JABUR 47 - Kitab Sutji

MASMUR 47 Gusti Allah, Ratuning salumahing bumi 47:1-10

¹ Kanggo lurah pasindhen. Saka bani Korakh. Masmur.

² He para bangsa kabeh, padha keplok-keploka, padha methuka Gusti Allah kalawan surak-surak!

³ Awit Pangeran Yehuwah Kang Mahaluhur iku nggegirisi, sarta jumeneng Ratu Agung ana ing salumahing bumi.

⁴ Para bangsa padha ditelukake marang kita, sarta para suku bangsa padha disorake ana ing tlapakan kita.

⁵ Kita padha kapilihake tanah-pusaka kita, kang digung-gungake dening Rama Yakub, kekasihe. (Selah)

⁶ Gusti Allah wus sumengka ingiring ing surak rame, iya Sang Yehuwah iku sumengka kalawan kairing ing swaraning kalasangka.

⁷ Gusti Allah padha saosana kekidungan masmur, padha saosana kekidungan masmur. padha ngidunga masmur kagem ratu kita, padha ngidunga masmur!

⁸ Amarga Gusti Allah iku Ratu ing salumahing bumi, padha ngidunga masmur, kidung piwulang!

⁹ Gusti Allah iku ngratoni para bangsa, sarta lenggah ing dhampare kang suci.

¹⁰ Para panggedhening bangsa-bangsa padha ngumpul, kang padha dadi umate Allahe Rama Abraham. Sabab tameng-tamenging bumi iku kagungane Gusti Allah, Panjenengane iku banget anggone kaluhurake.