JABUR 58 - Kitab Sutji

MASMUR 58 Tumrap panggedhe kang ambeksiya 58:1-12

¹ Kanggo lurah pasindhen. Lagune kaya kidung: Aja ngrusak. Miktam anggitane Prabu Dawud.

² He para kang nyekel pangwasa, apa pancasanmu iku adil temenan? Anggonmu ngakimi marang para anaking manungsa iku apa jujur?

³ Malah cocog karo karepmu kowe nglakoni piala, tanganmu nindakake kekerasan ana ing bumi.

⁴ Wong duraka padha murtad wiwit lair mula, para juru apus iku padha nasar wiwit ana ing wetenganing biyung.

⁵ Wisane kaya wisane ula, padha kaya ula bedhudhak kang budheg, kang nutupi kupinge,

⁶ kang ora ngrungokake marang swarane para tukang njapani, utawa swarane tukang maca mantra kang wasis.

⁷ Dhuh Allah, Paduka mugi karsaa ngrampali untuning cangkemipun, saha karsaa motholi siyungipun singa anem. (Selah)

⁸ Sami sirnaa kados toya ingkang mili lajeng telas, kajengipun sami alum kados rumput ing margi.

⁹ Kajengipun sami sirna kados bekicot ingkang dados ilu, sami kadosa bayining tiyang estri ingkang lair keluron ingkang boten ningali surya.

¹⁰ Sadurunge kwali-kwalimu kena panasing eri, kabeh kang isih seger dalasan kang wus geseng padha kabengkas dening Pangeran.

¹¹ Wong mursid bakal padha bungah-bungah marga nyumurupi piwales, sarta bakal ngwisuhi sikile kalawan getihe wong duraka.

¹² Lan wong bakal padha ngucap: “Wong mursid iku nyata tampa pituwas, satemene ana Allah kang maringi kaadilan ana ing bumi.”