ᐸᒋᔥᑎᓂᒑᓄᔨᒡ᙮ 7 ᒥᓯᐌ ᒉᒀᓐ ᓈᔥᒡ ᑖᐺ ᒋᑲᔅᒋᐦᐅᓈᐙᐤ᙮ ᓲᐦᒉᔨᐦᑖᑯᓐ ᒋᑖᐺᐦᑕᒧᐎᓇᐙᐤ᙮ ᒋᑲᔅᒋᐦᐅᓈᐙᐤ ᐁ ᐋᔨᒨᑕᒣᒄ ᑖᓐ ᐁ ᐃᔑ ᑖᐺᐦᑕᒣᒄ᙮ ᒥᔅᑕᐦᐄ ᒋᒋᔅᒉᔨᐦᑕᒧᐙᓈᐙᐤ ᒋᔐᒪᓂᑑ ᐅᑎᑌᔨᐦᑕᒧᐎᓐ᙮ ᓈᔥᒡ ᑖᐺ ᓲᐦᒃ ᒋᑎᑌᔨᐦᑌᓈᐙᐤ ᒉᒌ ᐐᒋᐦᐁᑯᒡ ᑯᑕᑲᒡ ᐊᐌᓂᒌ ᑲᔦ ᒫᒃ ᓈᔥᒡ ᑖᐺ ᒋᓵᒋᐦᐄᓈᓐ᙮ ᒋᐹ ᐐ ᒥᔪ ᒦᐌᓈᐙᐤ ᒫᒃ᙮ 8 ᓇᒧᐃ ᒋᐐ ᐐᔓᐙᑎᑎᓈᐙᐤ ᐆ ᑳ ᐃᑗᔮᓐ᙮ ᒥᒄ ᒋᐐ ᓂᑑ ᒋᔅᒉᔨᒥᑎᓈᐙᐤ ᑖᐺ ᓯᔮᒋᐦᐄᐌᑴ ᐁ ᐙᐐᐦᑕᒫᑕᑯᒡ ᑖᓐ ᐁ ᐃᔑ ᐋᓯᐦᒉᔨᐦᑕᐦᒀᐤ ᐁ ᐸᒋᔥᑎᓂᒉᑣᐤ ᑯᑕᑲᒡ ᐊᐌᓂᒌ᙮ 9 ᒋᒋᔅᒉᔨᒫᐙᐤ ᑖᓐ ᑳ ᐃᔑ ᒥᔪᑑᑕᒫᒉᑦ ᒋᑎᐯᔨᐦᒋᑫᒥᓅ ᒌᓴᔅ ᙭᙮ ᒌ ᐌᔫᑎᓯᔫ ᔮᐸᒡ ᒫᒃ ᒌ ᐃᐦᑑᑖᓲ ᒉᒌ ᒋᔅᑎᒫᑎᓰᑦ ᒋᔮᓅ ᐅᐦᒋ᙮ ᒌ ᓇᑲᑕᒻ ᐎᔭ ᒥᓯᐌ ᐅᐌᔫᑎᓰᐎᓐ᙮ 10 ᐁᐅᒄ ᒫᒃ ᐁ ᐃᑌᔨᒥᑕᑯᒡ ᒋᐹ ᐃᐦᑎᓈᐙᐤ᙮ ᐯᐳᐦᒡ ᒋᔭᐙᐤ ᓃᔥᑕᒻ ᓈᔥᒡ ᒋᒌ ᐃᑌᔨᐦᑌᓈᐙᐤ ᒉᒌ ᐸᒋᔥᑎᓂᒉᔦᒄ, ᒋᒌ ᒋᐦᒋᐸᔨᐦᑖᓈᐙᐤ ᒫᒃ ᐁ ᐸᒋᔥᑎᓂᒉᔦᒄ᙮ 11 ᐁᒄ ᒫᒃ, ᒌᔑᐦᑖᒄ ᑖᓐ ᑳ ᐃᔑ ᒋᐦᒋᐸᔨᐦᑖᔦᒄ᙮ ᑖᓐ ᑳ ᐃᔥᐱᔥ ᓲᐦᒃ ᒌ ᐋᔅᒉᔨᐦᑕᒣᒄ ᐅᔅᑲᒡ ᑳ ᐐ ᒋᐦᒋᐸᔨᐦᑖᔦᒄ ᒉᒌ ᐸᒋᔥᑎᓂᒉᔦᒄ ᐯᔭᑯᓐ ᔮᐸᒡ ᒋᐹ ᐃᔑ ᐋᔅᒉᔨᐦᑌᓈᐙᐤ ᐊᓐᒌᔥ ᐁ ᐸᒋᔥᑎᓂᒉᔦᒄ᙮ 12 ᓅᑯᐦᒉ ᓈᔥᒡ ᐁ ᐋᓯᐦᒉᔨᐦᑕᒣᒄ ᒉᒌ ᐸᒋᔥᑎᓂᒉᔦᒄ ᐁᐅᒄ ᐅᔫ ᒉ ᓇᐦᐁᔨᐦᑕᒥᐦᐄᑯᑦ ᒋᔐᒪᓂᑑ᙮ ᑖᐹ ᐊᓂᔫ ᐁᑳ ᐁ ᐊᔮᐗᑦ ᑲᑕ ᐅᐦᒋ ᑲᓇᐙᐸᐦᑕᒻ᙮ ᐊᓂᔫ ᑖᓐ ᐁ ᐃᔑ ᐊᔮᐗᑦ ᐁᐅᒄ ᐊᓂᔫ ᒉ ᑲᓇᐙᐸᐦᑕᐦᒃ᙮ 13 ᓇᒧᐃ ᒋᑎᑕᔓᒥᑎᓈᐙᐤ ᒉᒌ ᐋᔨᒥᐦᐄᓱᔦᒄ ᐊᓂᑦ ᒉᒌ ᐅᐦᒋ ᐌᐦᒋᐦᐆᑣᐤ ᑯᑕᑲᒡ᙮ 14 ᒋᐌᔫᒡ ᐊᔮᓈᐙᐤ ᒉᒀᓐ ᒉᒌ ᐐᒋᐦᐁᑯᒡ ᐊᓂᒌ ᐊᐌᓂᒌ ᑳ ᓅᐦᑌᐸᔨᑣᐤ᙮ ᐁᒄ ᒫᒃ ᒉᒃ ᐃᔑᓈᑯᐦᒉ ᒋᔭᐙᐤ ᐁ ᓅᐦᑌᐸᔦᒄ ᑯᑕᑲᒡ ᒫᒃ ᐁ ᐌᔫᒡ ᐊᔮᑣᐤ ᐁᒄ ᒫᒃ ᐎᔭᐙᐤ ᑴᔅᒌᐸᓐ ᒉᒌ ᐐᒋᐦᐄᑖᑯᒡ᙮ ᐁᒄ ᒫᒃ ᒉ ᑖᐱᑑᐸᔨᐦᒡ ᒥᓯᐌ ᐊᐌᓐ ᑖᓐ ᐁ ᐃᔑ ᐊᔮᑦ᙮ 15 ᒬᐦᒡ ᐁ ᐃᑕᔥᑌᒡ ᒋᔐᒪᓂᑑ ᐅᑕᔨᒧᐎᓂᐦᒡ, ᐊᓐ ᐊᐌᓐ ᒥᔅᑕᐦᐄ ᑳ ᒫᐅᒋᐦᑖᑦ ᓇᒧᐃ ᐌᓵ ᒥᔅᑕᐦᐄ ᐅᐦᒋ ᐊᔮᐤ, ᐁᒄ ᐊᓐ ᒥᒄ ᐊᐱᔒᔥ ᑳ ᒫᐅᒋᐦᑖᑦ ᓇᒧᐃ ᐅᐦᒋ ᓅᐦᑌᐸᔫ᙮ ᑕᐃᑕᔅ ᒀᕆᓐᑎᐦᒡ ᑳ ᐃᑎᔕᐦᐙᑲᓅᑦ 16 ᓂᓇᓈᔅᑯᒫᐤ ᒋᔐᒪᓂᑑ ᐁ ᒌ ᒥᔮᑦ ᑕᐃᑕᔅ ᒬᐦᒡ ᓂᔭ ᐁ ᐃᔑ ᓵᒋᐦᐄᑕᑯᒡ ᒉᒌ ᐃᔑ ᓵᒋᐦᐄᑖᒄ᙮ 17 ᓇᒧᐃ ᒥᒄ ᐊᓂᔫ ᐁ ᒌ ᐐ ᐃᑎᔕᐦᐅᒋᐦᑦ ᐊᓂᑌ ᐁ ᐃᐦᑖᐌᒄ ᐌᐦᒋ ᐃᑐᐦᑌᑦ, ᓈᔥᒡ ᐌᓯᓐ ᒋᒌ ᐐ ᓂᑐᐙᐸᒥᑯᐙᐤ᙮ 18 ᐃᐦᑖᐤ ᐅᑕᐦ ᑯᑕᒃ ᒌᒋᔖᓅ ᓈᔥᒡ ᐁ ᒥᔪ ᒋᔅᒉᔨᒥᑯᑦ ᒥᓯᐌ ᑖᓂᑌ ᐁ ᐊᑎ ᐃᐦᑖᔨᑣᐤᐦ ᐅᒫᒨᐊᔨᒥᐦᐋᐤᐦ ᑖᓐ ᐁ ᐃᔑ ᒥᔻᐸᑎᓯᑦ ᐁ ᐙᐐᐦᑕᐦᒃ ᒥᔻᒋᒧᐎᓂᔫ᙮ ᐁᐅᑯᓐ ᐅᔫ ᒉ ᐯᒋ ᐐᒉᐅᑯᑦ ᑕᐃᑕᔅ᙮ 19 ᐁᔫ ᒫᒃ ᐅᒫᒨᐊᔨᒥᐦᐋᐤᐦ ᒌ ᐎᔦᔨᒥᑰ ᒉᒌ ᐐᒉᐅᑯᔮᐦᒡ ᐁ ᐃᑐᐦᑕᑕᐗᒋᐦᑣᐤ ᐊᓂᒌ ᑳ ᒋᔅᑎᒫᑎᓰᑣᐤ ᑳ ᑖᐺᐦᑕᐦᒀᐤ ᐊᓂᔫ ᒋᐸᒋᔥᑎᓂᒉᐎᓇᐙᔫ᙮ ᐅᑎᐯᔨᐦᒋᑫᐤ ᒫᒃ ᓂᐐ ᒋᔅᑌᔨᐦᑕᒥᐦᐋᓈᓐ ᐆ ᑳ ᐃᐦᑑᑕᒫᐦᒡ᙮ ᐁᑯᑦ ᒉ ᓅᑯᐦᒡ ᐁ ᐐ ᐐᒋᐦᐄᐌᔮᐦᒡ᙮ 20 ᓇᒧᐃ ᑲᔦ ᓂᑕᐌᔨᐦᑌᓈᓐ ᓂᑕᒧᒄ ᒉᒌ ᐃᔑ ᐊᑖᒣᔨᒥᑯᔮᐦᒡ ᐁ ᐱᒥᐸᔨᐦᑖᔮᐦᒡ ᐆ ᐸᒋᔥᑎᓂᒉᐎᓐ᙮ 21 ᒋᔐᒪᓂᑑ ᓂᒋᔅᒉᔨᒥᒄ ᒨᔥ ᑯᐃᔅᒄ ᐁ ᐃᐦᑑᒡ᙮ ᓂᐳᑯᓭᔨᐦᑌᓐ ᒫᒃ ᒨᔥ ᑯᐃᔅᒄ ᒉᒌ ᐃᐦᑎᔮᓐ ᓈᐯᐤ ᑲᔦ ᐁ ᑲᓇᐙᐸᒥᑦ᙮ 22 ᐁᐅᒄ ᒫᒃ ᐌᐦᒋ ᐃᑎᔕᐦᐅᒋᐦᑦ ᐆ ᒌᒋᔖᓅ ᒉᒌ ᐐᒉᐙᑦ ᐊᓂᔫ ᑕᐃᑕᔅ᙮ ᒥᐦᒉᑣᐤ ᓂᒌ ᐙᐸᐦᑏᑯᓈᓐ ᑖᐺ ᑲᔦ ᐐ ᐁ ᐐ ᐐᒋᐦᐄᐌᑦ᙮ ᐊᓂᔫ ᒫᒃ ᑖᓐ ᐁ ᐃᔑ ᑖᐺᐅᒉᔨᒥᑖᒄ ᐁᒄ ᐁᑎᑑ ᐙ ᐐᒋᐦᐄᑖᒄ᙮ 23 ᐆ ᒫᒃ ᑕᐃᑕᔅ ᐁᐅᒄ ᐆ ᐙᒑᐸᑎᓰᒥᑦ ᐁ ᐐᒋᐦᐄᑕᑯᒡ᙮ ᐁᒄ ᐊᓂᒌ ᑯᑕᑲᒡ ᒌᒋᔖᓅᒡ ᐅᒫᒨᐊᔨᒥᐦᐋᐤᐦ ᒌ ᐃᑎᔕᐦᐅᑰᒡ᙮ ᒋᔅᑌᔨᐦᑖᑯᐦᐁᐅᒡ ᒫᒃ ᙭ ᒉᒀᔫ ᐁ ᐃᐦᑑᑕᐦᒀᐤ᙮ 24 ᓲᐦᒃ ᒫᒃ ᐙᐸᐦᑎᔮᐦᑯᒡ ᐅᒌ ᓈᐯᐅᒡ ᐁ ᓵᒋᐦᐁᑯᒡ ᒉᒌ ᐙᐸᐦᑕᐦᒀᐤ ᐅᒫᒨᐊᔨᒥᐦᐋᐅᒡ ᒋᓵᒋᐦᐄᐌᐎᓇᐙᔫ ᑲᔦ ᒉᒌ ᒋᔅᒉᔨᐦᑕᐦᒀᐤ ᒉᒀᓐ ᐌᐦᒋ ᓈᔥᒡ ᒫᒥᐦᒋᐦᐃᔮᐦᒡ᙮ |
© Wycliffe Bible Translators, Inc. and Canadian Bible Society, 2001.
Wycliffe Bible Translators, Inc.