1 Peter 5 - ᒋᔐᒪᓂᑑ ᐅᑕᔨᒳᐃᓐ ᑳ ᐅᔅᑳᒡ ᑌᔅᑎᒥᓐᑦᑳ ᓃᑳᓂᔥᑲᐦᒀᐤ ᐊᔨᒥᐦᐁᐅᑲᒥᒄ ᐁᒄ ᒫᒃ ᐅᔅᒋᓃᒎᒡ 1 ᒫᐅᔫ ᐙ ᐃᑕᒀᐤ ᐊᓂᒌ ᑳ ᐐᒋᐦᐄᐌᑣᐤ ᐁ ᐱᒥᐸᔨᐦᑖᑲᓄᔨᒡ ᐊᔨᒥᐦᐁᐅᑲᒥᑯᔫ ᐊᓂᑦ ᐁ ᐃᐦᑖᔦᒄ ᑳ ᐃᐦᑖᑣᐤ ᐌᔥ ᑲᔦ ᓂᔭ ᓂᐐᒋᐦᐄᐌᓐ ᐁ ᐱᒥᐸᔨᐦᑖᑲᓅᐦᒡ ᐊᔨᒥᐦᐁᐅᑲᒥᒄ᙮ ᓂᑲ ᒌ ᑎᐹᑐᑕᒧᐙᓐ ᑲᔦ ᑖᓐ ᑳ ᐃᔑ ᓇᓀᐦᑳᑌᔨᒧᐦᐋᑲᓅᑦ ᙭ ᑲᔦ ᒫᒃ ᓂᑲ ᒋᔅᑌᔨᐦᑖᑯᐦᐄᑰᓐ ᑲᔦ ᓂᔭ ᐃᔅᑯᑕᒃ ᓅᑯᐦᑖᑲᓄᐐᒉ ᐊᓂᑦ ᙭ ᒉ ᒋᔅᑌᔨᐦᑖᑯᐦᐋᑲᓅᑦ᙮ ᒫᐅᔫ ᐙ ᐃᑕᒀᐤ, 2 ᒥᔪ ᑲᓄᐌᔨᒨᒫᐦᒄ ᐊᓂᔫ ᐄᓅ ᒋᔐᒪᓂᑑ ᑳ ᒦᑖᒄ ᒉᒌ ᓃᑳᓂᔥᑰᒣᒄ ᒧᔮᒻ ᑳ ᒌ ᐃᔑ ᒥᔪ ᑲᓄᐌᔨᒫᑦ ᐅᒫᓂᔥᒑᓂᔑᒻ ᐊᓐ ᑳ ᑲᓄᒫᓂᔥᒑᓂᔓᐌᑦ᙮ ᒥᔪ ᑲᓄᐌᔨᒨᒫᐦᒄ ᒧᔮᒻ ᑖᓐ ᐁ ᐃᔑ ᓂᑐᐌᔨᒥᑖᒄ ᒋᔐᒪᓂᑑ ᒉᒌ ᐃᔑ ᑲᓄᐌᔨᒣᒄ᙮ ᐁᑳᐐ ᒧᔮᒻ ᐊᐃᓵᒡ ᑳ ᐃᐦᑑᑕᐦᒃ ᐊᐌᓐ ᒉᒀᔫ ᒋᑲ ᐅᐦᒋ ᐃᔑᓈᑯᓯᓈᐙᐤ ᐆ ᑖᓐ ᐁ ᐃᑖᐸᑎᓯᔦᒄ᙮ ᐃᐦᑑᑕᒧᒄ ᒋᑖᐸᑎᓱᐎᓇᐙᐤ ᓇᒪᔦᐤ ᒥᒄ ᐁ ᑲᓇᐙᐸᐦᑕᒣᒄ ᑖᓐ ᒉ ᐃᔑ ᐅᐦᑎᓯᔦᒄ ᒫᒃ ᒥᑐᓐ ᑌᑲᔥ ᐁ ᐃᑌᔨᐦᑕᒥᐦᐄᑯᔦᒄ ᑖᓐ ᒉᒌ ᐃᔑ ᐐᒋᐦᐁᑯᒡ ᐊᓂᒌ ᑳ ᒦᑯᔦᒄ ᒉᒌ ᓈᓈᑲᒋᐦᐁᑯᒡ᙮ ᐊᓂᒌ ᑳ ᑖᐺᐦᑕᐦᒀᐤ ᒉ ᐃᐦᑎᑣᐤ 3 ᐁᑳᐐ ᐐ ᐃᔑᓈᑯᓯᒄ ᓈᔥᒡ ᒉᒌ ᐐ ᐅᒋᒫᐦᑲᐦᑐᐌᑯᒡ ᐊᓂᒌ ᑳ ᒦᑯᔦᒄ ᒉᒌ ᓃᑳᓂᔥᑯᐌᑯᒡ ᑌᔭᑯᒡ ᐅᔅᑌ ᐐ ᒥᔪᑑᑕᐙᐦᑯᒡ ᒉ ᐃᐦᑕᑯᓂᔨᒡ ᒫᒃ ᐊᓂᑦ ᒉᒌ ᐅᐦᒋ ᒋᔅᒋᓄᐙᐸᒥᑖᑯᒡ᙮ 4 ᐁᒄ ᒫᒃ ᐃᔅᑯᑕᒃ ᐯᒋ ᓅᑯᓯᑌ ᐊᓐ ᒫᐅᒡ ᑳ ᓃᑳᓀᔨᐦᑖᑯᓯᑦ ᒫᓂᔥᒑᓂᔓᐄᓅ ᒉ ᒦᑯᔦᒄ ᐊᓐ ᒫᐅᒡ ᐁ ᒋᔅᑌᔨᐦᑖᑯᐦᒡ ᑳᓂᔪᐎᓐ ᐊᓐ ᐁᑳ ᐐᔅᑲᒡ ᒉ ᐅᐦᒋ ᐹᓯᑯᓈᑯᐦᒡ᙮ 5 ᐁᒄ ᒫᒃ ᒋᔭᐙᐤ ᑳ ᐅᔅᒋᐱᒫᑎᓯᔦᒄ ᒋᐹ ᓇᓂᐦᐄᐦᑐᐙᐗᐅᒡ ᐊᓂᒌ ᑳ ᐐᒋᐦᐄᐌᑣᐤ ᐁ ᐱᒥᐸᔨᐦᑖᑲᓄᔨᒡ ᐊᔨᒥᐦᐁᐅᑲᒥᑯᔫ᙮ ᒥᓯᐌ ᒫᒃ ᐁ ᑕᔑᔦᒄ ᒋᐹ ᐊᑐᔥᑳᑐᓈᐙᐤ ᐁ ᑎᐱᐦᑌᔨᒥᑎᓱᔦᒄ ᐌᔥ ᐃᑕᔥᑌᔫ ᒋᔐᒪᓂᑑ ᐅᑕᔨᒧᐎᓐ, ᒋᔐᒪᓂᑑ ᓇᒧᐃ ᓇᐦᐋᐸᒣᐤ ᐊᓂᔫ ᒋᐦᒋᐌ ᑳ ᐃᑌᔨᒥᓱᔨᒡ, ᐁᒄ ᐊᓂᔫ ᑳ ᑎᐱᐦᑌᔨᒥᓱᔨᒡ ᒋᔐᐙᑐᑕᐌᐤ᙮ 6 ᑎᐱᐦᑌᔨᐦᑖᑯᐦᐄᓱᒄ ᒫᒃ ᐁ ᓇᓂᐦᐄᐦᑐᐌᒄ ᒋᔐᒪᓂᑑ ᐊᓐ ᑳ ᓲᐦᑳᑎᓰᑦ, ᐌᔥ ᒋᑲ ᐅᐦᐱᓂᑯᐙᐤ ᑖᓂᑦ ᐃᑌᔨᐦᑕᐦᑫ ᐎᔭ ᒉ ᐅᐦᐱᓂᑖᒄ᙮ 7 ᐎᔭ ᐸᒋᔥᑎᓇᒨ ᒥᓯᐌ ᑖᓐ ᐁ ᐃᔑ ᒧᑯᔥᑳᑎᔅᑳᑯᔨᓐ ᒉᒀᓐ ᐌᔥ ᐎᔭ ᒨᔥ ᒋᓇᓈᑲᑐᐌᔨᒧᒄ ᒥᓯᐌ ᑖᓐ ᐁ ᐃᔅᐸᔨᐦᐄᑯᑦ ᒉᒀᔫ ᒋᐱᒫᑎᓰᐎᓂᐦᒡ᙮ 8 ᒨᔥ ᔮᒀᒦᔥᑐᐙᐦᒄ ᒪᒋᒪᓂᑑ, ᐊᓐ ᒨᔥ ᑳ ᐐ ᓈᓂᑑ ᒪᒋᐸᔨᐦᐄᑯᔦᒄ, ᐌᔥ ᒧᔮᒻ ᒥᔅᑕᑎᒻ ᒨᔥ ᑳ ᐸᐹᒧᐦᑌᑦ ᐁ ᐸᐹᓀᒧᑦ ᐁ ᓈᓂᑑ ᒦᒋᓱᑦ ᐁᑯᓐ ᐁ ᐃᔑᓈᑯᓯᑦ᙮ ᒪᒋᒪᓂᑑ ᒨᔥ ᓈᓂᑑᐌᔨᒣᐤ ᐊᐌᔫ ᒉᒌ ᐗᓈᒋᐦᐋᑦ᙮ 9 ᓂᔥᑰᔥᑐᐙᐦᒄ ᒫᒃ ᒪᒋᒪᓂᑑ᙮ ᔮᐃᒋᑳᐴᒄ ᒋᑖᐺᐦᑕᒧᐎᓇᐙᒡ ᐃᔑ ᐌᔥ ᒋᒋᔅᒉᔨᐦᑌᓈᐙᐤ ᐊᓂᒌ ᒌᒋᔖᓄᐙᐅᒡ ᑳ ᑖᐺᐦᑕᐦᒀᐤ ᐁᑯᓐ ᑲᔦ ᐎᔭᐙᐤ ᐁ ᐃᔑ ᓇᒋᔥᑲᐦᒀᐤ ᓇᓀᐦᑳᒋᐦᐄᐌᐎᓂᔫ ᐅᑕᐦ ᐊᔅᒌᐦᒡ ᒧᔮᒻ ᑲᔦ ᒋᔭᐙᐤ ᑳ ᐃᔑ ᓇᒋᔥᑲᒣᒄ᙮ 10 ᐃᔅᑯᑕᒃ ᒫᒃ ᒌᔑ ᓇᓀᐦᑳᑌᔨᒧᔦᑴ ᒋᑲ ᐃᐦᑑᑖᑯᐙᐤ ᒋᔐᒪᓂᑑ ᒦᓐ ᒉᒌ ᐐᑳᐳᐌᒄ, ᒋᑲ ᒦᑯᐙᐤ ᒪᔅᑰᔒᐎᓂᔫ, ᒋᑲ ᔮᐃᒋᑳᐴᐦᐄᑯᐙᐤ, ᑲᔦ ᒋᑲ ᓴᑲᔅᒉᔨᒧᐦᐄᑯᐙᐤ᙮ ᒋᔐᒪᓂᑑ ᐊᓐ ᑳ ᐊᔮᑦ ᒥᓯᐌ ᔕᐌᔨᐦᒋᒉᐎᓂᔫ ᒋᐐᔖᒥᑯᓅ ᒉᒌ ᐐᒋᐦᐄᐌᔨᐦᒄ ᐊᓂᑌ ᑳᒋᒉ ᐅᒋᔅᑌᔨᐦᑖᑯᓱᐎᓂᐦᒡ ᙭ ᐁ ᐃᐦᑖᔨᒡ ᐅᐦᒋ᙮ 11 ᐎᔭ ᒫᒃ ᒋᔐᒪᓂᑑ ᑳᒋᒉ ᐊᔮᐤ ᒥᓯᐌ ᓲᐦᑳᑎᓰᐎᓂᔫ᙮ ᐊᒣᓐ᙮ ᑆᓪ ᒫᐦᒋᔥᑕᐃ ᑳ ᐃᔑ ᐗᒋᔦᒫᑦ ᐅᔫᐦ ᐐᒋᔖᓂᒫᐤᐦ 12 ᐃᐦᑖᐤ ᐯᔭᒄ ᓃᒋᔖᓐ ᐁ ᑖᐺᐅᒉᔨᐦᑖᑯᓯᑦ ᐁ ᐃᑌᔨᒪᒃ᙮ ᓴᐃᓚᔅ ᐃᔑᓂᐦᑳᓲ᙮ ᐁᐅᒄ ᐆ ᑳ ᐐᒋᐦᐄᑦ ᐅᔫ ᐊᐱᔒᔥ ᐁ ᒪᓯᓇᐦᐊᒫᑕᑯᒡ᙮ ᐆ ᒫᒃ ᑳ ᒪᓯᓇᐦᐊᒫᑕᑯᒡ ᒋᐐ ᓰᐦᒋᒥᑎᓈᐙᐤ ᒉᒌ ᔮᐃᒋᑳᐳᔦᒄ ᑲᔦ ᒋᐐ ᒉᔥᑎᓈᑌᔨᐦᑕᒥᐦᐄᑎᓈᐙᐤ ᐁᐅᒄ ᐅᔫ ᑖᐺ ᒋᔐᒪᓂᑑ ᐅᔕᐌᔨᐦᒋᒉᐎᓐ ᑳ ᐋᔨᒨᑕᒫᑖᐦᒡ᙮ ᐁᑯᑦ ᒫᒃ ᐊᓂᑦ ᐅᔕᐌᔨᐦᒋᒉᐎᓂᐦᒡ ᐃᔑ ᔮᐃᒋᑳᐳᐙᐦᒄ᙮ 13 ᒋᐙᒋᔦᒥᑯᐙᐅᒡ ᐊᓂᒌ ᑲᔦ ᐎᔭᐙᐤ ᑳ ᐎᔮᐸᒥᑯᑣᐤ ᒋᔐᒪᓂᑑ ᐊᓂᑌ ᐹᐱᓨᓐ ᑳ ᐃᐦᑖᑣᐤ᙮ ᑲᔦ ᒫᕐᒃ ᓂᑯᔅ ᑳ ᐃᑌᔨᒪᒃ ᒋᐙᒋᔦᒥᑯᐙᐤ᙮ 14 ᐙᒋᔦᒥᑐᒄ ᐁ ᓅᑯᐦᑣᑐᔦᒄ ᐁ ᓵᒋᐦᐄᑐᔦᒄ᙮ ᒋᔮᒣᔨᐦᑕᒧᐎᓐ ᒋᑲ ᐐ ᐊᔮᓈᐙᐤ ᒥᓯᐌ ᒋᔭᐙᐤ ᙭ ᑳ ᑎᐯᔨᒥᑖᒄ᙮ |
© Wycliffe Bible Translators, Inc. and Canadian Bible Society, 2001.
Wycliffe Bible Translators, Inc.