2 Corinthians 2 - ᒋᔐᒪᓂᑑ ᐅᑕᔨᒳᐃᓐ ᑳ ᐅᔅᑳᒡ ᑌᔅᑎᒥᓐᑦ1 ᔖᔥ ᓂᒌ ᐃᑌᔨᐦᑌᓐ ᐁᑳ ᒉ ᐅᐦᒋ ᐐ ᒥᓯᒣᔨᐦᑕᒥᐦᐄᑕᑯᒡ ᒦᓐ ᓂᑐᐙᐸᒥᑕᑯᒉ, 2 ᐌᔥ ᒋᒥᔦᔨᐦᑕᒥᐦᐄᓈᐙᐤ᙮ ᒥᓯᒣᔨᐦᑕᒥᐦᐄᑕᑯᒉ ᒫᒃ, ᐊᐌᓐ ᒦᓐ ᐁ ᐃᐦᑖᑦ ᒉ ᒥᔦᔨᐦᑕᒥᐦᐄᑦ᙮ ᓇᒧᐃ ᐊᐌᓐ᙮ 3 ᐁᑯᓐ ᐌᐦᒌ ᒪᓯᓇᐦᐊᒫᑕᑯᒡ ᐊᓐ ᑳ ᒪᓯᓇᐦᐊᒫᑕᑯᒡ᙮ ᓇᒧᐃ ᓅᐦᒋ ᓂᑕᐌᔨᐦᑌᓐ ᒉᒌ ᒥᓯᒣᔨᐦᑕᒥᐦᐃᔦᒄ ᓂᑐᐙᐸᒥᑕᑯᒉ, ᐌᔥ ᒋᔭᐙᐤ ᒋᐹ ᒥᔦᔨᐦᑕᒥᐦᐄᓈᐙᐤ᙮ ᒥᑐᓐ ᓂᒌ ᒋᔅᒉᔨᐦᑌᓐ ᒥᔦᔨᐦᑕᒫᓀ ᑲᔦ ᒋᔭᐙᐤ ᒉ ᒥᔦᔨᐦᑕᒣᒄ᙮ 4 ᐅᑕᐦ ᑳ ᒪᓯᓇᐦᐊᒫᑕᑯᒡ ᒣᒀᒡ ᓈᔥᒡ ᑖᐺ ᓂᒌ ᒧᑯᔥᑳᑌᔨᐦᑌᓐ᙮ ᓂᒌ ᐲᑯᑌᐦᐁᓐ᙮ ᒥᔅᑕᐦᐄ ᑲᔦ ᓂᒌ ᐅᐦᒋᑯᐙᐱᓐ᙮ ᑖᐹ ᑰᐦᒋ ᐐ ᒥᓯᒣᔨᐦᑕᒥᐦᐄᑎᓈᐙᐤ ᐊᓐ ᑳ ᒪᓯᓇᐦᐊᒫᑕᑯᒡ ᒥᒄ ᒋᒌ ᐐ ᒋᔅᒉᔨᐦᑕᒥᐦᐄᑎᓈᐙᐤ ᑖᓐ ᐁ ᐃᔥᐱᔥ ᒥᔅᑕ ᓵᒋᐦᐄᑕᑯᒡ᙮ ᒉᒌ ᐌᐯᔨᐦᑕᒧᐙᑲᓅᑦ ᐊᐌᓐ ᑳ ᐗᓂᑑᑕᐦᒃ 5 ᐁ ᐃᐦᑖᑴ ᐊᐌᓐ ᐁ ᒌ ᒥᓯᒣᔨᐦᑕᒥᐦᐋᑦ ᐊᐌᔫ, ᓇᒧᐃ ᓂᔭ ᓅᐦᒋ ᒥᓯᒣᔨᐦᑕᒥᐦᐄᒄ᙮ ᒋᔭᐙᐤ ᒫᒃ ᒥᓯᐌ ᐁ ᑕᔑᔦᒄ ᒌ ᐃᐦᑕᑯᓂᔫ ᑖᓐ ᑳ ᐃᔑ ᒥᓯᒣᔨᐦᑕᒥᐦᐄᑖᒄ᙮ ᓇᒧᐃ ᐁᑎᑑ ᓂᐐ ᐋᔨᒨᑌᓐ ᐆ᙮ 6 ᔖᔥ ᒋᒌ ᐎᔦᔨᐦᑌᓈᐙᐤ ᑖᓐ ᒉ ᐃᔑ ᐗᐌᔑᐦᐋᑲᓅᑦ᙮ ᐃᔅᐸᔫ ᒫᒃ ᐊᓂᔫ ᑖᓐ ᑳ ᐃᔑ ᐗᐌᔑᐦᐋᑲᓅᑦ᙮ 7 ᐅᑎᐦᒋᐸᔫ ᒫᒃ ᒉᒌ ᐌᐯᔨᐦᑕᒧᐌᒄ ᐁᒄ᙮ ᑲᔦ ᒋᐹ ᑳᒌᒋᐦᐋᐙᐤ ᐁᑳ ᒉᒌ ᐃᑌᔨᐦᑕᐦᒃ ᒋᐦᒋᐌ ᒉᒌ ᐴᓃᑦ ᐌᓵ ᐁ ᒥᔅᑕ ᒪᒉᔨᐦᑕᐦᒃ᙮ 8 ᐁᑯᓐ ᐌᐦᒋ ᓰᐦᒋᒥᑕᑯᒡ ᒉᒌ ᒋᔅᒉᔨᐦᑕᒥᐦᐁᒄ ᑖᐺ ᐁᔥᒄ ᐁ ᓵᒋᐦᐁᒄ᙮ 9 ᒋᒌ ᐐ ᓂᑑ ᒋᔅᒉᔨᒥᑎᓈᐙᐤ ᐊᓐ ᑳ ᒪᓯᓇᐦᐊᒫᑕᑯᒡ᙮ ᒉ ᓇᓂᐦᐄᐦᑕᒧᐙᑴᓂᒡ ᐋᐦᒡ ᒥᓯᐌ ᑖᓐ ᐁ ᐃᑕᔓᒥᒀᐤ ᓂᒌ ᐃᑌᔨᐦᑌᓐ᙮ 10 ᐌᔥ ᑕᐦᑣᐤ ᐁ ᐌᐯᔨᐦᑕᒧᐌᒄ ᐊᐌᓐ ᑖᓐ ᑳ ᐃᐦᑎᑦ ᑲᔦ ᓂᔭ ᓂᐌᐯᔨᐦᑕᒧᐙᐤ᙮ ᓀᑐᐌᔨᐦᑖᑯᓂᑴ ᒉᒌ ᐌᐯᔨᐦᑕᒨᒃ ᐊᐌᓐ ᓂᐌᐯᔨᐦᑕᒧᐙᐤ ᒋᔭᐙᐤ ᒉᒌ ᐐᒋᐦᐄᑯᔦᒄ ᐁ ᒋᔅᒉᔨᐦᑕᒫᓐ ᙭ ᐁ ᐃᐦᑖᑦ ᐅᑕᐦ ᐁ ᐃᐦᑖᔮᓐ᙮ 11 ᐆ ᒫᒃ ᒋᑎᐦᑎᓈᓅ ᐁᑳ ᒉᒌ ᐱᓰᐐᑕᐦᒄ ᒪᒋᒪᓂᑑ᙮ ᐌᔥ ᒋᒋᔅᒉᔨᒫᓅ ᑖᓐ ᐙ ᐃᐦᑎᑦ᙮ ᑦᕎᐊᓯᐦᒡ ᐁᒄ ᒫᒃ ᒫᓯᑐᓂᔭᐦᒡ ᑳ ᐃᑐᐦᑌᑦ ᑆᓪ 12 ᑦᕎᐊᔅ ᑳ ᐃᔑᓂᐦᑳᑌᒡ ᐃᐦᑖᐎᓐ ᐁᑯᑌ ᑳ ᓂᑑ ᐙᐐᐦᑕᒧᒡ ᙭ ᐅᒥᔻᒋᒧᐎᓐ᙮ ᑳ ᐹᐸᔮᓐ ᒫᒃ ᐊᓂᑌ ᒥᑐᓐ ᒌ ᓂᓯᑑᓈᑯᓐ ᐅᑎᐯᔨᐦᒋᑫᐤ ᔖᔥ ᐁ ᒌ ᐊᔦᔅᑰᔥᑖᑯᐸᓀ ᐊᓂᑦ ᒉᒌ ᑲᒉᔅᑴᐅᒡ᙮ 13 ᒥᒄ ᒫᒃ ᔮᐸᒡ ᒌ ᐃᐦᑕᑯᓐ ᑖᓐ ᑳ ᐃᔑ ᒧᑯᔥᑳᑌᔨᐦᑕᒫᓐ ᐌᔥ ᑖᐹ ᓅᐦᒋ ᐙᐸᒫᐤ ᓃᒋᔖᓐ ᑕᐃᑕᔅ ᐊᓂᑌ ᒉᒌ ᐃᐦᑖᑦ᙮ ᐁᒄ ᒫᒃ ᑳ ᓇᑲᑕᒀᐤ ᐊᓂᒌ ᐄᓅᒡ ᐊᓂᑦ ᑳ ᐃᐦᑖᑣᐤ᙮ ᒫᓯᑐᓂᔭ ᑳ ᐃᔑᓂᐦᑳᑌᒡ ᐊᔅᒌ ᐁᑯᑌ ᒦᓐ ᑳ ᐃᑐᐦᑌᔮᓐ᙮ ᙭ ᒋᑎᐦᑑᑖᑯᓅ ᒉᒌ ᑳᓂᔫᐦᒄ 14 ᒥᒄ ᒫᒃ ᑖᐺ ᓂᓇᓈᔅᑯᒫᐤ ᒋᔐᒪᓂᑑ ᐌᔥ ᒨᔥ ᐐ ᓂᒋᔅᒋᓄᐦᑕᐦᐄᒄ ᑖᓂᑌ ᐁ ᐃᑐᐦᑌᐅᒡ ᐁ ᐐᒋᐦᐄᑦ ᐁ ᐋᔨᒨᒪᒡ ᙭ ᒉᒌ ᐅᐦᒋ ᒋᔅᒉᔨᒫᑲᓄᔨᒡ, ᐌᔥ ᙭ ᒨᔥ ᐸᔅᒉᔮᒉᐎᓂᐦᒡ ᒋᑦ ᐃᔑ ᐱᒧᐦᑕᐦᐄᑯᓅ᙮ ᒋᔐᒪᓂᑑ ᒋᐐᒋᐦᐄᑯᓅ ᒉᒌ ᑎᐹᒋᒥᐦᒄ ᙭ ᒥᓯᐌ ᐊᐌᓐ ᒉᒌ ᒋᔅᒉᔨᒫᑦ᙮ ᐁ ᒋᔅᒉᔨᒫᑲᓅᑦ ᙭ ᒬᐦᒡ ᑳ ᐐᐦᒋᒫᑯᓯᒡ ᒉᒀᓐ ᐃᑌᔨᐦᑖᑯᓐ᙮ 15 ᐆ ᐁ ᐃᐦᑏᐦᒄ ᒬᐦᒡ ᙭ ᐁ ᐸᒋᔥᑎᓇᒧᐙᑦ ᒋᔐᒪᓂᑑᐦ ᑳ ᐐᐦᒋᒫᑯᓯᔨᒡ ᒉᒀᔫ ᐁᑯᓐ ᐁ ᐃᔑᓈᑯᐦᒡ᙮ ᐊᓐ ᒫᒃ ᐁ ᐐᐦᒋᒫᔥᑌᒡ ᐊᓂᑌ ᐊᓂᒌ ᒉ ᐱᒫᒋᐦᐅᑣᐤ ᐊᐌᓂᒌ ᑲᔦ ᐊᓂᒌ ᐊᐌᓂᒌ ᒉ ᐗᓂᔑᐦᒀᐤ ᐁᑯᑌ ᐁ ᐃᑖᐸᐦᑌᒡ᙮ 16 ᐊᓂᒌ ᒫᒃ ᒉ ᐗᓂᔑᐦᒀᐤ ᐊᐌᓂᒌ ᒬᐦᒡ ᒉᒀᓐ ᑳ ᓂᐸᐦᐄᐌᒡ ᐁᑯᓐ ᐁ ᐃᔑᒫᐦᑕᐦᒀᐤ ᐅᔫ ᑳ ᐐᐦᒋᒫᑯᓯᔨᒡ, ᐁᒄ ᐊᓂᒌ ᒉ ᐱᒫᒋᐦᐅᑣᐤ ᐊᐌᓂᒌ ᒬᐦᒡ ᐊᓐ ᒉᒀᓐ ᒉ ᐱᒫᒋᐦᐄᐌᒡ ᐁᑯᓐ ᐁ ᐃᔑᒫᐦᑕᐦᒀᐤ ᐅᔫ᙮ ᐊᐌᓐ ᒫᒃ ᑎᔦᐱᒉᔨᐦᑖᑯᓯᑦ ᐅᔫ ᒉᒌ ᐃᑖᐸᑎᓯᑦ ᒥᔻᒋᒧᐎᓂᔫ ᐁ ᐙᐐᐦᑕᐦᒃ᙮ 17 ᐸᔅᒡ ᐊᐌᓂᒌ ᑳ ᐸᐹ ᑲᒉᔅᑴᑣᐤ ᒧᔮᒻ ᐁ ᐸᐹ ᐊᑖᐌᐙᑣᐤ ᒋᔐᒪᓂᑑᐦ ᐅᑕᔨᒧᐎᓂᔫ ᐁᑯᓐ ᐁ ᐃᔑᓈᑯᓯᑣᐤ, ᐁ ᐐ ᐅᐦᑎᓰᑣᐤ ᔔᓕᔮᔫ ᐁ ᐃᐦᑎᑣᐤ᙮ ᓇᒧᐃ ᐐ ᓂᔮᓐ ᐆ ᓂᑎᔑᓈᑯᓯᓈᓐ᙮ ᓂᑯᐃᔅᑯᑌᐦᐁᓈᓐ ᑲᔦ ᒋᐦᒋᐌ ᓂᑎᑌᔨᐦᑌᓈᓐ ᑖᓐ ᐁ ᐃᑕᔓᒥᔨᒥᐦᑦ ᙭ ᒉᒌ ᐃᔑ ᐊᑐᔥᑯᐗᒋᐦᑦ ᐌᔥ ᓂᒋᔅᒉᔨᒥᑯᓈᓐ ᑖᓐ ᐁ ᐃᐦᑑᒋᐦᑦ᙮ |
© Wycliffe Bible Translators, Inc. and Canadian Bible Society, 2001.
Wycliffe Bible Translators, Inc.