2 Corinthians 13 - ᒋᔐᒪᓂᑑ ᐅᑕᔨᒳᐃᓐ ᑳ ᐅᔅᑳᒡ ᑌᔅᑎᒥᓐᑦᑖᓐ ᑳ ᐃᔑ ᔮᒀᒧᐌᑦ ᑆᓪ ᑲᔦ ᑳ ᐃᔑ ᐙᒋᔦᒫᑦ ᐊᓂᔫᐦ ᑳ ᒪᓯᓇᐦᐊᒧᐙᑦ 1 ᐁᐅᑰ ᓂᔥᑣᐤ ᒉ ᒌᐅᑕᒥᑕᑯᒡ᙮ ᒉ ᐐ ᒋᔅᒋᓯᔦᒄ ᒥᒋᐦᐱᓐ ᐁ ᐃᐦᑖᑴ ᐊᐌᓐ ᐁ ᐃᐦᑕᑯᓂᔨᒡ ᑖᓐ ᐙ ᐃᔑ ᒪᒥᔑᒫᑦ ᐊᐌᔫᐦ ᒉᒀᔫ ᔮᐃᑌᐃ ᓃᔓ ᒫᒃ ᓂᔥᑐ ᐊᐌᓂᒌ ᐁ ᒌ ᐃᐦᑖᑣᐤ ᐊᓂᑦ ᐊᓂᔫ ᐌᐦᒋᐸᔨᔨᒡ ᐁ ᒪᒥᔑᒧᐙᓄᔨᒡ ᒋᑲ ᐃᐦᑖᐅᒡ ᒉᒌ ᑎᐹᒋᒧᑣᐤ᙮ 2 ᒫᐦᒋᔥᑕᐃ ᑳ ᑕᑯᔑᓅᒡ ᔖᔥ ᓂᒌ ᔮᒀᒥᒫᐅᒡ ᐊᓂᒌ ᑳ ᒪᒋᑑᑕᐦᒀᐤ᙮ ᒦᓐ ᒫᒃ ᐊᓄᐦᒌᔥ ᓂᑕᔮᒀᒥᒫᐅᒡ᙮ ᑲᔦ ᐊᓂᒌ ᑯᑕᑲᒡ ᓂᑕᔮᒀᒥᒫᐅᒡ᙮ ᐆ ᐊᓄᐦᒌᔥ ᒉ ᑕᑯᔑᓂᔮᓐ ᒋᐦᒋᐌ ᓂᑎᑗᓐ ᓇᒧᐃ ᓂᑲ ᐅᐦᒋ ᒪᓈᒋᒫᐅᒡ ᐅᒌ ᑳ ᒪᒋᑑᑕᐦᒀᐤ᙮ 3 ᒋᑎᑗᓈᐙᐤ ᐁ ᐐ ᐙᐸᐦᑕᒣᒄ ᑖᐺ ᙭ ᐁ ᐊᔨᒥᔥᑕᒨᒃ᙮ ᓇᒧᐃ ᐁᑳ ᓵᐱᓯᔫ ᙭ ᐃᔅᑯᑕᒃ ᐯᒦᐦᑲᐦᒃ ᒋᐱᒫᑎᓰᐎᓇᐙᐤᐦ᙮ ᒋᐙᐸᐦᑕᒧᐙᓈᐙᐤ ᐅᓲᐦᑳᑎᓰᐎᓐ ᒣᒀᒡ ᒉᒀᔫ ᐁ ᐃᐦᑑᑕᐦᒃ ᐊᓂᑦ ᐁ ᐃᐦᑖᐌᒄ᙮ 4 ᐋᑦ ᐁᑳ ᐅᐦᒋ ᓵᐱᓰᑦ ᑳ ᒌᔅᑖᔅᑯᐦᐙᑲᓅᑦ ᐋᔑᑌᔮᐦᑎᑯᐦᒡ ᒋᔐᒪᓂᑑᐦ ᐅᓲᐦᑳᑎᓰᐐᐦᒡ ᐅᐦᒋ ᐱᒫᑎᓯᔫ ᐊᓄᐦᒌᔥ᙮ ᐁᑯᓐ ᒫᒃ ᐁ ᐃᔑᓈᑯᓯᔮᐦᒡ ᑲᔦ ᓂᔮᓐ ᐁ ᐐᒉᐗᒋᐦᑦ ᙭, ᓇᒧᐃ ᓂᓵᐱᓰᓈᓐ᙮ ᒥᒄ ᒫᒃ ᙭ ᓂᑲ ᐱᒫᑎᓰᔅᑐᐙᓈᓐ ᒋᔐᒪᓂᑑ ᐅᓲᐦᑳᑎᓰᐎᓂᐦᒡ ᐅᐦᒋ ᒋᔭᐙᐤ ᒉᒌ ᐊᑐᔥᑳᑖᒡ᙮ 5 ᔮᒀᐤ ᓂᑑ ᒋᔅᒉᔨᒥᓱᒄ᙮ ᓂᑑ ᒋᔅᒉᔨᒥᓱᒄ ᐁᔥᒄ ᑖᐺ ᑎᔮᐺᐦᑕᒧᐌᑴ᙮ ᒋᓂᓯᑐᐦᑌᓈᐙᐤ ᐋ ᒌᓴᔅ ᙭ ᐁ ᐲᐦᒋᔥᑳᑖᒄ᙮ ᐁᑳ ᑎᔮᐺᐦᑕᒧᐌᑴ ᓇᒧᐃ ᑮᐹ ᑖᐺ ᒋᐲᐦᒋᔥᑳᑯᐙᐤ᙮ 6 ᓂᒉᔥᑎᓈᐦᐅᓐ ᐃᔅᑯᑕᒃ ᐯᐦᑕᒣᑴ ᐁ ᓂᑑ ᒋᔅᒉᔨᒥᓱᔮᐦᒡ ᒉ ᒋᔅᒉᔨᐦᑕᒣᒄ ᑖᐺ ᐁ ᑖᐺᐦᑕᒫᐦᒡ᙮ 7 ᓂᓂᑐᑕᒧᐙᓈᓐ ᒋᔐᒪᓂᑑ ᑯᐃᔅᒄ ᒉᒌ ᐃᔑ ᐱᒫᑎᓯᔦᒄ᙮ ᓇᒪᔦᐤ ᐐ ᐯᑎᓈᔅᒡ ᒥᒄ ᒉᒌ ᓅᑯᐦᑖᔮᐦᒡ ᑖᐺ ᑯᐃᔅᒄ ᐁ ᐃᐦᑎᔮᐦᒡ᙮ ᒋᓂᑐᐌᔨᒥᑎᓈᓐ ᑯᐃᔅᒄ ᒉᒌ ᐃᔑ ᐱᒫᑎᓯᔦᒄ ᐋᑦ ᐁ ᐃᑌᔨᒥᑯᐙᐦᒉ ᐁ ᒌ ᐗᓂᐸᔮᐦᒡ᙮ 8 ᓇᒧᐃ ᒋᑲ ᒌ ᐃᐦᑑᑌᓈᓅ ᒉᒌ ᓂᔥᑰᔥᑕᒧᐦᒄ ᑖᐺᐎᓐ, ᒥᒄ ᒋᑲ ᓇᓂᐦᐄᐦᑌᓈᓅ᙮ 9 ᓂᒥᔦᔨᐦᑌᓈᓐ ᐊᓂᑦ ᒣᒀᒡ ᐁᑳ ᓯᔮᐱᓯᔮᐦᒡ ᓂᔮᓐ ᐁᑯᑦ ᒋᔭᐙᐤ ᓯᔫᐦᒋᑳᐳᔦᒄ ᐅᑎᐯᔨᐦᒋᑫᐤ ᐁ ᐃᐦᑖᑦ᙮ ᓂᑐᑕᒧᐙᓈᓐ ᒋᔐᒪᓂᑑ ᒉᒌ ᓂᐦᑖᐅᒋᔦᒄ ᐎᔭ ᐃᔑ ᐁ ᐃᐦᑖᑦ᙮ 10 ᐆ ᒋᑎᑕᓯᓇᐦᐊᒫᑎᓈᐙᐤ ᐁᔥᒄ ᒣᒀᒡ ᐅᑌ ᐁ ᐃᐦᑖᔮᓐ ᐁᒄ ᒫᒃ ᐃᔅᑯᑕᒃ ᒦᓐ ᐙᐸᒥᑕᑯᒉ ᓇᒧᐃ ᒋᑲ ᐅᐦᒋ ᐃᐦᑕᑯᓐ ᒉᒀᓐ ᒉ ᐅᐦᒋ ᒥᔅᑕ ᐋᓄᐌᔨᒥᑕᑯᒡ ᒉᒌ ᓅᑯᐦᑖᔮᓐ ᑖᓐ ᑳ ᐃᔑ ᒦᑯᔮᓐ ᑎᐯᔨᐦᒋᒉᐎᓐ᙮ ᐅᑎᐯᔨᐦᒋᑫᐤ ᓂᒌ ᒦᒄ ᐅᔫ ᑎᐯᔨᐦᒋᒉᐎᓂᔫ ᒉᒌ ᐐᒋᐦᐄᑕᑯᒡ ᓇᒧᐃ ᐐ ᒉᒌ ᓃᐦᑕᐦᐆᑕᑯᒡ᙮ ᒫᐦᒋᔥᑕᐃ ᑳ ᐃᔑ ᒪᓯᓇᐦᐄᒉᑦ ᑆᓪ 11 ᐁᒄ ᒫᒃ ᓃᒋᔖᓂᑎᒄ, ᐙᒋᔦ ᒋᑎᑎᓈᐙᐤ᙮ ᓲᐦᒃ ᑯᒋᐦᑖᒄ ᓂᐦᐋᐤ ᒉᒌ ᐃᑌᔨᐦᑖᑯᓯᔦᒄ ᐁ ᐃᔑ ᓂᑐᐌᔨᒥᑖᒄ ᒋᔐᒪᓂᑑ ᒉᒌ ᐃᑌᔨᐦᑖᑯᓱᐌᒄ᙮ ᔮᒀᐤ ᓂᑐᐦᑕᒧᒄ ᑖᓐ ᐁ ᐃᔑ ᓰᐦᒋᒥᑕᑯᒡ᙮ ᓲᐦᒃ ᐯᔭᑯᓂᐦᒡ ᐐ ᐃᔑ ᐱᒫᑎᓰᒄ᙮ ᓲᐦᒃ ᒥᔪ ᐐᒉᐅᑐᒄ᙮ ᒋᔐᒪᓂᑑ ᐊᓐ ᑳ ᓵᒋᐦᐄᐌᑦ ᑲᔦ ᑳ ᐊᔮᑦ ᒋᔮᒣᔨᐦᑕᒧᐎᓂᔫ ᒋᑲ ᐐᒉᐅᑯᐙᐤ᙮ 12 ᒋᔭᐙᐤ ᑳ ᐐᒋᔖᓂᐦᑐᔦᒄ ᐅᒉᒥᑐᒄ ᐁ ᐙᒋᔦᒥᑐᔦᒄ᙮ 13 ᒥᓯᐌ ᐅᒌ ᑳ ᑖᐺᐦᑕᐦᒀᐤ ᐅᑌ ᑳ ᐃᐦᑖᑣᐤ ᒋᐙᒋᔦᒥᑯᐙᐅᒡ᙮ 14 ᐅᑎᐯᔨᐦᒋᑫᐤ ᒌᓴᔅ ᙭ ᓈᔥᒡ ᑳ ᒋᔐᐙᑎᓰᑦ, ᒋᔐᒪᓂᑑ ᑳ ᓵᒋᐦᐄᑖᒄ ᐁᒄ ᒫᒃ ᑳ ᐸᔦᐦᒋᓰᑦ ᐊᐦᒑᐦᒄ ᑳ ᐸᐹᐐᒉᐅᑖᒄ ᒥᓯᐌ ᒋᑲ ᐐᒉᐅᑯᐙᐅᒡ᙮ |
© Wycliffe Bible Translators, Inc. and Canadian Bible Society, 2001.
Wycliffe Bible Translators, Inc.